Jun

Dispela tok i strongim tru ol aposel! Ol i no kliagut yet olsem klostu nau, Bikman bilong ol bai lusim ol. Maski i olsem, i gat rot i stap bilong helpim ol. Jehova i redi long harim beten bilong ol taim ol i wok strong long bihainim tok bilong Jisas long autim gutnius bilong Kingdom. Bihain liklik, ol aposel i luksave olsem Jehova i harim beten bilong ol. (Apo. 4:29, 31) Dispela i wankain tu long nau. Taim yumi sanap strong na karim kaikai, yumi inap stap yet olsem pren bilong Jisas. Na tu, yumi ken bilip tru olsem Jehova i redi long harim beten bilong yumi. Em bai helpim yumi long karim ol hevi yumi bungim taim yumi autim gutnius bilong Kingdom. (Fili. 4:13) Yumi amamas tru olsem God i save harim ol beten bilong yumi, na yumi stap pren bilong Jisas! Ol dispela presen i kam long Jehova i strongim yumi long wok yet long karim kaikai.—Jems 1:17. w18.05 21 par. 17-18

Insait long 5-pela yia tasol, ol Kristen bilong lain Juda em ol i stap long Jerusalem, ol bai luksave olsem “de bilong Jehova” i laik kamap. Ol bai luksave tu long samting em Jisas i bin kolim, em sain bilong makim olsem ol i mas ranawe lusim taun. (Apo. 2:19, 20; Luk 21:20-22) Long yia 70 C.E., de bilong Jehova i kamap taim ol Rom i kam banisim Jerusalem, na i olsem Jehova i kotim ol manmeri. Long nau, yumi mas bilip tru olsem de bilong Jehova “em i bikpela de na ol man bai i pret nogut tru long en,” na dispela de i kam klostu pinis. (Jol. 2:11) Profet Sefanaia i tok: “Bikpela de bilong Jehova i kam klostu pinis! Em i kam klostu pinis na em i kam kwiktaim tru!” (Sef. 1:14) Dispela tok profet i stret tu long taim bilong yumi. De bilong Jehova i kam klostu pinis, olsem na Pol i tokim yumi long “tingim narapela narapela, na kirapim [narapela narapela] long mekim pasin laikim na mekim ol gutpela wok.” (Hib. 10:24) Yumi mas wok strong long soim pasin laikim long ol bratasista bambai yumi inap strongim ol taim ol i nidim helpim. w18.04 20 par. 1-2

Jehova i strongim tru Josua paslain long lain Israel i kisim Graun Bilong Promis! Jehova i save strongim yumi olgeta wan wan, na tu, em i save strongim yumi taim yumi olgeta i bung wantaim. Jehova i mekim tok profet bilong mekim isi bel bilong lain Juda husat i kalabus long Babilon. Em i tok: “Yu no ken pret, bikos mi stap wantaim yu. Yu no ken tingting planti, bikos mi God bilong yu. Mi bai strongim yu, yes, mi bai helpim yu, mi bai holim strong yu long rait han bilong mi we i save mekim stretpela pasin.” (Ais. 41:10) Ol Kristen long taim bilong ol aposel i bilip tru olsem God bai strongim ol, na i wankain tu long lain bilong Em long nau. (2 Kor. 1:3, 4) God i bin mekim tok bilong strongim Jisas. Taim Jisas i kisim baptais, em i harim wanpela nek long heven i tok: “Dispela em i Pikinini bilong mi, mi laikim em tumas na mi amamas long em.” (Mat. 3:17) Ol dispela tok i strongim Jisas taim em i mekim wok autim tok hia long graun! w18.04 16 par. 3-5

Planti man i ritim lo Jehova i givim long Adam, na ol i tok olsem God i tekewe pasin bilong Adam long i stap fri long mekim ol samting long laik bilong em. Ol i no holim stretpela tingting long pasin bilong man long i stap fri, na pasin bilong mekim disisen long wanem samting i gutpela na wanem samting i nogut. Adam na Iv i stap fri long makim olsem ol bai bihainim tok bilong God o nogat. Maski i olsem, Jehova wanpela tasol i gat namba long makim wanem samting i gutpela na wanem samting i nogut. Dispela i kamap klia taim em i putim “diwai bilong givim gutpela save long wanem samting i gutpela na wanem samting i nogut” long gaden Iden. (Stt. 2:9) Long pasin laikim, Jehova i givim lo long Adam na Iv bilong skulim tupela long pasin bilong i stap fri tru. Tasol tumbuna papamama bilong yumi i sakim tok bilong God. Yu ting disisen bilong Adam na Iv i mekim na tupela i stap fri tru long mekim olgeta samting ol i laik mekim? Nogat tru. Ol i strong long bihainim save bilong ol yet, olsem na ol i no stap fri moa. w18.04 5-6 par. 9-12

