Epril

Pastaim em i gutpela ensel na em i stap gut long Jehova. Em i save olsem ol manmeri i mas lotuim God, tasol pasin mangal i mekim na em i laik bai ol man i lotuim em. Em i no rausim dispela laik nogut, olsem na dispela laik nogut i kirapim em long mekim sin. (Jems 1:14, 15) Dispela ensel “i no holimpas tok i tru,” olsem na em i kisim nem Satan. Em i bikhet long Jehova na em i kamap “papa bilong pasin giaman.” (Jon 8:44) Kirap long taim Satan i mekim pasin bikhet, em i kamap nambawan birua bilong Jehova, na tu, em i kamap birua bilong ol man. Ol biknem bilong Satan i kamapim klia ol pasin nogut bilong em. Mining bilong dispela nem Satan em “Birua.” Dispela i makim olsem em i no laik i stap daun long wok bos bilong God, nogat; em i heitim na birua tru long wok bos bilong God. Satan i no laik tru bai Jehova i stap nambawan bos. w15 5/15 1:1, 2

Taim yumi stadi long Baibel, dispela bai helpim yumi long luksave long ol samting yumi mas mekim bilong kamap strong moa long bilip. Na tu, yumi bai pilim tru ol gutpela pasin bilong Jehova, na yumi bai laikim em moa yet. Taim pasin bilong yumi long laikim God i kamap strong moa, God bai laikim yumi moa yet, na dispela bai strongim pasin bilong yumi long pas gut wantaim em. Sapos yumi laik i go klostu long Jehova, orait yumi mas holim stretpela tingting taim yumi stadi long Baibel. Jon 17:3 i tok: “Bilong kisim laip oltaim, ol i mas kisim save long yu, yu wanpela tasol yu God tru, na ol i mas kisim save long man yu bin salim i kam, em Jisas Krais.” Yumi mas holim dispela tingting: Yumi laik “kisim save” long Jehova na tingim em olsem Man i stap tru. (Kis. 33:13; Sng. 25:4) Taim yumi save gut moa long Jehova, yumi no inap tingting planti sapos yumi no kliagut long sampela stori bilong Baibel—yumi no inap tingting planti long risen bilong sampela samting God i bin mekim. w15 4/15 3:6-8

Sampela elda i bin helpim ol narapela brata long kamap strong long bilip, na ol i stori long pasin ol i bihainim long trenim ol narapela brata. Maski ol elda i bihainim narapela narapela pasin bilong trenim ol narapela, ol i givim wankain skultok. Dispela i kamapim klia wanem samting? Dispela skul i kam long Baibel i stret long olgeta man i kisim trening na ol i stap long “olgeta kongrigesen long olgeta hap”—wankain olsem long taim bilong aposel Pol. Elda i mas mekim sampela samting paslain long em i trenim narapela brata. Man bilong wokim gaden i mas stretim graun paslain long em i planim sid, na olsem tasol elda i mas redim gut bel na tingting bilong brata paslain long em i skulim brata. Ol elda i ken bihainim pasin em Samuel i bin mekim taim em i redim Sol long stap lida bilong lain Israel.—1 Sml. 9:15-27; 10:1. w15 4/15 1:11, 12

Planti samting bilong graun i no stret wantaim ol tok bilong Baibel. Tasol sampela samting i gutpela. Satan bai yusim ol samting bilong graun long kirapim ol laik nogut bilong yumi na pulim yumi long mekim sin, na tu, em inap kirapim yumi long laikim ol samting bilong graun na lusim pasin bilong lotuim Jehova. (1 Jon 2:15, 16) Long taim bilong ol aposel, sampela Kristen i kirap laikim ol samting bilong dispela graun. Pol i tok: “Demas i lusim mi pinis, long wanem, em i laikim tumas ol samting bilong dispela graun.” (2 Tim. 4:10) Baibel i no kolim stret wanem samting i kirapim Demas long lusim Pol. Ating Demas i laikim tumas mani kago na em i no givim bikpela haptaim tumas long mekim wok bilong God. Demas i lus long kisim ol gutpela blesing long sait bilong bilip. Yu ting ol samting bilong graun inap helpim Demas long kisim ol blesing i gutpela moa winim ol blesing em Jehova inap givim sapos em i stap yet olsem wanwok bilong Pol?—Snd. 10:22. w15 5/15 2:10, 11

