April

Olsem wanem long yumi? Yumi bihainim tingting bilong God o tingting bilong graun? Ating yumi senisim pasin bilong yumi na bihainim ol pasin bilong God. Tasol olsem wanem long tingting bilong yumi? Yumi wok long kisim tingting bilong Jehova? Yumi mas wok hat na bai yumi inap kisim tingting bilong em. Yumi stap namel long ol manmeri nogut, olsem na yumi inap kisim tingting bilong graun. (Efe. 2:2) Na tu, ol man i tingting long inapim laik bilong ol yet, olsem na yumi tu inap kisim wankain laik. Yes, em tru olsem yumi mas wok hat na bai yumi inap kisim tingting bilong Jehova. Sapos yumi larim tingting bilong graun i stiaim yumi, yumi bai tingim yumi yet na yumi no laik bai ol narapela i stiaim yumi. (Mak 7:21, 22) Olsem na em i bikpela samting long yumi mas kisim “tingting bilong God,” na i no “tingting bilong ol man.” w18.11 18 par. 1; 19 par. 3-4

Jisas i kisim strong taim Jehova i toktok long em long 3-pela narapela narapela taim. Bihain tasol long Jisas i kisim baptais long Wara Jordan, Jehova i mekim dispela tok i stap long teks bilong nau. Jisas na Jon Bilong Baptais tasol i harim dispela tok. Wanpela yia paslain long Jisas i dai, 3-pela aposel bilong em i harim Jehova i tok: “Dispela em i Pikinini bilong mi, mi laikim em tumas na bel bilong mi i amamas long em. Harim tok bilong em.” (Mat. 17:5) Sampela de paslain long Jisas i dai, Jehova i toktok long Pikinini bilong em. (Jon 12:28) Jisas i save olsem ol man bai mekim nogut long em na kilim em i dai, na ol bai kolim em olsem man bilong tok bilas long God. Olsem na em i beten long Jehova na em i tok: “No ken bihainim laik bilong mi. Nogat. Bihainim laik bilong yu tasol.” (Mat. 26:39, 42) Jisas i “sanap strong na karim hevi long diwai pos, na em i no wari long sem em bai kisim.” Em i no laik bai ol manmeri i givim biknem long em, nogat, em i laik bai Papa bilong em i save olsem em i stap gut long em.​—Hib. 12:2. w18.07 10-11 par. 15-16

Bihain tasol long Jisas i mekim Kaikai Bilong Bikpela, hevi i painim em na em i strongim tru bel. Em i redi long bihainim laik bilong Papa maski em i save olsem ol birua bai kilim em i dai. Ol bai sutim tok olsem em i tok bilas long God. (Mat. 26:65, 66) Jisas i stap gut long God bikos em i laik onarim nem bilong Jehova, sapotim wok bos bilong God, na opim rot bilong ol manmeri long tanim bel na kisim laip oltaim. Na tu, em i redim ol disaipel long sanap strong taim hevi i painim ol. Jisas i strongim bel na em i no larim wanpela samting i pulim tingting bilong em, nogat. Em i tingting tasol long ol samting em i mas mekim bilong helpim ol aposel. Bihain long em i tokim Judas long lusim ol, em i mekim liklik kaikai bilong tingim dai bilong em. Dispela kaikai bai helpim ol disaipel long tingim ol blesing ol bai kisim long blut bilong Jisas, na ol bai tingim tu olsem ol bai insait long nupela kontrak.​—1 Kor. 10:16, 17. w19.01 22 par. 7-8

Papa i stap long heven na em i tok: “Mi litimapim pinis nem bilong mi na bai mi litimapim gen.” Jisas i tingting planti bikos em i gat bikpela wok long stap gut long Jehova. Jisas i save olsem em bai karim bikpela pen na hevi na ol birua bai mekim hatpela pasin tru long em na kilim em i dai. (Mat. 26:38) Tasol nambawan bikpela laik bilong Jisas em long litimapim nem bilong Papa. Ol birua i sutim tok olsem Jisas i tok bilas long God, olsem na Jisas i tingting planti olsem dai bilong em bai bagarapim gutnem bilong God. Olsem Jisas, yumi no laik mekim wanpela samting we inap bagarapim gutnem bilong Jehova. Ating ol man i no mekim fea pasin long yumi. O yumi tingting planti bikos ol birua i kamapim ol giaman stori long yumi. Ating yumi tingting planti olsem ol dispela stori bai bagarapim gutnem bilong Jehova. Long kain taim olsem, tok bilong Jehova inap mekim gut bel bilong yumi. Oltaim Jehova bai litimapim nem bilong em.​—Sng. 94:22, 23; Ais. 65:17. w19.03 11-12 par. 14-16

