¿Tiku tlawakgo xtalakaskin Jehová la uku?
1. La nakinkamakgtayayan xlakata natalikgalhtawakga «¿Tiku tlawakgo xtalakaskin Jehová la uku?»
1 Natalikgalhtawakga kTakgalhtawakga nema takilhtinit kBiblia kCongregación folleto ¿Tiku tlawakgo xtalakaskin Jehová la uku? Uma xasasti likgalhtawakga, nema mastaka ktamakxtumit xaʼakgtutu kilhtamaku «Kuenta katlawaw kinakujkan», wa litlawaka xlakata natalakatsuwikgo kxkachikin Jehová, tiku kgalhtawakgamakgolh Biblia. Uma nakinkamakgtayayan xlakata tlakg lhuwa xtapalh naʼakxilhaw xlakata wilaw kxkachikin Jehová, chu tlakg nakatsiyaw maklakaskinaw akxni nalichuwinanaw Dios (Sal. 48:13).
2. ¿La natalikgalhtwakga folleto kcongregación?
2 La natalikgalhtawakga. Tiku napulalinkgo takgalhtawakga talakaskin liwana namaklakaskinkgo kilhtamaku xlakata putum natalikgalhtawakga lecciones. Pulana nalikgalhtawakgakan takgalhskinin nema litsuku akgatunu lecciones. Akxni talikgalhtawakganita nawan xapulana párrafo, tiku pulalima takgalhtawakga natlawa takgalhskinin nema wa nalakkaxtlawa. Alistalh, putum sección nema litsuku letras nema tlakg lakgtsitsakga, natalikgalhtawakga chu na atanu pulaktu natalichuwinan. Tiku napulalin takgalhtawakga nakakgalhskin natalan la makgtayanan sección xlakata natakgalhti xtítulo. Komo masta talakaskin kilhtamaku, natalikgalhtawakga textos nema tlakg xlakaskinka. Nachuna, uma folleto lhuwa dibujos limin nema tlan nalimastakan takgalhtin. Akxni nina matsuki atanu lección, tiku pulalima takgalhtawakga namaklakaskin takgalhskinin nema wi tutsu. Komo wi akgtum recuadro «Xlakata tlakg nakatsiya», nawanikan tiku likgalhtawakgama pi kalikgalhtawakgalh, chu alistalh nakakgalhskin natalan la namakgtaya tiku kgalhtawakgama komo natlawa tastakyaw tuku anta tamasta. Komo wijku kilhtamaku, tlan nakgalhskininamparaya xatítulos. Talakaskin nalakpuwanaw pi maski chuna natatlawa kTakgalhtawakga nema takilhtinit kBiblia kCongregación, ni talakaskin chuna natalikgalhtawakgayaw tiku makgalhtawakgemaw.
3. ¿Tuku natlawayaw xlakata tlakg nakinkamakgtayayan akxni nalikgalhtawakgayaw xla uma folleto?
3 Xlakata nalitamakgtayayaw uma tamakxtumit, pulana nalikgalhtawakgayaw chu namastayaw kintakgalhtinkan ktamakxtumit. Akxni natalikgalhtawakga ktamakxtumit, kalakpuwaw la namakgtaya tiku makgalhtawakgemaw. Xlakata natalikgalhtawakga uma xasasti folleto nakinkamakgtayayan xlakata nakamakgtayayaw amakgapitsin, chu na natlawakgo xtalakaskin Dios chu tlan nalatamakgo putum kilhtamaku (1 Juan 2:17).