La nakalimaklakaskinaw niku kawilikan likgalhtawakga akxni nalichuwinanaw Dios

Akxni lichuwinankan Dios niku kawilikan likgalhtawakga o mesa xla likgalhtawakga makgtayanan xlakata nakamasiyaniyaw tiku katsiputunkgo tuku xaxlikana (Juan 6:44). Wa xlakata kawanika lakgkgolotsin pi kalakkaxwilikgolh natalichuwinan Dios niku titaxtukgo lhuwa latamanin anta niku lakgchan congregación. Xlakata niku wilikan likgalhtawakga tlan malakxijkan, ni xlakaskinka nakaskiniyaw talakaskin mapakgsinanin. ¿Tiku tlan namakgtayanankgo? Tiku limasiyakgo pi liwana lakapastaknankgo, liwana lhakganankgo chu liwana katachuwinankgo latamanin. Tuku aku naʼakxilhaw, kaj makgapitsi tuku tlan natatlawa chu amakgapitsi tuku ni xlitlawat. Komo chuna natatlawakgo tiku lichuwinankgo Dios tlan nakakitaxtuni akxni nalichuwinankgo.

Tuku natlawaya:

Tlan kakalikatsini chu liwana kakamakgamakglhtinanti tiku natitaxtukgo. Kakatalitsinti chu tlan kakatachuwinanti. Akxni naʼakxilha komo wi tiku kaks akxilhma niku wi likgalhtawakga, tlan nawaniya: «Komo lakgatiya maktum likgalhtawakga, tlan nalipina».
Ni makgat militayat niku wi likgalhtawakga. Kmakgapitsi kachikinin, tiku lichuwinankgo Dios tlan kakitaxtuninit akxni ni makgat tayakgo niku wi xlikgalhtawakgakan, pero lakgachunin nichuna kitaxtu. Komo chuna, max tlakg tlan tsinu makgat natayaya asta akxni wi tiku natalakatsuwi xlakata naʼakxilha likgalhtawakga. Ama kilhtamaku, kalitsakgsa natakgalhchuwinana chu tlan nakgalhskina: «¿Milh kilhtamaku akxni tlawanika uma takgalhskinin?».
Kalimaklakaskinti Biblia akxni namatlaniya.
Komo wi tiku nalin likgalhtawakga nema limastayaw takgalhtawakga xalak Biblia, la libro ¿Tuku xlikana masiyay Biblia?, kalitachuwinanti la tatlawa takgalhtawakga chu kawani pi nawiliniya video ¿Tuku xlakata nalikgalhtawakgaya Biblia? kminteléfono o atanu.
Komo limasiya pi tlakg katsiputun, kaskini xdirección komo chuna nalakaskin.