Ol disaipel bilong Jisas i no bilipim tok ol i harim. Ol i bilip olsem Jisas bai strongim gen kingdom bilong Israel, tasol em i tok em bai karim pen na hevi na i dai. Aposel Pita i kamapim tingting bilong em na i tok: “Bikpela, marimari long yu yet, dispela samting i no ken kamap long yu.” Tasol Jisas i tok strong long em olsem: “Satan, yu go baksait long mi! Yu laik pasim rot bilong mi. Tingting bilong yu i no wankain olsem tingting bilong God, nogat, tingting bilong yu i wankain olsem tingting bilong ol man.” (Mat. 16:22-23; Apo. 1:6) Tok bilong Jisas i kamapim klia olsem tingting bilong God i no wankain long tingting bilong ol man bilong graun em ol i stap aninit long wok bos bilong Satan. (1 Jon 5:19) Pita i bihainim pasin bilong ol man bilong graun—ol i save tingim ol yet. Tasol Jisas i save olsem tingting bilong Papa bilong em i no wankain long tingting bilong ol man bilong graun. Tok bilong Jisas long Pita i soim olsem em i sakim tingting bilong graun na em i laik bihainim tingting bilong Jehova. w18.11 18 par. 1-2

Planti milion manmeri long olgeta hap i mekim bung bilong Memorial. Jehova i lukim olgeta wan wan man husat i stap long dispela bung. Em i lukim ol manmeri husat i save kam long dispela bung long olgeta yia. Sampela i karim bikpela hevi tru long han bilong ol birua. Sampela i no save kam oltaim long ol miting, tasol ol i tingim Memorial olsem nambawan bikpela bung ol i mas i stap long en. Jehova i lukim tu ol manmeri husat i kam fes taim long Memorial; ating ol i laik save long ol samting i kamap long dispela bung. Jehova i amamas tru long lukim planti manmeri i kam long Memorial. (Luk 22:19) Tasol em i laik save long risen bilong ol long kam; dispela em bikpela samting long Jehova. Olsem wanem? Yumi laik tru long kisim skul i kam long Jehova na oganaisesen bilong em?​—Ais. 30:20; Jon 6:45. w19.01 26 par. 1-3

Jisas i redi long lusim laip bilong em bilong helpim ol disaipel, na oltaim em i tingim laik bilong ol na daunim laik bilong em yet. Em i bung wantaim ol disaipel maski em i pilim taiet o bel hevi. (Luk 22:39-46) Em i tingting moa long ol samting em inap givim long ol narapela, na i no ol samting em inap kisim long ol. (Mat. 20:28) Yumi stap insait long lain Kristen tru, na yumi amamas long lusim bikpela haptaim long invaitim ol nupela manmeri long bung wantaim yumi. Tasol yumi gat bikpela laik moa long helpim “ol wanbilip” em ol i kamap slek long bilip. (Gal. 6:10) Yumi soim pasin laikim taim yumi kirapim ol long kam long miting, na moa yet long Memorial. Olsem Jehova na Jisas, yumi amamas tru taim ol wanbilip i kam bek long Jehova.​—Mat. 18:14. w19.01 29 par. 12, 14; 30 par. 15-16

Jisas i mekim fes Memorial bilong tingim dai bilong em. Em i yusim wain na bret i no gat yis bilong Pasova. Jisas i gutpela olgeta, olsem na em i tokim ol aposel olsem bret na wain i makim bodi na blut bilong em. Em bai givim laip bilong em olsem ofa bilong baim bek ol. Ating ol aposel i no kirap nogut taim ol i lukim olsem Jisas i redim liklik samting tasol bilong mekim dispela nupela bung. Bilong wanem? Sampela mun paslain, Jisas i go visitim ol gutpela pren bilong em​—Lasarus, Marta, na Maria. Em i stap long haus bilong ol na skulim ol. Tasol Marta i bisi tru long redim bikpela kaikai. Jisas i bihainim gutpela pasin na em i stretim tingting bilong Marta; em i helpim Marta long luksave olsem i no gat wok long redim bikpela kaikai. (Luk 10:​40-42) Bihain, sampela aua paslain long Jisas i dai, em i mekim samting em i bin tokim Marta long mekim. Em i redim liklik kaikai tasol taim em i kirapim bung bilong Memorial. w19.01 20-21 par. 3-4

