Kamaklakaskiw folleto Tuku litsuku xTachuwin Dios xlakata wi tiku tlan natachuwinanaw
1. ¿Tuku xasasti tamakgtay kgalhiyaw akxni lichuwinanaw Dios?
1 Nina makgas makglhtinaw folleto Tuku litsuku xTachuwin Dios. Akxilhnitaw pi lhuwa temas limin akglhuwa textos, xtachuna la libro Razonamiento chu wa xlakata wi tiku tlan natsukukan tachuwinankan. ¿La tlan namaklakaskinaw akxni nalakkaxwiliyaw tuku nawanaw akxni nalichuwinanaw Dios?
2. ¿La tlan namaklakaskinaw folleto Tuku litsuku xTachuwin Dios akxni nalichuwinanaw Dios?
2 Akgtum liʼakxilhtit, tlan namaklakaskina takgalhskinin 8 chu nawana: «Kkatachuwinanitaw mintalakatsu chu kakxilhnitaw pi lhuwa kakgalhskinkan komo xkuenta Dios xlakata anan tapatin. [Kmakgapitsi kachikin tlakg tlan kitaxtu akxni masiyanikan takgalhskinin kfolleto.] ¿Wix tuku lakpuwana? [Kamaxki talakaskin nakgalhtinan.] Biblia liwana masiya xtakgalhtin». Alistalh tlan nalikgalhtawakgaya chu nalichuwinana akgtum o akglhuwa versículos nema wi kfolleto. Komo tiku tachuwinampat nalakgati tuku wanipat, kamasiyani 20 takgalhskinin nema limin xapulana página xla uma folleto chu kawani pi tlan nalitachuwinana pulaktum akxni nalakgpimparaya. Na tlan namaxkiya maktum likgalhtawakga nema limakgalhtawakgananaw chu nawaniya pi tlakg lichuwinanaw tema nema lichuwinantit.
3. ¿La tlan namaklakaskinaw folleto xlakata wi tiku natsukuyaw tachuwinanaw niku latamanin ni kanajlanikgo Cristo?
3 Takgalhskinin nema wilakgo kpágina 4 chu 13 asta 17 lu makgtayanan niku wilakgolh tiku makgtapakgsikgo ktakanajla nema ni kanajlanikgo Cristo. Akgtum liʼakxilhtit, tlan namaklakaskina takgalhskinin 17 chu nawana: «Kaj tsinu kkalakgmiman xlakata kkamakgtayamaw familias. Kakxilhnitaw pi tlakg lhuwa taʼakglhuwit titaxtukgo. ¿Tuku lakpuwana wix? [Kamaxki talakaskin nakgalhtinan.] Lhuwa tamakgaxtokgat liskujkgo xlakata natlawakgo tuku wan uma lu tlan tachuwin: “Xapuskat lu xlimaxkit kakni xchixku” [Ni talakaskin nawaniya pi wa Efesios 5:33. Komo tachuwinampat chatum puskat, tlan namaklakaskina Efesios 5:28.] ¿Lakpuwana pi nakamakgtaya tamakgaxtokgat komo natlawakgo uma lu tlan tastakyaw?».
4. ¿Tuku tlan natlawaya akxni natachuwinankgoya chatum tiku makgtapakgsi ktakanajla nema ni kanajlanikgo Cristo?
4 Akxni namakgalhsputuya takgalhchuwin, kawani pi nalakgpimparaya atanu kilhtamaku xlakata chuntiya nalichuwinanatit uma tema. Akxni nataspita, tlan nalitachuwinana atanu versículo nema limin takgalhskinin nema akxilhtit. Akxni naʼakxilha pi tlan nawaniya, kawani pi xalaktlan tastakyaw nema lichuwinantit takilhtinit kBiblia. Xlakata tuku lichuwinantit chu tuku lakpuwan xlakata Biblia, kamaxki likgalhtawakga nema max nalakgati. (Kaʼakxilhti La Natlawayaw xTaskujut Dios xla diciembre kata 2013, páginas 3 asta 6.)