ARTÍCULO NEMA NATALIKGALHTAWAKGA 50
«Nakintatawilayapi kParaíso»
«Xlikana kwaniyan uku: nakintatawilayapi kParaíso» (LUC. 23:43).
TAKILHTLIN 145 Dios malaknu stlan Paraíso
TUKU NATALICHUWINANa
1. ¿Tuku wanilh Jesús chatum chixku tiku xtlawanit tuku nitlan chu xpaxtuwaka? (Lucas 23:39-43).
JESÚS chu chatiy tiku xtlawakgonit tuku nitlan chu xpaxtuwakakgo lu xpatinamakgo (Luc. 23:32, 33). Umakgolh chatiy lakchixkuwin xlikgalhkgamanamakgo Jesús, uma liwana limasiya pi ni kstalaninanin xwankgonit (Mat. 27:44; Mar. 15:32). Pero chatum lakgpalilh tuku xlakpuwan. Wa: «Jesús, kakilakapastakti akxni natanuyapi kminTamapakgsin». Chu Jesús kgalhtilh: «Xlikana kwaniyan uku: nakintatawilayapi kParaíso» (kalikgalhtawakga Lucas 23:39-43). Ni anan tuku limasiya pi uma chixku makgamakglhtinalh tuku Jesús lichuwinalh xlakata «Tamapakgsin xalak akgapun». Chu Jesús nikxni wa pi uma chixku xʼama makgtapakgsi kTamapakgsin (Mat. 4:17). Jesús xlichuwinama Paraíso nema xʼama anan kKatiyatni kkilhtamaku nema aku mima. ¿Tuku likatsiyaw?
¿Tuku katsiyaw xpalakata chixku tiku xpaxtuwaka Jesús chu tuku xkatsi uma chixku? (Kaʼakxilhti párrafos 2 chu 3).
2. ¿Tuku kinkamalakpuwaniyan pi uma chixku judío xwanit?
2 Max uma chixku judío xwanit. Uma chixku kgalhskilh achatum chixku tiku na anta xwaka: «¿Nipara tsinu pekuaniya Dios maski malakgaxokgepaka chuna la uma chixku?» (Luc. 23:40). Judíos xkakninanikgo kaj chatum Dios, pero latamanin xalak atanu kachikinin xkakninanikgo lhuwa dioses (Éx. 20:2, 3; 1 Cor. 8:5, 6). Komo umakgolh lakchixkuwin ni judíos xwankgonit, max xtikgalhskininalh: «¿Nipara tsinu kapekuaniya dioses?». Nachuna, xlakata Jesús makaminka “nakamakgtaya tiku xalak Israel”, xla ni lu xkalitachuwinan xatlan tamakatsinin tiku xalak atanu kachikinin (Mat. 15:24). Chu Dios xkamakatsininita israelitas pi xla xʼama kamalakastakwani tiku xnikgonita. Max uma chixku xkatsi, chu tuku wa limasiya pi xʼakgatekgsa pi Jehová xʼama malakastakwani Jesús xlakata xmapakgsinalh kxTamapakgsin. Uma kinkamasiyaniyan pi uma chixku na xkgalhi takgalhkgalhin pi Dios xʼama malakastakwani.
3. ¿Tuku max lakpuwa chixku tiku xtlawanit tuku nitlan akxni kgaxmatli pi Jesús lichuwinalh Paraíso? (Génesis 2:15).
3 Komo uma chixku judío xwanit, xkatsi pi Jehová xkawilinit Adán chu Eva kʼakgtum Paraíso. Wa xlakata akxni Jesús lichuwinalh akgtum Paraíso, uma chixku max lilakpuwa akgtum stlan jardín unu kKatiyatni (kalikgalhtawakga Génesis 2:15).
4. ¿Tuku xlilat nakinkamalakpuwaniyan tuku Jesús wanilh chixku tiku xtlawanit tuku nitlan?
4 Tuku Jesús wanilh chixku tiku xpaxtuwaka xlitlawat pi nalilakpuwanaw la nawan latamat kParaíso. Pulaktum tuku nakinkamakgtayayan wa nalilakpuwanaw takaksni nema xʼanan akxni xmapakgsinama Salomón. Biblia lichuwinan pi Jesús «tlakg xlakaskinka nixawa Salomón». Wa xlakata tlan liwana nakanajlayaw pi Jesús chu tiku natamapakgsinankgo natlawakgo pi Katiyatni kalilakgatit nawan (Mat. 12:42). Wa xlakata, «amakgapitsi borregos» xlikatsinitkan tuku xlitlawatkan xlakata tlan nalatamakgo putum kilhtamaku kParaíso (Juan 10:16).