Jehova i mekim samting em Jisas i no ting em bai mekim. Jisas i kirap bek na i kisim “bikpela namba moa” na em i kamap spirit i no inap dai! I no gat wanpela man i stap paslain long Jisas i kisim kain gutpela pe olsem. (Fili. 2:9; 1 Tim. 6:16) Jisas i stap gut long God, olsem na God i givim em gutpela pe bilong soim olsem em i save long Jisas! Wanem samting inap helpim yumi long sakim pasin bilong larim ol man bilong graun i luksave long yumi? Tingim dispela, oltaim Jehova i save long ol gutpela wokman bilong em, na em i save givim ol gutpela blesing long ol long ol rot em ol i no ting long en. Yumi no save long wanem ol narapela blesing yumi bai kisim long nupela taim. Yumi wok long karim ol hevi long nau, tasol oltaim yumi mas tingim olsem olgeta dispela samting bai pinis. (1 Jon 2:17) Jehova em Papa i gat pasin laikim, na em i ‘no man bilong mekim pasin i no stret na bai em i lusim tingting long ol wok yumi bin mekim na pasin bilong yumi long laikim tru nem bilong em.’​—Hib. 6:10. w18.07 11 par. 17-18

Taim Jisas i mekim laspela kaikai wantaim ol aposel, em i kamapim klia olsem em i laik bai ol i stap wanbel. Em i beten olsem olgeta disaipel i mas pas gut wantaim narapela narapela wankain olsem Papa i pas wantaim em na em i pas wantaim Papa. Sapos ol disaipel i stap wanbel, dispela bai soim klia olsem Jehova i bin salim Jisas i kam long graun bilong mekim laik bilong Em. Sapos ol i laikim narapela narapela, ol bai soim olsem ol i disaipel tru bilong Jisas na dispela bai strongim pasin wanbel namel long ol. (Jon 13:​34, 35) I stret Jisas i stori long pasin wanbel. Em i luksave olsem dispela pasin i no stap namel long ol aposel; ol i no stap wanbel tu long taim em i mekim laspela kaikai wantaim ol. Ol i tok pait gen long “husat bilong ol i winim ol arapela.” (Luk 22:24-27; Mak 9:33, 34) Jems na Jon i bin tokim Jisas long larim tupela i sindaun long rait sait na left sait bilong em taim em i kamap King.​—Mak 10:35-40. w18.06 8 par. 1-2

Jehova i laik bai ol marit i laikim tru narapela narapela long laip olgeta bilong ol. (Mat. 19:3-6) Pasin adaltri em pasin i nogut tru na i soim olsem man i no gat tru pasin laikim. Olsem na namba 7 lo bilong Tenpela Lo i tambuim pasin adaltri. (Lo 5:18) Man i mekim pasin adaltri i “mekim sin long ai bilong God” na em i bagarapim tru bel bilong poroman marit. (Stt. 39:7-9) Poroman marit bai stap bel hevi inap planti yia. Jehova i tingim tru sindaun bilong ol pikinini. Jehova i laik bai papamama i lukautim gut pikinini long ol samting olsem haus, klos, na kaikai, na helpim pikinini long pas gut wantaim God. Oltaim papamama i mas painim rot bilong skulim gut pikinini long Lo Bilong Jehova na kisim pasin bilong laikim God. (Lo 6:​6-9; 7:13) Papamama i mas tingim pikinini olsem presen i kam long Jehova, na i no olsem samting nating na ol i mekim nogut long em.​—Sng. 127:3. w19.02 21 par. 5, 7

Jop i putim tingting i go long ol blesing God bai givim. Em i stap gut long God, na em i bilip olsem God i luksave long pasin em i mekim. Jop i bilip tru olsem Jehova bai blesim em, na dispela i strongim em long i stap gut yet long God. Jehova i amamas tru long pasin bilong Jop long i stap gut long em, olsem na em i givim planti blesing long em maski Jop i sinman! (Jop 42:12-17; Jems 5:11) Jop bai kisim planti moa blesing. God bilong yumi i no senis. (Mal. 3:6) Sapos oltaim yumi tingim olsem God i laikim pasin bilong yumi long i stap gut long em, yumi bai tingim yet ol blesing yumi bai kisim. (1 Tes. 5:8, 9) Sampela taim yu inap pilim olsem yu wanpela i mekim olsem. Tasol yu no stap wanpis. Long olgeta hap bilong graun, planti milion manmeri i stap gut long God. Long bipo, planti manmeri i holimpas bilip na stap gut long God maski ol inap lusim laip bilong ol.​—Hib. 11:​36-38; 12:1. w19.02 7 par. 15-16

