Ktamakxtumit xaʼakgtutu kilhtamaku, tlan xatapaxuwan kakninanikan Jehová
1. ¿La xtachuna paskua nema xtatlawa israelitas chu tamakxtumit xaʼakgtutu kilhtamaku nema tatlawa uku?
1 José, María, xkamanan chu lhuwa tiku ni xmakgatsankgananikgo Dios ankgalhin xʼankgo Jerusalén xlakata natlawakgo paskua kata kata. Uma kilhtamaku xtapatsankga putum xtaʼakglhuwitkan chu kaj xtalakpuwan tuku tlakg xlakaskinka kxlatamatkan, uma wamputun tuku xla Dios. Anta kpaskua xkgalhikgo kilhtamaku xlakata nalakpuwankgo chu xlichuwinankgo xlakata la tlan likatsi Jehová chu xlikgalhtawakgakgo xLimapakgsin. Chuna la makgasa, ktamakxtumit xaʼakgtutu kilhtamaku nema nakgalhiyaw tlan xatapaxuwan kakninanikan Jehová.
2. ¿Tuku talakaskin natlawayaw xlakata tlan naʼanaw kxalanka tamakxtumit xaʼakgtutu kilhtamaku?
2 Katakaxwi. Akxni xʼankgo chu xtaspitkgo kʼNazaret xfamilia Jesús max xtlawankgo 200 kilómetros. Chu maski ni katsiyaw la chalit xnatalan xkgalhi Jesús tlan lakpuwanaw pi José chu María xliskujkgo chu lhuwa tuku xlakkaxwilikgo xlakata tlan xkalinkgolh xkamanan kpaskua. Chu wix, ¿lakkaxwilinitata putum tuku natalakaskin xlakata tlan napina akgtutu kilhtamaku kxalanka tamakxtumit nema nakgalhiyaw? Max naskina vacaciones kmintaskujut o natachuwinana tiku taskuja o natachuwinana xmakgalhtawakgena minkamanan xlakata nakamaxkikan talakaskin naʼankgo ktamakxtumit. Komo kʼhotel natamakgxtakga, ¿makgataxtinitata? Komo wi tiku linkgoya kata chu tiku lu tatatlakgo kmincongregación, ¿tlan nakamakgtayaya xlakata tlan naʼankgo klanka tamakxtumit? (1 Juan 3:17, 18).
3. ¿La xkamakgtaya paskua nema xtlawakgo israelitas?
3 Tiku matliwakglhkgo kintakanajlakan. Paskua nema xtlawakgo judíos xtlawa pi xlaskujnin Jehová xlamatliwakglhkgolh chu akxtum xtawilakgolh. Xlikana pi xfamilia Jesús xkaʼakxilhputunkgo xʼamigos. Na tlan xkalakapaskgo lhuwa judíos chu tiku ni judíos nema xkatatanokglhkgo kJerusalén o ktiji akxni xʼankgo chu xkitaspitkgo.
4. Xlakata makgtapakgsiyaw kxkachikin Jehová, ¿la nalimasiyayaw pi xlakaskinka akxilhaw?
4 Skujni xatalipaw chu xaskgalala ni kajwatiya kinkamaxkiyan likgalhtawakga, wata na lakkaxwili xlakata tlan natamakxtumiyaw chu nakgaxmataw taʼakgchuwin. ¿Tuku xlakata? Pulaktum wa xlakata tlan nalamatliwekglhaw (Heb. 10:24, 25). Wa xlakata kalakkaxwili xlakata sokg nachipina akgatunu kilhtamaku chu akxtum nakatatawilaya minatalan akxni tiku namatsuki tamakxtumit nina wan pi natsuku tatlakgni chu militawilat. Tlakg tlan xwa komo ni xtaxtu tastunut xlakata napina tamawaya tuku nawaya wata xlipi mi liwat chu anta natamakxtakga niku tlawamaka tamakxtumit xlakata tlan nakatachuwinana natalan. Xkachikin akgtum lanka tamaskiwin nema Jehová kinkamaxkinitan chu nikxni nalakpuwanaw pi ni xlakaskinka (Miq. 2:12).
5. ¿Tuku nakinkamakgtayayan xlakata tlakg nalitamakgtayayaw tamakxtumit?
