Kilhtamaku 22 xla marzo natsukuyaw makgpitsiyaw invitación akxni natalakapastaka akxni tinilh Cristo

Uma kata, sábado 22 xla marzo natsukukan makgpitsikan invitación akxni natalakapastaka akxni tinilh Cristo. Kimputumkan kinkawanikanan pi tlan namakgtayananaw. Sábado o domingo na tlan namastayaw revistas komo latamanin nalakaskinkgo. Xapulana sábado xla abril kaj invitaciones namastayaw chu ni namatsukiyaw takgalhtawakga. Pero, komo natekgsaw tiku xlikana katsiputun, tlan natsukuyaw makgalhtawakgayaw. Tiku pulalin la lichuwinankan Dios kcongregación nawan komo natamakgpitsi invitaciones niku titaxtukgo lhuwa latamanin xlakata tlakg lhuwa nakamakatsinikan. Katlawaw akgtum lista xla kifamiliajkan, tiku kataskujaw o tiku kataʼanaw kʼescuela, latamanin tiku katsiputunkgo chu amakgapitsi tiku kalakgapasaw tiku lakaskinaw pi kakinkatatamakxtumikgon, chu kakamakgxtakgniw invitación akxni natsukuyaw makgpitsiyaw. Lakaskinaw pi lhuwa latamanin kakinkatatamakxtumikgon akxni nalakapastakaw pulaktiy tapaxkit nema kinkalimasiyanikan (Juan 3:16; 15:13).