Det bilong Memorial i kam na i go, olsem na yumi ken askim yumi yet: ‘Hau bai mi inap bihainim gut moa pasin laikim bilong Jisas? Mi tingting moa long helpim ol wanbilip long ol samting ol i nidim o mi tingim mi yet? Mi ekspektim ol bratasista long mekim planti wok moa, o mi luksave long skel bilong ol?’ Oltaim yumi mas bihainim pasin bilong Jisas na “pilim hevi bilong narapela.” Taim bai kamap na yumi no inap moa long mekim Memorial bilong tingim dai bilong Krais. Long taim bilong traipela hevi tru, Jisas bai “kam” na kisim “lain God i bin makim” i go long heven, olsem na yumi no inap moa long mekim Memorial. (1 Kor. 11:26; Mat. 24:31) Bung bilong Memorial bai pinis, tasol ol manmeri bilong Jehova bai tingim yet dispela liklik kaikai we i soim klia olsem Jisas i gat pasin daun, pasin bilong strongim bel, na bikpela pasin laikim. w19.01 25 par. 17-19

Pasin bilong lukautim bodi i wankain long pasin bilong lukautim bilip. Namba 1: Sapos yumi laik bai bodi long insait i wok gut, orait yumi mas kisim gutpela kaikai na eksasais oltaim. Olsem tasol, sapos yumi laik stap gut long bilip, orait yumi mas kisim gutpela kaikai bilong strongim bilip na oltaim yumi mas mekim wok bilong soim olsem yumi bilip long Jehova. Yumi mas bihainim save yumi kisim na autim bilip bilong yumi. (Rom 10:​8-10; Jems 2:26) Namba 2: Taim yumi skelim bodi bilong yumi, yumi inap ting olsem yumi stap helti, tasol sik inap stap insait long bodi. Olsem tasol, yumi inap mekim wok lotu na ting olsem bilip bilong yumi i stap strong, tasol yumi inap stat long kisim ol laik nogut. (1 Kor. 10:12; Jems 1:14, 15) Satan i laik bai yumi kisim tingting bilong em. w19.01 15 par. 4-5

Yumi ken askim yumi yet: ‘Mi mekim wankain pasin? Mi soim pasin sori long ol narapela olsem man Samaria i mekim?’ (Luk 10:30-35) ‘Mi inap mekim sampela samting bilong soim pasin sori na pasin helpim long ol lain husat i karim pen na hevi? Mi inap helpim ol bratasista i lapun, ol wido, na ol pikinini em papamama i no stap long tok i tru? Mi inap go pas long mekim tok we i “mekim gut bel bilong ol man i bel hevi”?’ (1 Tes. 5:14; Jems 1:27) Taim yumi soim pasin sori long ol narapela, yumi kisim amamas long pasin bilong givim samting. Bikpela samting em yumi mekim Jehova i amamas. (Apo. 20:35; Hib. 13:16) King Devit i stori long man husat i save tingim ol narapela, na em i tok: “Jehova bai lukautim em na larim em i stap laip. Na ol bai tok olsem em man bilong amamas taim em i stap long graun.” (Sng. 41:1, 2) Na tu, taim yumi soim pasin sori long ol narapela, Jehova bai marimari long yumi. Long dispela rot, yumi inap stap amamas inap oltaim oltaim.​—Jems 2:13. w18.09 19 par. 11-12

Yoshiko em wanpela sista Kristen, na em i kisim wanpela toksave. Dokta i tokim em olsem em bai stap laip inap sampela mun tasol na bihain em bai dai. Yoshiko i mekim wanem? Em i tingim feiveret skripsa bilong em long teks bilong tude. Em i stap bel isi na tokim dokta olsem em i no pret bikos Jehova i holim han bilong em. Gutpela tok long dispela ves i helpim Yoshiko long trastim tru Jehova. Dispela ves inap helpim yumi tu long stap bel isi taim ol bikpela hevi tru i painim yumi. Jehova i kirapim Aisaia long raitim ol dispela tok bambai dispela tok inap mekim gut bel bilong ol Juda em bihain ol bai i go kalabus long Babilon. Jehova i lukautim gut dispela tok na bai dispela tok i helpim lain Juda na olgeta manmeri bilong em kirap long bipo i kam inap long nau. (Ais. 40:8; Rom 15:4) Yumi stap long “taim nogut” we i “givim hatwok long ol man,” olsem na yumi nidim tru tok bilong Buk Aisaia long strongim yumi.​—2 Tim. 3:1. w19.01 2 par. 1-2