Jisas i pilim tru hevi bilong ol narapela maski em yet i no bin karim wankain hevi. Ol man nating i pret long ol hetman bilong lotu bikos ol dispela hetman i putim planti lo na daunim tru ol manmeri. (Mat. 23:4; Mak 7:1-5; Jon 7:13) Jisas i no pret long ol man o pundaun long tok giaman bilong ol, tasol em i pilim tru ol hevi i painim ol narapela. Olsem na “taim em i lukim bikpela lain manmeri, em i sori tru long ol, long wanem, ol man i bin mekim nogut long ol na ol i stap nogut tru olsem ol sipsip i no gat wasman.” (Mat. 9:36) Jisas i bihainim pasin bilong Papa bilong em na em tu i soim pasin laikim na pasin sori. Taim Jisas i lukim ol man i karim pen na hevi, dispela i kirapim em long soim pasin laikim. Em i bihainim gut pasin laikim bilong Papa bilong em. Wanpela taim Jisas na ol aposel i mekim bikpela wok bilong autim tok, na bihain ol i laik i go long hap i no gat man bambai ol inap malolo. Tasol bikpela lain manmeri i kam wetim em, olsem na em i sori tru long ol na em i “skulim ol long planti samting.”—Mak 6:30, 31, 34. w15 5/15 4:3, 4

Fesbon Pikinini Bilong God em namba 1 man long kamapim klia bikpela savetingting bilong Jehova. Savetingting i pulap tru long em, na taim em i wok wantaim Papa, em i stap olsem “saveman i bosim wok.” Yumi inap piksaim amamas em i kisim taim em i lukim Papa “i wokim skai” na “makim ples bilong putim dispela graun i stap long en.” Tasol em i “amamas [moa yet] long lukim . . . ol manmeri.” (Snd. 8:22-31) Jisas i gat pasin bilong sori na laikim tru ol manmeri paslain tru long em i kamap man na i kam i stap long graun. Bihain, Jisas i soim klia olsem em i laikim tru Papa na em i stap gut long em, na tu, em i laikim tru “ol manmeri.” Olsem na “em i lusim olgeta samting em i bin holim” na em i kam i stap olsem man long graun. Em i mekim olsem bambai em inap “givim laip bilong em olsem pe bilong baim bek planti manmeri.” (Fili. 2:5-8; Mat. 20:28) Jisas i soim olsem em i laikim tru ol manmeri! w15 6/15 2:1, 2

Olsem wanem? Yu pilim tru ol samting Jehova i mekim bilong helpim yu? Sapos yu save mekim olsem, orait dispela i makim olsem yu ken dediket long Jehova na kisim baptais. Tingim, taim yu dediket long Jehova, yu mekim strongpela tok promis olsem yu bai mekim laik bilong em inap oltaim oltaim, maski wanem ol samting i kamap long laip bilong yu. Yu ting i stret long yu surik long mekim kain promis olsem? Nogat tru! Tingim olsem Jehova i laik helpim yu, na em “i save givim gutpela pe long ol man i wok strong long painim em.” (Hib. 11:6) Taim yu dediket long Jehova na kisim baptais, dispela i no inap putim hevi long yu, nogat. Laip bilong yu bai i kamap gutpela moa taim yu mekim wok bilong Jehova. Jehova i laikim yu tru na em i laik helpim yu, tasol Satan i tingim em yet na em i no laikim yu! Satan i no inap givim gutpela pe long ol manmeri i stap long sait bilong em. Hau bai em inap givim yu ol samting we em i no gat? w16.03 2:16, 18, 19

Yu mas bilip olsem Jehova i save harim ol beten, na long dispela rot yu bai pilim olsem em Man i stap tru. Tingim: Paslain long Jisas i kam i stap olsem man long graun, em yet i lukim ol samting Jehova i mekim taim em i harim ol beten bilong ol wokman bilong Em long graun. Bihain, taim Jisas i kam i stap long graun na mekim wok autim tok, em i save beten na toktok long Papa bilong em long heven na autim ol tingting i stap long bel bilong em. Sapos Jisas i holim tingting olsem Jehova i no save harim ol beten, yu ting em bai beten long God, na lusim wanpela nait olgeta long beten? (Luk 6:12; 22:40-46) Yu ting em bai skulim ol disaipel long beten sapos em i save olsem beten em samting bilong helpim tingting tasol? Nogat, a? Jisas i save olsem beten em rot bilong toktok long Jehova olsem Man i stap tru. Yumi tu i mas bilip olsem Jehova em Man bilong “harim beten.”—Sng. 65:2. w15 4/15 3:11, 13

