Makgtayanankan kxlikalanka katiyatni kpandemia

Marzo kata 2020 akxni Organización Mundial de la Salud wa pi tajatat xla COVID-19 akgtum pandemia xwanit, ni lhuwa tiku xlakpuwankgo pi uma tajatat chuntiya xʼama kamakgapatinan latamanin kxlikalanka katiyatni akgtum kata alistalh. Xlakata uma pandemia, millones latamanin, asta xtatayananin Jehová, lu lipatinankgonit. Litatatlakgonit, kalimininit talipuwan chu titaxtukgonit tuku lu tuwa xlakata ni kgalhikgo tumin. ¿Tuku tlawakgonit xtatayananin Jehová xlakata nakamakgtayakgo xnatalankan?

Kamakgtayakan tiku maklakaskinkgo

Comité de Coordinadores xla Lakgkgolotsin tiku Pulalinkgo xtatayananin Jehová, kawaninit natalan la nalakkaxwilikgo liwaka 950 Comités de Socorro kxlikalanka katiyatni xlakata namakgtayanankgo kʼuma pandemia xla COVID-19. Minit kilhtamaku, comités lakkaxwilikgonit la nakamakgtayakgo natalan kʼakgatunu kachikinin, chu amakgapitsi kilhtamaku xtatayananin Jehová makglhtinankgonit xtamakgtaykan mapakgsinanin. Nachuna, Comités de Socorro lhuwa tuku atanu lakkaxwilikgonit xlakata nakamakgtayakgo xnatalankan.

Akgtum liʼakxilhtit, kalichuwinaw tuku lama kParaguay. Maktum periódico lichuwinan pi xlakata ni anan tumin xlakata wilaw kʼakgtum pandemia, lhuwa latamanin xalak Paraguay ni kaʼakchani tuku naliwayankgo. Pero Comité de Socorro xalak Paraguay xtsukunita makgpitsi paquetes nema xkaʼakchanilh akgtiy semana. Akgatunu paquete, 30 dólares xtapalh chu limin liwat chu atanu tuku tamaklakaskin kʼakgtum familia niku kgalhtati wilaka.

¿Tuku tlawakgo tiku makgtayanamakgo xlakata ni nakapasa COVID-19 chu xlakata ni nakamapasikgo amakgapitsin? Maklakaskinkgo cubrebocas chu ni lu latalakatsuwinikgo. Na lu kuenta tlawakgo pi tiku kastamaxkimakgo liwat kaskulunku niku skujmakgo chu pi kgalhakgaxmatkgo tuku lakkaxwilikgonit mapakgsinanin xlakata la natamakgtakgalhkan. Na lu kuenta tlawakgo pi putum tiku xamakgo paquetes nawilikgo cubrebocas chu guantes, nakaxakakgo xputlawkan chu nakaxakakgo niku namakikgo paquetes. Chu tiku makgpitsikgo ni lu katalakatsuwinikgo natalan akxni kamaxkikgo.

Liwana akxilhkan la namaklakaskinkan donaciones

Enero kata 2021, Comité de Coordinadores xlakkaxwilinit pi xmaklakaskinka liwaka 25 millones de dólares xlakata xkalimakgtayaka tiku xtitaxtumakgo tuku tuwa xlakata COVID-19. Sucursales chu Comités lu kuenta tlawakgo la namaklakaskinkgo donaciones chu lu liskujkgo xlakata ni tapalaxla naxokgokgo tuku natamawakgo. Akgtum liʼakxilhtit, anta kChile, tiku lakgayakgo nakamakgtayakgo natalan xtamawaputunkgo 750 kilos lentejas. Pero kaj akgtum papaʼ xtitaxtunit lu xtapalaxlanit lenteja. Natalan talakkaxlakgolh tiku ksta lenteja pi xʼamakgo makgtamawakgo maski tapalaxla xwanit. Pero, akgtiy hora alistalh, stana kawanilh pi atanu tiku xmakgtamawanit lentejas, xmaspitninit tuku xmakgtamawanit. Wa xlakata, kawanilh pi xʼama kalistamaxki umakgolh lentejas chuna la xlistama xapulana.

Pero akxni natalan xʼamakgo tiyakgo lentejas, stana nialh xkastamaxkiputun. Kalimawakalh pi xtlawamakgo chuna la amakgapitsin organizaciones chu ni lakxtum xkamakgpitsinimakgo liwat latamanin. Chatum tala lakapala xatsekg tlawalh oración chu alistalh wanilh stana pi liwana xkgalhskininankgonit kputum congregaciones tiku xlikana xmaklakaskima tamakgtay. Natalan na wanikgolh pi akxni lakkaxmujukgo akgatunu paquete kuenta tlawakgo tuku xlikana maklakaskinkgo, xlakata tanu tanu xkachikinkan chu tanu tanu xtalismaninkan. Wa xlakata kʼakgatunu paquete tanu tanu tuku xmujukan chu wa xmujukan tuku xmaklakaskinkgo akgatunu familias. Chu xaʼawatiya, liwana wanikgolh pi donaciones nema makglhtinankgo xtatayananin Jehová, xatapaxuwan mastakanit chu tiku makgtayanankgo ni kaxokgonikan. Chixku lu kaks lilakawa. Wa xlakata, ni kajwatiya kastamaxkilh tuku xkalitayaninit, wata kamaskiwilh 400 kilos lentejas akxni amparakgolh tamawanankgo.

«Xlikana lapaxkikgo»

Lusu chatum tala tiku lina kata chu ninita xchixku. Xla katalama kLiberia kgalhkitsis tiku xalak xfamilia. Akgtum kilhtamaku tsisa, akxni xwayamakgo chu xlikgalhtawakgamakgo texto xala chali chali, xtanat Lusu tiku kgalhi akgtujun kata akxilhli pi nialhtu xkgalhikgo liwat, chu wa: «¿Chu la uku tuku nawayaw?». Xnana wanilh pi xla xtlawaninita oración Jehová chu kskininit xtamakgtay chu pi liwana xkatsi pi xla xʼama kamaxki tuku xmaklakaskinkgo. Watiya uma kilhtamaku, kakgotanun, lakgkgolotsin xalak congregación tachuwinankgolh Lusu chu wanikgolh pi xʼalh tiya liwat. Xla kinkawaniyan: «Kintanat wan pi la uku liwana katsi pi Jehová kgaxmata oraciones xlakata kgaxmatli kiʼoración».

Chatum puskat xalak República Democrática del Congo lakatsu katawi akgtum familia tiku xtatayananin Jehová litaxtukgo. Akxni akxilhli pi uma familia xkaliminikgo liwat amakgapitsi xtatayananin Jehová, xla wa: «Akxni nasputa pandemia, xtatayananin Jehová nalitaxtuyaw, xlakata xlakan kalilakgaputsakgo xnatalankan kʼuma lu xatuwa kilhtamaku». Xchixku kgalhskilh: «¿Xtatayana Jehová nalitaxtuya kaj xlakata namaxkikana tsinu arroz?». Xla kgalhtilh: «Ni, ni wa xpalakata. Pero uma tsinu arroz limasiya pi xlakan xlikana lapaxkikgo».

Xtatayananin Jehová tlan lakapala kamakgtayakgonit xnatalankan kʼuma pandemia xlakata donaciones nema wixin tlawanitantit. Lu kkapaxtikatsiniyan donaciones nema tlawayatit anta kdonate.jw.org.