Jehova i pilim sori long ol manmeri bilong em taim hevi i painim ol. Na tu, em i save mekim sampela samting bilong helpim ol. Taim lain Israel i mekim wok sleiv long Isip, Jehova i pilim tru hevi bilong ol na em i redi long kisim bek ol. Jehova i tokim Moses: “Mi lukim pinis pen na hevi bilong ol manmeri bilong mi . . . na mi harim pinis krai bilong ol. Na mi save tru long pen na hevi ol i karim. Olsem na bai mi go daun na kisim bek ol long han bilong ol Isip.” (Kis. 3:7, 8) Jehova i pilim sori tru long ol manmeri bilong em, olsem na em i kisim bek ol long Isip. Planti handret yia bihain taim lain Israel i stap pinis long Graun Bilong Promis, ol birua i go pait long ol. Jehova i mekim wanem? Em “i sori tru long harim krai bilong ol, long wanem, ol birua i givim pen na hevi long ol na mekim nogut tru long ol.” Long dispela taim tu, Jehova i pilim hevi bilong ol manmeri bilong em na em i helpim ol. Em i salim ol hetman i go bilong kisim bek lain Israel long han bilong ol birua.—Het. 2:16, 18. w19.03 15 par. 4-5

Fes 2-pela lo long lista bilong Tenpela Lo i tok lain Israel i mas lotuim Jehova wanpela tasol na ol i no ken lotuim ol imis. (Kis. 20:3-6) Ol dispela lo i no bilong helpim Jehova, nogat. Ol i bilong helpim ol manmeri bilong em. Taim ol i lotuim ol god bilong ol narapela lain, hevi i painim ol. Tasol Jehova i blesim ol taim ol i stap gut long em na mekim fea pasin long narapela narapela. (1 Kin. 10:4-9) Taim ol manmeri i sakim ol lo bilong Jehova na ol i mekim nogut long ol narapela, ol i no inap sutim tok long God. Jehova i laikim yumi na em i luksave taim ol narapela i no mekim fea pasin long yumi. Mama inap lusim tingting long bebi bilong em, tasol Jehova i no inap tru long lusim tingting long yumi. Maski em i no kirap kwik long givim strafe long ol man nogut, bihain em bai kotim ol long pasin nogut bilong ol. w19.02 22 par. 13-​15

Sampela wik paslain long Memorial, ol miting i save stori long eksampel bilong Jisas na olsem wanem em i daunim em yet na givim laip bilong em olsem ofa. Dispela i kirapim yumi long bihainim pasin bilong Jisas long daunim yumi yet na mekim laik bilong Jehova maski hevi i painim yumi. Yumi tingim pasin bilong Jisas; sampela de paslain long em i dai, em i soim olsem em i bin strongim bel. Em i save olsem ol birua bai semim em, paitim em, na kilim em i dai. (Mat. 20:17-19) Maski i olsem, em i redi long i dai. Taim ol birua i kam, em i tokim ol aposel husat i stap wantaim em long Getsemani: “Kirap na yumi go. Lukim! Man i laik putim mi long han bilong ol birua em i kam klostu pinis.” (Mat. 26:36, 46) Taim ol birua i kam bilong arestim em, em i sanap i go long fran na tokaut long em i husat, na em i tokim ol soldia long larim ol aposel i go. (Jon 18:3-8) Dispela i soim klia olsem Jisas i strongim bel! Long nau, ol Kristen em God i anointim na ol arapela sipsip i wok strong long bihainim pasin bilong Jisas long strongim bel. w19.01 27-28 par. 7-8

Atis i save bungim na miksim ol naispela kala na bai em inap peintim piksa. Olsem tasol, yumi mas bungim na miksim sampela gutpela pasin na bai yumi inap daunim yumi yet. Sampela bilong ol dispela pasin em pasin bilong bihainim tok, pasin isi, na pasin bilong strongim bel. Ol man i gat pasin daun bai daunim laik bilong ol yet na bihainim laik bilong God. Em i laik bai yumi bihainim pasin isi. (Mat. 5:5; Gal. 5:23) Taim yumi bihainim laik bilong God, dispela i save mekim Satan i belhat nogut tru. Olsem na maski yumi bihainim pasin daun na pasin isi, ol manmeri bilong graun bai heitim yumi. (Jon 15:18, 19) Yumi mas strongim bel na bai yumi inap sakim Satan. Sapos man i no gat pasin bilong daunim em yet, em bai mekim pasin antap, em i no inap bosim belhat, na em bai sakim tok bilong Jehova. Dispela em ol pasin tru bilong Satan. Olsem na em i heitim tru ol man i daunim ol yet! Pasin bilong ol i soim klia olsem Satan em man nogut na man bilong giaman. Bilong wanem? Taim ol manmeri i daunim ol yet, ol i no inap larim wanpela tok o pasin bilong Satan i stopim ol long mekim laik bilong Jehova!—Jop 2:3-5. w19.02 8-9 par. 3-5