5 Niku tlan nakatsiniyaw. Akxni aktsinajku xwanit Jesús, liwana xkgaxmata tuku xlichuwinankan kpaskua nema xtlawakgo judíos xlakata tlakg xkatsinilh xlakata xTlat xalak akgapun (Luc. 2:41-49). ¿La tlan akinin chu kifamiliajkan tlakg nalitamakgtayayaw putum tuku nalichuwinankan ktamakxtumit? Komo ni lu talakaskin ni kataya chu ni kachuwinanti ktamakxtumit. Ni kamasta talakaskin pi minteléfono, localizador o atanu tuku xtachuna natlawa pi nialh kuenta natlawaya tamakxtumit chu nialh kuenta natlawakgo amakgapitsin. Wa kaʼakxilhti tiku akgchuwinama chu katsokgtilha tsinu tuku tlakg xlakaskinka xlakata tuku lichuwinama. Akgtum familia akxtum xlitawilatkan xlakata natlatni naʼakxilhkgo komo xkamanan kuenta tlawamakgo. Katsisni kalimaxtutit kilhtamaku xlakata nalichuwinanatit tuku tlakg lakgatitit xlakata tuku talichuwinalh ktamakxtumit.
6. ¿Tuku nalakapastakaw xlakata la lhakgananaw chu la takaxtayayaw?
6 Talhakgan chu la takaxtayayaw. Stananin tiku xtitaxtukgo kxtiji Jerusalén tunkun xkalakgapaskgo xfamilia Jesús chu amakgapitsi judíos tiku xkakninanikgo Dios nema xʼamakgo kpaskua o xkitaspitmakgo. ¿Tuku xkalilakgapaskan? Xlakata xkilhpan xfalda xwilinikgo flecos chu xʼakgspun fleco xwilinikgo kgantum cinta xaspupuku (Núm. 15:37-41). Maski uku kstalaninanin Cristo ni kgalhiyaw lhakgat nema nakinkalilakgapaskanan pero kinkalilakgapaskanan xlakata liwana lhakgananaw, xatachakgen linaw kilhakgatkan chu liwana takaxtayayaw. Kuenta natlawayaw xlakata la tasiyayaw akxni anaw ktamakxtumit o kitaspitaw o lamaw niku tatlawama tamakxtumit. Maski nalakgpaliyaw kinlhakgatkan akxni sputnita tamakxtumit chuntiya liwana nalhakgananaw chu nawiliyaw gafete. Chu chuna nakatsikan pi akinin xTatayananin Jehová chu tlan nakinkaʼaxilhkanan.
7. ¿Tuku xlakata naskujputunaw ktamakxtumit?
7 Talakaskin tiku xatapaxuwan skujputunkgo. Xlakata tamakxtumit tlan natawila talakaskin lhuwa tiku namakgtayanankgo. ¿Na tlan xmakgtayaninanti? (Sal. 110:3.) Taskujut nema tatlawa ktamakxtumit na wa likakninaniyaw Dios chu makgtayanan xlakata amakgapitsin tlan nalichuwinankgo xlakskujnin Dios. Chatum tiku lakgaya niku tlawakan tamakxtumit kaks lilakawa akxni kaʼakxilhli tiku kaxakakgolh, xla tsokgnalh: «Kapaxkatkatsiniyan xlakata uma tuku lu tlan kakxilhli nema ni para makgtum xakaʼakxilhnit. Akit xkintalichuwinankanit pi ni anankgo atanu tiku xtachuna la xtatayananin Jehová, makgasa kalilakgapaskanatit unu xlakata tlakg skulunku makgxtakgatit niku tamakxtumiyatit chu ni chuna la akxni kamaxkikanatit. Wixin chu tiku katatapakgsiyatit tlawanitantit pi tlakg tlan natawila unu xlakata nalimaklakaskinkgo kachikin, chu tiku chuna tlawakgonit lu tlan likatsikgo nema akit aku kkalakgapasli».
8. ¿La tlan nalichuwinanaw Dios kachikin niku natatlawa tamakxtumit?
8 Tlan nalichuwinanaw Dios. Lhuwa latamanin tiku lamakgo kkachikin niku natlawakan tamakxtumit naʼakxilhkgo pi chalhuwa tiku naʼankgo anta liwana lhakganankgonit chu liwana takaxtayakgonit chu linkgo gafetes. Ama natlawa pi nakatsiputunkgo tuku xlakata chuna lhakgananaw chu tlan nakalitachuwinana xlakata tamakxtumit. Chatum aktsu kgawasa nema kgalhi akgtati kata lilh kʼakgtum restaurante xasasti likgalhtawakga nema aku xmastakanit ktamakxtumit chu masiyanilh mesera, chu uma tlawalh pi xnatlatni xwanikgolh puskat pi na xʼalh ktamakxtumit.