Maski man na meri i seperet, tupela i stap yet olsem marit. Maski tupela i no stap wantaim, ol inap bungim sampela hevi. Olsem na aposel Pol i tok long ol marit i mas stap wantaim. Em i tok: “Man i no bilip, em i pas wantaim meri bilong em, na long dispela pasin em i kamap holi. Na meri i no bilip, em i pas wantaim man bilong em husat i bilip, na long dispela pasin em i kamap holi; sapos nogat, orait ol pikinini bilong yupela bai i no stap klin, tasol nau ol i stap holi.” (1 Kor. 7:14) Planti Kristen i stap yet wantaim poroman marit husat i no wanbilip maski ol i karim bikpela hevi. Bihain, ol i amamas tru olsem gutpela samting i kamap long pasin bilong i stap gut long poroman​—poroman marit i kamap wanbilip. (1 Kor. 7:16; 1 Pita 3:1, 2) Long planti kongrigesen long olgeta hap bilong graun, planti marit i stap gut na ol i stap amamas. Yu inap lukim sampela marit olsem long kongrigesen bilong yu. Ol brata i laikim tumas meri bilong ol, na ol sista i stap gutpela helpim bilong man bilong ol, na olgeta i soim olsem ol i onarim marit.​—Hib. 13:4. w18.12 14 par. 18-19

Mining bilong Iden em “Amamas,” na dispela gaden em ples tru bilong amamas. I gat planti kaikai, na ol naispela plaua na diwai, na planti animal bilong amamas na pilai wantaim ol. (Stt. 1:​29-31) Long tok Grik, dispela tok “gaden” em pa·raʹdei·sos. Wanpela dikseneri (Cyclopaedia by M’Clintock and Strong) i tok olsem long mining bilong pa·raʹdei·sos: “Bikpela pak we olgeta samting i stap gut tru na i luk nais tru, na i gat ol bikpela diwai na planti bilong ol i karim prut, na ol i sanap klostu long klinpela wara, na bikpela lain antelop o sipsip i raun arere long wara​—ol manmeri bilong mekim tok Grik i piksaim kain samting olsem taim ol i tingim paradais.” (Skelim Stat 2:15, 16.) God i putim Adam na Iv long naispela ples olsem, tasol tupela i sakim tok bilong God, olsem na God i rausim tupela. Ol tumbuna pikinini i kamap bihain, ol tu i no stap long Paradais. (Stt. 3:​23, 24) I no gat man i stap long Paradais, tasol God i larim Paradais i stap i go inap long Bikpela Tait i kamap long taim bilong Noa, na Paradais i lus. w18.12 3-4 par. 3-5

Ol papamama i wok strong long skulim ol pikinini long bihainim ol gutpela pasin. Sapos ol pikinini i bihainim ol pasin em papamama i skulim ol long en, ol bai mekim ol gutpela disisen. Ol bai abrusim ol hevi we ol yet inap kamapim sapos ol i mekim rong disisen. Jehova i olsem gutpela papa, na em i laik bai yumi stap amamas. (Ais. 48:18) Olsem na em i putim ol lo bilong stiaim pasin yumi yet i bihainim na pasin yumi mekim long ol narapela. Em i kirapim yumi long bihainim tingting na ol lo bilong em. Ol lo bilong em i no kalabusim yumi, nogat, ol i stiaim yumi long skelim gut ol samting paslain long yumi mekim disisen. (Sng. 92:5; Prov. 2:1-5; Ais. 55:9) Yumi inap mekim ol gutpela disisen na stap amamas, na pasin bilong yumi bai kamap gutpela moa. (Sng. 1:2, 3) Tru tumas, tingting bilong Jehova i gutpela na inap tru long helpim yumi! w18.11 19-20 par. 7-8