¿LA NAWAN LATAMAT KPARAÍSO?
5. ¿La lakpuwana pi nawan latamat kParaíso?
5 ¿La lakpuwana pi nawan latamat kParaíso? Max lilakpuwana akgtum lu stlan parque, chuna la jardín xaʼEdén (Gén. 2:7-9). O max lakapastaka xtachuwin Miqueas niku wan pi xlakskujnin Dios «chatunu chatunu natawila kxtampin xakiwi xʼuvas chu kxtampin xʼhiguera» (Miq. 4:3, 4). Chu max lakapastaka texto xalak Biblia niku wan pi naʼanan lhuwa liwat (Sal. 72:16; Is. 65:21, 22). Wa xlakata max lilakpuwana pi wila kʼakgtum lu stlan jardín chu kmilakatin wi akgtum mesa niku wi lakgkgama liwat. ¿Lilakpuwana la lu stlan muksunkgo lakglilakgatit xanat? ¿Chu tlan kgaxpata la miʼamigos chu tiku xalak mifamilia litsimakgo chu akxtum paxuwamakgo? Max makgapitsin xnikgonita pero kamalakastakwanika. Uma ni kaj akgtum tamanixnat. Chuna nala kKatiyatni. Anta kParaíso na naʼanan taskujut nema lu nakinkamakgapaxuwayan.
Natalakaskin nakamasiyaniyaw tiku nalakastakwanankgo (Kaʼakxilhti párrafo 6).
6. ¿Tuku natlawayaw kParaíso? (Kaʼakxilhti dibujo).
6 Jehová kinkamalakatsukin xlakata nalipaxuwayaw kintaskujutkan (Ecl. 2:24). Akxni Cristo namapakgsinan Akgtum Mil Kata nakgalhiyaw lhuwa taskujut. Lhuwa latamanin tiku nalakgtaxtunikgo lhuwa tapatin chu tiku nalakastakwanankgo namaklakaskinkgo lhakgat, liwat chu niku natawilakgo. Natalakaskin lhuwa chu lu palha naskujaw xlakata nakamaxkiyaw putum uma, pero lu nalipaxuwayaw. Xtachuna la Adán chu Eva kuentajtlawakgolh jardín xaʼEdén, akinin na nakgalhiyaw talakgalhaman akgtum Paraíso natlawayaw Katiyatni. Na kalilakpuwanti la napaxuwayaw akxni nakamasiyaniyaw lhuwa latamanin tiku nalakastakwanankgo chu ni lhuwa tuku katsinikgolh xlakata Jehová chu xtalakaskin. Nachuna, tlan nakamasiyaniyaw tuku xasasti xlakskujnin Dios tiku nikgolh akxni nina xmin Jesús kKatiyatni.
7. ¿Tuku liwana katsiyaw chu tuku xlakata?
7 Liwana katsiyaw pi kParaíso naʼanan takaksni chu nitu kintikatsankganin. ¿Tuku xlakata? Xlakata Jehová limaklakaskilh xtamapakgsin Salomón xlakata nakinkamasiyaniyan la nawan latamat akxni xKgawasa namapakgsinan kKatiyatni.
XTAMAPAKGSIN SALOMÓN KINKAMASIYANIYAN LA NAWAN LATAMAT KPARAÍSO
8. ¿La kgantaxtulh tuku lichuwinan Salmo 37:10, 11, 29 makgasa? (Kaʼakxilhti artículo «Tuku katsiputunkgo tiku likgalhtawakgakgo» kʼuma revista).
