«Lakatitum nalatapayatit kxlakgstipankan xaʼakgmakgat chixkuwin»

1. ¿Tuku xlakata talakaskin tlan nalikatsiyaw akxni natawila tamakxtumit xaʼakgtutu chu xaʼakgtati kilhtamaku?

¹ Kata kata latamanin kinkaʼakxilhkgoyan akxni kgalhiyaw kintamakxtumitkan xaʼakgtutu kilhtamaku, wa xlakata lu xlakaskinka pi kintayatkan kamaxkilh kakni Dios tiku kakninaniyaw (Lev. 20:26). Xlakata xatlan kintayatkan chu la tasiyayaw limasiyayaw pi akinin xaxlikana kstalaninanin Cristo. ¿La tlan nakgalhiyaw “lakatitum latamat kxlakgstipankan lakchixkuwin” akxni naʼanaw ktamakxtumit xaʼakgtutu kilhtamaku chu xaʼakgtati kilhtamaku namalankiyaw kinTlatkan xalak akgapun? (1 Ped. 2:12.)

2. ¿Niku tlan nalimasiyayaw tayat xla kstalaninanin Cristo akxni nakgalhiyaw tamakxtumit xaʼakgtutu kilhtamaku?

² Kalimasiyaw tayat xla kstalaninanin Cristo. Tapaxkit nema lakgalhiniyaw chu la kalikatsiniyaw «wa nti nkaj akgmakgat lamakgolh» ni xtachuna la lalikatsini latamanin xalak kakilhtamaku (Col. 3:10; 4:5; 2 Tim. 3:1-5). Lu xlakaskinka tlan nakalikatsiniyaw chu ni nakasitsiniyaw tiku skujmakgolh khoteles chu krestaurantes, maski ni tunkun nakinkamaxkikanan tuku lakaskinaw. Nachuna, tlan nalitasiyayaw komo namakgxtakgaw propinas niku chuna talismani.

3. ¿Tuku kamalakapastakakan natlatni chu tuku xlakata?

³ Natlatni kuenta nakatlawakgo xkamanankan ktamakxtumit, krestaurantes chu khotel (Prov. 29:15). Xgerente akgtum hotel wanilh akgtum tamakgaxtokgat: «Lu klakgatiyaw akxni minkgo xtatayananin Jehová. Xkamanankan lu tlan likatsikgo. Putum tiku skujkgo unu xkalichuwinamakgon chu lu xaklakgatiw pi xtantit unu putum sábados chu domingo».

4. Akxni natawilayaw kkachikin niku natawila tamakxtumit, ¿la kililhakganatkan?

⁴ Lakatitum nalhakgananaw. Tuku nalhakgayaw akxni naʼanaw ktamakxtumit lakatitum xliwanat chu tlan xlitasiyat chu ni nalhakgananaw la lhakganankgo latamanin xalak kakilhtamaku (1 Tim. 2:9). Nachuna, ni nalhakgananaw la komo kaj paxialhnamaw o ni lixkajni xliwanat kintalhakgankan, asta akxni nachanaw khotel o akxni nataxtuyaw khotel chu maski ni ktamakxtumit natawilayaw. Chuna tlan nalimakgkatsiyaw pi linaw tarjeta xla solapa chu ni katimaxanaw akxni nalichuwinanaw xtachuwin Dios. Xlakata lu tlan natasiyayaw chu tlan nalikatsiyaw ktamakxtumit xaʼakgtutu o xaʼakgtati kilhtamaku, ni kajwatiya nalakgatikgo latamanin tiku katsiputunkgo tuku wan Biblia, wata na namakgapaxuwa Jehová (Sof. 3:17).

Tuku kililakapastakatkan xlakata tamakxtumit xaʼakgtutu kilhtamaku kata 2014

◼ Hora akxni natsuku chu nakgalhsputa tamakxtumit. Kamakgtsayan namalakikan. Tamakxtumit xaʼakgtutu kilhtamaku nalitsuku tatlakgni 9:20. Akxni nawankan pi natsuku tatlakgni nema nalimatsukikan tamakxtumit naʼanaw tawilayaw xlakata natsuku chuna la xlilat. Viernes chu sábado 4:55 nakgalhsputa tamakxtumit chu domingo nakgalhsputa 3:50.

