Me

Long ol yia i go pinis, planti moa refiuji i go sindaun long ol arapela kantri. Yu ken lainim pasin bilong gritim man long tokples bilong ol lain husat i kam sindaun long hap yu stap long en. Na tu, yu ken lainim sampela hap tok yu inap mekim bilong kirapim laik bilong ol long putim yau. Yu ken stiaim ol i go long jw.org na soim ol long ol vidio na pablikesen i stap long tokples bilong ol. Long rot bilong Miting Bilong Kristen Laip na Wok Autim Tok, Jehova i skulim yumi long olsem wanem yumi inap mekim gut wok autim tok. Dispela miting i helpim yumi long mekim gut ol gobek na ol Baibel stadi. Ol papamama, helpim ol pikinini bilong yupela long bekim tok long toktok bilong ol yet na bai lait bilong ol i stap ples klia. Sotpela tok ol pikinini i pilim tru long bel na bekim, dispela inap kirapim ol nupela man long luksave long tok i tru.​—1 Kor. 14:25. w18.06 22-23 par. 7-9

Yumi olgeta i mas tingim olsem, pastaim yumi stap olsem ol manmeri husat “i no insait” long lain bilong God. (Efe. 2:12) Tasol Jehova i “yusim pasin laikim olsem rop” bilong pulim yumi i kam long em. (Hos. 11:4; Jon 6:44) Na tu, Krais i welkamim yumi. Em i opim rot long yumi inap stap insait long lain famili bilong God. Maski yumi sinman, Jisas i welkamim yumi olgeta i kam insait long lain bilong God, olsem na i no stret long yumi bel nogut long ol narapela! Yumi kam klostu long pinis bilong pasin nogut bilong nau, olsem na pasin bilong brukim lain, bel nogut, na belhat i go bikpela moa. (Gal. 5:19-21; 2 Tim. 3:13) Olsem na yumi mas kisim savetingting i kam long Jehova, na mekim wankain pasin long olgeta manmeri na strongim pasin wanbel. (Jems 3:17, 18) Yumi amamas taim yumi strongim pasin pren bilong yumi wantaim ol man bilong narapela kantri, na lainim kalsa na tokples bilong narapela narapela. Taim yumi mekim olsem, bel isi bai kamap olsem wara i ron na i no save pinis, na stretpela pasin olsem solwara i bruk long nambis.​—Ais. 48:17, 18. w18.06 12 par. 18-19

Soldia bilong Rom husat i no werim su i soim olsem em i no redi long i go long pait. Su bilong ol soldia i olsem sendol. Ol i samapim na pasim dispela su wantaim skin bilong animal inap 3-pela taim. Long dispela rot, su i karamapim gut lek bilong soldia, na tu, su inap i stap longpela taim. Ol soldia bilong Rom i save werim su taim ol i redi long i go pait. Olsem tasol, pasin bilong redi gut long autim tok i helpim ol Kristen long autim gutnius bilong bel isi. (Ais. 52:7; Rom 10:15) Maski i olsem, yumi mas strongim bel na autim tok taim rot i op. Bo i gat 20 krismas i tok: “Mi save pret long autim tok long ol wanklas bilong mi. Ating mi pilim sem. Taim mi tingim bek dispela samting, mi no save wai na mi no bin autim tok. Nau mi amamas long autim tok long ol wanlain bilong mi.” Planti yangpela i pilim olsem pasin bilong redi gut i mekim na ol i no pret long autim tok. w18.05 29 par. 9-11

Jisas i tokim ol aposel: “Mi givim bel isi bilong mi long yupela.” (Jon 14:27) Olsem wanem bel isi bilong Jisas i helpim yumi long karim kaikai? Taim yumi sanap strong, yumi bai kisim bel isi bikos yumi save olsem Jehova na Jisas i orait long yumi. (Sng. 149:4; Rom 5:3, 4; Kol. 3:15) Jisas i tokim ol aposel olsem em i laik bai amamas bilong ol “i ken pulap.” Bihain em i stori long risen na em i bikpela samting long yumi mas lusim sampela samting bilong yumi yet na helpim ol narapela. (Jon 15:11-13) Bihain, Jisas i tok: “Mi kolim yupela pren.” Dispela em wanpela gutpela presen​—yumi inap stap pren bilong Jisas! Ol aposel i mas mekim wanem bilong stap yet olsem pren bilong Jisas? Ol i mas “karim yet kaikai.” (Jon 15:14-16) Tupela yia paslain, Jisas i tokim ol aposel: “Yupela go na autim tok olsem: ‘Kingdom bilong heven i kam klostu pinis.’” (Mat. 10:7) Olsem na long laspela nait bilong Jisas long i stap wantaim ol, em i kirapim ol long sanap strong na pinisim wok em i givim long ol.​—Mat. 24:13; Mak 3:14. w18.05 20-21 par. 15-16

