Kakamakgtayaw latamanin nakgalhakgaxmatkgo Dios
1. ¿Tukuya folletos mastaka ktamakxtumit «Kamilh mintamapakgsin», chu tuku xlakata lu makgtayanan?
1 Ktamakxtumit xaʼakgtutu kilhtamaku «Kamilh mintamapakgsin», masta maktiy xasasti folleto: Kakgalhakgaxpatti Dios chu nalatapaya putum kilhtamaku chu xlimaktiy nema ni xatuwa, Kakgalhakgaxpatti Dios. Xlakata ni lhuwa letra limin, tlakg ni tuwa matitaxtikan kʼatanu tachuwin. Akxni mastaka ktamakxtumit folleto Kakgalhakgaxpatti Dios chu nalatapaya putum kilhtamaku, xmastakanita talakaskin pi xtamatitaxtilh k431 tachuwin.
2. ¿Tiku nakamakgtaya umakgolh folletos?
2 ¿Tiku nalitamakgtayakgo umakgolh folletos? Kaʼakxilhwi tuku titaxtukgo makgapitsi xlikalanka katiyatni:
• Chatum tiku lichuwinan Dios, maski xlimakgtumku tachuwinama o xlimakgtiy, akxilha pi ni katsini kgalhtawakga o nila liwana kgalhtawakga.
• Chatum lichuwinan Dios kʼakgtum kkachikin niku ni anan likgalhtawakga kxtachuwinkan o ni lhuwa anan. Na max lhuwa latamanin ni katsinikgo kgalhtawakgakgo kxtachuwinkan.
• Tiku lichuwinan Dios tachuwinan chatum tiku ni kgaxmata chu maklakaskin klenguaje de señas.
• Chatum tlat masiyaniputun xaxlikana aktsu xkgawasa tiku nina katsini kgalhtawakga.
3. ¿Tuku limin folleto Kakgalhakgaxpatti Dios?
3 Wantuku limin folletos. Folleto Kakgalhakgaxpatti Dios ni lhuwa letra limin. Niku kgalhsputa akgatunu página wi akgtum oración nema ni tuwa chu akgtum texto nema lichuwinan tuku tlakg xlakaskinka. ¿Tuku xlakata? Kalakpuwaw pi wi tiku nakinkamaxkiyan folleto kʼatanu tachuwin chu lhuwa tuku limin nema ni katsiyaw tuku wamputun. ¿Xmakgtayan maski lu lakglilakgatit dibujo xkgalhilh? Ni xmakgtayan. Nachuna, likgalhtawakga nema lhuwa letra limin ni kamakgtaya tiku nila kgalhtawakgakgo. Wa xlakata, uma folleto lhuwa dibujos limin chu liwana tlawakanit. Chu xlakata tlakg liwana naʼakgatekgsaw akgatunu lección, wi tuku kinkamakgtayayan xlakata nakatsiyaw tukuya dibujo stalatilha.
4. Kawanti tuku limin folleto Kakgalhakgaxpatti Dios chu nalatapaya putum kilhtamaku.
4 Folleto Kakgalhakgaxpatti Dios chu nalatapaya putum kilhtamaku, na limin dibujos chuna la folleto Kakgalhakgaxpatti Dios. Uma folleto tlawaka xlakata nakamakgtaya tiku nila kgalhtawakgakgo o tiku aku katsinimakgolh. Komo limakgalhtawakgenamaw folleto Kakgalhakgaxpatti Dios tlan na namaklakaskinaw folleto Kakgalhakgaxpatti Dios chu nalatapaya putum kilhtamaku. Akgatunu lección kgalhi akgtiy página. Niku litsuku akgatunu lección, wi akgtum takgalhskinin nema takgalhtinan anta. Xadibujo kgalhi makgapitsi tachuwin chu textos. Xatutsu wi recuadro nema lichuwinan tuku wan lección chu textos nema tlan natalikgalhtawakgakan tiku makgalhtawakgemaka, pero liwana naʼakxilhaw komo tlan tlakg namasiyaniyaw.
5. ¿Tukuya kilhtamaku chu la namastayaw folletos?