9. ¿La na tlan nalimasiyayaw pi lu xlakaskinka akxilhaw tuku kinkamaxkiyan Dios chuna la xtlawakgo xfamilia Jesús?
9 Paskua nema xtlawakgo makgasa putum judíos tiku xlakgatikgo tuku xla Dios lu lipaxuw xkgalhkgalhikgo ama kilhtamaku (Deu. 16:15). Xfamilia Jesús xpaxuwakgo akxni xʼankgo tamakxtumit maski lhuwa xliskujkgo chu liwana xlitamakgtayakgo ama paskua. Akinin na lu xlakaskinka akxilhaw kintamakxtumitkan xaʼakgtutu kilhtamaku xlakata katsiyaw pi uma tamaskiwin nema kinkamaxkiyan xapaxkina kinTlatikan xalak akgapun (Sant. 1:17). ¡La uku katsuku takaxa xlakata tlan lipaxuw nakakninaniya Jehová!
[Recuadro xla página 6 chu 7]
Tuku kililakapastakatkan xlakata tamakxtumit xaʼakgtutu kilhtamaku
◼ Hora akxni natsuku chu nakgalhsputa tamakxtumit. Akgtutu kilhtamaku nema nakgalhiyaw tamakxtumit natsuku tsisa 9:20. Tsisa namalakkikan 7:00 niku natlawakan tamakxtumit. Akxni nawankan pi natsuku tatlakgni nema nalimatsukikan tamakxtumit naʼanaw tawilayaw xlakata tamakxtumit natsuku chuna la xlilat. Tamakxtumit nakgalhsputa 4:55 viernes chu sábado, domingo nakgalhsputa 3:40.
◼ Niku kawilikan putlaw. Ni kintikamaxokgekgan niku nawiliyaw putlaw komo anta tapakgsi niku tamakxtumimaw chu chuna la nachintilhakgo putlaw nakakaxwilikan. Na makgataxtikanit niku tlan nakawilikan putlaw nema liminkgo tiku nila tlawankgo o atanu tuku nitlan kalaninit, putlaw xlikgalhit akgtum letrero o placa nema maxkikanit kpumapakgsin niku wan pi tlan anta namakgxtakga. Xlakata ni anan lhuwa niku nakawilikan putlaw, tlakg tlan xwa kaj akgtum putlaw xlipitit komo natanukgoyatit.
◼ Putawilh. Kajwatiya tiku akxtum kataʼanaw kputlaw o tiku wilakgolh kkinchikkan tlan nakamakgataxtiniyaw niku natawilakgo chu nachuna tiku kamakgalhtawakgemaw (1 Cor. 13:5).
◼ Taway. Tlakg tlan nalinaw tuku nawayaw chu ni naʼanaw tamawayaw tastunut. Tlakg tlan komo xaʼaktsina tuku napulipina miliwat nema tlan natamaknuya xtanpin minputawilh. Anta ktamakxtumit ni mastakan talakaskin xalanka tuku napulinaw kiliwatkan chu na ni nalinaw tuku litatlawanit vidrio.
◼ Tumin nema xatapaxuwan tamaskiwinan. Tlan nalimasiyayaw pi paxtikatsiniyaw tamakxtumit akxni xatapaxuwan mastayaw tumin xlakata taskujut nema tatlawa xlikalanka katiyatni, tlan namastayaw anta kPukgalhtawakga xla xTatayananin Jehová o anta klanka tamakxtumit xaʼakgtutu kilhtamaku. Unu kMéxico wantiku namastakgo cheque nawilikgo pi wa maxkimaka «La Torre del Vigía, A.R.».
◼ Akxni wi tuku kaj lakapara nitlan la. Akxni lakapara wi tiku nalani tuku nitlan anta ktamakxtumit, pulana kawani chatum kaxwilina tiku lakatsu ya, chu wa lakapara namakatsininan niku wilakgolh Makuchinanin xlakata anta naʼakxilhkgo tuku kgalhi chu namakgtayakgo.
◼ Tatunu. Kata kata wi tuku nitlan kaliʼakgspula natalan kaj xlakata xtatunukan. Tlakg tlan nalinaw tatunu chuna la xlilat, xlakata tlan kaniwa nalitlawanaw, kʼescaleras, niku wilakgolh rejillas o alakatanu.
◼ Tiku ni liwana kgaxmatkgo. Kmakgapitsi tamakxtumit namatitaxtikan tuku nalichuwinankan kradio (FM), kajwatiya anta niku tatlawama tamakxtumit. Xlakata tlan nakgaxmata natalakaskin nalipina akgtum aktsu radio nema limaklakaskin pilas chu nalipina mi audífono.