Jehova i save olsem ol manmeri bilong Babilon bai pret. Ami bilong Midia-Persia bai daunim Babilon. Jehova bai yusim dispela ami long helpim lain Juda long lusim kalabus bilong Babilon. (Ais. 41:2-4) Taim ol manmeri bilong Babilon na ol narapela kantri i harim olsem ol birua i kam klostu long Babilon, ol i tokim narapela narapela: “Strongim bel.” Na tu, ol i wokim planti giaman god, na ol i bilip na hop olsem ol dispela god bai lukautim ol. (Ais. 41:5-7) Tasol Jehova i mekim isi bel bilong ol Juda, na em i tok: “Yu, O Israel, [yu no olsem ol neiba bilong yu] yu wokman bilong mi . . . Yu no ken tingting planti, bikos mi God bilong yu.” (Ais. 41:8-10) Jehova i tok: “Mi God bilong yu.” Em i laik bai ol manmeri bilong em i tingim olsem em i no lusim tingting long ol, na ol i stap yet olsem ol manmeri bilong em. God i tokim ol: “Mi bai karim yupela . . . na kisim bek yupela.” Dispela tok i strongim lain Juda i stap kalabus.—Ais. 46:​3, 4. w19.01 4 par. 8

Mak 1:9-11 i stori long 3-pela taim Jehova i toktok wantaim Jisas taim em i stap long graun. Jehova i tok: “Yu Pikinini bilong mi, mi laikim yu tumas, mi amamas long yu.” Ating Jisas i amamas tru long harim olsem Papa i laikim em na dispela i strongim tru Jisas! Ol tok bilong Jehova i kamapim klia 3-pela samting ol man i mas save long en long Jisas. Namba 1: Jisas em Pikinini bilong God. Namba 2: Jehova i laikim Pikinini bilong em. Namba 3: Jehova i amamas long Pikinini bilong em. Taim Jehova i tok “Yu Pikinini bilong mi,” em i soim klia olsem Jisas i kisim wanpela bikpela wok. Taim Jisas i stap long heven, em i pikinini spirit bilong God. Tasol taim Jisas i kisim baptais, God i makim em long holi spirit. Long dispela taim, Jisas i kamap Pikinini bilong God long sait bilong bilip. God i makim em long kamap King na Hetpris taim em i go bek long heven. (Luk 1:31-33; Hib. 1:8, 9; 2:17) Olsem na taim Jisas i kisim baptais, i stret Papa i tok: “Yu Pikinini bilong mi.”—⁠Luk 3:22. w19.03 8 par. 3-4

Bihain tasol long God i wokim namba 1 man na meri, Satan i givim edvais nogut long tupela. Em i gat pasin antap na long laik bilong em yet, em i tokim Iv olsem Iv na man bilong em bai stap amamas moa sapos ol yet i makim ol samting ol i laik mekim. (Stt. 3:1-6) Tasol Satan i tingim em yet. Em i laik bai Adam na Iv—na ol tumbuna pikinini—i stap daun long em na lotuim em, na ol i no ken lotuim Jehova. Jehova tasol i givim olgeta samting long ol—em i wokim tupela bilong inapim laik bilong narapela narapela, em i wokim naispela gaden ol i stap long en, na bodi bilong ol i gutpela olgeta na ol inap stap laip inap oltaim oltaim. Sori tru olsem Adam na Iv i sakim tok bilong God na ol i no pas gut moa wantaim em. Olsem na bikpela hevi tru i painim ol. Wankain olsem nupela plaua em man i katim, isi isi tupela i kamap lapun na ol i dai. Na tu, ol tumbuna pikinini bilong ol i karim ol hevi i kamap long rot bilong sin. (Rom 5:12) Ol manmeri i luksave long dispela hevi, tasol ol i no laik stap aninit long God. Ol i laik bihainim laik bilong ol yet. (Efe. 2:1-3) Dispela i soim klia olsem tok i stap long teks bilong tude i stret na i tru olgeta. w18.12 20 par. 3-4