Ol yangpela, putim tingting i go long mekim wok bilong Jehova. Yu mas wok strong long winim ol mak long sait bilong bilip. Ol narapela yangpela husat i gat wankain krismas olsem yu i putim ol amamas bilong dispela graun i stap namba 1 samting, olsem na ol inap kirapim yu long bung wantaim ol. Tasol yu yet i mas kamapim long ples klia olsem yu laik bihainim ol samting em yu tingting pinis long mekim. No ken larim ol narapela yangpela i pulim yu. I gat sampela rot yu ken bihainim bambai yu no larim ol wanlain i pulim yu. Olsem, abrusim ol samting we inap traim yu. (Prov. 22:3) Na tu, yu mas tingim ol hevi we inap kamap sapos yu bihainim pasin nogut bilong ol narapela. Yu mas kisim gutpela skultok long ol narapela. Pasin daun bai helpim yu long redi long bihainim tok bilong papamama na ol narapela husat i stap strong long bilip insait long kongrigesen. (1 Pita 5:5, 6) Yu redi long mekim pasin daun na kisim tok bilong helpim yu? w18.04 28-29 par. 14-16

Taim Jisas i givim tok long sampela kongrigesen long Esia Maina, em i kamapim tenkyu bilong em long wok ol i mekim. Taim em i givim tok long kongrigesen long Taiataira, em i kirapim tok olsem: “Mi save long ol samting yu mekim, na pasin laikim bilong yu na bilip bilong yu na wok bilong yu na pasin bilong yu long sanap strong. Na mi save olsem ol samting yu mekim long nau, ol i winim ol samting yu bin mekim bipo.” (Rev. 2:19) Jisas i tok tenkyu long bikpela wok ol i mekim, na em i tok amamas long ol pasin i kirapim ol long mekim gutpela wok. Taim Jisas i givim tok kaunsel bilong stretim pasin bilong sampela long Taiataira, em i kirapim na pinisim wantaim tok bilong strongim ol. (Rev. 2:27, 28) Tingim namba Jisas i holim long stap het bilong olgeta kongrigesen. I no gat wok long em i tok tenkyu long wok yumi mekim. Maski i olsem, oltaim em i save soim tenkyu bilong em. Em i stap gutpela eksampel tru long ol elda! w19.02 16 par. 10

Gavening bodi long taim bilong ol aposel i strongim ol lain i go pas long kongrigesen, na tu, ol i strongim olgeta narapela Kristen. Ol i salim Pita na Jon long i go na beten long ol nupela Kristen i ken kisim holi spirit. (Apo. 8:​5, 14-17) Filip na ol lain i kamap Kristen i kisim strong long rot bilong gavening bodi! Long nau, Gavening Bodi Bilong Ol Witnes Bilong Jehova i save givim ol tok bilong strongim ol memba bilong Betel famili, ol lain i mekim wok autim tok fultaim, na tu, ol bratasista bilong yumi long olgeta hap bilong graun. Olsem ol Kristen long taim bilong ol aposel​—yumi amamas na kisim strong long rot bilong Gavening Bodi! Long 2015, Gavening Bodi i wokim nupela buklet Kam Bek Long Jehova. Dispela buklet i gat ol gutpela tok we inap strongim planti bratasista long olgeta hap bilong graun. w18.04 19 par. 18-​20

Ol manmeri i ting sapos i no gat lo i bosim ol, ol bai stap amamas. Tasol tru tru, sapos i no gat lo i bosim yumi, hevi bai painim yumi. Bikpela hevi inap kamap sapos i no gat ol lo. Wanpela buk (The World Book Encyclopedia) i tok: “Ol lo em ol oganaisesen bilong graun i kamapim i planti tumas, na dispela i pasim ol man long mekim sampela samting.” Ol man i raitim planti lo, olsem na i mas i gat planti loya na jas bilong strongim ol dispela lo na ol man i mas bihainim ol dispela lo. Tok bilong Jisas i soim olsem man i mas mekim 2-pela samting bilong stap fri tru: Namba 1: Em i mas bilip long tok i tru em Jisas i autim. Namba 2: Em i mas kamap disaipel bilong Jisas. Sapos man i mekim olsem, em bai stap fri tru. Tasol em bai stap fri tru long wanem samting? Jisas i tok: “Olgeta man i save mekim sin, ol i stap wokboi bilong sin. . . . Sapos Pikinini i mekim yupela i kamap fri, orait yupela bai stap fri tru.”​—Jon 8:34, 36. w18.04 6-7 par. 13-14

