¿Liwana namaklakaskinaw kinkilhtamakujkan?
Akxni natalakapastaka akxni tinilh Cristo: tlan nalimasiyayaw pi paxtikatsiniyaw
1. ¿Tuku tlan natlawayaw akxni natalakapastaka akxni tinilh Cristo?
1 Kilhtamaku 14 xla abril akxni natalakapastaka akxni tinilh Cristo tlan nalimasiyayaw paxtikatsinit xlakata tuku tlawanit Jehová. Libro xla Lucas 17:11-18 lichuwinan la akxilha Jehová chu Jesús xlakata mastakan paxtikatsinit. ¡Lu nitlan pi kaj chatum tiku xkgalhi lepra taspitli chu maxkilh paxtikatsinit Jesús, maski kgalhakaw tiku xkamakuchikanit! Kilhtamaku nema aku mima, xtamakamastan Jesús namasputu tuku nitlan, chu nakgalhiyaw latamat nema ni kgalhi xlisputni. Chali chali napaxtikatsiniyaw Jehová xlakata tasikulunalin nema nakinkamaxkiyan. Pero ¿la napaxtikatsiniyaw semanas nema aku mima?
2. ¿Tuku kilitlawatkan xlakata napaxtikatsiniyaw xtamakamastan Jesús?
2 Kalimasiyaw paxtikatsinit. Akxni paxtikatsininanaw kkintalakapastaknikan minacha. Xlakata tlakg napaxtikatsiniyaw xtamakamastan Cristo kgalhiyaw programa nema takilhtinit kBiblia, xlakata nalikgalhtawakgayaw akxni natalakapastaka akxni tinilh Cristo, la calendario chu Texto nema Nalikgalhtawakgayaw chali chali. ¿Tlan akxtum xkatalikgalhtawakga mifamilia? Komo chuna natlawayaw tlakg napaxtikatsiniyaw xtamakamastan Jesús, chu nakinkamakgtayayan kkintayatkan (2 Cor. 5:14, 15; 1 Juan 4:11).
3. ¿La nalimasiyayaw paxtikatsinit akxni natalakapastaka akxni tinilh Cristo?
3 Kalimasiyaw paxtikatsinit. Tuku tlawayaw, litasiya pi paxtikatsiniyaw (Col. 3:15). Leproso tiku taspitli putsalh Jesús xlakata napaxtikatsini. Max xatapaxuwan kalitachuwinalh amakgapitsin pi xmapaksakanit (Luc. 6:45). Xlakata paxtikatsiniyaw, ¿liwana naliskujaw kʼcampaña akxni natalakapastaka akxni tinilh Cristo? Atanu tuku nalimasiyayaw pi paxtikatsiniyaw, naliskujaw precursores auxiliares o tlakg nalimaxtuyaw kilhtamaku xlakata nalichuwinanaw Dios. Chu uma katsisni, xlakata paxtikatsiniyaw talakgmaxtut nakinkamakgtayayan tlan nakamakgamakglhtinanaw tiku naʼankgo, chu nakakgalhtiyaw xtakgalhskininkan.
4. ¿Tuku tlan natlawayaw akxni natalakapastaka akxni tinilh Cristo xlakata tlan nalimakgkatsiyaw?
4 ¿Xaʼawatiya uma kata nalakapastakaw Cristo? (1 Cor. 11:26.) Ni katsiyaw. Pero liwana katsiyaw pi akxni natitaxtu uma kilhtamaku nialhla katilimasiyaw pi paxtikatsiniyaw. ¿Chuna natlawayaw? Wantuku nawanaw nema limasiya tapaxtikatsinit chu tuku nalakpuwanaw tlan kaʼakxilhli Jehová, Tiku kinkamaxkin talakgmaxtut (Sal. 19:14).