Kamaklakaskiw jw.org akxni nalichuwinanaw Dios

Kisitiojkan xla Internet lu xlakaskinka xlakata nalichuwinanaw xatlan tamakatsin «asta awatiya kxtankgana tiyat» (Hech. 1:8). Pero, lhuwa latamanin ni lakgapaskgo; katsikgo komo chatum tala litachuwinan o masiyani.

Chatum superintendente viajante maktilh video ¿Tuku xlakata nalikgalhtawakgaya Biblia? kxteléfono chu kamasiyani latamanin akxni kgalhikgo kilhtamaku. Akgtum liʼakxilhtit, akxni lichuwinan Dios kʼakgatunu chiki, wan: «Kaj lakapala kkalakgapaxilhnama latamanin xlakata nakkamakgtaya natekgskgo xtakgalhtin akgtutu takgalhskinin nema lu xlakaskinka: ¿Tuku xlakata lu nitlan wi kakilhtamaku? ¿La nalakkaxtlawa Dios? chu ¿Tuku tlan natlawayaw akinin? Uma video masta xtakgalhtin». Masiyani lataman chu ni kgalhskin komo akxilhputun chu alistalh akxilha komo lakgatilh. Xlakata lu stlan, atsinu ni putum latamanin akxilhkgo video lata tsuku asta kgalhsputa. Alistalh, tala wampara: «Chuna la kgaxpatti, tlan naskina pi nalimakgalhtawakgakana Biblia ksitio jw.org. Pero akit tlan nakmasiyaniyan tsinu la kgalhtawakgakan». Komo tlan tlawa lataman, tala masiyani la tlawakan takgalhtawakga xalak Biblia, limaklakaskin folleto Lakwan tamakatsin masta Dios. Komo lataman ni kgalhi kilhtamaku, wani pi nalakgapaxialhnampara atanu kilhtamaku. Akxni jaxa tsinu niku stakan kape, tsuku tachuwinan tiku wi kxpaxtun chu nachuna wani la kawanilh amakgapitsin. ¿Chu akinin? ¿Limaklakaskimaw jw.org akxni lichuwinanaw Dios?