Taim yu beten na bihainim pasin daun, ol pikinini bai lain long trastim Jehova. Ana i stap long Brasil, na em i tok: “Taim 2-pela bubu i sik, papamama i save beten askim Jehova long strongim ol na givim savetingting long ol bambai ol inap mekim ol gutpela disisen. Na tu, taim bikpela hevi i kamap, papamama i beten na putim olgeta dispela hevi long han bilong Jehova. Dispela i skulim mi long trastim Jehova.” Taim yu beten wantaim ol pikinini, yu ken beten askim Jehova long helpim ol, na yu ken beten askim Jehova long helpim yu tu. Yu ken askim God long strongim yu long toktok wantaim bos long ples wok bambai yu inap kisim sampela de malolo bilong i go long kibung, o yu ken askim em long strongim yu bambai yu inap autim tok long neiba, o helpim yu long ol narapela samting. Bihainim pasin daun na soim olsem yu trastim God, na ol pikinini bai bihainim pasin bilong yu. w15 11/15 1:7, 8

Nambawan rot bilong strongim pasin bilong laikim tru Jehova em olsem, yu mas tingim tingim nambawan presen Jehova i givim—em ofa bilong Pikinini bilong em long baim bek ol man. (2 Kor. 5:14, 15; 1 Jon 4:9, 19) Taim yu tingim pe bilong baim bek man na olsem wanem dispela pe i helpim yu, dispela bai kirapim yu long mekim ol samting bilong soim tenkyu bilong yu. Yu inap mekim sampela samting bilong soim tenkyu bilong yu long pe bilong baim bek man. Piksaim long tingting olsem yu laik draun insait long wara na wanpela man i seivim yu. Yu ting yu bai i go long haus, draim yu yet, na lusim tingting long dispela man i helpim yu? Nogat tru! Yu bai pilim olsem yu gat bikpela dinau tru long dispela man. Yu bai pilim olsem yu mas givim laip olgeta bilong yu long mekim wok bilong em! Yumi gat bikpela dinau moa long God Jehova na Jisas Krais. God i soim bikpela pasin laikim long yumi, na dispela i opim rot bilong yumi long kisim laip oltaim long Paradais long graun! w16.03 2:16, 17

Jehova i bilip long Pikinini tru bilong em—dispela Pikinini i stap gut long God long heven inap planti yia. Taim Jisas i kam i stap long graun, ol bikpela hevi tru i painim em, tasol em i stap gut long wok king bilong Jehova i go inap long taim em i dai. Yumi mas tenkyu olsem long rot bilong dai bilong Jisas, em i baim bek yumi ol manmeri na dispela i opim rot long yumi inap kisim laip oltaim long nupela taim em God i tok promis long kamapim! Aposel Jon i tok: “Pasin laikim bilong God i kamap ples klia long yumi olsem: God i salim Pikinini bilong en, em pikinini tru bilong en, i kam long dispela graun bai yumi inap kisim laip long rot bilong em. I no olsem yumi laikim God na em i mekim dispela samting, nogat. Em olsem, God i laikim yumi na salim Pikinini bilong en i kam olsem sakrifais long ol sin bilong yumi bilong mekim yumi kamap wanbel wantaim God.”—1 Jon 4:9, 10. w15 11/15 3:13, 14

Yumi ol pikinini bilong Adam, olsem na yumi kisim sin na dai long em. I no gat wanpela bilong yumi inap tok olsem, “Mi no nidim pe bilong baim bek man.” Long rot bilong Krais, Jehova i soim bikpela pasin helpim bilong em, na dispela i helpim tru ol gutpela wokman bilong God. Yumi olgeta wan wan i mas luksave olsem God i lusim tingting long bikpela dinau yumi gat long em. Pasin laikim na pasin marimari bilong Jehova i mas kirapim yumi long mekim wanem? Sapos yumi holim sampela bel kros long wanpela brata o sista bilong yumi, orait yumi mas bihainim pasin bilong Jehova, em Man i redi long “lusim sin” bilong yumi. (Neh. 9:17; Sng. 86:5) Sapos yumi pilim tru pasin em Jehova i mekim long lusim bikpela dinau bilong yumi, orait yumi bai fogivim ol arapela long bel olgeta bilong yumi. Sapos yumi no laikim ol narapela na fogivim rong ol i mekim, God tu i no inap laikim yumi na fogivim ol rong bilong yumi. (Mat. 6:14, 15) Em tru olsem pasin bilong lusim rong i no inap senisim hevi i kamap, tasol dispela pasin bai opim rot long yumi inap kisim ol blesing long bihain. w16.01 2:5, 15-17