Aposel Pol em bikpela saveman na em i save long 2-pela tokples. (Apo. 5:34; 21:37, 39; 22:2, 3) Maski i olsem, em i sakim savetingting bilong graun. Oltaim em i larim Rait Holi i stiaim em. (Apo. 17:2; 1 Kor. 2:6, 7) Olsem na wok autim tok bilong Pol i kamapim planti gutpela samting, na em i bilip long kisim blesing bilong laip oltaim. (2 Tim. 4:8) Tru tumas, tingting bilong God i winim tingting bilong ol man long graun. Taim yumi bihainim tingting bilong God, yumi bai stap amamas tru. Tasol Jehova i no inap fosim yumi long mekim olsem. “Gutpela wokboi i gat savetingting” i no kontrolim tingting bilong yumi, na ol elda tu i no mekim olsem. (Mat. 24:45; 2 Kor. 1:24) Olgeta wan wan Kristen i gat wok long senisim tingting bilong ol na bihainim tingting bilong God. w18.11 20-21 par. 12-13

Long rot bilong Aisaia, God i tok olsem taim ol manmeri bilong Em i go bek long asples bilong ol, i no gat wanpela samting bai bagarapim o givim pen long ol. Na tu, i no gat animal o man bai pait na mekim nogut long ol. Ol yangpela na ol lapun bai i no pret long wanpela samting. (Ais. 11:6-9; 35:5-10; 51:3) Aisaia i tok tu olsem graun olgeta—na i no lain Israel tasol—“bai pulap long save bilong Jehova olsem wara i karamapim solwara olgeta.” Aisaia i strongim gen tok olsem lain Israel i no inap pret long ol animal na ol manmeri. Graun bilong ol bai kamapim planti kaikai bikos i gat planti hanwara wankain olsem long gaden Iden. (Stt. 2:10-14; Jer. 31:12) Yu ting tok profet bilong Aisaia i kamap tru long taim bilong lain Israel tasol? I no gat wanpela tok long Baibel i soim olsem God i wokim mirakel na oraitim sik bilong lain Israel taim ol i go bek long asples bilong ol, nogat. Ai bilong ol aipas i no kamap orait. Dispela i soim olsem wanpela taim bai kamap bihain na God bai wokim mirakel bilong oraitim olgeta kain sik. w18.12 5 par. 11-​12

Yumi kirap pinis long wokabaut long tok i tru, na yumi inap wokabaut yet long dispela rot i go inap oltaim oltaim. Olsem wanem yumi inap strongim tingting bilong yumi long wokabaut yet long tok i tru? Yumi mas wok yet long stadi na tingim tingim ol gutpela tok i tru i stap long Baibel. I olsem yu baim tok i tru bikos yu lusim sampela haptaim long stadi. Taim yu mekim olsem, yu bai laikim moa yet ol dispela tok na yu bai strongim tingting olsem yu no inap tru long salim tok i tru. Provep 23:23 i tok yumi mas baim tok i tru, na tu, yumi mas baim “savetingting, tok bilong skulim [yumi] na pasin bilong kliagut long ol samting.” Yumi kisim save, tasol yumi mas mekim sampela samting moa. Yumi mas bihainim tok i tru long laip bilong yumi. Taim yumi kliagut long ol samting, yumi bai luksave olsem olgeta tok bilong Jehova i stret na i sapotim narapela narapela. Savetingting bai kirapim yumi long mekim wok long save yumi kisim pinis. Sampela taim, tok i tru i stretim yumi na soim yumi long sampela pasin yumi mas senisim. Oltaim yumi mas larim tok i tru i stiaim yumi. Tok i tru em samting i dia tumas na i winim tru silva.—Prov. 8:10. w18.11 9 par. 3; 11 par. 13-14

Wanem samting i dia tumas long yu? Yu redi long senisim na kisim narapela samting we pe bilong en i daun tru? Ol lain i dediket long Jehova, ol i save long bekim bilong ol dispela askim. Pasin pren bilong yumi wantaim Jehova em samting i dia tumas, na yumi no inap senisim bilong kisim narapela samting. Na tu, tok i tru bilong Baibel em samting i dia tumas long yumi, bikos em i opim rot long yumi inap pas gut wantaim Papa bilong yumi long heven. (Kol. 1:9, 10) Tingim olgeta samting em Nambawan Bikpela Tisa i skulim yumi long en long rot bilong Baibel! Em i tokaut long ol gutpela pasin bilong em na mining i stap long nem bilong em. Em i tokim yumi long ofa bilong baim bek yumi—em bikpela samting tru em i kamapim long rot bilong Jisas. Na tu, Jehova i tokim yumi long Kingdom Bilong Mesaia na hop bilong kisim laip oltaim long graun. Em i skulim yumi long ol pasin yumi mas bihainim. Ol dispela tok i tru em samting i dia tumas long yumi bikos ol i helpim yumi long i go klostu long Krieta bilong yumi. Taim yumi kisim save long ol dispela tok i tru, yumi inap pilim olsem laip bilong yumi i gat as bilong en. w18.11 3 par. 1-2

