¿Kinkamakgtayayan Biblia namaxkiyaw kakni tuku lakpuwankgo amakgapitsin?
Latatayanikan akgtum «tayat nema tlawa pi na’anan takaksni» (Declaración de Principios sobre la Tolerancia de la Unesco, 1995).
Akxni ni latatayanikan tlawa pi max ni nalamaxkikan kakni chu asta ni nala akxilhputunkan. Chu uma tayat tlawa pi nalawaniya laklixkajni tachuwin, talaksakpaxkit o tatalachipat.
Lhuwa latamanin tanu tanu la lakpuwankgo xlakata uma tayat. Makgapitsi lakpuwankgo pi uma wamputun natatayaya putum tayat chu tuku tatlawa. Pero, amakgapitsi lakpuwankgo chuna la wan Biblia: chatum tiku tatayaninan wa tiku maxki kakni tuku laksakkgo latamanin, chuna la xtakanajlakan chu tuku lakpuwankgo, maski xla nichuna lakpuwan.
¿Tlan nakinkamakgtayayan Biblia nalatatayaniyaw kʼuma kakilhtamaku?
Biblia chu latatayanikan
Biblia wan pi nalatatayaniyaw. «Putum latamanin kakatsikgolh pi tlan talakapastakni kgalhiyatit» (Filipenses 4:5). Nachuna kinkamakgpuwantiniyan xaʼakgstitum nakalikatsiniyaw, nakalilakpuwanaw amakgapitsin chu tlan nakalikatsiniyaw. Wa xlakata, tiku stalanikgo uma tastakyaw ni tlawa pi amakgapitsin namachokgokgo tuku tlawaputunkgo maski ni tatayakgo tuku lakpuwankgo.
Pero kBiblia katsiniyaw pi Dios kamaxkinit limapakgsin latamanin chuna la xlilinatkan xlatamatkan. Anta wan: «Chixku, [Dios] waninitan tuku tlan» (Miqueas 6:8). Dios kinkawaniyan anta kBiblia tuku kilitlawatkan komo lakaskinaw xatapaxuwan nalatamayaw (Isaías 48:17, 18).
Nachuna, Dios ni kinkamaxkiyan talakaskin nakalakputsananiyaw amakgapitsin. Biblia wan: «Kajwatiya Dios xMastana limapakgsin chu Juez. […] ¿tiku litaxtuya xlakata nalakputsananiya mintalataman?» (Santiago 4:12). Xla masta talakaskin pi chatunu chatunu nalaksaka tuku natlawa chuwa nalin kuenta tuku nakitaxtu alistalh (Deuteronomio 30:19).
Biblia chu mastakan kakni
«Kakamaxkitit kakni putum latamanin», wan Biblia (1 Pedro 2:17, El libro del Pueblo de Dios). Wa xlakata tiku laksakkgo nalilatamakgo xtastakyaw Biblia nakalimasiyanikgo kakni putum latamanin, maski tanu tanu tuku kanajlakgo chu la linkgo xlatamatkan (Lucas 6:31). Uma ni wamputun pi makgamakglhtinankgo putum takanajla o tuku lakpuwankgo, chu ni putum tatayakgo tuku laksakkgo amakgapitsin. Pero uma ni tlawa pi nitlan nakalikatsinikgo wata liskujkgo nalimasiyakgo kakni chuna la tlawalh Jesús.
Kalichuwinaw uma, akgtum kilhtamaku Jesús lakgapasli chatum puskat tiku xkgalhi tanu takanajla nema Jesús ni xtataya. Nachuna, chixku tiku xtawi ni xtatamakgaxtokgnit, chu Jesús nani xtataya uma. Pero maski chuna Jesús limasiyanilh kakni (Juan 4:9, 17-24).
