Liwana kalimaklakaskiw kinkilhtamakujkan akxni lichuwinanaw Dios
Xtatayananin Jehová 1,945,487,604 horas lichuwinaw Dios kkata 2014, uma litasiya pi liwana lakapastaknitaw pi naskujniyaw Jehová (Sal. 110:3; 1 Cor. 15:58). Xlakata «nkilhtamaku nkaj atsinu wi», ¿tlan tlakg lhuwa latamanin xkatachuwinaw akxni lichuwinanaw Dios? (1 Cor. 7:29.)
Xlakata liwana namaklakaskinaw kinkilhtamakujkan akxni nalichuwinanaw Dios, talakaskin nalakgpaliyaw la natlawayaw. Akgtum liʼakxilhtit, komo wix limaxtuya akgtum o akglhuwa horas xlakata nalichuwinana Dios chu nipara chatum tachuwinana, ¿tlan xlakkaxwili xlakata xkatekgsti chu xkatachuwinanti tlakg lhuwa latamanin? Maski talakgpalitilha kʼakgatunu kachikin, umakgolh tastakyaw namakgtayayan xlakata tlakg liwana namaklakaskinaw kinkilhtamakujkan xlakata ni kaj namakgatsankgayaw kinkilhtamakujkan (1 Cor. 9:26).
Lichuwinankan Dios kʼakgatunu chiki. Akglhuwata kata, xtatayananin Jehová lismanikgonit namatsukikgo lichuwinankgo Dios kʼakgatunu chiki. Pero, lhuwa latamanin skujkgo kakuwani, ¿tuku xlakata ni lichuwinanaw Dios kʼakgatunu chiki kakgotanun o akxni tsiswamaja? Uma hora, akxni latamanin wilakgolh kxchikkan chu nitu lilakgaputsamakgo. Nachuna, tlan kitaxtu tsisa lichuwinankan Dios ktiji chu niku stanankan.
Niku lhuwa titaxtukgo latamanin. Nawilikan mesas chu niku wilikan likgalhtawakga anta niku lhuwa latamanin titaxtukgo, anta niku lakgchan nalichuwinankgo Dios congregación (kaʼakxilhti La Natlawayaw xTaskujut Dios xla julio kata 2013, página 5). Komo nialh lhuwa latamanin natitaxtukgo niku lichuwinankgo Dios, Comité de Servicio xalak congregación tlan nalaksaka pi alakatanu niku nawilikan mesa chu niku wilikan likgalhtawakga tlan nawilikan alakatanu niku lhuwa titaxtukgo latamanin.
Revisitas chu takgalhtawakga xalak Biblia. Wi hora akxni ni lu tlan kinkakitaxtuniyan xlakata la lichuwinanaw Dios. ¿Tlan tlawayaw revisitas chu namakgalhtawakgenanaw umakgolh hora? Akgtum liʼakxilhtit, komo sábado tsisa tlan kitaxtu akxni lichuwinankan Dios akgatunu chiki, ¿tlan namakgalhtawakgenanaw kakgotanun o katsisni? Komo kputlaw anaw akxni tlawayaw revisitas, tlakg tlan xwa ni lhuwa tiku nakalinaw kʼakgatunu putlaw xlakata tlakg lhuwa nalichuwinanaw Dios.
Maski xlikana pi tlan naputlakgayaw kinkilhtamakujkan la limaxtuw nalichuwinanaw Dios, tlakg napaxuwayaw akxni tlan kinkakitaxtuniyan. Komo naʼakxilhaw pi uma hora akxni lichuwinamaw Dios nitlan kitaxtu, kalitsakgsaparaw atanu. Katlawaniw oración Jehová, «xMalana tachanan», xlakata nakinkamakgtayayan liwana namaklakaskinaw kinkilhtamakujkan akxni lichuwinanaw Dios (Mat. 9:38).