◼ Xalanka tamakxtumit xaʼakgtati kilhtamaku. Kmakgapitsi kachikinin natlawakan xalaklanka tamakxtumit xaʼakgtati kilhtamaku. Sucursal liwana akxilha la xlilhuwa laktawilh natamaklakaskin, niku kawilikan putlaw, la xlilhuwa hoteles anankgo, akxni akxilhkgo uma, tlan kawanikan amakgapitsin congregaciones chu natalan xalak atanu países xlakata naʼankgo. Komo makgapitsi natalan naʼankgo kʼuma tamakxtumit komo ni kalakgchan, max ni katiʼakchalh niku natamakxtumikan. Komo nila pina ktamakxtumit niku lakgchanan, ni kapit xalanka tamakxtumit xaʼakgtati kilhtamaku.

◼ Niku kawilikan putlaw. Ni kintikamaxokgekan niku nawiliyaw putlaw komo anta tapakgsi niku tamakxtumimaw chu chuna la nachintilhakgo putlaw nakakaxwilikan. Xlakata ni anan lhuwa niku nakawilikan putlaw, tlakg tlan xwa kaj akgtum putlaw xlipitit komo natanukgoyatit. Niku makgataxtikanit niku tlan nakawilikan putlaw nema liminkgo tiku nila tlawankgo, kajwatiya putlaw nema kgalhi letrero o placa niku wan pi maklakaskin tiku nila tlawan tlan natamakgxtakga.

◼ Putawilh. Akxni namalakikan, ni nakgosnanaw xlakata naʼanaw tawilayaw niku lakgatiyaw, xtachuna la kaj lalakgatlajaputunaw. Xlakata kapaxkiyaw amakgapitsin tlawa pi pulana nakawiliyaw nixawa akinin. Wa uma kinkalilakgapaskanan pi xlikana kstalaninanin Cristo chu uma tlawa xlakata tiku kinkaʼakxilhmakgon na nakakninanikgo Dios (Juan 13:34, 35; 1 Cor. 13:4, 5; 1 Ped. 2:12). Kajwatiya tiku akxtum kataʼanaw kputlaw o tiku wilakgolh kkinchikkan tlan nakamakgataxtiniyaw niku natawilakgo chu nachuna tiku kamakgalhtawakgemaw. Xlakata ni lhuwa anan niku natawilakgo tiku linkgoya kata chu tiku tatatlakgo wa xlakata nila nakatatawilakgo putum xfamilia. Katlawa litlan, kakamakgxtakgni laktawilh tiku linkgoya kata chu tiku tatatlakgo chu tiku kakuentajtlawakgo.

◼ Taway. Tlakg tlan nalinaw tuku nawayaw chu ni naʼanaw tamawayaw tastunut. Tlakg tlan komo xaʼaktsina tuku napulipina miliwat nema tlan natamaknuya xtanpin laktawilh. Anta ktamakxtumit ni mastakan talakaskin xalanka tuku napulinaw kiliwatkan chu na ni nalinaw tuku litatlawanit vidrio.

◼ Tumin nema xatapaxuwan tamaskiwinan. Tlan nalimasiyayaw pi paxtikatsiniyaw paskua xlakata kintakanajlakan akxni xatapaxuwan mastayaw tumin xlakata taskujut nema tatlawa xlikalanka katiyatni, anta klanka tamakxtumit. Wantiku namastakgo cheque nawilikgo pi wa maxkimaka «La Torre del Vigía, A.R.». Natlan namaklakaskina mintarjeta de débito o de crédito.

◼ Likuchun. Komo wix waya likuchun nema maxkin makuchina kalipi ktamakxtumit nema nalimaklakaskina, xlakata ni katimaxkika ktamakxtumit. Komo wix diabético chu maklakaskina agujas chu jeringas, liwana kamakgchi akxni namakgana xlakata max wi tiku nitlan tuku naliʼakgspula. Ni kamakganti niku wilimaka basura ktamakxtumit o anta kʼhotel.

◼ Kuenta katlawaw xlakata nitu nakinkaʼakgspulayan. Lu xlakaskinka xlakata ni nalitatantuxlitaw, o naliʼakgchakgxaw kintatunukan. Kata kata nitlan tuku kaliʼakgspula, kaj xtatunukan xlakata lu laktalhmanin linkgo. Tlakg tlan nalinaw tatunu chuna la xlilat, xlakata tlan kaniwa nalitlawanaw, kʼescaleras, niku wilakgolh rejillas o alakatanu.

◼ Tiku ni liwana kgaxmatkgo. Ktamakxtumit namatitaxtikan tuku nalichuwinankan kradio (FM). Xlakata tlan nakgaxmata natalakaskin nalipina akgtum aktsu radio nema limaklakaskin pilas chu nalipina mi audífono.