Yumi save amamas long bung wantaim ol manmeri husat i pilim tru ol hevi bilong yumi. Ol i traim long tingim hau ol yet bai pilim sapos wankain hevi i painim ol. Ol i skelim ol samting yumi nidim na ol i helpim yumi​—sampela taim ol i mekim olsem paslain long yumi yet i askim ol long helpim yumi. Yumi laikim tru ol manmeri husat i “pilim hevi” bilong yumi. Yumi ol Kristen i laik pilim hevi bilong narapela. Tasol sampela taim i hatwok long mekim olsem. Wanpela risen em olsem, yumi olgeta i sinman. (Rom 3:23) Olsem na yumi mas wok strong long daunim laik bilong tingim yumi yet tasol. Sampela bilong yumi i hatwok long pilim hevi bilong ol narapela bikos laip yumi kamap bikpela long en i no wankain long laip bilong ol narapela. Na tu, yumi inap bihainim nating ol tingting na pasin bilong ol manmeri i stap klostu long yumi. Long dispela taim bilong las de, planti manmeri i no gat pasin bilong pilim hevi bilong ol narapela. Ol i “laikim ol yet tasol.” (2 Tim. 3:1, 2) Yumi inap pilim hevi bilong ol narapela sapos yumi bihainim eksampel bilong God Jehova na Pikinini bilong em, Jisas Krais. w19.03 14 par. 1-3

Long lista bilong Tenpela Lo, laspela lo i tambuim pasin mangal. (Lo 5:21; Rom 7:7) Jehova i givim dispela lo bilong skulim ol manmeri long wanpela bikpela samting​—ol i mas lukautim gut bel, olsem tingting, filings, na astingting bilong ol. God i save olsem taim man i kisim tingting nogut, dispela bai kirapim em long mekim pasin nogut. Dispela samting i bin kamap long King Devit. Em i gutpela man. Tasol wanpela taim em i mangalim meri bilong narapela man. Dispela pasin mangal i kirapim em long mekim sin. (Jems 1:14, 15) Devit i mekim pasin adaltri, na em i traim long giamanim man bilong dispela meri, na bihain em i wokim plen long kilim man i dai. (2 Sml. 11:2-4; 12:7-11) Jehova i lukim pasin bilong yumi, na em i lukim tu ol tingting na laik i stap insait long bel. (1 Sml. 16:7) I no gat wanpela tingting, filings, na pasin i stap hait long ai bilong em. Em i laik bai yumi bihainim stretpela pasin. Tasol em i laik bai yumi luksave na kontrolim ol tingting nogut na bai yumi no ken mekim rong.​—2 Sto. 16:9; Mat. 5:27-30. w19.02 21 par. 9; 22 par. 11

Baibel i tok Moses em “man bilong mekim pasin daun tru, na i no gat wanpela man long dispela graun i save daunim em yet olsem Moses.” (Nam. 12:3) Yu ting dispela i makim olsem Moses i no gat strong, em i surik long mekim disisen, na em i pret taim ol narapela i birua long em? Sampela manmeri inap ting olsem. Tasol dispela tingting i no stret. Moses em strongpela wokman bilong God, em i holim wanpela tingting tasol, na em i gat pasin bilong strongim bel. Jehova i helpim Moses na em inap feisim strongpela king bilong Isip, na stiaim bikpela lain tru, inap olsem 3 milion manmeri i go long ples drai nating, na helpim ol long daunim ol birua. Yumi no bungim wankain hevi olsem Moses, tasol pasin bilong ol manmeri o sampela samting inap mekim na i hatwok long yumi daunim yumi yet. Maski i olsem, yumi gat gutpela risen long kisim pasin bilong daunim yumi yet. Jehova i tok promis olsem “ol man i gat pasin daun, ol bai kisim graun olgeta.” (Sng. 37:11) Yu ting yu gat pasin bilong daunim yu yet? Yu gat nem long dispela pasin? w19.02 8 par. 1-2

Kirap long taim God i wokim Adam na Iv, em i wokim yumi ol man wantaim maus bilong bel. Bihain long tupela i brukim lo bilong Jehova, ol i go na hait. Dispela i soim olsem maus bilong bel i kotim ol. Ol lain i no skulim gut maus bilong bel, ol i olsem wanpela sip i gat kompas i bagarap. Sapos sip i go long wanpela longwe hap na kompas i no wok gut, hevi inap kamap. Strongpela win na solwara inap stiaim sip i go long narapela hap. Gutpela kompas bai helpim kepten long stiaim sip i go long ples em i laik go long en. Maus bilong bel bilong yumi i olsem kompas. Em inap stiaim yumi long bihainim stretpela pasin o pasin i no stret. Sapos yumi laik bai maus bilong bel i wok gut, yumi mas skulim gut maus bilong bel na stretim stretim. Sapos man i no skulim gut maus bilong bel, orait maus bilong bel i no inap pasim em long mekim pasin nogut. (1 Tim. 4:1, 2) Maus bilong bel inap kirapim yumi long ting olsem “samting i nogut em i gutpela.” w18.06 16 par. 1-3

