Akgtutu kilhtamaku makgamakglhtinaw xtasikulunalin Jehová
1. ¿La tlan nakinkamakgtayayan tamakxtumit xaʼakgtutu kilhtamaku uma kata?
1 Kʼuma xkakilhtamaku Satanás niku lhuwa ni katsikgo xlakata Dios, Jehová chuntiya lhuwa kamaxkima xlakskujnin tuku maklakaskinkgo (Isa. 58:11). Pulaktum la tlawa wa tamakxtumit xaʼakgtutu kilhtamaku nema tawila akgatunu kata. Chuna la natalakatsuwitilha tamakxtumit xaʼakgtutu kilhtamaku uma kata, nakinkamakgtayayan komo akinin natakaxaw xlakata tlan nakamakgtayayaw amakgapitsin chu na nakinkamakgtayakgoyan kkintakanajlakan. ¿La natlawayaw? (Pro. 21:5.)
2. ¿Tuku kililakkaxwilitkan natlawayaw xlakata tlan naʼanaw tamakxtumit?
2 Komo nina tlawanita, kalakpuwanti la nalakkaxwiliya minkilhtamaku chu mintaskujut xlakata napina akgtutu kilhtamaku. ¿Akxilhtita la xlilhuwa kilhtamaku limaklakaskina xlakata tlan sokg nachipina chu natekgsa niku natawilaya akxni nina tsuku tamakxtumit? Xlikana pi putum kgaxmatputunaw tuku namatliwakglha kintakanajlakan nema lakkaxwilinit Jehová (Isa. 65:13, 14). ¿Lakkaxwilinitata niku natamakgxtakga chu la napina ktamakxtumit?
3. ¿Tuku nakinkamakgtayayan xlakata liwana nalitamakgtayayaw tamakxtumit, kinchatunukan chu putum familia?
3 ¿Tuku kilitlawatkan xlakata nitu natlawa pi nialh kuenta natlawayaw ktamakxtumit? Komo tlan, sokg kalhtata xlakata liwana najaxa, kalakaʼakxilhti tiku akgchuwinama, kaputsa putum textos xalak Biblia chu katsokgtilha tuku tlakg xlakaskinka. Tlan nawan komo familia akxtum natawilakgo ktamakxtumit xlakata natlatni tlan namakgtayakgo xkamanan nakuentajnatlawakgo tuku liʼakgchuwinamaka (Pro. 29:15). Max katsisni tlan nalichuwinanatit tuku tlakg lakgatitit xlakata tuku lichuwinanka. Chu xlakata chuntiya nakamatliwekglhan maski nialh anta wilatit ktamakxtumit, tlan nalimaxtuyatit kilhtamaku akxni kakninaniyatit Dios kfamilia xlakata nalichuwinanatit wantuku nakamakgtayayan.
4. ¿Tuku tlan natlawayaw xlakata amakgapitsi na natatliwakglha xtakanajlakan?
4 La tlan nakamakgtayayaw amakgapitsin. Pero na lakaskinaw pi amakgapitsin katatliwakglhi xtakanajlakan. ¿Lakapastaknitata la tlan nakamakgtayaya natalan tiku linkgoya kata chu tiku nila ankgo ktamakxtumit? Komo wi chatum anta kcongregación, ¿tlan namakgtayaya? (1 Juan 3:17, 18.) Talakaskin pi lakgkgolotsin xalak congregación, pero liwaka tiku pulalin akgtum grupo, xliʼakxilhatkan komo tiku chuna wilakgo nakamakgtayakan.
5. ¿La namakgpitsikan invitaciones? (Kaʼakxilhti recuadro.)
5 Chuna la tatlawama akgtutu semanas akxni nina tsuku tamakxtumit makgpitsiyaw invitación xlakata latamanin nakinkataʼankgoyan. Akgatunu congregación xlilakapastakat pi namastakgo putum xʼinvitaciones chu namakgpitsikgo putum niku lichuwinankgo Dios. Pero komo akxni nasputa kilhtamaku xlakata namakgpitsiyaw invitación chu mifamilia kgalhijku, kakalipitit ktamakxtumit xlakata tlan nakamaxkiyatit tiku nakatalichuwinatit Dios kkachikin niku natawila tamakxtumit. Viernes nawankan la tlan natlawayaw. Nema nalakpuwana pi nila katimakgpitsi tlan namaxkiya chatum kaxwilina akxni nachipina tamakxtumit. Kalakapastakti namakiya maktum xlakata xaʼawatiya taʼakgchuwin xalak domingo wa nalichuwinankan.