Jisas i mekim dispela tok i stap long teks bilong tude. Em i laik helpim Pita na ol narapela disaipel long tingim wok ol bai mekim insait long gavman, na dispela gavman bai bosim graun na kamapim planti blesing bilong helpim ol manmeri husat i bihainim tok. Taim ol wokman bilong Jehova long graun i tingim truim bilong ol tok promis bilong em, oltaim dispela i helpim ol. Abel i save gut long ol samting em God i tingting pinis long mekim, olsem na em inap piksaim ol gutpela samting bai kamap bihain, na em inap bilip na wet long en, na em inap kamapim klia bilip bilong em. Abraham i gat strongpela bilip, olsem na em i mekim sampela bikpela wok. Em inap “luksave” long ol blesing bai kamap taim God i truim tok profet bilong em long givim “pikinini” bilong promis. (Stt. 3:15, NW) Moses i bilip, na dispela i kirapim em long mekim ol bikpela wok, na pasin bilong em long laikim Jehova i kamap strong moa, olsem na em inap “tingting strong long gutpela pe em bai kisim.” (Hib. 11:26) Bilip bilong yumi yet na pasin bilong yumi long laikim God inap helpim yumi long piksaim ol samting Jehova i tok promis long kamapim. w15 5/15 3:17, 18

Sapos Kristen i laik kamap strong long bilip, em bai wok strong long kisim sampela save moa long Baibel. Oltaim em bai stadi gut long ol tok bilong Baibel, na em i luksave olsem “strongpela kaikai em bilong ol man i bikpela pinis.” (Hib. 5:14) Strongpela Kristen bai i gat laik long kisim “stretpela save bilong Pikinini bilong God.” (Efe. 4:13) Olsem wanem? Yu save makim taim bilong ritim Baibel long olgeta de? Yu save bihainim sediul bilong mekim stadi bilong yu yet, na lusim sampela haptaim long olgeta wik long mekim famili lotu? Taim yu stadi long Baibel, yu mas luksave long ol stiatok we bai helpim yu long kliagut moa long tingting na laik bilong Jehova. Yu ken bihainim ol stiatok bilong Baibel, na larim ol dispela stiatok i stiaim yu taim yu mekim ol disisen, na dispela bai kirapim yu long i go klostu moa long Jehova. w15 9/15 1:5, 9, 10

Jisas i kliagut long wok bilong olgeta samting i stap long graun. Em i save gut long olsem wanem em bai yusim na kontrolim ol dispela samting. Taim Jisas i stap long graun, em “i kamapim ples klia strong . . . bilong God” taim em i stopim strongpela win na ren. Tingim samting i kamap: Krais i mekim bikpela wok bilong autim tok na em i pilim taiet. Ol bikpela weiv i kam paitim bot long sait sait na wara i go insait long bot. Win i mekim bikpela nois na sakim bot i go i kam, tasol Jisas i slip yet. Ol disaipel i pret tru na ol i kirapim Jisas na ol i tok: “Klostu bai mipela i dai!” (Mat. 8:25) Jisas i kirap na em i tok strong long win na solwara olsem: “Inap nau! No ken pairap!” na win i stop. (Mak 4:39) I olsem Jisas i tokim win na solwara long i stap isi. Wanem samting i kamap? “Win i dai na raunwara i stap isi tru.” Jisas i soim klia olsem em i gat bikpela strong! w15 6/15 1:12-14

Taim Jisas i kolim bret bilong wan wan de, em i tingim ol samting yumi mas kisim long olgeta wan wan de. Em i tok, God i save bilasim ol plaua bilong bus, na bihain em i tok: “Olsem tasol, God bai amamas moa long givim ol klos samting long yupela, yupela ol man i gat liklik bilip.” Bihain, em i kolim gen dispela skultok: “No ken tingting planti long ol samting bilong de antap.” (Mat. 6:30-34) Dispela i soim olsem yumi no ken bungim planti mani kago, nogat, yumi mas amamas long klos na kaikai yumi gat pinis. Long olgeta wan wan de, yumi nidim haus, wok mani bilong helpim yumi long lukautim famili, na yumi nidim savetingting bilong helpim yumi long karim hevi bilong sik. Sapos yumi beten askim God long lukautim yumi long ol dispela samting tasol, dispela i makim olsem yumi no bihainim stretpela tingting. Em i bikpela samting moa long yumi mas beten askim God long helpim yumi long sait bilong bilip. Bosman bilong yumi i tok: “Man i no inap stap laip long bret tasol, nogat. Em i mas bihainim tu olgeta tok i kamap long maus bilong Jehova.” (Mat. 4:4) Olsem na yumi mas wok yet long beten askim Jehova long givim yet kaikai bilong strongim bilip bilong yumi long taim stret. w15 6/15 5:4, 7, 8