Sampela taim, tingting bilong graun i no inap stap ples klia. Olsem na i gutpela sapos yumi inap luksave na sakim. Ating wanpela nius ripot i sapotim tingting bilong wanpela lain politik. O wanpela stori i sapotim tingting bilong graun long namba na biknem ol man inap kisim. Sampela muvi na buk i kirapim ol man long pilim olsem i no gat rong long tingim ol yet na famili bilong ol. Tasol dispela pasin i no stret. Baibel i tok yumi yet na famili bilong yumi bai stap amamas sapos yumi laikim tru Jehova na i no laikim yumi yet tasol. (Mat. 22:36-39) I no gat rong long mekim ol samting bilong kisim amamas. Tasol yumi mas askim yumi yet olsem: ‘Yumi inap luksave long ol tingting bilong graun maski ol i no stap ples klia? Yumi save putim sampela lo bilong stopim yumi yet na ol pikinini long lukim sampela kain program o ritim sampela kain buk na nius? Sapos ol pikinini i harim o lukim sampela samting i kamapim tingting bilong graun, yumi save helpim ol long luksave long tingting bilong Jehova?’ w18.11 22 par. 18-19

Jehova i tingim na laikim yumi, na dispela i soim olsem em i stap wantaim yumi. Skelim ol tok em i mekim bilong kamapim tingting tru bilong em. Em i tok: “Yu kamap samting i dia tumas long ai bilong mi, yu bin kisim biknem tru, na mi bin laikim yu tumas.” (Ais. 43:4) I no gat wanpela samting long ples antap o long graun inap pinisim pasin bilong Jehova long laikim ol manmeri i mekim wok bilong em. I no gat wanpela samting bai tekewe pasin bilong em long i stap gut long yumi. (Ais. 54:10) Jehova i no inap pinisim ol hevi i painim yumi. Ol hevi bai stap, tasol ol i no inap karamapim yumi olsem “wara,” o pinisim yumi olsem “paia.” Em i tok promis long stap wantaim yumi na helpim yumi long “brukim ol wara,” olsem yumi bai winim hevi. Jehova bai helpim yumi long daunim pret na i stap bel isi bambai yumi inap i stap gut yet long em, maski yumi inap lusim laip bilong yumi. (Ais. 41:13; 43:2) Taim yumi trastim tok promis bilong God olsem “mi bai stap wantaim yu,” yumi tu bai strongim bel na karim hevi. w19.01 3 par. 4-6

Sapos yu wanpela yangpela, ating ol tisa, ol kaunsela, na ol narapela i kirapim yu long i go long bikpela skul na kisim wok i gat gutpela pe. Tasol Jehova i givim skultok bilong stiaim yu long mekim narapela disisen. Em tru olsem, em i laik bai yu wok hat long skul bambai yu inap lukautim yu yet taim yu lusim skul. (Kol. 3:23) Yumi stap long taim bilong pinis, olsem na taim yu laik makim ol bikpela samting yu laik mekim, God i laik bai yu bihainim ol stiatok we inap helpim yu long mekim laik bilong em. (Mat. 24:14) Jehova i save long samting bai kamap long graun, na em i save olsem klostu tru nau ol pasin nogut bai pinis. (Ais. 46:10; Mat. 24:3, 36) Na tu, em i save gut long yumi—em i save long ol samting we inap mekim yumi amamas tru na ol samting we inap mekim yumi bel hevi. Ol man inap givim gutpela edvais, tasol sapos ol i no skelim tok bilong Baibel, dispela em i no savetingting. w18.12 19 par. 1-2

“Ol man i gat pasin daun, ol bai kisim graun olgeta, na ol bai i stap bel isi tru na dispela bai mekim ol i stap amamas moa yet.” Devit i tok moa olsem: “Ol stretpela man bai kisim graun olgeta, na ol bai stap oltaim long en.” (Sng. 37:11, 29; 2 Sml. 23:⁠2) Ol dispela tok promis i mekim wanem long ol manmeri husat i redi long bihainim laik bilong God? Ol inap bilip tru olsem ol stretpela man tasol bai stap long graun. Olsem na graun bai kamap gen olsem paradais wankain olsem gaden Iden. Bihain long sampela haptaim, planti manmeri bilong lain Israel i givim baksait long Jehova na lotu i tru. Olsem na God i larim ol Babilon i daunim ol, bagarapim graun bilong ol, na kisim planti bilong ol i go kalabus long Babilon. (2 Sto. 36:15-21; Jer. 4:22-27) Tasol ol profet bilong God i tokaut olsem bihain long 70 yia, lain Israel bai i go bek long asples bilong ol. Ol dispela tok profet i kamap tru. Yumi tu bai lukim truim bilong ol dispela tok​—paradais long graun. w18.12 4 par. 9-10