Ol man bilong tok giaman i no inap haitim wanpela samting long Jehova bikos “olgeta samting i op olgeta na i stap ples klia” long ai bilong em. (Hib. 4:13) Ananaias na Safaira i pasim tok long bel olsem ol bai giamanim ol aposel. Ol i salim wanpela hap graun, tasol ol i holim bek sampela mani na ol i givim narapela hap long ol aposel. Tupela i laik bai kongrigesen i ting olsem ol i mekim gutpela pasin long givim bikpela donesen tru winim skel bilong ol. Tasol Jehova i lukim samting tupela i mekim na em i givim panismen i stret long pasin giaman ol i mekim. (Apo. 5:1-10) Jehova i gat wanem tingting long pasin giaman? Satan wantaim olgeta manmeri husat i bihainim pasin bilong em long tok giaman long bagarapim nem bilong ol narapela na ol i no tanim bel, ol bai go daun long “raunwara i gat bikpela paia.” (Rev. 20:10; 21:8; Sng. 5:6) Yumi save olsem Jehova “i no save giaman olsem ol man.” Baibel i tok: “God i no inap giaman.” (Nam. 23:19; Hib. 6:18) “Jehova i nolaik tru long . . . maus i save giaman.” (Prov. 6:16, 17) Sapos yumi laik bai God i orait long yumi, orait yumi mas bihainim lo bilong em na mekim tok tru tasol. w18.10 8 par. 10-​13

Tingim olsem bos i askim yu long givim sampela mani bilong sapotim wanpela bung, tasol dispela bung i insait long lotu giaman. Yu bai mekim wanem? No ken wet i go inap long kain traim olsem i painim yu. Mobeta sapos long nau yet, yu skelim tingting bilong Jehova long ol kain samting olsem. Bihain, sapos kain traim olsem i kamap, yu bai save long tok na pasin yu mas mekim. Sapos yumi kliagut long wai na em i bikpela samting long yumi mas i stap gut long God, dispela inap helpim yumi long taim bilong imejensi. Yumi ol Kristen i save olsem yumi no inap kisim blut o wanpela bilong 4-pela hap bilong en. Tasol i gat sampela rot bilong ol dokta long mekim wok long blut bilong yumi long taim bilong operesen samting. Dispela em disisen yumi wan wan i mas mekim na yumi mas larim ol stiatok bilong Jehova long Baibel i stiaim yumi. (Apo. 15:28, 29) I no savetingting long skelim ol dispela samting taim yu stap long haus sik. Ating yu pilim bikpela pen na ol narapela i putim presa long yu mas mekim disisen kwiktaim. Nau em taim bilong mekim wok painimaut, raitim ol tok long blut kat i tokaut long samting yu laik bai dokta i mekim, na toktok wantaim dokta bilong yu. w18.11 24 par. 5; 26 par. 15-16

Jehova em i gutpela wasman, na em i stap klostu long ol manmeri bilong em na lukautim ol long ol birua. Ol dispela tok i strongim tru bilip bilong yumi bikos yumi go klostu moa long pinis bilong haptaim nogut bilong nau! Jehova bai lukautim yet lain bilong em long taim bilong traipela hevi tru em klostu nau bai kamap. (Rev. 7:9, 10) Ol manmeri bilong God, maski ol i yangpela, lapun, ol i gat sik, o ol i paralais, ol i no inap pret o guria. Ol bai strongim bel na amamas! Ol bai tingim tok Jisas Krais i mekim: “Yupela i mas sanap na litimapim het bilong yupela, long wanem, taim bilong God long kisim bek yupela i kam klostu.” (Luk 21:28) Ol bai sanap strong taim Gok bilong Magok—em ol kantri i bung wantaim—i pait long ol. (Ese. 38:2, 14-16) Wai na ol manmeri bilong God bai i no pret? Ol i save olsem Jehova i no save senis. Oltaim em bai mekim samting bilong soim olsem em i save tingim gut lain bilong em na em i Man Bilong Kisim Bek ol.—is. 26:20. w18.09 26 par. 15-16