6. ¿La nalimasiyayaw pi tlan likatsiyaw?
6 Makgtayanan akxni tlan likatsiyaw. Uma kilhtamaku niku anankgo latamanin «nti nkaj nakstupaxkikan», tiku ni kuenta tlawakgo la makgkatsikgo amakgapitsin, ¡lu tlan tamakgkatsi nakatatawilayaw natalan tiku tlan likatsikgo! (2 Tim. 3:2.) ¿La limasiyayaw pi tlan likatsiyaw? Pulaktum la limasiyayaw wa akxni lakatsuku chu ni nakgosnanaw, o tsalanana, akxni namalakikan niku natamakxtumiyaw makgtsayan tsisa, nachuna kajwatiya namaʼakgataxtiya niku natawilakgo kifamiliakan, chu tiku kataʼanaw kputlaw o tiku limakgalhtawakgemaw Biblia. Atanu la nalimasiyayaw pi tlan likatsiyaw wa akxni nakgalhakgaxmataw tuku nawan tiku namatsuki tamakxtumit akxni nakinkaskiniyan pi natawilayaw xlakata nakgaxmataw tatlakgni; nachuna namaktiniyaw volumén celular o localizador xlakata ni natlawa pi amakgapitsin nialh kuenta natlawakgo tamakxtumit. Nalimasiyayaw pi tlan likatsiyaw wamputun pi ni nachuwinanaw, ni namalakgachayaw mensajes, ni nawayanaw o ni nalakawantapuliyaw akxni wi tamakxtumit.
7. ¿La tlan nakamatliwekglhaw natalan akxni akxtum katawilaw?
7 Tiku tlan kinkamamakgkatsinikgoyan. Laklanka tamakxtumit kinkamaxkikgoyan talakaskin akxtum nakatatawilayaw kinatalankan chu napaxawayaw (Sal. 133:1-3). ¿Tuku xlakata ni katachuwinana natalan xalak atanu congregaciones xlakata mi amigos nakatlawaya? (2 Cor. 6:13.) Tlan xlakpuwanti nalakgapasa maski chatum o akgtum familia akgatunu kilhtamaku. Tastunut akxni wayankan tlan nalimaklakaskina xlakata chuna natlawaya. Wa xlakata tlan xlipi mi liwat xlakata ni nataxtuya tamawaya o napina kʼakgtum restaurante chu anta natamakgxtakga niku tlawamaka tamakxtumit xlakata tlan nakatachuwinana natalan. Max tlan natekgsa natalan tiku mi amigos nawankgo putum kilhtamaku.
8. Kawanti tuku xlakata talakaskin namakgtayananaw ktamakxtumit chu la tlan namakgtayananaw.
8 Lu tlan tamakgkatsi akxni akxtum kataskujaw kinatalankan kstaskujut Dios. Akgtum liʼakxilhtit, tlan xatapaxuwan kskujti niku talakaskin tamakgtay, na tlan namakgtayaya mincongregación taskujut nema lakgayawakanit (Sal. 110:3). Komo nitu lakgayawakanita taskujut, kapit departamento nema wanikan Tiku xatapaxuwan Skujkgo. Akxni lhuwa tiku makgtayanankgo tlakg ni tuwa chu xatapaxuwan tlawakan.
9. ¿Tuku xlakata xlakaskinka naʼakxilhaw kintayatkan chu la takaxtayanitaw akxni anaw ktamakxtumit?
9 Tiku kinkaʼakxilkgoyan lakgatikgo kintayatkan. Akgtutu kilhtamaku nema nakgalhiyaw kintamakxtumitkan nakinkalilakgapaskanan pi akinin xtatayananin Jehová. Uma kilhchani pi putum latamanin tiku nakinkaʼakxilhkgoyan kkachikin niku natatlawa tamakxtumit naʼakxilhkgo pi akinin ni xtachuna la amakgapitsin latamanin (1 Ped. 2:12). Kalitasiyalh kilhakgatkan chu la takaxtayanitaw pi malankiyaw Jehová, akxni wilaw niku tatlawama tamakxtumit, niku tamakgxtakgmaw o akxni anaw kʼakgtum restaurante (1 Tim. 2:9, 10). Komo wiliyaw kigafetekan latamanin nakatsikgo pi akinin xtatayananin Jehová chu max uma natlawa pi tlan nakatalichuwinankgoyaw xlakata tamakxtumit chu xlakata Dios.