Yumi save beten oltaim na askim God long helpim yumi long i stap gut long em taim traim i painim yumi? Ating pasin em papamama i bihainim long mekim bikpela long yumi o pasin yumi bihainim long bipo inap kirapim yumi long laikim ol pasin em Jehova i no orait long en. Tasol God inap helpim yumi long mekim ol senis bambai yumi inap mekim yet wok bilong em na bihainim ol pasin em i laikim. King Devit i bin luksave long dispela samting. Bihain long Devit i mekim pasin pamuk wantaim Batseba, em i tokim Jehova olsem: “Yu ken wokim nupela klinpela bel insait long mi. Putim nupela spirit insait long mi na bai mi bihainim yu tasol.” (Sng. 51:10, 12) Yumi ol sinman, olsem na yumi inap laikim ol pasin i no stret, tasol Jehova inap strongim laik bilong yumi long bihainim tok bilong em. Maski sapos ol laik nogut bilong yumi i kamap strong moa na i laik daunim pasin bilong yumi long tingim ol samting i klin, Jehova inap stiaim yumi na bai yumi inap bihainim ol lo bilong em na kisim gutpela sindaun. God inap sambai long yumi na bai ol pasin nogut i no ken daunim yumi.—Sng. 119:133. w15 6/15 3:5, 6

Ol lapun i tingim taim bipo we kongrigesen i gat kongrigesen sevan na i no gat lain elda, na ol kantri i gat brens sevan na i no gat Brens Komiti, na presiden bilong Was Taua Sosaiti i mekim disisen na givim tok bilong stiaim ol bratasista na i no gat Gavening Bodi Bilong Ol Witnes Bilong Jehova. Long kongrigesen, brens ofis, na hetkota, wanpela brata tasol i mekim ol disisen. Long ol yia bihain long 1970, ol senis i kamap na ol elda i mas bung wantaim na wokim ol disisen, na i no wanpela man tasol i wokim disisen. Save bilong ol man long tok bilong Baibel i kamap klia moa. Sapos wanpela man tasol i wokim ol disisen, dispela i no inap helpim oganaisesen. Olsem na ol elda i wok bung wantaim long wokim ol disisen, na ol i stap “olsem ol presen,” na ol gutpela pasin bilong ol i helpim oganaisesen.—Efe. 4:8. w15 7/15 1:14, 15

Long olgeta kain taim, sampela samting i save kamap na ol Kristen tru i mas mekim disisen: Ol bai i stap gut long God na bai ol i no insait long ol wok bilong graun, o nogat? Bilong wanem? Taim ol i dediket long Jehova, ol i tok promis olsem ol bai laikim em, stap gut long em, na bihainim tok bilong em. (1 Jon 5:3) Maski yumi stap long wanem hap o yumi kam long wanem kain sindaun, kantri, o kalsa, yumi laik bihainim ol stretpela lo bilong God. Pasin bilong yumi long i stap gut long Jehova na Kingdom bilong em i mas i stap namba 1, winim olgeta narapela samting long laip bilong yumi. (Mat. 6:33) Ol Kristen i no ken insait long olgeta kain tok pait bilong dispela graun. (Ais. 2:4; Jon 17:11, 15, 16) Ol manmeri husat i no gat wankain bilip olsem yumi, ating ol i pilim olsem ol i mas i stap gut long kantri bilong ol, klen, kalsa, o spots tim bilong kantri. Kain pasin olsem i bin kamapim pasin resis na pasin jeles. Olsem na ol man bilong wanpela lain i bin kilim sampela man bilong narapela lain i dai na sampela taim ol i kilim wanpela lain olgeta i dai. Sapos yumi no was gut, yumi inap sapotim wanpela lain na insait long ol tok pait bilong dispela graun. w15 7/15 3:1, 2