Ating dispela tok bilong Jehova i strongim tru lain Israel. Olsem wanpela wokman bilong Jehova, yu ken bilip olsem em i laikim yu tru. Baibel i mekim gutpela tok long ol lain husat i wok strong long lotu tru long God. Em i tok: “Em Man i gat bikpela strong, em bai seivim yu. Em bai belgut na amamas tru long yu.” (Sef. 3:16, 17) Maski yumi bungim kain kain hevi, Jehova i tok promis long lukautim na mekim gut bel bilong yumi. Em i tok: “Yupela bai stap olsem bebi i dring susu bilong mama na mama i karim em long hips bilong em, na olsem bebi em mama i putim long lek bilong em na em i kalap kalap. Olsem mama i save mekim isi bel bilong pikinini bilong em, bai mi wok yet long mekim isi bel bilong yupela.” (Ais. 66:12, 13) Dispela em naispela tok piksa—mama i laikim pikinini bilong em na i karim em na putim em long lek na pilai wantaim em! Jehova i mekim dispela tok piksa bilong kamapim klia pasin bilong em long laikim tru ol manmeri husat i lotu tru long em. Yu ken bilip tru olsem Jehova i tingim yu olsem man i dia tumas na em i laikim yu tru.—Jer. 31:3. w18.09 13 par. 6-7

Long taim bilong ol Israel long bipo, ol manmeri i save volantia long mekim wok. (Kis. 36:2; Neh. 11:2) Long nau, planti rot i op long yu inap givim taim, save, na ol samting yu gat long helpim ol bratasista. Yu bai amamas tru na kisim planti blesing taim yu insait long kain kain wok. Ol lain i insait long ol wok konstraksen i save bungim ol nupela pren. Tingim eksampel bilong Margie. Em wanpela sista husat i helpim wok bilong sanapim ol Haus Kingdom inap 18 yia pinis. Long ol yia em i mekim wok, em i lukautim sampela yangpela sista na trenim ol. Em i luksave olsem dispela em gutpela rot bilong strongim ol long sait bilong bilip. (Rom 1:12) Long taim bilong hevi, ol pren bilong Margie long konstraksen i mekim ol tok bilong strongim em. Yu bin volantia long wok konstraksen? w18.08 25 par. 9, 11

Taim Pol i raitim ol dispela tok, ating Timoti i gat 32 o 33 krismas samting. Maski i olsem, Pol i givim ol bikpela wok long Timoti long mekim insait long kongrigesen. Dispela i helpim yumi long luksave olsem, yumi no ken skelim krismas bilong ol yangpela brata. Tingim, Bikpela bilong yumi, Jisas, i mekim wok autim tok long graun taim em i gat 30 krismas samting. Ating ol lain long ples bilong yumi i gat pasin bilong luk daun long ol yangpela man. Sapos olsem, ating ol elda long kongrigesen bai i gat 2-pela tingting long makim ol yangpela brata husat i winim mak long kamap kongrigesen sevan o elda. Olgeta elda i mas tingim olsem Baibel i no kolim stret krismas man i mas winim bilong kamap kongrigesen sevan o elda.—1 Tim. 3:1-10, 12, 13; Tai. 1:5-9. w18.08 11-12 par. 15-16

Yumi mas kliagut long olgeta samting i kamap bambai yumi inap mekim gutpela disisen. Olsem na yumi mas skelim gut ol stori na makim wanem ol stori yumi laik ritim. (Fili. 4:8, 9) Yumi no ken westim taim long go long Intenet na ritim ol nius i kamapim ol stori i no tru, o ritim ol stori nating i kam long rot bilong e-mail. Na tu, yumi no ken tru go long ol Web-sait bilong ol apostet na ritim stori bilong ol. Nambawan tingting bilong ol em long bagarapim lain bilong God na paulim tok i tru. Ol stori nating bai stiaim man long mekim ol disisen i no stret. Ol stori nating i gat strong long stiaim bel na tingting bilong yumi. Tingim samting i kamap long taim bilong Moses. Tenpela man namel long 12-pela man husat i go bilong lukstil long Graun Bilong Promis i kam bek na kamapim ol giaman stori. (Nam. 13:25-33) Stori nating bilong ol i mekim na ol manmeri bilong Jehova i pret nogut tru. (Nam. 14:1-4, 6-10) Ol i no kliagut long samting tru i kamap na ol i no bilip long Jehova, olsem na ol i bilipim giaman stori. w18.08 4 par. 4-5

