¿Lakkaxwilipat xlakata tlan napina akxni natalakapastaka akxni tinilh Cristo?

Xaʼawatiya Pascua nema xʼama tlawa Jesús lu xlakaskinka xʼama wan. Xlakata nialh makgas xʼama niy, katatlawaputulh xʼapóstoles uma Pascua chu kalimapakgsilh pi lata uma kilhtamaku xtlawakgolh xTaway Malana. Wa xlakata kawanilh Pedro chu Juan pi xkakaxwilikgolh niku xtlawakgolh (Lu 22:7-13; kaʼakxilhti anta kxmakni). Uma kinkamalakaspastakayan pi lu xlakaskinka nalakkaxwiliyaw tuku talakaskin xlakata naʼanaw akxni natalakapastaka akxni tinilh Cristo nema natatlawa 27 xla marzo. Congregaciones laksakkgonita nawan tiku naʼakgchuwinan, lakkaxwilikgonita nawan xlakata kaxtalanchu chu vino, chu atanu. Pero ¿tuku tlan natlawayaw chatunu akinin xlakata tlan anta natawilayaw?

Kalakkaxwiliw kinakujkan. Kalilakpuwaw tuku likgalhtawakgakan kBiblia akxni talakapastaka akxni tinilh Cristo. Natekgsaw akgtum programa anta kfolleto Nalikgalhtawakgayaw chali chali. Anan akgtum xatakgatsin programa anta kʼapéndice B12-A chu kʼapéndice B12-B xla La Biblia. Traducción del Nuevo Mundo chu klikgalhtawakga Tuku natalikgalhtawakga xla abril kata 2020. Komo wix chu mifamilia lakputsananiputunatit la xlilakaskinka lakgtaxtut, tlakg lhuwa tuku natekgsa kʼÍndice de las publicaciones Watch Tower chu kLiputsan xla xtatayananin Jehová.

Kakawani amakgapitsin. Kamakgtayanaw akxni namaʼakgpitsikan invitación xlakata akxni natalakapastaka akxni tinilh Cristo. ¿Tiku tlan nakawaniyaw? Tiku kalakgapaxialhnanaw xlakata nakalitachuwinanaw Biblia, tiku xkamakgalhtawakgeyaw makgasa, chu tiku xalak kifamiliajkan chu tiku kalakgapasaw. Lakgkgolotsin xkaliwanitkan tiku tamakgatlinikgonit Jehová pi kaʼankgolh uma kilhtamaku. Kalakapastakwi pi komo wi tiku ni anta wi niku natlawakan uma tamakxtumit, tlan natekgsaw anta kjw.org hora chu niku natlawakan akxni natalakapastaka akxni tinilh Cristo laktsu niku xla lama. Kapit niku wan XLAKATA AKININ chu alistalh kapit niku wan «Akxni lakapastakkan akxni tinilh Cristo».

¿Tuku atanu tlan natlawaya xlakata akxni nalakgchan uma kilhtamaku?