Taim wanpela kongrigesen i kisim nupela Haus Kingdom, ol i mas lukautim gut dispela Haus Kingdom na bai ol samting i stap stret. Dispela bai i stret wantaim ol pasin bilong God yumi lotuim, “em i no save mekim ol samting i paul nabaut.” (1 Kor. 14:33) Baibel i tok, pasin bilong i stap klin i stret wantaim pasin holi na pasin bilong i stap klin long sait bilong bilip. (Rev. 19:8) Sapos ol man i laik bai Jehova i amamas long ol, orait ol i mas i stap klin long olgeta samting. Oltaim yumi mas tingim ol dispela stiatok na singautim ol man i kam long ol miting, na yumi ken bilip olsem sapos Haus Kingdom i stap klin, dispela bai i stret wantaim gutnius yumi autim long ol. Ol bai luksave olsem yumi lotuim God i holi, na klostu nau em bai mekim dispela graun i kamap ples paradais we i klin olgeta. (Ais. 6:1-3; Rev. 11:18) Maski ol manmeri long hap yumi stap long en i gat wanem kain tingting na sindaun, Haus Kingdom i mas i stap klin na ol samting i mas i stap stret, long wanem, nem bilong Jehova i stap long dispela haus na em ples bilong mekim lotu i tru.—Lo 23:14. w15 7/15 4:13-15

Ol disaipel bilong Jisas i luksave olsem Jisas i kam i stap pinis long 1914, olsem na ol i ting pinis bai kamap sotpela haptaim bihain long 1914. Ol i mekim bikpela wok moa long autim tok bilong Kingdom. Jisas i tok em bai kam bihain liklik, “taim kakaruk i krai o long bikmoning.” Taim Jisas i kam, ol disaipel i mas mekim wanem? Em i tok: “Yupela i mas was i stap.” Maski ol i wet inap longpela taim pinis, ol i no ken kisim tingting olsem pinis i no inap kamap na ol i no gat wok long was i stap. Long nupela taim, yumi bai amamas long tokaut olsem truim i bin kamap long olgeta tok profet i stori long pinis bilong dispela haptaim nogut bilong nau. Taim yumi tingim tingim ol samting i kamap, dispela bai strongim bilip bilong yumi long Jehova na yumi bai bilip na wet long lukim truim bilong ol narapela tok promis. (Jos. 23:14) Yumi bai tok tenkyu long God, long wanem, ‘em samting bilong em yet long makim ol taim na ol de,’ na em i tokim yumi long was i stap bikos “pinis bilong olgeta samting i kam klostu.”—Apo. 1:7; 1 Pita 4:7. w15 8/15 2:10, 11, 14

Ol manmeri i traim kain kain rot bilong kisim amamas, na planti bilong ol i lukim ol piksa bilong ol pasin em Baibel i tambuim. Ol i laikim ol kain pasin olsem pasin bilong pait, pasin pamuk, mekim wok bilong spirit nogut, na ol narapela pasin we i no stret. Ol program i stap long Intenet, televisen, muvi, na ol stori i kamap long ol buk na magasin i kirapim ol man long kisim tingting olsem i no gat rong long mekim pasin pamuk na pait na bagarapim man. Long sampela ples, lo bilong gavman i tok orait long sampela pasin we bipo i no stret long mekim. Tasol God i no laikim ol dispela pasin. (Rom 1:28-32) Long taim bilong ol aposel, ol disaipel bilong Jisas i sakim ol amamas nogut. Na tu, ol i bihainim pasin bilong God, olsem na ol manmeri i tok bilas long ol na mekim nogut long ol. Aposel Pita i tok: “Yupela i no poroman moa wantaim ol long ol dispela pasin nogut, olsem na ol i kirap nogut na ol i wok long tok bilas long yupela.”—1 Pita 4:4. w15 8/15 4:2, 3

Wokman bilong Jehova i save wok strong long kamapim pasin wanbel insait long kongrigesen. (Efe. 4:1-6, 15) Yumi laik bai ol manmeri bilong God i “pas wantaim” na wok gut wantaim narapela narapela. Tok Bilong Jehova i helpim yumi long luksave olsem yumi mas i gat pasin daun na dispela bai helpim yumi long i stap wanbel. Sapos brata o sista i stap strong long bilip, em bai bihainim pasin daun na stap wanbel wantaim ol narapela, maski ol i rongim em. Yu save mekim wanem taim yu lukim wanpela brata o sista long kongrigesen i mekim wanpela pasin i no stret? O, olsem wanem sapos wanpela brata o sista long kongrigesen i rongim yu? Yu bai abrusim dispela brata o sista, na i olsem yu putim wanpela banis namel long yutupela? O, yu bai wok strong long kamapim pasin wanbel namel long yutupela? Strongpela Kristen i save wok strong long kamapim pasin wanbel, na i no brukim lain. Olsem wanem? Yu save strongim pasin wanbel insait long kongrigesen? w15 9/15 1:12, 13