5 La namaklakaskinaw. Tlan namastayaw akxni naʼanaw lichuwinanaw Dios akgatunu chiki, maski ni wa lakgchan natamasta kʼuma papaʼ (kaʼakxilhti recuadro «La namastayaw»). Akxni wi tiku nalakgamparayaw, tlan nawaniyaw pi wi tuku maxkiputunaw chu namaxkiyaw folleto.
6. ¿La tlan nalimakgalhtawakgenanaw umakgolh folletos?
6 Xlakata folleto Kakgalhakgaxpatti Dios ni kgalhi takgalhskinin, akxni nalimakgalhtawakgenanaw ni chuna natlawayaw la akxni maklakaskinaw libro ¿Tuku xlikana masiyay Biblia? Lhuwa latamanin lakgatikgo akxni wi tuku kalitachuwinankan. Wa xlakata kamaklakaskinti dibujos xlakata nakalitachuwinana tuku wan xTachuwin Dios. Kawani tuku wamputun akgatunu dibujos. Lipaxuw kawani chu na kamaxki talakaskin nachuwinan. Kalikgalhtawakga textos nema wi xkgalhsputat página chu kalitakgalhchuwinanti. Kakgalhskinti xlakata na nakgalhtiyan chu kaʼakxilhti komo akgatekgstilhama. Komo tiku masiyanipat maklakaskin folleto Kakgalhakgaxpatti Dios chu nalatapaya putum kilhtamaku, katalikgalhtawakga tuku tatsokgnit kʼakgatunu dibujo chu textos.
7. ¿La nakamakgtayayaw tiku kamakgalhtawakgemaw xlakata natatliwakglha xtakanajlakan?
7 Kakamakgtayaw tiku makgalhtawakgamaw nastaka xtakanajlakan. Akxni makgalhtawakgeyaw, namakgtaya xlakata nalakgapasputun letra chu chuna tlakg nakatsini xlakata Jehová (Mat. 5:3; Juan 17:3). Wa xlakata, komo likgalhtawakgapatit folleto Kakgalhakgaxpatti Dios, alistalh tlan namakgtayaya xlakata nakatsini kgalhtawakga chu natsuku maklakaskin folleto Kakgalhakgaxpatti Dios chu nalatapaya putum kilhtamaku. Maski nalikgalhtawakgayatit umakgolh folletos, nina makgatsi tuku talakaskin xlakata natamunu. Wa xlakata, talakaskin nalikgalhtawakga libro ¿Tuku xlikana masiyay Biblia? o atanu likgalhtawakga nema tlakg namakgtaya naʼakgatekgsa xTachuwin Dios.
8. ¿Tuku xlakata kilipaxtikatsinitkan xlakata kgalhiyaw umakgolh xalaksasti folleto?
8 Komo latamanin latamaputunkgo putum kilhtamaku, xlikgalhakgaxmatnitkan tiku lakgchan namapakgsinan xlikalanka kakilhtamaku (Isa. 55:3). Jehová lakaskin pi «paks» asta tiku nila kgalhtawakgakgo kakatsinikgolh nakgalhakgaxmatkgo (1 Tim. 2:3, 4). ¡Lu paxtikatsiniyaw Jehová pi kgalhiyaw umakgolh xalaksasti likgalhtawakga xlakata nakamasiyaniyaw latamanin nakgalhakgaxmatkgo Dios!
[Recuadro xla página 3]
La namastayaw
Kamasiyani página 2 chu 3 chu kakgalhskinti: «¿Latapaputuna chuna la tasiya kʼuma dibujo? [Kamaxki talakaskin nakgalhtinan.] Biblia [o uma libro xasanto] wan pi nialh makgas Dios xakalipaxaw natlawa Katiyatni niku ni katiʼanalh taʼakglhuwit, ni katiʼanalh tiku nitu nakgalhi, nipara tajatat. Kaʼakxilhti tuku kilitlawatkan xlakata tlan nalatamayaw anta. [Kalikgalhtawakga oración tuku wi xatalhman kpágina 3 chu nema lichuwinan Isaías 55:3.] Unu wan pi kilikgalhakgaxmatatkan Dios. Pero ¿la kgalhakgaxmataw?». Kaputsa página 4 chu 5, chu akxtum kaputsatit xtakgalhtin. Komo ni limakgwani, kamakgxtakgni folleto chu kawani pi nalakgpimparaya atanu kilhtamaku xlakata nalikgalhtawakgayatit.