Sapos yumi laik wokabaut yet long tok i tru, yumi no ken larim ol narapela i putim presa long yumi na yumi bihainim ol. Taim yumi stat long wokabaut long tok i tru, sampela senis i kamap long pasin bilong yumi long pas gut wantaim ol wanblut na ol pren husat i no Witnes. Sampela i amamas, tasol ol narapela i birua long yumi. Ating ol wanblut, ol wanwok, na ol wanskul i fosim yumi long insait long sampela selebresen olsem betde na pablik holide. Olsem wanem yumi inap sakim presa bilong insait long ol kastam na ol holide we i no onarim Jehova? Yumi inap mekim olsem sapos yumi kliagut long tingting bilong Jehova long ol dispela kastam na holide. Yumi ken skelim gen ol pablikesen bilong yumi we i stori long risen bilong sampela de long i stap olsem holide. Taim yumi kliagut long ol risen na Baibel i tambuim ol kain selebresen olsem, dispela bai strongim tingting bilong yumi olsem yumi wokabaut long rot “em Bikpela i orait long en.” (Efe. 5:10) Sapos yumi trastim Jehova na tok i tru bilong Baibel, dispela bai lukautim yumi na yumi no inap “pret na guria long man.”​—Prov. 29:25. w18.11 11 par. 10, 12

Taim ol senis i kamap wantu, yumi inap wari na tingting planti na dispela inap pasim yumi long tingim ol samting yumi inap mekim long bihain. Josep i no larim dispela samting i kamap long em. Em i mekim gut ol wok em inap mekim, na Jehova i blesim em. Maski Josep i stap kalabus, em i givim bel tru long mekim olgeta wok we ofisa i tokim em long mekim, wankain olsem em i bin mekim taim em i stap wokboi bilong Potifa. (Stt. 39:​21, 22) Olsem Josep, hevi inap painim yumi na yumi no gat strong long mekim wanpela samting bilong pinisim hevi. Tasol sapos yumi no les kwik na yumi givim bel long mekim wok lotu, Jehova bai blesim yumi. (Sng. 37:5) Ating sampela taim yumi “no kliagut long [yumi] bai mekim wanem,” tasol olsem aposel Pol i tok “i no olsem [yumi] stap bel hevi tasol,” nogat. (2 Kor. 4:8; ftn.) Dispela tok bilong Pol bai kamap tru long yumi sapos yumi givim bel olgeta long mekim wok autim tok. w18.10 29 par. 11, 13

Yu bai pilim olsem wanem sapos wanpela man yu save long em na rispektim em i lusim tingting long nem bilong yu, na moa yet sapos em i no luksave long yu? Dispela inap mekim yu bel hevi bikos yumi olgeta i laik bai ol narapela i mas save long yumi. Na tu, yumi laik bai ol i luksave long ol pasin bilong yumi na ol wok yumi mekim. (Nam. 11:16; Jop 31:6) Yumi olgeta i laik bai ol narapela i mas save long yumi, tasol sin i mekim na ating yumi no holim stretpela tingting long dispela samting. Ating yumi laik bai ol man i givim biknem long yumi. Ol manmeri long graun i laik tru long kisim biknem na kamap man o meri em planti lain i save long ol. Dispela i mekim na ol i no laik kisim save na lotu long Papa bilong ol long heven, em God Jehova.​—Rev. 4:11. w18.07 7 par. 1-2

Satan na ol spirit nogut i gat strong long kirapim ol manmeri husat i gat namba long mekim ol “tok giaman.” (1 Tim. 4:​1, 2) Ol pris pasto husat i mekim ol tok giaman i gat bikpela asua bikos ol i pasim rot bilong ol manmeri long kisim laip. Sapos man i bilipim tok we i no stret wantaim tok bilong Baibel, na em i bihainim ol pasin em God i no orait long en, em bai lus long kisim laip oltaim. (Hos. 4:9) Jisas i save olsem ol lida bilong lotu long taim bilong em, ol i gat asua long giamanim ol manmeri. Em i tokim ol stret olsem: “Yupela ol saveman bilong Lo na yupela ol Farisi, yupela ol man bilong tupela maus, yupela lukaut! long wanem, yupela i save brukim solwara na raun long olgeta hap graun long painim wanpela man long joinim lotu Juda. Taim em i joinim yupela pinis, yupela i mekim em i kamap olsem man bilong i go long Gehena [bagarap inap oltaim] na asua bilong em i winim asua bilong yupela.” (Mat. 23:15; ftn.) Jisas i mekim strongpela tok bilong kotim ol lida bilong ol lotu giaman. Tru tumas, ol i ‘kam long Papa bilong ol, em Devil, man bilong kilim man i dai.’​—Jon 8:44. w18.10 7 par. 5-6