Planti man i gat ol gutpela pasin, na planti husat i no wanbilip i no save insait long ol pasin nogut. Maski sapos yu poroman wantaim ol wanbilip na ol man ausait husat i save bihainim ol gutpela pasin, yu ting ol inap stap gutpela pren bilong yu? Olsem wanem? Pasin bilong yu long poroman wantaim ol bai strongim pasin pren bilong yu wantaim Jehova? Wanem samting i stap long bel na tingting bilong ol? Olsem, ol i save stori planti long ol klos na bilas, mani, ol fon na teblet samting, ol muvi na musik, na ol narapela samting bilong skin? Olsem wanem? Ol i save mekim ol tok bilong rabisim ol narapela o mekim ol tok pilai doti? Jisas i tok: “Maus i save autim ol tingting i pulap long bel.” (Mat. 12:34) Sapos yu luksave olsem ol lain yu save bung wantaim inap bagarapim pasin pren bilong yu wantaim Jehova, orait mobeta yu no lusim bikpela haptaim long bung wantaim ol, o yu no ken bung moa wantaim ol.—Prov. 13:20. w18.07 19 par. 11

Taim Moses i gat 80 krismas, Jehova i givim em bikpela asainmen​—⁠Moses bai lidim lain Israel long lusim kalabus long Isip. (Kis. 3:10) Inap planti taim, Moses i mekim ol eskius. Tasol Jehova i no les kwik long Moses, na em i givim strong long Moses long wokim ol mirakel. (Kis. 4:2-9, 21) Em inap pretim Moses na bai Moses i redi tasol long bihainim tok bilong em. Tasol Jehova i gat gutpela pasin na em i no les kwik long Moses; em i strongim Moses, em man i gat pasin daun. Yu ting pasin God i bihainim i helpim Moses? Yes! Moses i kamap gutpela lida. Em i tingim tru ol narapela na mekim pasin isi long ol wankain olsem Jehova i bin mekim long em. Sapos yu mekim wok bilong lukautim na stiaim ol narapela, orait em i bikpela samting long yu mas bihainim pasin bilong Jehova—tingim gut ol, mekim gutpela pasin, na no ken les kwik long ol! (Kol. 3:19-21; 1 Pita 5:1-3) Taim yu bihainim pasin bilong Jehova na Jisas, em Man i Winim Moses, ol narapela bai amamas long toktok wantaim yu na yu bai givim nupela strong long ol.—Mat. 11:28, 29. w18.09 24-25 par. 7-10

Olsem wanem? Yu laik stap olsem gutpela eksampel na strongim pasin wanbel namel long ol bratasista? Sapos yu mekim olsem, mipela i laik tok amamas long yu. Yu ting yu inap “mekim pasin laikim long bel bilong [yu] i go bikpela moa”? (2 Kor. 6:11-13) Yu ting yu inap wok strong moa long larim lait bilong tok i tru i stap ples klia long hap yu stap long en? Gutpela tok na pasin bilong yu inap kirapim neiba bilong yu long kisim tok i tru. Askim yu yet: ‘Ol neiba bilong mi i gat wanem tingting long mi? Haus na banis bilong mi i stap klin long ai bilong ol neiba? Mi save go pas long helpim ol narapela?’ Taim yu toktok wantaim wanpela wanbilip, askim em long olsem wanem gutpela pasin bilong em i bin helpim ol wanblut, ol neiba, ol wanwok, na ol wanskul bilong em. Ating yu bai harim em i stori long ol gutpela ekspiriens bilong em.—Efe. 5:9. w18.06 24 par. 13-14

Kain hevi olsem i kamap long taim bilong ol aposel. Ol birua i mekim nogut na kilim i dai disaipel Stiven na planti arapela bilipman. (Apo. 6:8, 12; 7:54-60) Ol man i go pas long kilim i dai ol wokman bilong God, ol i ting God i orait long pasin ol i mekim, tasol ol i no luksave olsem ol i brukim lo bilong God! (Kis. 20:13) Maus bilong bel i stiaim ol long mekim rong samting stret! Yumi inap mekim wanem na bai maus bilong bel i wok gut? Ol lo na stiatok bilong Baibel i “gutpela long skulim man, stretim man, mekim ol samting i kamap stret, na skulim ol man long stretpela pasin.” (2 Tim. 3:16) Yumi mas stadi gut long Tok Bilong God, tingim tingim, na bihainim ol dispela tok. Taim yumi mekim olsem, yumi trenim gut maus bilong bel long bihainim tingting bilong God long olgeta samting, na yumi inap mekim gutpela disisen. w18.06 16-17 par. 3-4