◼ Tuku kalilinkan lakgskgatan nema kgalhi xllanta chu sillas nema tlan talakgxtu. Niti nalin ktamakxtumit tuku kalilinkan lakgskgatan nema kgalhi xllanta chu sillas nema tlan talakgxtu. Kajwatiya tlan linkan sillas nema tlan chiwilikan klaktawilh.

◼ Perfumes. Lhuwa tamakxtumit katlawakan niku putum talakchuwanit chu kgalhikgo aire acondicionado. Wa xlakata limasiyayaw pi paxkinanaw akxni ni wiliyaw lhuwa perfume nema lu takgankgawanan nema max natlawa pi amakgapitsin nalitatatlakgo o nitlan naclimakgkatsikgo (1 Cor. 10:24).

◼ Formularios Sírvase visitar (S-43-S). Anta kformularios Sírvase visitar tlan natsokgwiliya xtukuwanikan chu niku wilakgolh tiku nakatachuwinana akxni nakatatanokglha komo nalakgatikgo tuku nakalitachuwinana. Tlan namastaya uma kapsnat kDepartamento de Publicaciones, o secretario xla congregación akxni nataspita kmincongregación.

◼ Restaurantes. Akxni limasiyayaw tlan tayat krestaurantes malankiyaw xtukuwani Jehová. Liwana kalhakgananti, chuna la xlilhakganat chatum kstalanina Cristo. Komo talismani namastakan propina, kamakgxtakgti chuna la xlilat.

◼ Hoteles:

Ni kaskinti cuartos nema ni namaklakaskina chu ni kamasta talakaskin tlakg natamakgxtakgkgo, kajwatiya tiku chuna la wankanit.
Kajwatiya komo xlikana nila katipi kawanti pi nialh namaklakaskina akgtum cuarto chu tunkun kamakatsininanti khotel (Mat. 5:37). Komo chuna natlawaya, katsokgwili numero nema namaxkikana xlakata nialh katimaklakaskinti. Komo nawana pi nialh katimaklakaskinti chu kaj 48 horas tsankga natsuku asamblea, nialh katimaxkika mintumin nema xlixokgonita.
Milikatsit pi komo maklakaskina tarjeta de crédito o débito akxni naskina cuarto, hotel namakglhtiyan tsinu mintumin xlakata nalixokgoniya tuku namaklakaskina kcuarto, o komo wi tuku nalani cuarto akxni anta natawilaya. Wix tlan nalimaklakaskimparaya uma tumin akxni natitaxtukgo makgapitsi kilhtamaku.
Kalipi tuku pulinkan maletas akxni pinpata maklakaskina chu tunkun kamaspitti xlakata tlan atanu tiku nalimaklakaskin.
Komo chuna talismaninit, kamaxki propina tiku natalinan mimaleta chu chali chali kamakgxtakgni propina tiku kaxaka mincuarto khotel.
Kajwatiya natlawaya liwat kcuarto niku mastakan talakaskin.
Ni kalipi liwat, café o hielos nema maskiwinankan akxni wila khotel anta ktamakxtumit.
Xliputum kilhtamaku kalimasiya lakwan tayat chuna la nakalikatsiniya tiku skujkgo khotel. Kalakapastakti pi lhuwa tiku wilakgolh khotel chu lhuwa taskujut kgalhikgo, wa xlakata napaxtikatsinikgo komo akinin ni lhuwa tuku nakaskiniyaw, tlan nakalikatsiniyaw chu ni nakasitsiniyaw.
Lu xlakaskinka pi natlatni nakuentatlawakgo xkamanan akxni natawilakgo kʼhotel, tuku kilhchani niku wi ascensores, piscina, niku putum chinkgo chu gimnasio.
Kkapsnat niku tatsokgnit tukuya hoteles tlan natamakgxtakgaw wilikanit la naxokgoyaw chali chali, chu tanu naxokgoyaw impuestos. Komo tlakg namaxokgekana tuku wix nitu skinpat ni kaxokgo, tunkun kamakatsini Departamento tiku Putsakgo niku tlan Natamakgxtakgkgo natalan.
Komo nakgalhiya taʼakglhuwit khotel, tunkun kamakatsini Departamento tiku Putsakgo niku tlan Natamakgxtakgkgo natalan.

◼ Tiku xatapaxuwan skujputunkgo. Putum tiku makgtayananputunkgo kaʼalh kDepartamento xlakata tiku Xatapaxuwan Skujputunkgo. Tiku nina kgalhikgo 16 kata na tlan namakgtayanankgo, pero wa xnatlatnikan tiku kakuentajtlawakgo o chatum tiku nakalakgayawakgo xnatlatnikan.