Kapaxuwaw akxni natalakapastaka akxni tinilh Cristo
1. ¿La tlan tlakg napaxuwaya akxni natalakapastaka akxni tinilh Cristo?
1 ¿Tlakg paxuwaputuna marzo, abril chu mayo? Tlakg napaxuwaya komo tlakg nalichuwinana Dios o precursor auxiliar nawana. ¿Tuku xlakata tlakg namakgapaxuwayan?
2. ¿Tuku xlakata tlakg paxuwayaw akxni tlakg lichuwinanaw Dios?
2 Tlakg kapaxuwa. Jehová tlawalh pi tlan namakgkatsiyaw chu nalipaxuwayaw akxni nakakninaniyaw (Mat. 5:3). Na kinkatlawan pi nalipaxuwayaw akxni nakamakgtayayaw amakgapitsin (Hech. 20:35). Akxni lichuwinanaw Dios pulaktiy tuku makgantaxtiyaw: kakninaniyaw Dios chu kamakgtayayaw amakgapitsin. Wa xlakata, akxni tlakg lichuwinanaw Dios tlakg paxuwayaw. Nachuna, akxni tlakg lichuwinanaw Dios, tlakg katsiniyaw masiyayaw, chu uma tlawa pi nialh lu napekuanaw. Nachuna, tlakg kinkamaxkiyan talakaskin nalichuwinanaw Dios chu namatsukiyaw takgalhtawakga. Putum uma tlawa pi tlakg nalipaxuwayaw akxni lichuwinanaw Dios.
3. ¿Tuku xlakata marzo chu abril lu tlan nawan xlakata natlawakan precursorado auxiliar?
3 Marzo chu abril lu tlan nawan xlakata natlawayaw precursorado auxiliar, tlan nalaksakaw komo puxamakaw o tipuxamakaw hora natlawayaw. Nachuna, ama kilhtamaku nakamaxkiyaw invitación latamanin xlakata nakinkatatamakxtumikgoyan akxni natalakapastaka akxni tinilh Cristo. Uma nalitsuku sábado 22 xla marzo chu nasputa lunes 14 xla abril, akxni nalakapastakaw akxni tinilh Cristo. Congregaciones lu lhuwa nakgalhikgo taskujut, lhuwa tiku lichuwinankgo Dios “makxtum naskujkgo” xlakata tlakg lhuwa latamanin nakamakatsinikan asta akxni nasputa ama kilhtamaku (Sof. 3:9).
4. ¿Tuku militlawat komo precursor auxiliar wamputuna?
4 Kalakkaxwilita minkilhtamaku. Komo nina lakkaxwiliya, kaʼakxilhti mi horario chu kaʼakxilhti tuku tlan nalakgpaliya xlakata tlakg nalichuwinana Dios akgtum o akglhuwa papaʼ. Katlawani oración Jehová (Sant. 1:5). Kakalitachuwinanti mifamilia chu natalan xalak congregación (Prov. 15:22). Maski wix tatatlaya o tantaku skuja, na tlan nalipaxuwaya xlakata precursor auxiliar nawana.
5. La nakinkakitaxtuniyan komo tlakg nalichuwinanaw Dios akxni natalakapastaka akxni tinilh Cristo?
5 Jehová lakaskin pi tiku skujnanikgo kapaxuwakgolh (Sal. 32:11). Komo naliskujaw xlakata tlakg nalichuwinanaw Dios akxni natalakapastaka akxni tinilh Cristo, ni kajwatiya tlakg napaxuwayaw, na namakgapaxuwayaw kinTlatkan xalak akgapun (Prov. 23:24; 27:11).