Wanem insait bilong tok bilong Jisas? Em i tok moa olsem: “Yupela i ken belgut na amamas tru, long wanem, pe bilong yupela long heven bai i bikpela tru. Ol man i bin mekim ol wankain pasin long ol profet i bin stap paslain long yupela.” (Mat. 5:12) Taim ol man i paitim ol aposel na tokim ol long no ken autim tok, “ol aposel i lusim Sanhedrin na ol i go. Ol i amamas.” I no olsem ol i amamas long ol man i paitim ol, nogat. Ol i amamas bikos “God i ting ol i gutpela inap long ol i ken kisim sem long nem bilong Jisas.” (Apo. 5:41) Long nau tu, lain bilong Jehova i sanap strong na amamas maski traim i painim ol, o ol man i birua long ol bikos ol i holim nem bilong Jisas. (Jems 1:​2-4) Olsem ol aposel, yumi no save amamas taim ol man i mekim nogut long yumi. Tasol sapos yumi stap gut long Jehova, em bai helpim yumi long sanap strong na maski ol traim i kamap, yumi inap stap amamas yet. Taim yumi save olsem “God bilong amamas” i orait long yumi, yumi bai stap amamas maski ol man i birua long bilip bilong yumi, ol wanfamili i mekim nogut long yumi, yumi sik, o yumi kamap lapun.​—1 Tim. 1:11. w18.09 21 par. 18-20

Laip i pulap long ‘hatwok na hevi tasol,’ olsem na planti manmeri long dispela “taim nogut” long nau i gat kain kain bel hevi na ol i tingting planti. Planti manmeri i givap long laip bilong ol. (2 Tim. 3:​1-5) Wok painimaut i soim olsem winim 8 handret tausen manmeri i suasaid long olgeta yia. Dispela i makim olsem insait long olgeta 40 seken, wanpela man i suasaid. Sori tru, sampela Kristen i no painim rot bilong kisim helpim, olsem na ol i pinisim laip bilong ol yet. Em tru olsem sampela bratasista i no tingting long suasaid, tasol planti i karim ol hevi na yumi mas soim pasin laikim na strongim ol. Sampela i sanap strong taim ol narapela i birua na mekim nogut long ol. Sampela i karim hevi long ples wok we ol narapela i sutim tok o tok baksait long ol. O ol i pilim taiet bikos ol i wok ovataim o ol i mas pinisim wok long taim stret. Sampela bratasista i karim hevi insait long famili na dispela i pinisim strong bilong ol. Ating poroman marit i no stap long tok i tru i mekim ol tok bilong daunim ol. Ol dispela hevi na ol narapela presa bilong laip i mekim na planti insait long kongrigesen i tingting planti na bel hevi, na ol i no gat strong long mekim ol wok. w18.09 13 par. 3, 5

Papamama Kristen i wok wantaim Jehova taim ol i kirapim ol pikinini long putim mak long mekim ol wok lotu. Ol papamama husat i mekim olsem, bihain ol pikinini bilong ol i insait long fultaim sevis na kisim asainmen long ol narapela ples. Sampela i mekim wok misineri; sampela i mekim wok painia long hap i sot long ol pablisa; ol narapela i wok long Betel. Taim ol pikinini i kisim asainmen long narapela hap, dispela i mekim na famili i no inap bung wantaim olsem ol i save mekim. Maski i olsem, ol papamama husat i no gat pasin bilong tingim ol yet i save strongim ol pikinini long stap gut long asainmen bilong ol. Bilong wanem? Taim ol pikinini i putim wok bilong Kingdom i stap namba 1, dispela i givim bikpela amamas tru long ol papamama na ol i pilim olsem laip bilong ol i gat as bilong en. Ating planti bilong ol i pilim wankain olsem Hana, em i “givim” pikinini bilong em Samuel long Jehova. Ol dispela papamama i tingim olsem em gutpela blesing tru long wok wantaim God long kain rot olsem. Ol i ting dispela em nambawan wok ol pikinini bilong ol inap mekim.​—1 Sml. 1:28. w18.08 24 par. 4

