¿Tlan xʼaw lichuwinanaw Dios kakgotanun?
1. Chuna la wan akgtum tatsokgni, ¿tuku hora xʼan Pablo lichuwinan Dios kʼakgatunu chiki?
1 Kʼakgtum tatsokgni wan pi Pablo xʼan lichuwinan Dios kʼakgatunu chiki, «kamakgtati kakgotanun xmatsuki chu katsisnita xmakgalhsputu» (Daily Life in Bible Times). Maski nila wanaw pi wa uma hora xlichuwinan Dios, katsiyaw pi xla putum xtlawa tuku xtalakaskin «xpalakata xatlan tamakatsinin» (1 Cor. 9:19-23). Xlikana pi xtalakaskin nalakkaxwili tuku xtlawa xlakata tlan xʼalh kʼakgatunu chiki akxni tlakg xkgaxmatnika.
2. ¿Tuku xlakata tlakg tlan natalichuwinan Dios kakgotanun?
2 Klakalhuwa niku talismaninit kaj lakatsisa talichuwinan Dios kʼakgatunu semana kʼakgatunu chiki. ¿Pero wa uma hora tlakg nakatekgsaw latamanin? Chatum precursor wa: «Kakuwani ni lu kkatekgsaw latamanin, pero katsisni tlakg kkatekgsaw». Katsisni tlakg nialhtu tlawamakgolh latamanin chu tlakg nakgaxmatkgo. Na tlakg nakatekgsaw lakchixkuwin xlakata nakalitachuwinanaw Dios. Wa lakgkgolotsin nalakkaxwilikgo tuku hora natalichuwinan Dios kakgotanun.
3. ¿La limasiyayaw pi kuenta tlawayaw akxni lichuwinanaw Dios katsisni?
3 Kuentaj katlawaw akxni naʼanaw lichuwinaw Dios. Akxni nalichuwinanaw Dios katsisni ni xafuerza nakatachuwinamputunaw tiku max wayamakgolh, nakawaniyaw pi alistalh naminaw. Komo kapukswa, anta katayaw niku tlan nakinkaʼakxilhan tiku kalakgamaw, tunkun kakawaniw tuku xlakata kalakgamaw. Tlakg tlan komo lichatiyun naʼankan lichuwinankan Dios, o anta niku lakatsu lamakgolh natalan chu niku lhuwa makgskgot anan chu niku lhuwa lamaka. Na nitlan komo lu tsiswanita nachuwinanaw kʼakgtum chiki, max latamanin lhtataputunkgoya nawan (2 Cor. 6:3). Tlakg tlan nalichuwinankan Dios akxni nina tsiswan niku kalipekua (Prov. 22:3).
4. ¿Tuku tlan kitaxtu akxni lichuwinanaw Dios kakgotanun?
4 Tuku tlan kitaxtu. Tlakg lipaxuwayaw akxni katekgsaw tiku nakatachuwinanaw. Komo tlakg lhuwa tiku tlan nakatachuwinanaw, tlakg lhuwa latamanin nakatsikgo tuku xaxlikana chu tlan nalakgtaxtukgo (1 Tim. 2:3, 4). ¿Tlan xlakkaxwiliw kinkilhtamakujkan xlakata tlan xʼaw lichuwinanaw Dios?