Niku Mastakan Xtakgalhtin Akgtum Takgalhskinin

◼ ¿Tiku tlan naskin likgalhtawakga o nalakgapaxialhnankan chu namalakgatsama akgtum cupón o akgtum solicitud ksitio xla Internet?

Lhuwa likgalhtawakga nema limaklakaskinaw kgalhikgo cupón xlakata tlan naskinkan likgalhtawakga o naskinkan pi chatum xtatayana Jehová nalakgapaxialhnan. Nachuna, ksitio xla Internet www.watchtower.org tlan skinkan akgtum takgalhtawakga xalak Biblia. Xlakata uma, lhuwa latamanin katsinikgonit xaxlikana. Pero, akxni tiku xtatayana Jehová malakgacha uma solicitud xtukuwani chatum xʼamigo o chatum xfamilia, max naʼanan taʼakglhuwit.

Akgtum liʼakxilhtit, akxni makglhtinankgo likgalhtawakga nema kamalakgachani Betel chu nitu skinkgonit, makgapitsi wankgo pi xtatayananin Jehová lu kamakglhuwikgo latamanin chu wankgo pi xdireccióneskan wi kʼakgtum lista xla correo. Nachuna, akxni makgapitsi natalan lakgapaxialhnankgo uma latamanin nitlan makgkatsikgo akxni akxilhkgo pi lu sitsikgo latamanin xlakata xlakan nitu skinkgonit nakalakgapaxialhnankan. Wa xlakata, ni para chatum tiku lichuwinan Dios namalakgatsama uma cupones o solicitudes nema wilakgo ksitio xla Internet xtukuwani achatum; wa namalakgatsama tiku nalakaskin nalakgapaxialhnankan. Betel ni tlawa pi nalakgapaxialhnanka chatum lataman komo liwana tasiya pi ni wa malakgatsamalh uma solicitud.

Pero ¿tuku tlan natlawaya xlakata namakgtayaya chatum xalak mifamilia o tiku lakgapasa xlakata nakatsini tuku xaxlikana? Komo lakaskina namakgamakglhtinan maktum likgalhtawakga, ¿tuku xlakata ni malakgachaniya la akgtum tamaskiwin? Komo tasiya pi katsiputun tuku xaxlikana chu lakaskin pi chatum xTatayana Jehová nalakgapaxialhnan, kakatachuwinanti lakgkgolotsin xalak congregación niku xla wi. Pero komo nila chuna natlawaya kamalakgatsama formulario Sírvase visitar (S-43-S) chu kamaxki secretario xla mincongregación, tiku naʼakxilha komo tlan talakgatsamanit chu namalakgacha kBetel. Pero, ni kapalakatsokgnanti kBetel xtukuwani tiku tanuma kpulachin, o akgtum hospital. Tlakg tlan nawan komo nawaniya pi wa kakatachuwinalh natalan tiku lakgapaxialhnankgo uma institución o xla katsokgnalh kBetel.