Tlakg Kakatsini La Nalichuwinana Dios: Kalakgpali tuku xlakkaxwilinita nalichuwinana komo talakaskin

TUKU XLAKATA XLAKASKINKA. Xatalaksakni chu amakgapitsi borregos kawanikgo kaxatikawa latamanin kalikgotnankgolh «nchuchut xla latamat ntu nkaj litlan mastakan» (Ap 22:17). Uma chuchut kilhchanima putum tuku Jehová tlawanit xlakata nakalakgmaxtu latamanin tiku kgalhakgaxmatnankgo kkalinin chu ktalakgalhin. Xlakata nakamakgtayayaw latamanin tiku tanu tanu takanajla chu talismanin kgalhikgo, talakaskin namasiyayaw «xatlan tamakatsin» chuna la latamanin nalakgatikgo (Ap 14:6).

LA NATLAWAYAW

• Kalaksakti pulaktum tuku nalichuwinana chu akgtum texto nema tlan nakalakgchan xnakujkan latamanin niku lichuwinana Dios. Tlan nalaksaka pulaktum liʼakxilhtit xla página 1 o nalilakpuwana pulaktum tuku tlan kitaxtuninitan. ¿Tuku tema chu texto tlan kitaxtu lichuwinankan? ¿Tuku noticia lichuwinamakgo latamanin? ¿Tuku lakgatikgo lichuwinankgo lakchixkuwin? ¿Tuku lakgatikgo lichuwinankgo lakpuskatin?

• Akxni nakgalhchuwinana, kuentajkatlawa talismanin chu la kgalhchuwinankan niku wix lapat (2Co 6:3, 4).

• Liwana kalakgapasti likgalhtawakga chu videos nema wi kkit de enseñanza, xlakata chuna tlan namaklakaskina akxni natachuwinana tiku tlakg katsiputun.

• Kamakti likgalhtawakga chu videos ktachuwin nema chuwinankan niku lichuwinana Dios.

• Kalakgpali tuku xlakkaxwilinita nalichuwinana komo atanu tuku katsiputun tiku tachuwinampat (1Co 9:19-23). Akgtum liʼakxilhtit, ¿tuku xwanti komo xkatsi pi chatum lataman nilh tiku lu xpaxki?

AKXNI AKXILHNITATA VIDEO, KAKGALHTI UMAKGOLH TAKGALHSKININ:

• ¿Tuku limatsukilh takgalhchuwin uma tala?

• ¿Tuku xtitaxtuma uma lataman?

• ¿Tuku texto tlakg tlan xwanit xmaklakaskilh chu tuku xlakata?

• ¿La lakgpaliya wix mintakgalhchuwin xlakata latamanin niku lichuwinanatit Dios nalakgatikgo tamakatsin?