Planti edvais bilong ol man bilong graun i no stret wantaim tok bilong Baibel. Tasol yu ting sampela edvais bilong ol inap helpim yumi? Jisas i tok: “Stretpela pasin man i mekim i kamapim ples klia olsem em i gat savetingting.” (Mat. 11:19) Teknoloji i helpim sindaun bilong ol manmeri long olgeta hap bilong graun. Tasol em i no stretim ol bikpela hevi, olsem woa, pasin raskol, na pasin bilong birua long ol manmeri bilong narapela skin kala. Ol dispela hevi i mekim na ol manmeri i no stap amamas. Ol manmeri i no tingting tumas long bihainim stretpela pasin. Olsem na kain kain hevi i painim ol​—ol famili i no stap amamas na ol i kisim ol bikpela sik. Tasol sampela manmeri i bihainim tingting bilong God, olsem na famili bilong ol i stap amamas, ol i bihainim klinpela pasin, helt bilong ol i gutpela, na ol i stap wanbel wantaim ol wanbilip long olgeta hap. (Ais. 2:4; Apo. 10:34, 35; 1 Kor. 6:9-11) Dispela i soim olsem tingting bilong Jehova i winim tru tingting bilong graun. w18.11 20 par. 8-10

Yumi laik pas gut wantaim ol wanblut, mekim gut long ol, na amamasim ol, tasol yumi no ken larim dispela i kirapim yumi long brukim ol lo bilong Baibel. Yumi bai wok yet long mekim ol samting bilong i stap bel isi wantaim ol, tasol yumi bai pas gut wantaim ol manmeri i laikim Jehova. Olgeta lain husat i wokabaut long tok i tru, ol i mas i stap holi. (Ais. 35:8; 1 Pita 1:14-16) Taim yumi kam insait long tok i tru, yumi olgeta i bin mekim ol senis bambai yumi inap bihainim ol stretpela lo bilong Baibel. Sampela i bin mekim ol bikpela senis. Maski yumi mekim ol bikpela senis o nogat, yumi no ken tru lusim ol pasin i klin na holi na bihainim olkain pasin pamuk na pasin doti bilong dispela graun. Olsem wanem yumi inap abrusim pasin pamuk? Yumi mas tingim bikpela pe Jehova i givim bilong baim bek yumi na mekim yumi kamap holi​—Em i givim samting i dia tumas, em blut bilong Pikinini bilong em, Jisas Krais. (1 Pita 1:18, 19) Sapos yumi laik i stap klin yet long ai bilong Jehova, orait oltaim yumi mas tingim na pilim tru ofa bilong Jisas long baim bek yumi. w18.11 11 par. 10-11

Planti bratasista insait long fultaim sevis i luksave olsem taim ol i givim bel long mekim wok autim tok, dispela i helpim ol long holim stretpela tingting maski senis i kamap. Ol ekspiriens bilong ol i soim klia olsem sapos yumi mekim ol wok em yumi inap mekim na yumi bilip na wet long Jehova, yumi bai stap bel isi yet. Na tu, taim ol senis i kamap long sindaun bilong yumi, yumi inap luksave olsem dispela i strongim bilip bilong yumi long trastim God. Sapos senis i kamap wantu​—kain olsem yu kisim nupela tiokratik asainmen, o yu sik, o yu gat wok long lukautim famili—yu mas bilip olsem Jehova bai lukautim yu na helpim yu long taim stret. (Hib. 4:16; 1 Pita 5:6, 7) Long nau yet, maski senis i kamap, yu inap givim bel yet long mekim ol wok lotu. Long rot bilong beten, yu inap i go klostu long Papa bilong yu long heven, na yu mas kisim pasin bilong bilip olsem em bai lukautim yu. Taim yu mekim olsem, yu inap stap bel isi yet maski i gat ol senis i kamap. w18.10 30 par. 17; 31 par. 19, 22