Chuna la Jesús, kstalaninanin Cristo “limasiyakgo pi lu mastakgo kakni” akxni kalitachuwinankgo xtakanajlakan tiku kgaxmatputunkgo (1 Pedro 3:15). Biblia kalimapakgsi kstalaninanin Cristo ni nakamafuerzalikgo amakgapitsin nachuna nalakpuwankgo chuna la xlakan. Wan pi chatum kstalanina Cristo «ni talakaskin natalachipanan, wata tlan nakalikatsini putum latamanin», asta tiku tanu tuku lakpuwankgo (2 Timoteo 2:24).
Biblia chu talamakgasitsin
Biblia wan: «Putum tlan kakatalalipitit» (Hebreos 12:14). Tiku putsa takaksni lakgmakgan tasitsi chu liskuja xlakata putum tlan nakatalalin. Pero ni namalakatsali xlimapakgsin Dios (Mateo 5:9). Anta kBiblia na makgpuwantininan pi kstalaninanin Cristo napaxkikgo xtalatlawananinkan. Uma wamputun pi tlan nakalikatsinikgo maski xlakan nitlan nakalikatsinikan (Mateo 5:44).
Biblia wan kProverbios 6:16-19 pi Dios «ni akxilhputun» o «xkajni» tiku katlawanikgo tuku nitlan amakgapitsin. Pero unu Biblia maklakaskin tachuwin ni akxilhputun xlakata namasiya pi Dios xkajni: tuku nitlan tlawakan. Biblia lichuwinan pi katapati chu kamakgtaya putum tiku lakgpaliputunkgo xlatamatkan chu tiku kgaxmatputunkgo xlimapakgsin (Isaías 55:7).
Textos xalak Biblia niku lichuwinan nalatatayanikan chu nalamaxkikan kakni
Tito 3:2: «Liwana kalakapastaknankgolh, ankgalhin kakalimasiyanikgolh putum latamanin pi kgalhikgo tsatata naku».
Chatum tiku liwana lakapastaknan ni lakapala sitsi akxni kgaxmata tuku wankgo amakgapitsin maski ni watiya tuku lakpuwan xla chu tlawa pi kaʼanalh takaksni.
Mateo 7:12: «Chuna la lakaskinatit nakalikatsinikgoyan latamanin, nachuna wixin kakalikatsinikgotit».
Kimputumkan lakgatiyaw nakinkalimasiyanikanan kakni chu nakuentajtlawakgo tuku lakpuwanaw chu tuku makgkatsiyaw. Xlakata tlakg nakatsiya la nalilatapaya tuku Jesús masiyalh, kaʼakxilhti artículo «¿Qué es la Regla de Oro?».
Josué 24:15: «Kalaksaktit la uku tiku skujnaniputunatit».
Makgtayananaw naʼanan takaksni akxni kamaxkiyaw kakni amakgapitsin xlakata tuku laksakkgo.
Hechos 10:34: «Dios ni laksakpaxkinan».
Dios ni kalaksakpaxki latamanin xlakata xtalismanin, komo chixku o puskat, xkachikin, xcolor, tuku titaxtunit o tuku titaxtuma la uku. Tiku likatsiputunkgo chuna la Dios kamaxkikgo kakni putum latamanin.
Habacuc 1:12, 13: «Wix ni akxilhputuna tuku nitlan».
Chuna la tatayaninan Dios ni putum kilhtamaku makgapala. Xla ni katimastalh talakaskin pi putum kilhtamaku latamanin chuntiya natlawakgo tuku nitlan. Xlakata tlakg nakatsiya, ka’akxilhti video ¿Tuku xlakata Dios masta talakaskin kaʼanalh tapatin?
Romanos 12:19: «Kamakgxtakgtit pi Dios nalimasiyani xtasitsi ama tuku nitlan; xlakata tatsokgnit: “Akit nakkamalakgaxokge xlakata tuku nitlan tlawakgolh”».a
Jehová niti maxkinit talakaskin pi wi tiku namalakgaxokgenan. Xla katsi tuku kilhtamaku nakamalakgaxokge. Xlakata tlakg nakatsiya, kalikgalhtawakga artículo «¿Alguna vez se hará justicia en el mundo?».
a Jehová wa xtukuwani Dios (Salmo 83:18). Kaʼakxilhti artículo «¿Tiku Jehová?»