8 Jehová malakpuwanilh David xlakata xtsokgwililh la xʼama wan latamat kkilhtamaku nema aku mima akxni xmapakgsinalh chatum mapakgsina tiku xaskgalala chu ni makgxtakgnan (kalikgalhtawakga Salmo 37:10, 11, 29). Akxni kalitachuwinanaw amakgapitsi latamanin xlakata Paraíso, makglhuwa limaklakaskinaw Salmo 37:11. Chu lu tlan pi chuna tlawayaw, xlakata Jesús limaklakaskilh uma texto kxTaʼakgchuwin xalak Sipi. Chuna limasiyalh pi umakgolh tachuwin xʼama kgantaxtu kkilhtamaku nema aku xmima (Mat. 5:5). Pero tuku tsokgwililh mapakgsina David na limasiyalh la xʼama wan latamat kxkilhtamaku Salomón. Kʼuma kilhtamaku, kkachikin Israel xʼanan takaksni chu tlan xkakitaxtunima. Xlamakgo kʼakgtum tiyat niku xʼanan leche chu ksakgsi cera. Dios xwanit: «Komo chuntiya nalilatapayatit kilimapakgsin […], akit naklimin takaksni kkachikin, chu wixin nalhtatayatit chu niti katikamakgapekuan» (Lev. 20:24; 26:3, 6). Uma tuku xmalaknunit kgantaxtulh akxni xmapakgsinama Salomón (1 Crón. 22:9; 29:26-28). Chu Jehová lichuwinalh pi latamanin tiku lixkajni xlikatsikgo xʼamaka kamalakgsputukan (Sal. 37:10). Tlan nawanaw pi tuku lichuwinan Salmo 37:10, 11 chu 29 kgantaxtulh makgasa chu na nakgantaxtu kkilhtamaku nema aku mima.
9. ¿Tuku wa mapakgsina xalak Saba xlakata xtamapakgsin Salomón?
9 Mapakgsina xalak Saba katsilh pi lu tlan xkakitaxtunima israelitas kxtamapakgsin Salomón, xlakata xkgalhikgo takaksni chu putum tuku xmaklakaskinkgo. Xla alh asta kJerusalén xlakata naʼakxilha komo xlikana tuku xlitachuwinankanit (1 Rey. 10:1). Akxni akxilhli tuku la xwanit xtamapakgsin Salomón, xla wanilh: «Nipara itat tuku xkiwanikanit. […] ¡Paxuwakgo lakchixkuwin tiku tapakgsinikgoyan chu paxuwakgo miskujnin, tiku ankgalhin tawilakgon chu kgaxmatkgo miliskgalala!» (1 Rey. 10:6-8). Pero tasikulunalin nema xʼanan kxtamapakgsin Salomón kaj tsinu limasiya tuku natlawa Jehová xpalakata latamanin akxni xKgawasa, Jesucristo, namapakgsinan kKatiyatni.
10. ¿Tuku xlakata Jesús tlakg lanka nixawa Salomón?
10 Salomón nipara tsinu tatalakxtumi xlilanka Jesús. Salomón chatum chixku tiku xkgalhi talakgalhin chu lhuwa tuku nitlan tlawalh nema nitlan kitaxtunilh xkachikin Dios. Pero Jesús chatum Mapakgsina tiku ni kgalhi talakgalhin chu nikxni tlawa tuku nitlan (Luc. 1:32; Heb. 4:14, 15). Nachuna, tayanilh putum tuku Satanás liputsananilh. Cristo limasiyanit pi nikxni katitlawalh talakgalhin chu ni katitlawalh tuku nitlan nakakitaxtuni tiku natapakgsinikgo xTamapakgsin. ¡Xlikana pi akgtum lanka talakgalhaman pi wa kiMapakgsinakan!
11. ¿Tiku namakgtayakgo Jesús?
11 Jesús nakgalhi xtamakgtay 144,000 mapakgsinanin chu akxtum nakakuentajtlawakgo latamanin chu namakgantaxtikgo xtalakaskin Jehová xlakata Katiyatni (Apoc. 14:1-3). Umakgolh mapakgsinanin na titaxtukgolh tuku tuwa akxni xlamakgo unu kKatiyatni. Wa xlakata lu nakinkaʼakgatekgsnikgoyan. ¿Tuku taskujut natlawakgo?
¿TUKU TASKUJUT NATLAWAKGO TIKU XATALAKSAKNI?
12. ¿Tuku taskujut nakalakgayawa Jehová 144,000 tiku xatalaksakni?
12 Jesús chu 144,000 tlakg lhuwa taskujut natlawakgo nixawa tuku tlawalh Salomón. Uma mapakgsina xalak Israel xkakuentajtlawa chu xkamapakgsi kaj ni lhuwa latamanin kʼakgtum país. Pero tiku namapakgsinankgo kxTamapakgsin Dios nakakuentajtlawakgo lhuwa millón latamanin kxlikalanka Katiyatni. ¡Jehová kamaxki akgtum lanka talakgalhaman 144,000 tiku xatalaksakni!
13. ¿Tuku xlakaskinka taskujut natlawakgo tiku natamapakgsinankgo Jesús?