Jisas i bilip olsem Baibel em Tok Bilong God, na dispela buk i kamapim ol nambawan gutpela tok bilong stiaim yumi. Yumi mas bihainim pasin bilong Jisas na ritim Baibel long olgeta de, stadi long en, na tingim tingim ol skul yumi kisim long en. Taim yu stadi long Baibel, mekim wok painimaut long ol bikpela tok yu gat askim long en. Yu ken mekim olsem: Sapos yu laik strongim bilip bilong yu olsem pinis bilong haptaim bilong nau i klostu, orait yu ken stadi gut long ol tok bilong Baibel we i soim klia olsem yumi stap long haptaim bilong las de. Yu ken skelim ol tok profet bilong Baibel em truim bilong ol i kamap pinis bambai dispela i ken strongim bilip bilong yu long ol tok promis bilong ol samting bai kamap bihain. Na tu, yu ken skelim sampela stori long olsem wanem tok bilong Baibel i bin helpim sindaun bilong ol manmeri, na dispela bai strongim bilip bilong yu olsem tok bilong Baibel i gat strong long helpim ol manmeri. (1 Tes. 2:13) Yu ken bihainim pasin bilong Jisas na tingim tingim ol gutpela blesing em Jehova i tok promis long givim long yu. (Hib. 12:2) Yu ken tingim olsem yu yet i wanpela bilong ol lain husat bai kisim blesing. w15 9/15 3:16, 17

Yumi inap mekim wanem ol samting bilong soim olsem yumi laikim God? Yumi inap yusim mani kago long helpim wok bilong Kingdom long hap bilong yumi na long olgeta hap bilong graun. Dispela em gutpela rot bilong soim olsem yumi laikim Jehova maski yumi gat planti mani kago, o nogat. (2 Kor. 8:12) I gat ol narapela samting tu yumi inap mekim bilong soim olsem yumi laikim Jehova. Jisas i tokim ol disaipel olsem ol i no ken tingting planti long kaikai ol bai kisim na klos ol bai werim. Mobeta ol i wok yet long painim Kingdom pastaim. Em i tok, Papa i save long ol samting yumi nidim. (Mat. 6:31-33) Sapos yumi laikim tru Jehova, yumi bai bilipim dispela tok promis. Yumi no inap laikim wanpela man sapos yumi no bilipim tok bilong em. (Sng. 143:8) Yumi ken askim yumi yet: ‘Ol mak mi laik winim na ol pasin bilong mi i soim olsem mi laikim tru Jehova? Ol samting mi mekim long olgeta wan wan de i soim olsem mi bilip olsem em bai lukautim mi long ol samting mi nidim?’ w15 9/15 5:7, 8

Wanpela taim yu bin tingim kain askim olsem, ‘Long taim bilong traipela hevi tru, Jehova bai seivim kain man olsem mi na mi inap kisim laip long nupela taim, o nogat?’ Wanpela bikpela samting em olsem, yumi mas mekim bilip bilong yumi i kamap strong moa. Aposel Pita i kamapim klia olsem bilip em i bikpela samting. Em i tok: “Bilip bilong [yumi], em ol traim i mekim i kamap strong pinis, i ken stap olsem rot bilong kisim biknem na glori na ona taim Jisas Krais i kamap ples klia.” (1 Pita 1:7) Taim bilong traipela hevi tru i kam klostu pinis, olsem na yumi mas i gat strongpela bilip bambai King bilong yumi i givim biknem long yumi taim em i kamap ples klia. Yumi laik i stap olsem “man i gat bilip, na dispela bilip i lukautim laip bilong yumi.” (Hib. 10:39) Olsem na yumi tu i ken mekim dispela tok: “Mekim bilip bilong mi i kamap strong moa!” (Mak 9:24) O, yumi ken mekim wankain tok olsem ol aposel bilong Jisas i mekim, ol i tok: “Yu mas mekim bilip bilong mipela i kamap bikpela moa.”—Luk 17:5. w15 10/15 2:1, 2

