Kamaklakaskiw jw.org akxni nalichuwinanaw Dios: «Preguntas sobre la Biblia»

Anta kpágina jw.org ksección xla «Enseñanzas bíblicas», limin nema wanikan «Preguntas sobre la Biblia». Komo liwana nalakgapasaw temas nema talichuwinan, lu nakinkamakgtayayan akxni nalichuwinanaw Dios, komo wi tiku natlawa takgalhskinin tuku lichuwinan kʼuma sección, tlan namasiyaniyaw kisitiojkan xla Internet xlakata namaxkiyaw takgalhtin. Na tlan nalimaklakaskinaw umakgolh takgalhskinin xlakata nalimatsukiyaw takgalhchuwin. Niku lichuwinanaw Dios tlan nalaksakaw tuku lakgatikgo latamanin, nakakgalhskinaw tuku lakpuwankgo chu alistalh nakawaniyaw tuku masiya Biblia pero wa nalimaklakaskinaw tuku wan jw.org. O tlan nakamasiyaniyaw niku wi página kʼInternet chu wa nalikgalhtawakgakgo xatakgalhtin. Xpuskat chatum superintendente lu tlan kitaxtuninit akxni wan: «Lhuwa latamanin kakgalhskinkan komo Dios lin kuenta xlakata anan tapatin. ¿Katsiputuna xtakgalhtin? Nipara akgtum minuto katimakgapalalh». Alistalh wilini grabación, nema maktinit kʼjw.org kxteléfono chu alistalh masiyani capítulo 11 xla libro ¿Tuku xlikana masiyay Biblia?