Tayat nema maxki kakni Dios

1. ¿Tuku xlakata putum latamanin kinkaukxilhkgoyan akxni anaw klaklanka tamakxtumit?

¹ Akxni anaw klaklanka kintamakxtumitkan, putum latamanin kinkaukxilhkgoyan. Klakalhuwa laklanka kachikinin, tiku mastakgo noticias lichuwinankgo pi anta tatakgsaw kxkachikinkan. Hoteles chu restaurantes litatsamakgo xtatayananin Jehová, chu ktiji lhuwa natalan tasiyakgo xlakata wilikgonit xgafetekan. Uku nalichuwinanaw tuku kililakapastakatkan natlawayaw anta kkachikin niku nala tamakxtumit xlakata nakgalhiyaw tayat nema maxki kakni Dios (1 Ped. 2:12).

2. ¿La namaxki kakni Dios komo tlan nalhakgananaw kkachikin niku nakgalhiyaw kintamakxtumitkan?

² Tlan talhakgan. Tlan kililhakganatkan akxni tatakgsaw kxalanka tamakxtumit. Pero makgapitsin, na akxilhkgo la lhakgananaw akxni ni ktamakxtumit tatakgsaw, la akxni chanaw khotel, akxni anaw wayanaw o akxni anaw tamawananaw. Maski ni chuna nalhakgananaw la akxni anaw kkintamakxtumitkan, talakaskin tlan talhakgan nawiliyaw. Tiku nakinkaʼakxilhkgoyan xlikatsitkan pi ni xtalakxtum akinin amakgapitsin latamanin (Rom. 12:2). Nachuna kaliw kigafetekan nema kinkalilakgapaskanan, chuna latamanin nakatsikgo pi wi tamakxtumit, chu tlan nalichuwinanaw Dios nachuna tlan nakinkalakgapaskgoyan kinatalankan.

3. ¿La nalimasiyayaw pi kgalhkgalhinanaw chu tlan likatsiyaw?

³ Kgalhkgalhinankan chu tlan likatsikan. La uku, lhuwa latamanin xakstu kapaxkikan chu ni mastakgo paxtikatsinit. Wa xlakata, komo tlan nalikatsinikgoyaw latamanin uma lu tlan nalimakgkatsikgo, tlan nakalikatsiniyaw tiku skujmakgolh khoteles chu krestaurantes (2 Tim. 3:1-5). Nachuna ni lhuwa laktawilh namakgataxtiyaw chu ni lhuwa xasasti likgalhtawakga namakglhtinanaw chuna nalimasiyayaw pi kapaxkiyaw kinatalankan (1 Cor. 10:23, 24). Akxni xapulana kilalh klanka tamakxtumit, chatum chixku wa: «Ni akgtum taʼakgchuwin klakapastaka nema tamatitaxtilh, pero xtayatkan xtatayananin Jehová putum kilhtamaku naklakapastaka».

4. ¿Tuku xlakata tlan nalakpuwanaw namakgtayananaw klaklanka tamakxtumit?

⁴ Xatapaxuwan katlawaw. Xaxlikana kstalaninanin Cristo litalakgapaskgo xlakata putum kilhtamaku makgtayanankgo (Sal. 110:3). ¿Tlan xmakgtayananti? Kʼakgtum tamakxtumit, max 600 natalan makgtayanankgolh xlakata xkakaxtlawaka. Tiku mapakgsikgo niku tlawaka tamakxtumit wankgolh: «Uma nikxni xakʼakxilhaw. Nila kkanajlayaw pi putum kaj xatapaxuwan skujkgo». Lu xlikana pi kgalhkgalhimaw lanka tamakxtumit xa akgtutu kilhtamaku kata 2013, anta ni kajwatiya tlan nakgaxmataw chu na katsiniyaw, nachuna tlan namaxkiyaw kakni kiMakgalhtawakganakan, Jehová.