Long taim bilong Pol, ol soldia bilong Rom i save yusim bainat em longpela bilong en inap olsem 50 sentimita. Ol i wokim dispela bainat bilong man i ken holim long han na pait. Ol soldia bilong Rom i save gut long pait bikos ol i save prektis long yusim bainat long olgeta de. Pol i kolim Tok Bilong God olsem bainat Jehova i givim long yumi. Yumi mas lain long yusim gut dispela bainat long sapotim bilip bilong yumi, na stretim tingting bilong yumi yet. (2 Kor. 10:4, 5; 2 Tim. 2:15) Yumi no ken pret long Satan na ol spirit nogut. Satan na ol spirit nogut i gat strong, tasol yumi inap winim ol. Ol i no inap i stap oltaim. Long Wan Tausen Yia, ol bai stap kalabus na ol i no inap mekim wanpela samting, na bihain ol bai bagarap na pinis olgeta. (Rev. 20:1-3, 7-10) Yumi save long birua bilong yumi, ol trik bilong em, na laik nogut bilong em. Jehova inap helpim yumi na yumi inap sanap strong na sakim Satan! w18.05 30 par. 15; 31 par. 19-21

Adam i save olsem ol snek i no inap toktok. Olsem na ating em i save olsem wanpela spirit i toktok long Iv long rot bilong snek. (Stt. 3:1-6) Adam na Iv i no save liklik long dispela spirit. Maski i olsem, Adam i mekim disisen long givim baksait long gutpela Papa bilong em long heven, na sapotim man em i no save long en na sakim laik bilong God. (1 Tim. 2:14) Kwiktaim Jehova i kamapim klia husat dispela birua i bin trikim Adam na Iv, na God i tok promis olsem bagarap bai painim dispela birua long bihain. Na tu, Jehova i tok lukaut olsem dispela spirit husat i toktok long rot bilong snek, em bai i gat strong long mekim nogut long ol man i laikim God. (Stt. 3:15) Jehova i gat savetingting, olsem na em i no tokim yumi long nem bilong dispela ensel husat i bikhet long em. Klostu 2,500 yia bihain long dispela birua i kirapim Adam na Iv long bikhet, God i kamapim nem em i givim long dispela bikhet ensel.—Jop 1:6. w18.05 22 par. 1-2

Sapos yu autim tok long ol hap we ol man i no laik harim tok, yu inap bel hevi wankain olsem aposel Pol. Em i mekim wok autim tok inap 30 yia samting na helpim planti manmeri long kamap disaipel bilong Krais. (Apo. 14:21; 2 Kor. 3:2, 3) Maski i olsem, planti Juda i no kamap Kristen. Planti bilong ol i sakim Pol na sampela i laik kilim em. (Apo. 14:19; 17:1, 4, 5, 13) Pol i pilim olsem wanem long pasin bilong lain Juda? Em i tok: “Mi man i save bihainim Krais, . . . mi bel hevi tru na bikpela sori i stap insait long bel bilong mi.” (Rom 9:1-3) Wai na Pol i bel hevi? Em i tingim tru wok autim tok. Pol i autim tok long lain Juda bikos em i laik tru long helpim ol. Em i bel hevi bikos ol i no pilim tru gutpela pasin marimari bilong God. Olsem Pol, yumi autim tok bikos yumi laik tru long helpim ol manmeri.—Mat. 22:39; 1 Kor. 11:1. w18.05 13 par. 4-5

Pol i kamapim klia olsem maski man i gat wok long strongim ol narapela, em tu i nidim ol tok bilong strongim em. Em i tokim ol Kristen long Rom olsem: “Mi gat bikpela laik long lukim yupela bai mi ken givim yupela presen i kam long God, na dispela i ken strongim yupela. O i gutpela moa sapos yupela i strongim mi na mi strongim yupela, olsem bilip bilong mi i ken strongim yupela, na bilip bilong yupela i ken strongim mi.” (Rom 1:11, 12) Pol i save strongim ol narapela, tasol sampela taim em i nidim ol tok bilong strongim em. (Rom 15:30-32) Yumi mas tok amamas long ol man husat i givim laip bilong ol long mekim wok bilong God. Ol bratasista husat i stap singel bikos ol i laik bihainim tok bilong Baibel long maritim man o meri “i bihainim Bikpela,” ol tu i nidim tok bilong strongim ol. (1 Kor. 7:39) Na tu, ol Kristen husat i stap strong long bilip taim ol man i birua long ol o ol i sik, ol tu i nidim tok bilong strongim ol.—2 Tes. 1:3-5. w18.04 21 par. 3-5