Baibel i stori long planti samting Jehova i mekim bilong soim olsem em i tingim tru ol wokman bilong em. Skelim gutpela pasin God i bihainim long helpim yangpela Samuel long givim tok bilong kotim Hetpris Eli olsem i stap long 1 Samuel 3:1-18. Lo Bilong Jehova i tok ol pikinini i mas rispektim ol lapun, na moa yet ol hetman. (Kis. 22:28; Wkp. 19:32) Olsem wanem? Yu ting Samuel i no pret long i go lukim Eli long bikmoning na tokim em long strongpela tok God i mekim bilong kotim em? Nogat! Baibel i tok Samuel i “pret long tokim Eli long visen em i bin lukim.” Tasol God i kamapim klia long Eli olsem Em i wok long singautim Samuel. Olsem na Eli i tokim Samuel long no ken haitim “wanpela tok” long em. Samuel i “tokim em long olgeta samting,” na ol dispela tok i wankain long ol tok em Eli i bin harim long pastaim. (1 Sml. 2:27-36) Dispela stori i soim olsem Jehova i save tingim gut yumi na em i gat savetingting. w18.09 23 par. 2; 24 par. 4-5

Long nau planti manmeri moa i mekim tok giaman. Wanpela atikol, “Risen na Yumi Save Giaman,” i tok: “Pasin giaman em wanpela pasin we i pas strong tru long ol manmeri.” Planti man i save tok giaman bilong lukautim o givim biknem long ol yet. Ol i tok giaman bilong haitim ol popaia na ol pasin nogut ol i mekim, o bilong kisim mani kago na gutpela sindaun. Atikol i tok moa olsem ol manmeri i “pilim olsem em isi tru long giaman maski em long ol bikpela samting na ol liklik samting. Ol i tok giaman long ol man ol i no save long ol, ol wanwok, ol pren, na ol lain ol i laikim tru.” Wanem samting inap kamap sapos yu tok giaman? Ol narapela i no inap trastim yu na dispela bai bagarapim pasin pren bilong yupela. Man bilong raitim song, Devit, i beten olsem: “Yu save amamas long lukim pasin i tru i stap long bel bilong man.” (Sng. 51:6) Devit i save olsem taim yumi mekim tok tru, dispela i kam long bel bilong yumi. Yumi stap olsem ol Kristen tru, olsem na long olgeta samting yumi mekim, ‘yumi mas mekim tok tru tasol long narapela narapela.’​—Sek. 8:16. w18.10 7 par. 4; 8 par. 9-10; 10 par. 19

Taim lain Israel i lusim Isip long 1513 B.C.E., ating namba bilong ol manmeri i winim 3 milion. Namel long dispela bikpela lain manmeri, i gat ol lain em ol i bilong namba 3 o namba 4 lain tumbuna. I gat ol pikinini, ol lapun, ol lain i sik, na ol lain i paralais. Olsem na ol i nidim gutpela Lida husat i kliagut long hevi bilong ol bambai em i ken lidim dispela bikpela lain manmeri long lusim Isip. Long rot bilong Moses, Jehova i stap gutpela Lida bilong lain Israel. Olsem na ol i no pret long lusim Isip, em ples we ol i stap long en inap longpela taim. (Sng. 78:52) Olsem wanem Jehova i lukautim gut lain Israel na ol i no pret long wanpela samting? Wanpela rot em olsem, taim em i lidim ol long lusim Isip, em i oganaisim ol gut na ol i “wokabaut i go olsem wanpela lain ami.” (Kis. 13:18) God i oganaisim gut lain Israel na dispela i helpim ol long bilip tru olsem em i go pas long ol. Na tu, Jehova i kamapim klia olsem em i stap wantaim ol. “Long san em i stap long klaut . . . na long nait em i stap long paia.” (Sng. 78:14) I olsem Jehova i tokim ol: “No ken pret. Mi stap wantaim yupela na bai mi stiaim na lukautim yupela.” w18.09 26 par. 11-12

Long taim bilong ol man i raitim Baibel, sampela wokman bilong God i bel hevi tru long ol samting i kamap long ol na ol i laik dai. Olsem, Jop i pilim bikpela pen na em i tok: “Mi les tru long laip bilong mi; mi no laik i stap laip moa.” (Jop 7:16) Jona i bel hevi tru long ol samting i kamap long asainmen bilong em, na em i tok: “Nau, O Jehova, plis tekewe laip bilong mi, mobeta mi dai na mi no stap laip.” (Jna. 4:3) Na tu, wanpela taim profet Elaija i pilim olsem hevi i daunim em tru na em i askim God long larim em i dai. Elaija i tok: “Mi inap nau! O Jehova, plis tekewe laip bilong mi.” (1 Kin. 19:4) Tasol Jehova i laikim tru ol dispela gutpela wokman bilong em, na em i laik bai ol i stap laip. God i no krosim ol, em i helpim ol long daunim bel hevi bilong ol na em i strongim ol bambai ol inap stap laip na mekim wok bilong em. w18.09 13 par. 4