Pol i putim tingting i go long “ol samting i bikpela samting moa,” na em i taitim bun tru long mekim wok bilong God, na em i visitim Siria, Esia Maina, Masedonia, na Judia. Pol i tok: “Mi wok long lusim tingting long ol samting bilong bipo na mi wok strong long kisim ol samting bai kamap bihain.” (Fili. 1:10; 3:8, 13, 14) Pol i stap singel, olsem na em i givim bel olgeta long “mekim wok bilong Bikpela oltaim na i no gat wanpela samting i pulim nabaut tingting” bilong em. (1 Kor. 7:32-35) Wankain olsem Pol, sampela wokman bilong God i stap singel bambai wok bilong famili i no ken pasim ol long lusim bikpela haptaim moa long mekim wok bilong Kingdom. (Mat. 19:11, 12) Ol wokman bilong God em ol i marit pinis, ol i gat planti moa wok bilong mekim insait long famili. Tasol maski yumi stap singel o yumi marit, yumi olgeta inap “lusim olgeta samting i putim hevi long yumi,” na i no gat planti samting inap pasim yumi long mekim wok bilong God. Yumi mas lusim sampela samting we i pulim nating taim bilong yumi, na putim ol mak bilong lusim bikpela haptaim moa long mekim wok bilong God. w15 10/15 3:15, 16

Ol hevi i kamap long graun i kamapim klia olsem dispela tok bilong Baibel em i tru olgeta. Baibel i tok: “Bikpela, mi save, mipela man i no inap bosim wokabaut bilong mipela yet na bihainim ol rot mipela i laikim.” (Jer. 10:23) Taim Jehova i wokim ol man, em i no givim rait long ol long bosim wokabaut bilong ol yet, nogat, em yet i mas bosim ol. I gat narapela bikpela risen na God i larim ol pasin nogut i stap inap sampela haptaim. God i laik kamapim klia olsem wok bos bilong em tasol inap helpim tru ol manmeri. Taim Jehova i pinisim olgeta pasin nogut na bagarapim ol man nogut, em i no inap larim wanpela man i stap sapos dispela man i sutim tok olsem Jehova i no bihainim pasin laikim long wok bos bilong em. God inap yusim histori bilong ol man long nau long soim klia olsem i stret long em i rausim kwik ol man nogut, na em i no ken larim ol i kirapim gen pasin nogut. w15 11/15 3:5, 6

Olgeta taim Jisas i amamas long stori long ol man long Kingdom Bilong God. Baibel i stori olsem Jisas i toktok long Kingdom planti taim moa winim olgeta narapela samting—winim 100 taim em i stori long Kingdom taim em i autim tok. Kingdom i stap nambawan samting long laip bilong Jisas. (Mat. 12:34) Bihain liklik long Jisas i kirap bek, winim 500 manmeri i bung na Jisas i go toktok wantaim ol. (1 Kor. 15:6) Ating long dispela taim em i tokim ol manmeri long autim tok bilong Kingdom long “olgeta lain man”—em bikpela wok tru! Jisas i tok profet olsem ol disaipel bai mekim dispela wok “i go inap long pinis bilong dispela taim,” na tru tumas ol i mekim olsem. Ating yu tu i insait long dispela wok na truim tok profet bilong Jisas. (Mat. 28:19, 20) God i givim “olgeta gutpela samting” bilong redim yumi long mekim gut dispela wok. w15 11/15 5:1-3

Ol saveman husat i stadi long ol manuskrip bilong Ol Rait Holi long tok Hibru bilong bipo, kain olsem Ol Olpela Rait Bilong Detsi, ol i kirap nogut long lukim olsem nem bilong God long 4-pela leta bilong tok Hibru i kamap planti taim. Nem bilong God i kamap tu long sampela rait bilong Grik Septuagint we i stap 200 yia paslain long taim bilong Jisas na i go inap long 100 yia bihain long taim bilong Jisas. I gat evidens i soim olsem nem bilong God i mas i stap long Baibel, tasol planti trenslesen i no putim nem bilong God long ples stret bilong en. Long 1952, ol narapela lain i prinim Baibel Revised Standard Version, na ol i rausim nem bilong God long en. Dispela Baibel em nupela edisen bilong American Standard Version bilong 1901. Bilong wanem ol i rausim nem bilong God? Ol i putim dispela hap tok long ol pes i stap long kirap bilong dispela Baibel, olsem: “Pasin bilong yusim wanpela nem stret bilong kolim dispela wanpela God, em i God tru . . . em i no stret liklik wantaim bilip bilong Lotu Kristen.” Bihain, taim ol narapela lain i trensletim Baibel i go long tok Inglis na ol narapela tokples, ol tu i bihainim wankain stail. w15 12/15 2:3-5