Jisas i tok dispela i no makim olsem maniman i no gat rot long go insait long Kingdom bilong heven. Em i tok: “Yupela ol man i stap rabis, yupela i ken amamas, long wanem, Kingdom bilong God em i bilong yupela.” (Luk 6:20) Tasol dispela i no makim olsem God i orait tasol long ol man i stap rabis na olgeta bai harim tok bilong Jisas, nogat. Planti man i stap rabis i no kamap disaipel bilong Jisas. Dispela i skulim yumi olsem maski man i gat mani kago o em i stap rabis, em inap long i stap pren bilong Jehova. God i blesim yumi na i givim yumi planti bratasista husat i laikim tru Jehova na i mekim wok bilong em. Sampela bilong ol i gat mani kago na sampela i no gat planti samting. Baibel i kirapim ol lain i gat mani kago long “ol i no ken putim trast bilong ol long mani samting i bilong stap sotpela taim tasol, nogat. Ol i mas trastim God.” (1 Tim. 6:17-19) Na tu, Baibel i kirapim olgeta wokman bilong God, maski ol i maniman o ol i stap rabis long ol i no ken kisim pasin bilong laikim tumas mani. (1 Tim. 6:9, 10) Tru tumas, taim yumi holim wankain tingting olsem bilong Jehova long ol bratasista, yumi no inap skelim ol long mani kago bilong ol o long pasin bilong ol long i stap rabis. w18.08 10-11 par. 11-12

Yumi laik soim tenkyu bilong yumi bikos Jehova i makim yumi olsem lain bilong em. Yumi save olsem yumi bilong God, olsem na yumi bihainim savetingting na dediketim laip bilong yumi long em. Olsem na yumi mas sanap strong na sakim ol pasin nogut. Na tu, yumi mas soim pasin laikim na pasin rispek long ol wanbilip bikos ol tu i bilong Jehova. (Rom 12:10) Baibel i tok promis olsem: “Jehova i no inap lusim ol manmeri bilong em.” (Sng. 94:14) Yumi ken bilip tru olsem God bai sambai long yumi maski wanem wanem hevi i painim yumi. Maski yumi dai, dispela i no inap tekewe yumi long pasin laikim bilong Jehova. (Rom 8:38, 39) “Olsem na maski yumi stap laip o yumi dai, yumi bilong Jehova.” (Rom 14:8) Yumi bilip na wet long lukim Jehova i kirapim bek ol gutpela wokman bilong em. (Mat. 22:32) Yumi kisim planti blesing long nau. Baibel i tok: “Lain manmeri God bilong ol em Jehova, ol i ken amamas, ol dispela manmeri em i bin makim bilong em yet.”​—Sng. 33:12. w18.07 26 par. 18-19

Sampela man i pilim olsem ol yet i ken mekim disisen long sampela samting, olsem long sait bilong skul o wok mani; ol i ken mekim olsem sapos maus bilong bel i no gat tok long dispela samting. Ating ol i tingim tok em Pol i mekim long ol Kristen long Korin long sait bilong kaikai, em i tok: “Mi stap fri long mekim ol samting, tasol mi no laik bai maus bilong bel bilong narapela man i skelim dispela pasin bilong mi long i stap fri long mekim samting.” (1 Kor. 10:29) Yumi stap fri long mekim disisen long ol dispela samting, tasol yumi mas tingim olsem fridom bilong yumi i gat mak bilong en, na ol disisen yumi mekim inap kamapim gutpela samting o samting nogut. Olsem na Pol i mekim tok i stap long teks bilong tude. Taim yumi yusim fridom bilong yumi long makim ol samting yumi laik mekim, i gat sampela bikpela samting em yumi mas tingim na skelim. w18.04 10 par. 10

Wanpela Kristen inap tok olsem em i lotuim Jehova, tasol em i mekim ol pasin i no stret. (Jut 11) Ating em i tingting long mekim pasin pamuk, tingting long inapim laik bilong em yet, o em i bel nogut long wanpela wanbilip. (1 Jon 2:15-17; 3:15) Ol kain tingting olsem inap kirapim em long mekim bikpela rong. Ating dispela Kristen i givim bel long autim tok na go oltaim long ol miting. Ol narapela i no inap lukim ol tingting na ol pasin hait bilong em, tasol Jehova i lukim olgeta samting. Em i save sapos yumi givim bel olgeta long stap long sait bilong em o nogat. (Jer. 17:9, 10) Maski i olsem, Jehova i no save les kwik long yumi. Taim ol man i insait long ol pasin i no stret, Jehova i tok: “Yupela i mas kam bek long mi.” Jehova i laik bai yumi sakim ol pasin nogut maski yumi pilim hatwok long daunim ol pasin kranki bilong yumi. (Ais. 55:7) Sapos yumi mekim olsem, God bai lukautim yumi long sait bilong bilip, na em bai givim yumi strong long “bosim” ol tingting kranki yumi gat.​—Stt. 4:7. w18.07 18 par. 5-6