Ol wanwok bilong God i save mekim gut long narapela narapela. Long Ol Skripsa Grik, dispela tok “mekim gut long ol arapela” i makim pasin bilong “mekim pasin helpim long ol man [yumi] no save long ol.” (Hib. 13:2; ftn.) Baibel i stori long ol bilipman i mekim gut long narapela, olsem na yumi tu inap mekim wankain pasin laikim. (Stt. 18:1-5) Oltaim yumi mas painim rot long helpim ol narapela, maski ol i “wanbilip” bilong yumi o nogat. (Gal. 6:10) Olsem wanem? Yu inap wok wantaim God na mekim gut long ol fultaim sevan em ol i kam visitim kongrigesen? (3 Jon 5, 8) Taim yumi mekim olsem, rot i op long ‘yumi strongim ol na ol i strongim yumi.’ (Rom 1:11, 12) Tok Bilong God i kirapim ol brata long winim ol mak na mekim ol wok insait long kongrigesen bambai ol inap wok wantaim Jehova. (1 Tim. 3:1, 8, 9; 1 Pita 5:2, 3) Ol i helpim ol narapela long sait bilong bilip na long sait bilong klos na kaikai samting. (Apo. 6:1-4) Ol brata husat i mekim ol wok insait long kongrigesen bai tokim yu olsem pasin bilong helpim ol narapela bai givim amamas long yu. w18.08 24 par. 6-7; 25 par. 10

Maski Timoti i gat namba long mekim sampela wok, em i mas soim pasin sori na pasin rispek long ol man i gat bikpela krismas. Olsem wanem yumi inap holim stretpela tingting long tok Baibel i mekim long rispektim ol lapun? Olsem, yumi bai orait tasol sapos brata o sista husat i gat bikpela krismas i mekim sin long laik bilong em yet o em i kirapim ol narapela long mekim pasin em Jehova i no orait long en? Jehova i no inap skelim krismas bilong dispela brata o sista na orait long rong em i mekim, nogat. Tingim stiatok i stap long Aisaia 65: 20. Em i tok: “Man bilong mekim sin bai kisim tok long bagarap i ken painim em maski em i winim pinis 100 krismas.” Wankain stiatok i stap long visen bilong Esekiel. (Ese. 9:5-7) Olsem na bikpela samting em yumi mas rispektim God Jehova, em Man Bilong Bipo Bipo Yet. (Dan. 7:9, 10, 13, 14) Sapos yumi mekim olsem, yumi no inap pret long stretim man i mekim rong, maski em i gat hamas krismas.​—Gal. 6:1. w18.08 11 par. 13-14

Yumi ol Kristen i mas kisim pasin bilong skelim gut ol stori na bai yumi inap kliagut long ol samting tru i kamap. (Prov. 3:21-23; 8:4, 5) Sapos yumi no kisim dispela pasin, em bai isi tru long Satan na ol manmeri bilong dispela graun i paulim tingting bilong yumi. (Efe. 5:6; Kol. 2:8) Taim yumi save long olgeta samting i kamap, dispela bai helpim yumi long kliagut long stori tru. Long nau, ol manmeri i save harim kain kain stori long rot bilong Intenet, televisen, long redio na niuspepa samting. Na tu, ol man i kisim planti e-mail, teks mesis, na ol nius ripot long ol pren bilong ol na ol lain ol i save long ol. Planti manmeri i save amamas long kamapim ol stori i no tru, o ol i save haitim sampela tok o kamapim tingting bilong ol yet long ol stori, olsem na yumi mas was gut na skelim ol stori yumi harim. w18.08 3 par. 1, 3

Maria em wanpela yangpela meri i gat pasin daun na Jehova i makim em long karim Pikinini bilong em. Dispela meri i no bin slip wantaim wanpela man. Maria i stap long liklik taun em ol i kolim Nasaret. Dispela taun i stap longwe long Jerusalem na tempel. (Luk 1:26-33) Maria i soim olsem em i tingim tru ol samting bilong lotu taim em i toktok wantaim wanblut bilong em Elisabet. (Luk 1:46-55) Tru tumas, Jehova i luksave long bilip bilong Maria, olsem na em i givim gutpela pe long pasin bilong Maria long stap gut long Em. Taim Maria i karim Jisas, Jehova i no toksave long ol bikman long Jerusalem na Betlehem long samting i kamap. Ol ensel i kamap long ol wasman bilong sipsip ausait long Betlehem. (Luk 2:8-14) Bihain ol dispela wasman bilong sipsip i go visitim bebi Jisas. (Luk 2:15-17) Ating Maria na Josep i amamas tru long samting God i mekim bilong soim olsem em i save long Jisas! w18.07 9-10 par. 11-12