13 Chuna la Jesús, 144,000 mapakgsinanin chu sacerdotes nalitaxtukgo (Apoc. 5:10). Limapakgsin nema maxkika Moisés xwan pi sacerdotes xlikuentajtlawatkan xwanit kachikin xlakata ni lu xtatatlakgolh chu tliwakga xkgalhikgolh xtakanajlakan. Xlakata Limapakgsin «xmastilenkg tuku aku namin», xlilat nalakpuwanaw pi tiku natamapakgsinankgo Jesús natlawakgo akgtum lu xlakaskinka taskujut: nakamakgtayakgo xkachikin Dios xlakata nialh natatatlakgo chu tlan natawila xtakanajlakan (Heb. 10:1). Xlikana, ni katsiyaw la umakgolh mapakgsinanin chu sacerdotes nakawanikgo tiku nalatamakgo kKatiyatni tuku xlitlawatkan. Pero maski ni katsiyaw la nalakkaxwili Jehová taskujut, lipawanaw pi tiku nalatamakgo kKatiyatni nakgalhikgo xtapulalit Jehová (Apoc. 21:3, 4).
¿TUKU XLITLAWATKAN «AMAKGAPITSI BORREGOS» XLAKATA TLAN NALATAMAKGO KPARAÍSO?
14. ¿Tuku lakxtum katlawa «amakgapitsi borregos» chu «ni xalhuwa borregos»?
14 Jesús kalimapakuwilh «ni xalhuwa borregos» latamanin tiku natamapakgsinankgo (Luc. 12:32). Chu na lichuwinalh xlipulaktiy grupo, nema kalimapakuwilh «amakgapitsi borregos». Umakgolh akgtiy grupos kgamputum borregos litaxtukgo (Juan 10:16). Akxtum skujmakgolha chu chuntiya natlawakgo akxni Katiyatni akgtum Paraíso nawan. Ama kilhtamaku «ni xalhuwa borregos» wilakgolha nawan kʼakgapun chu «amakgapitsi borregos» nakgalhikgo takgalhkgalhin pi tlan nalatamakgo kKatiyatni putum kilhtamaku. Pero «amakgapitsi borregos» wijku tuku xlitlawatkan xlakata tlan nalatamakgo kParaíso.
La uku tlan nalimasiyayaw pi latamaputunaw kParaíso (Kaʼakxilhti párrafo 15).b
15. 1) Akinin tiku makgtapakgsiyaw «amakgapitsi borregos», ¿la kamakgtayayaw xnatalan Cristo? 2) ¿La tlan nastalaniya xliʼakxilhtit tala tiku tasiya kdibujo?
15 Chixku tiku xpaxtuwaka Jesús nialhla limasiyalh pi lu xpaxtikatsini Jesús tuku xtlawanit xpalakata. Pero akinin, «amakgapitsi borregos» tipalhuwa la tlan nalimasiyayaw pi paxtikatsiniyaw. Akgtum liʼakxilhtit, limasiyayaw pi paxkiyaw Jesús xlakata la kalikatsiniyaw xnatalan tiku xatalaksakni. Jesús wa pi chuna la amakgapitsi borregos xkalikatsinikgolh xnatalan, wa tuku xʼamaka kalilakputsananikan (Mat. 25:31-40). Pulaktum la nakamakgtayayaw xnatalan Cristo wa pi xatapaxuwan nalichuwinanaw Dios chu nakamakgalhtawakgeyaw latamanin (Mat. 28:18-20). Wa xlakata, maklakaskimputunaw putum tuku kinkamaxkikgoyan xlakata namakgalhtawakgenanaw, chuna la libro Kalipaxuwa latamat. Komo wix niti limakgalhtawakgepat Biblia, kaliskujti xlakata wi tiku namalaknuniya akgtum takgalhtawakga xalak Biblia
16. ¿Tuku tlan natlawayaw la uku xlakata tlan nalatamayaw kParaíso?