◼ Grabación. Ni namakgalhnuyaw kluz cámaras o atanu tuku litlawamaw akgtum grabación chu nipara ksonido nema tamaklakaskima ktamakxtumit. Tlan natlawayaw akgtum grabación pero kuentaj natlawayaw, ni tlawayaw pi amakgapitsin nialh kuentaj natlawakgo tuku talichuwinama.
◼ Tuku kalilinkan lakgskgatan nema kgalhi xllanta chu sillas nema talakgnu chu talakgxtu. Niti nalin tuku kalilinkan lakgskgatan nema kgalhi xllanta chu sillas nema talakgnu chu talakgxtu anta niku natlawakan tamakxtumit. Kajwatiya tlan linkan sillas nema tlan chiwilikan xla lakgskgatan nema tlan kawilikan kxpaxtun niku wilakgolh xanatlatni.
◼ Perfumes. Lhuwa tamakxtumit katlawakan niku putum talakchuwanit chu kgalhikgo aire acondicionado. Wa xlakata limasiyayaw pi paxkinanaw akxni ni wiliyaw lhuwa perfume nema lu takgankgawanan nema max natlawa pi amakgapitsin nalitatatlakgo o nitlan nalimakgkatsikgo (1 Cor. 10:24).
◼ Formularios Sírvase visitar. Tlan nalipina maktum o maktiy formularios: Sírvase visitar (S-43-S) xlakata natsokgwiliya xtukuwanikan chu niku wilakgolh tiku nakatachuwinana akxni nakatatanokglha chu nalakgatikgo tuku nakalitachuwinana. Tlan namastaya uma kapsnat Departamendo de Publicaciones, o secretario xla congregación akxni nataspita kmincongregación (kaʼakxilhti likgalhtawakga La Natlawayaw xTaskujut Dios xla noviembre kata 2009, pág. 4).
◼ Restaurantes. Akxni limasiyayaw tlan tayat krestaurantes malankiyaw xtukuwani Jehová. Klhuwa restaurantes xlitamastat propina 10 o 15%.
◼ Hoteles. 1) Ni kaskinti cuartos nema ni namaklakaskina chu ni kamasta talakaskin tlakg natamakgxtakgkgo, kajwatiya tiku kamaxkikanit talakaskin. 2) Komo nialh namaklakaskina akgtum cuarto tunkun kamakatsininanti khotel. 3) Kalipi tuku pulinkan maletas akxni pinpata maklakaskina chu tunkun kamaspitti xlakata tlan atanu tiku nalimaklakaskin. 4) Ni katlawa liwat khotel komo ni mastakan talakaskin. 5) Chali chali kamakgxtakgni propina tiku kaxaka mincuarto. 6) Ni kamalakatsali la nawaya liwat, café o hielos nema maskiwinankan akxni wilaw khotel. 7) Xliputum kilhtamaku kalimasiya xtawakat espíritu chuna la nakalikatsiniya tiku skujkgo khotel. Kalakapastakti pi lhuwa tiku wilakgolh khotel chu lhuwa taskujut kgalhikgo, wa xlakata napaxtikatsinikgo komo akinin ni lhuwa tuku nakaskiniyaw, tlan nakalikatsiniyaw chu ni nakasitsiniyaw. 8) Kkapsnat niku tatsokgnit tukuya hoteles tlan natamakgxtakgaw wilikanit la naxokgoyaw chali chali, chu tanu naxokgoyaw impuestos. Komo tlakg namatejekana o namatajekana tuku wix nitu skinpat ni kaxokgo, tunkun kamakatsini Departamento tiku Putsakgo niku tlan Natamakgxtakgkgo natalan. 9) Komo nakgalhiya akgtum taʼakglhuwit anta niku tamakgxtakgpat tunkun kamakatsini Departamento tiku Putsakgo niku tlan Natamakgxtakgkgo natalan akxni wijku nawan ktamakxtumit.
◼ Tiku xatapaxuwan skujputunkgo. Tlakg napaxuwayaw klanka tamakxtumit komo namakgtayaninanaw niku natalakaskin xlakata tlan natawila tamakxtumit (Hech. 20:35). Putum tiku makgtayaputunkgo naʼan kDepartamento xlakata tiku Xatapaxuwan Skujputunkgo. Tiku nina kgalhikgo 16 kata na tlan namakgtayanankgo pero wa xnatlatnikan, tiku kakuentajtlawakgo o chatum tiku nakalakgayawakgo xnatlatnikan nakataʼankgo skujkgo.