[Recuadro xla páginas 3-6]

Tuku kililakapastakatkan xlakata tamakxtumit xaʼakgtutu kilhtamaku kata 2013

◼ Hora akxni natsuku chu nakgalhsputa tamakxtumit. Kamakgtsayan namalakkikan. Tamakxtumit xaʼakgtutu kilhtamaku nalitsuku tatlakgni 9:20. Akxni nawankan pi natsuku tatlakgni nema nalimatsukikan tamakxtumit naʼanaw tawilayaw xlakata natsuku chuna la xlilat. Viernes chu sábado 4:50 nakgalhsputa tamakxtumit chu domingo nakgalhsputa 3:35.

◼ Niku kawilikan putlaw. Ni kintikamaxokgekan niku nawiliyaw putlaw komo anta tapakgsi niku tamakxtumimaw chu chuna la nachintilhakgo putlaw nakakaxwilikan. Xlakata ni anan lhuwa niku nakawilikan putlaw, tlakg tlan xwa kaj akgtum putlaw xlipitit komo natanukgoyatit. Na makgataxtikanit niku tlan nakawilikan putlaw nema liminkgo tiku nila tlawankgo o atanu tuku nitlan kalaninit, putlaw xlikgalhit akgtum letrero o placa nema maxkikanit kpumapakgsin niku wan pi tlan anta namakgxtakga.

◼ Putawilh. Kajwatiya tiku akxtum kataʼanaw kputlaw o tiku wilakgolh kkinchikkan tlan nakamakgataxtiniyaw niku natawilakgo chu nachuna tiku kamakgalhtawakgemaw (1 Cor. 13:5).

◼ Taway. Tlakg tlan nalinaw tuku nawayaw chu ni naʼanaw tamawayaw tastunut. Tlakg tlan komo xaʼaktsina tuku napulipina miliwat nema tlan natamaknuya xtanpin minputawilh. Anta ktamakxtumit ni mastakan talakaskin xalanka tuku napulinaw kiliwatkan chu na ni nalinaw tuku litatlawanit vidrio.

◼ Tumin nema xatapaxuwan tamaskiwinan. Tlan nalimasiyayaw pi paxtikatsiniyaw paskua xlakata kintakanajlakan akxni xatapaxuwan mastayaw tumin xlakata taskujut nema tatlawa xlikalanka katiyatni, anta klanka tamakxtumit. Wantiku namastakgo cheque nawilikgo pi wa maxkimaka «La Torre del Vigía, A.R.». Natlan namaklakaskina mintargeta de débito o de crédito kmakgapitsi tamakxtumit.

◼ Likuchun. Komo wix waya likuchun nema maxkin makuchina kalipi ktamakxtumit nema nalimaklakaskina, xlakata max ni katianalh kkintamakxtumitkan. Komo kgalhiya diabétes chu limaklakaskina jeringas, liwana kamakgchi akxni namakgana xlakata max wi tiku nitlan naliʼakgspula. Ni kamakganti niku wilimaka basura ktamakxtumit o kʼhotel.

◼ Tatunu. Kata kata wi tuku nitlan kaliʼakgspula natalan kaj xlakata xtatunukan. Tlakg tlan nalinaw tatunu chuna la xlilat, xlakata tlan kaniwa nalitlawanaw, kʼescaleras, niku wilakgolh rejillas o alakatanu.

◼ Tiku ni liwana kgaxmatkgo. Ktamakxtumit namatitaxtikan tuku nalichuwinankan kradio (FM). Xlakata tlan nakgaxmata natalakaskin nalipina akgtum aktsu radio nema limaklakaskin pilas chu nalipina mi audífono.

◼ Tuku kalilinkan lakgskgatan nema kgalhi xllanta chu sillas nema talakgnu chu talakgxtu. Niti nalin tuku kalilinkan lakgskgatan nema kgalhi xllanta chu sillas nema talakgnu chu talakgxtu anta niku natlawakan tamakxtumit. Kajwatiya tlan linkan sillas nema tlan chiwilikan xla lakgskgatan nema tlan kawilikan.

◼ Perfumes. Lhuwa tamakxtumit katlawakan niku putum talakchuwanit chu kgalhikgo aire acondicionado. Wa xlakata limasiyayaw pi paxkinanaw akxni ni wiliyaw lhuwa perfume nema lu takgankgawanan nema max natlawa pi amakgapitsin nalitatatlakgo o nitlan nalimakgkatsikgo (1 Cor. 10:24).