16 Ni talakaskin nakgalhkgalhiyaw asta akxni nalatamayaw kParaíso xlakata nalikatsiyaw la Jehová lakaskin. La uku kiliskujatkan xlakata xaʼakgstitum nalinaw kilatamatkan chu ni namalakatsaliyaw. Na talakaskin ni namakgxtakgaw Jehová, ni naʼakgskgawiyaw kinchixkukan o kimpuskatkan chu ni nakamakgxtakgaw kinatalankan. Komo la uku liskujaw xlakata nakgalhakgaxmataw xlimapakgsin Dios maski lamaw kxalixkajni kakilhtamaku, tlakg ni tuwa katimakgkatsiw chuna natlawayaw kParaíso. Nachuna, tlan wi tuku nakatsiniyaw natlawayaw xlakata nalimasiyayaw pi liskujmaw xlakata tlan nalatamayaw kParaíso. Kaʼakxilhti artículo «¿Tlantiya nalatapaya kxasasti kakilhtamaku?» nema min kʼuma revista.
17. ¿Tuku xlakata ni kilimastatkan talakaskin pi tuku nitlan tlawaw makgasa lu nakinkamakgalipuwanan?
17 Na kiliskujatkan xlakata nialh nalilipuwanaw talakgalhin nema tlawaw makgasa. Xlikana, ni lakpuwamputunaw pi talakgmaxtut kinkamaxkiyan talakaskin “natlawayaw talakgalhin” (Heb. 10:26-31). Pero komo xlikana nitlan limakgkatsiyaw tuku nitlan tlawaw, putsanitaw xtamakgtay Jehová chu xtamakgtaykan lakgkgolotsin chu talakgpalinitaw, tlan lipawanaw pi xla xatapaxuwan kinkatapatinitan (Is. 55:7; Hech. 3:19). Kalakapastakwi tuku kawanilh Jesús fariseos: «Ni kminit katasani tiku xaʼakgstitum, wata wa tiku tlawakgo talakgalhin» (Mat. 9:13). Chuna, tlan kinkatapatikanan putum kintalakgalhinkan xlakata talakgmaxtut.
WIX TLAN NALATAPAYA KPARAÍSO PUTUM KILHTAMAKU
18. ¿Tuku litachuwinamputuna chixku tiku xpaxtuwaka Jesús?
18 Kalilakpuwanti pi kParaíso tachuwinampat chixku tiku xpaxtuwaka Jesús. Max minchatiykan nalichuwinanatit pi lu paxtikatsiniyatit Cristo xlakata xtamakamastan. Max wix nawaniya pi kalitachuwinan tuku lalh kxaʼawatiya hora akxni Jesús latamalh kKatiyatni chu la makgkatsilh akxni kgaxmatli xtakgalhtin Jesús xlakata tuku skinilh. Chu max uma chixku nakgalhskinan la xwanit latamat kxaʼawatiya kilhtamaku. ¡Akgtum lanka talakgalhaman nawan nakamasiyaniyaw tuku wan xTachuwin Dios latamanin tiku chuna la uma chixku! (Efes. 4:22-24).
Anta kParaíso, chatum tala limakgatawakgama tuku ankgalhin xtlawaputun (Kaʼakxilhti párrafo 19).
19. ¿Tuku xlakata ni katilitlakgwaw latamat kParaíso? (Kaʼakxilhti dibujo nema min kxmakni revista).
19 Kparaíso nikxni katilitlakgwaw latamat. Ankgalhin naʼanan tiku tlan nakatachuwinanaw chu nakgalhiyaw akgtum taskujut nema nakinkamakgapaxuwayan. Chu tuku tlakg tlan, wa pi chali chali tlakg nalakgapasaw kinTlatkan xalak akgapun chu nalipaxuwayaw xtamaskiwin. Chuntiya nakatsiniyaw tuku ni xkatsiyaw xpalakata Jehová chu xtamalakatsukin. Tapaxkit nema kgalhiniyaw kiDioskan nastaktilha chali chali. ¡Lu paxtikatsiniyaw Jehová chu Jesús pi kinkamalaknunikgonitan latamat nema nikxni sputa anta kParaíso!
TAKILHTLIN 22 ¡Kamilh xTamapakgsin Dios!
a ¿Lakgatiya lilakpuwana la nawan latamat kParaíso? Lu kinkamakgpuwantiniyan akxni chuna tlawayaw. Akxni tlakg lilakpuwanaw tuku Jehová kinkamalaknuninitan, tlakg xatapaxuwan kalitachuwinanaw latamanin xasasti kakilhtamaku. Uma artículo namatliwakglha takanajla nema kgalhiniyaw tamalaknun nema Jesús tlawalh xlakata Paraíso.
b TUKU TASIYA KDIBUJO: Chatum tala tiku kgalhkgalhima nakamasiyani tiku nalakastakwanankgo kalitachuwinamaja Biblia amakgapitsin.