Wai na Jehova i belhat tru long Solomon? Baibel i tok: “Bel bilong em i no stap moa wantaim Jehova . . . , tupela taim God i bin kamap long Solomon long driman na em i givim tok lukaut long Solomon long dispela samting em i mekim, olsem em i no ken i go lotuim ol arapela god. Tasol Solomon i no bihainim tok bilong Jehova.” Olsem na God i no orait long Solomon na sambai long em. Ol king i kamap long lain bilong Solomon, ol i no inap bosim lain Israel olsem wanpela lain olgeta, na bikpela hevi i painim ol lain tumbuna i kamap bihain. (1 Kin. 11:9-13) Olsem Solomon, yumi inap pundaun long sait bilong bilip sapos yumi poromanim ol man i no save rispektim ol lo bilong Jehova. Ating sampela i bung wantaim kongrigesen, tasol ol i slek long sait bilong bilip. Ol narapela em ol wanblut, ol neiba, ol wanwok, na ol wanskul em ol i no lotuim Jehova. Sapos ol poroman bilong yumi i no tingim ol lo bilong Jehova olsem bikpela samting, ol inap bagarapim pasin bilong yumi long stap gut long God. w18.07 19 par. 9-10

Satan i yusim ol muvi na ol TV program long kamapim tingting bilong em. Em i save olsem ol man i gat pasin bilong amamas long harim stori, na stori inap kirapim man long kisim kain kain tingting, filings, na mekim sampela samting. Jisas i bin skulim ol man long rot bilong ol stori. Tingim tok piksa bilong Jisas long gutpela man Samaria na pikinini man husat i lusim ples na pinisim mani kago bilong em yet. (Mat. 13:34; Luk 10:29-37; 15:11-32) Ol man husat i bihainim tingting bilong Satan, ol inap yusim ol stori long posinim bel bilong yumi. Olsem na yumi mas bihainim stretpela tingting. Ol muvi na ol TV program inap amamasim na skulim yumi. Tasol yumi mas lukaut. Taim yumi makim wanem kain amamas yumi laik kisim, yumi mas askim yumi yet: ‘Dispela muvi o TV program i skulim mi olsem i orait long bihainim ol laik bilong bodi?’ (Gal. 5:19-21; Efe. 2:1-3) Yu mas mekim wanem sapos yu luksave olsem wanpela program i sapotim tingting bilong Satan? Abrusim dispela program long wankain pasin olsem yu bai abrusim sik we inap kalap kwik long man! w19.01 15-16 par. 6-7

Hat kapa i lukautim het bilong soldia. Olsem tasol, “pasin bilong bilip na wetim God i kisim bek yumi” i lukautim tingting bilong yumi. (1 Tes. 5:8; Prov. 3:21) Olsem wanem Satan inap kirapim yumi long rausim hat kapa bilong yumi? Tingim samting em i mekim bilong traim Jisas. Satan i save olsem Jisas bai mekim wok king na bosim ol manmeri long graun, tasol em i mas wet i go inap long taim Jehova yet i makim. Na tu, em i mas karim pen na hevi na em i mas i dai. Olsem na Satan i traim Jisas long inapim samting em i bilip na wet long en. Satan i tok sapos Jisas i lotu long em, wantu tasol em bai givim olgeta samting em Jisas i wet long en. (Luk 4:5-7) Olsem tasol, Satan i save olsem Jehova bai lukautim yumi long ol samting bilong skin long nupela taim. Tasol yumi mas wet na karim ol hevi. Olsem na Satan i traim yumi long kisim olgeta dispela samting long nau yet. Em i laik bai yumi lusim bikpela haptaim long kisim ol samting bilong skin bambai yumi putim wok bilong Kingdom i stap namba 2.​—Mat. 6:31-33. w18.05 30-31 par. 15-17

Tru tumas, Jehova i laik bai yupela ol yangpela i mas amamas. Yupela i mas putim ol mak em yupela i laik winim long ol wok lotu, na putim Jehova i stap namba 1 long olgeta samting yupela i mekim. Taim yu kirap kwik long mekim olsem, yu bai lukim olsem Jehova i lukautim yu na blesim yu. Tingim olgeta gutpela tok yu kisim i kam long Tok Bilong God, na tingim dispela skultok: “Taim yu stap yangpela yet, tingim Bikpela Man Bilong Wokim yu.” (Ekl. 12:⁠1) Yumi mas mekim tok amamas long ol yangpela insait long kongrigesen em ol i putim ol mak long mekim wok bilong Jehova long laip bilong ol. Ol yangpela i mekim olsem bilong winim ol mak ol i putim, na putim wok autim tok i stap namba 1 samting. Na tu, ol i no laik bai ol samting bilong dispela graun i pulim nabaut tingting bilong ol. Ol yangpela i ken bilip tru olsem hatwok ol i mekim i no inap lus nating. Ol bratasista i redi long helpim ol, na taim ol i givim ol yet long Jehova, Em bai blesim hatwok bilong ol. w18.04 29 par. 17, 19