10. ¿Tuku natlawayaw xlakata tlan nalichuwinankgo tamakxtumit tiku skujkgo khotel o krestaurante?
10 ¿Chu la nakinkaʼakxilhkgoyan tiku skujkgo khotel o kʼakgtum restaurante? Ni naskinaw habitaciones nema ni namaklakaskinaw, xlakata uma natlawa pi amakgapitsin kinatalankan ni katitekgskgolh niku natamakgxtakgkgo, chu hotel lhuwa tumin namakgatsankganan. Komo lu tsamakan khotel akxni naskinaw o akxni namakgxtakgaw cuarto, ni nasitsiyaw chu nalimasiyayaw pi tlan likatsiyaw (Col. 4:6). Chu nachuna, nakamakgxtakgniyaw propina tiku skujkgo krestaurante chu tiku skujkgo khotel tiku nakinkalinikgoyan kimaletaskan, tiku kaxaka kmincuarto o tiku tlawa atanu taskujut.
11. ¿Tuku liakxilhtit limasiya pi tlan lichuwinankan tayat nema kgalhiyaw?
11 ¿La akxilhkan kintamakxtumitkan xlakata kintayatkan? Maktum periódico wa xlakata tuku lichuwinalh chatum gerente niku tatlawalh tamakxtumit: «Lu tlan likatsikgo. Klipaxuwayaw pi minkgo akgatunu kata». Kata nema titaxtulh, chatum chixku tiku ni xtatayana Jehová makgatsankgalh xcartera khotel niku xwilakgolh lhuwa natalan tiku xʼankgonit ktamakxtumit. Akxni maxkika xcartera chu nitu xkitsankgani, gerente wanilh: «Lu tlan pi wa xtatayananin Jehová xkgalhikgo xtamakxtumitkan chu unu khotel tamakgxtakgmakgolh. Komo niwa xtekgskgolh max nikxni xtitekgsti mincartera».
12. Chuna la natalakatsuwitilha tamakxtumit, ¿tuku nalakpuwanaw natlawayaw chu tuku xlakata?
12 Tamakxtumit xaʼakgtutu kilhtamaku lu lakapala talakatsuwima. Lhuwa kilhtamaku chu taskujut limaklakaskinkanit xlakata tuku namatitaxtikan chu tuku naʼakxilhaw lu nakinkamatliwakglhan. Liwana kalakpuwanti napina akgtutu kilhtamaku xlakata namakglhtinana tuku Jehová chu xkachikin lakkaxwilinit mimpalakata. Kalakpuwanti pi nakamatliwakglha amakgapitsin xlakata tlan likatsiya, tlan talalipinkana chu tlan tayat kgalhiya. Chuna, kimputumkan namakgkatsiyaw la makgkatsilh chatum tiku alh tamakxtumit katata, xla tsokgnalh: «¡Ni klakapastaka atanu tuku tlakg tlan klimakgkatsinit!».
[Blurb on page 4]
Chuna la tatlawama akgtutu semanas akxni nina tsuku tamakxtumit makgpitsiyaw invitación xlakata latamanin nakinkataʼankgoyan
[Blurb on page 6]
Kilhakgatkan chu la takaxtayanitaw kamalankilh Jehová, akxni wilaw niku tatlawama tamakxtumit, niku tamakgxtakgmaw o akxni anaw kʼakgtum restaurante
[Blurb on page 7]
Kalakpuwanti pi nakamatliwakglha amakgapitsin xlakata tlan likatsiya, tlan talalipinkana chu tlan tayat kgalhiya
[Box on page 4]
Tuku kililakapastakatkan xlakata tamakxtumit xa’akgtutu kilhtamaku kata 2011
◼ Hora akxni natsuku chu nakgalhsputa tamakxtumit. Akgtutu kilhtamaku nema nakgalhiyaw tamakxtumit natsuku tsisa 9:20. Tsisa namalakkikan 8:00 niku natlawakan tamakxtumit. Akxni nawankan pi natsuku tatlakgni nema nalimatsukikan tamakxtumit naʼanaw tawilayaw xlakata tamakxtumit natsuku chuna la xlilat. Tamakxtumit nakgalhsputa 4:55 viernes chu sábado, domingo nakgalhsputa 3:40.