◼ Formularios Sírvase visitar (S-43-S). Anta kformularios Sírvase visitar tlan natsokgwiliya xtukuwanikan chu niku wilakgolh tiku nakatachuwinana akxni nakatatanokglha komo nalakgatikgo tuku nakalitachuwinana. Tlan namastaya uma kapsnat kDepartamento de Publicaciones, o secretario xla congregación akxni nataspita kmincongregación.

◼ Restaurantes: Akxni limasiyayaw tlan tayat krestaurantes malankiyaw xtukuwani Jehová. Liwana kalhakgananti, chuna la xlilhakganat chatum kstalanina Cristo. Komo talismani namastakan propina, chuna katlawa.

◼ Hoteles:

1) Ni kaskinti cuartos nema ni namaklakaskina chu ni kamasta talakaskin tlakg natamakgxtakgkgo, kajwatiya tiku kamaxkikanit talakaskin.

2) Kajwatiya komo xlikana nila katipi kawanti pi nialh namaklakaskina akgtum cuarto chu tunkun kamakatsininanti khotel (Mat. 5:37). Komo chuna natlawaya, katsokgwili numero nema namaxkikana xlakata nialh katimaklakaskinti. Komo nawana pi nialh katimaklakaskinti chu kaj 48 horas tsankga natsuku asamblea, nialh katimaxkika mintumin nema xlixokgonita.

3) Milikatsit pi komo maklakaskina tarjeta de crédito o de débito akxni naskina cuarto, hotel namakglhtiyan tsinu mintumin xlakata nalixokgoniya tuku namaklakaskina kcuarto, o komo wi tuku nalani cuarto akxni anta natawilaya. Wix tlan nalimaklakaskimparaya uma tumin akxni natitaxtukgo makgapitsi kilhtamaku.

4) Kalipi tuku pulinkan maletas akxni pinpata maklakaskina chu tunkun kamaspitti xlakata tlan atanu tiku nalimaklakaskin.

5) Kamaxki propina tiku natalinan mimaleta chu chali chali kamakgxtakgni propina tiku kaxaka mincuarto khotel.

6) Kajwatiya natlawaya liwat kcuarto niku mastakan talakaskin.

7) Ni kamalakatsali la nawaya liwat, café o hielos nema maskiwinankan akxni wilaw khotel.

8) Xliputum kilhtamaku kalimasiya xtawakat espíritu chuna la nakalikatsiniya tiku skujkgo khotel. Kalakapastakti pi lhuwa tiku wilakgolh khotel chu lhuwa taskujut kgalhikgo, wa xlakata napaxtikatsinikgo komo akinin ni lhuwa tuku nakaskiniyaw, tlan nakalikatsiniyaw chu ni nakasitsiniyaw.

9) Lu xlakaskinka pi natlatni nakuentatlawakgo xkamanan akxni natawilakgo kʼhotel, tuku kilhchani niku wi piscina, niku putum chinkgo chu gimnasio.

10) Kkapsnat niku tatsokgnit tukuya hoteles tlan natamakgxtakgaw wilikanit la naxokgoyaw chali chali, chu tanu naxokgoyaw impuestos. Komo tlakg namatejekana o namatajekana tuku wix nitu skinpat ni kaxokgo, tunkun kamakatsini Departamento tiku Putsakgo niku tlan Natamakgxtakgkgo natalan.

11) Komo nakgalhiya akgtum taʼakglhuwit anta niku tamakgxtakgpat, tunkun kamakatsini Departamento tiku Putsakgo niku tlan Natamakgxtakgkgo natalan akxni wijku nawan tamakxtumit.

◼ Tiku xatapaxuwan skujputunkgo. Putum tiku makgtayananputunkgo kaʼalh kDepartamento xlakata tiku Xatapaxuwan Skujputunkgo. Tiku nina kgalhikgo 16 kata na tlan namakgtayanankgo pero wa xnatlatnikan, tiku kakuentajtlawakgo o chatum tiku nakalakgayawakgo xnatlatnikan nakataʼankgo skujkgo.