◼ Niku kawilikan putlaw. Ni kintikamaxokgekan niku nawiliyaw putlaw komo anta tapakgsi niku tamakxtumimaw chu chuna la nachintilhakgo putlaw nakakaxwilikan. Na makgataxtikanit niku tlan nakawilikan putlaw nema liminkgo tiku nila tlawankgo o atanu tuku nitlan kalaninit, putlaw xlikgalhit akgtum letrero o placa nema maxkikanit kpumapakgsin niku wan pi tlan anta namakgxtakga. Xlakata ni anan lhuwa niku nakawilikan putlaw, tlakg tlan xwa kaj akgtum putlaw xlipitit komo natanukgoyatit.
◼ Putawilh. Kajwatiya tiku akxtum kataʼanaw kputlaw o tiku wilakgolh kkinchikkan tlan nakamakgataxtiniyaw niku natawilakgo chu nachuna tiku kamakgalhtawakgemaw (1 Cor. 13:5).
◼ Taway. Tlakg tlan nalinaw tuku nawayaw chu ni naʼanaw tamawayaw tastunut. Tlakg tlan komo xaʼaktsina tuku napulipina miliwat nema tlan natamaknuya xtanpin minputawilh. Anta ktamakxtumit ni mastakan talakaskin xalanka tuku napulinaw kiliwatkan chu na ni nalinaw tuku litatlawanit vidrio.
◼ Tumin nema xatapaxuwan tamaskiwinan. Tlan nalimasiyayaw pi paxtikatsiniyaw paskua xlakata kinakanajlakan akxni xatapaxuwan mastayaw tumin xlakata taskujut nema tatlawa xlikalanka katiyatni, anta klanka tamakxtumit xaʼakgtutu kilhtamaku. Wantiku namastakgo cheque nawilikgo pi wa maxkimaka «La Torre del Vigía, A.R.».
◼ Akxni wi tuku kaj lakapara nitlan la. Akxni lakapara wi tiku nalani tuku nitlan anta ktamakxtumit, pulana kawani chatum kaxwilina tiku lakatsu ya, chu wa lakapara namakatsininan niku wilakgolh Makuchinanin xlakata anta naʼakxilhkgo tuku kgalhi chu namakgtayakgo.
◼ Likuchun. Komo wix waya likuchun nema maxkin makuchina kalipi ktamakxtumit nema nalimaklakaskina, xlakata max ni katianalh kintamakxtumitkan.
◼ Tatunu. Kata kata wi tuku nitlan kaliʼakgspula natalan kaj xlakata xtatunukan. Tlakg tlan nalinaw tatunu chuna la xlilat, xlakata tlan kaniwa nalitlawanaw, kʼescaleras, niku wilakgolh rejillas o alakatanu.
◼ Tiku ni liwana kgaxmatkgo. Kmakgapitsi tamakxtumit namatitaxtikan tuku nalichuwinankan kradio (FM), kajwatiya anta niku tatlawama tamakxtumit. Xlakata tlan nakgaxmata natalakaskin nalipina akgtum aktsu radio nema limaklakaskin pilas chu nalipina mi audífono.
◼ Tuku kalilinkan lakgskgatan nema kgalhi xllanta chu sillas nema talakgnu chu talakgxtu. Niti nalin tuku kalilinkan lakgskgatan nema kgalhi xllanta chu sillas nema talakgnu chu talakgxtu anta niku natlawakan tamakxtumit. Kajwatiya tlan linkan sillas nema tlan chiwilikan xla lakgskgatan nema tlan kawilikan kxpaxtun niku wilakgolh xanatlatni.
◼ Perfumes. Lhuwa tamakxtumit katlawakan niku putum talakchuwanit chu kgalhikgo aire acondicionado. Wa xlakata limasiyayaw pi paxkinanaw akxni ni wiliyaw lhuwa perfume nema lu takgankgawanan nema max natlawa pi amakgapitsin nalitatatlakgo o nitlan nalimakgkatsikgo (1 Cor. 10:24).
◼ Formularios Sírvase visitar (S-43-S). Tlan nalipina maktum o maktiy formularios Sírvase visitar xlakata natsokgwiliya xtukuwanikan chu niku wilakgolh tiku nakatachuwinana akxni nakatatanokglha chu nalakgatikgo tuku nakalitachuwinana. Tlan namastaya uma kapsnat Departamendo de Publicaciones, o secretario xla congregación akxni nataspita kmincongregación (kaʼakxilhti likgalhtawakga La Natlawayaw xTaskujut Dios xla noviembre kata 2009, pág. 4).
◼ Restaurantes. Akxni limasiyayaw tlan tayat krestaurantes malankiyaw xtukuwani Jehová. Komo talismani namastakan propina, chuna katlawa.
◼ Hoteles.
1) Ni kaskinti cuartos nema ni namaklakaskina chu ni kamasta talakaskin tlakg natamakgxtakgkgo, kajwatiya tiku kamaxkikanit talakaskin.
2) Kajwatiya komo xlikana nila katipi kawanti pi nialh namaklakaskina akgtum cuarto chu tunkun kamakatsininanti khotel (Mat. 5:37).
3) Kalipi tuku pulinkan maletas akxni pinpata maklakaskina chu tunkun kamaspitti xlakata tlan atanu tiku nalimaklakaskin.
4) Kajwatiya natlawaya liwat cuarto niku mastakan talakaskin.
5) Kamaxki propina tiku natalinan mimaleta chu chali chali kamakgxtakgni propina tiku kaxaka mincuarto khotel.
6) Ni kamalakatsali la nawaya liwat, café o hielos nema maskiwinankan akxni wilaw khotel.
7) Xliputum kilhtamaku kalimasiya xtawakat espíritu chuna la nakalikatsiniya tiku skujkgo khotel. Kalakapastakti pi lhuwa tiku wilakgolh khotel chu lhuwa taskujut kgalhikgo, wa xlakata napaxtikatsinikgo komo akinin ni lhuwa tuku nakaskiniyaw, tlan nakalikatsiniyaw chu ni nakasitsiniyaw.
8) Kkapsnat niku tatsokgnit tukuya hoteles tlan natamakgxtakgaw wilikanit la naxokgoyaw chali chali, chu tanu naxokgoyaw impuestos. Komo tlakg namatejekana o namatajekana tuku wix nitu skinpat ni kaxokgo, tunkun kamakatsini Departamento tiku Putsakgo niku tlan Natamakgxtakgkgo natalan.
9) Komo nakgalhiya akgtum taʼakglhuwit anta niku tamakgxtakgpat tunkun kamakatsini Departamento tiku Putsakgo niku tlan Natamakgxtakgkgo natalan akxni wijku nawan ktamakxtumit.
10) Milikatsit pi komo maklakaskina tarjeta de crédito o de débito akxni naskina cuarto, hotel namakglhtiyan tsinu mintumin xlakata nalixokgoniya tuku namaklakaskina kcuarto, o komo wi tuku nalani cuarto akxni anta natawilaya. Wix tlan nalimaklakaskimparaya uma tumin akxni natitaxtukgo makgapitsi kilhtamaku.
◼ Tiku xatapaxuwan skujputunkgo. Tlakg napaxuwayaw klanka tamakxtumit komo namakgtayaninanaw niku natalakaskin xlakata tlan natawila tamakxtumit (Hech. 20:35). Putum tiku makgtayaputunkgo naʼan kDepartamento xlakata tiku Xatapaxuwan Skujputunkgo. Tiku nina kgalhikgo 16 kata na tlan namakgtayanankgo pero wa xnatlatnikan, tiku kakuentajtlawakgo o chatum tiku nakalakgayawakgo xnatlatnikan nakataʼankgo skujkgo.
[Epígrafe de la página 5]
¿La namakgpitsiyaw invitación?
Xlakata tlan namastayaw invitación putum niku lichuwinanaw Dios, xlakaskinka ni lhuwa tuku nawanaw. Max tlan chuna nawanaw: «Tlen. Kmastamaw uma invitación xlikalanka katiyatni. Kmaxkiputunan mila. Anta tlakg lhuwa tuku nakatsiya». Niku tsuku wi tuku tlakg namakgtaya xlakata tiku maxkimaw tlakg nakatsiputun, kamaxki chuna la tlan naʼakxilha. Kalimasiya pi paxuwaya. Akxni namakgpitsiya sábado chu domingo, na tlan nakamaxkiya revistas komo tlan tlawa.