Ogas

Yu ting wanem wanpela risen na Jehova inap raitim nem bilong ol man em toktok bilong ol i soim olsem ol i pret long em na tingim tingim nem bilong em long “buk i gat nem bilong ol man em i tingim ol”? Ol toktok bilong yumi i kamapim klia wanem samting i stap long bel bilong yumi. Jisas i tok: “Maus i save autim ol tingting i pulap long bel.” (Mat. 12:34) Jehova i laik bai ol manmeri i laikim em i stap amamas oltaim long nupela taim. Pasin bilong yumi long toktok bai makim olsem Jehova bai orait long lotu bilong yumi o nogat. (Jems 1:26) Sampela man em ol i no laikim God ol i save toktok long pasin we i soim olsem ol i gat hatpela pasin, ol i kros, na ol i gat pasin antap. (2 Tim. 3:​1-5) Yumi no laik bihainim pasin bilong ol. Yumi laik amamasim Jehova long ol toktok bilong yumi. Tasol olsem wanem? Jehova bai amamas long yumi sapos yumi mekim ol gutpela tok long taim bilong ol miting Kristen o long wok autim tok, tasol yumi mekim ol hatpela tok na ol tok i no soim pasin laikim taim yumi stap wantaim ol wanfamili bilong yumi?—1 Pita 3:7. w22.04 5 par. 4-5

God i givim tingting long dispela 10-pela kom na dispela wel animal long bagarapim na pinisim Bikpela Babilon. Yes, Jehova bai kirapim ol gavman long yusim dispela retpela wel animal, em Yunaitet Nesen, long bagarapim na pinisim tru Bikpela Babilon. (Rev. 18:21-24) Dispela i mekim wanem long yumi? Yumi mas wok yet long bihainim “pasin bilong mekim lotu i klin na i no gat doti long en long ai bilong God.” (Jems 1:27) Yumi no ken tru larim Bikpela Babilon i yusim ol bilip giaman bilong en, ol selebresen bilong ol haiden, pasin bilong sakim ol stretpela lo, na wok bilong ol spirit nogut long stiaim ol tingting na pasin bilong yumi! Na yumi mas wok yet long tokim ol manmeri long “lusim dispela ples na kam ausait” na bai ol i no gat asua long sin bilong em long ai bilong God.—Rev. 18:4. w22.05 11 par. 17; 14 par. 18

Ol papamama, painim ol rot bilong skulim ol pikinini long Jehova na long planti gutpela samting em i mekim bilong helpim yu. (Lo 6:6, 7) Dispela em bikpela samting sapos oltaim yu no inap stadi wantaim ol pikinini bilong yu long haus bikos poroman marit bilong yu i no wanbilip. Wanpela sista em nem bilong em Christine i tok: “Planti taim i no gat rot long mi ken stori wantaim ol pikinini long Jehova, olsem na wanem taim rot i op mi save mekim olsem.” Na tu, taim yu toktok wantaim ol pikinini mekim ol gutpela tok long oganaisesen bilong Jehova na long ol bratasista bilong yu. No ken mekim ol tok bilong daunim ol elda. Ol tok yu mekim long ol pikinini, dispela bai helpim ol long kisim helpim long ol elda long taim ol i gat hevi o nogat. Strongim bel isi insait long famili. Long olgeta taim tokim man bilong yu na ol pikinini bilong yu olsem yu laikim ol. Toktok long man bilong yu long gutpela pasin na long pasin rispek, na trenim ol pikinini long mekim wankain pasin. Taim yu mekim olsem, em bai isi moa long ol pikinini bilong yu long kisim save long Jehova.—Jems 3:18. w22.04 18 par. 10-11

Ol tok Jisas i mekim long kongrigesen long Efesus i soim olsem kongrigesen i bin sanap strong na ol i bin givim bel yet long mekim wok bilong Jehova, maski ol i bin karim planti hevi. Tasol ol i bin lusim pasin bilong ol long laikim tru Jehova em ol i bin gat long pastaim tru. Ol i mas kisim bek na strongim dispela pasin, sapos nogat, Jehova i no inap orait long lotu bilong ol. Olsem tasol, long nau tu yumi mas sanap strong na karim ol hevi na yumi mas mekim sampela samting moa. Yumi mas skelim gut as na yumi sanap strong. God bilong yumi em i amamas long ol samting yumi mekim na risen na yumi mekim olsem. Astingting yumi gat bilong lotuim em, dispela em i bikpela samting long em, bikos em i laik bai pasin bilong yumi long laikim em na tenkyu long em i kirapim yumi long lotuim em. (Prov. 16:2; Mak 12:29, 30) Yumi mas wok yet long was i stap na no ken slip. Ol manmeri long kongrigesen long Sardis i gat wanpela narapela hevi. Bipo ol i bin givim bel long mekim wok bilong God, tasol bihain ol i no moa mekim ol wok bilong God. Jisas i tokim ol long “lusim slip na kirap.” (Rev. 3:​1-3) Tru tumas, Jehova i no inap lusim tingting long ol wok yumi mekim.—Hib. 6:10. w22.05 3-4 par. 6-7

Solomon i tok olsem amamas yumi kisim taim yumi wok hat “em i presen i kam long God.” (Ekl. 5:18, 19) Solomon i save olsem dispela tok em i tru. Em i man bilong wok hat! Em i wokim ol haus, planim ol gaden wain, na em i wokim ol gaden na ol raunwara. Na em i wokim tu ol taun. (1 Kin. 9:19; Ekl. 2:4-6) Em i wok hat tru na dispela i mekim em i amamas. Tasol Solomon i save olsem ol dispela wok tasol i no inap mekim em i stap amamas tru, em i mas mekim sampela samting moa. Em i bin mekim planti wok bilong Jehova. Olsem, em i bin lukautim wok konstraksen bilong wokim wanpela naispela tempel bilong lotuim Jehova—ol i mekim dispela projek insait long 7-pela yia! (1 Kin. 6:38; 9:1) Solomon i bin insait long olgeta kain wok—long sait bilong wok skin na wok lotu—na em i luksave olsem wok lotu em i bikpela samting moa winim wok skin. Em i tok: “Olgeta tok mi mas mekim, mi mekim pinis, na bilong pinisim tok, mi laik tok: Yu mas pret long God tru na bihainim ol lo bilong em.”—Ekl. 12:13. w22.05 22 par. 8

Baibel i gat stori bilong ol manmeri em Jehova i bin redi long fogivim ol. Yu inap tingim stori bilong husat? Ating yu tingim stori bilong King Manase. Dispela man nogut i bin mekim planti sin tru long ai bilong Jehova. Em i go pas long lotuim ol god giaman na em i kirapim ol narapela tu long mekim olsem. Em i kilim i dai ol pikinini bilong em yet na givim ol olsem ofa i go long ol god giaman. Na tu, em i wokim imis bilong wanpela god giaman na sanapim dispela imis insait long tempel holi bilong Jehova. Baibel i tok long em olsem: “Em i mekim ol pasin nogut tru long ai bilong Jehova na mekim em i kros.” (2 Sto. 33:2-7) Maski i olsem, taim Manase i soim olsem em i tanim bel tru tru, Jehova i redi long lusim ol rong bilong em. (2 Sto. 33:12, 13) Ating yu tingim tu stori bilong King Devit, em i bin mekim ol bikpela sin long ai bilong Jehova—em i mekim pasin adaltri na kilim man i dai. Maski i olsem, taim Devit i bin tanim bel tru na em i tokaut long ol rong bilong em, Jehova i fogivim em tu. (2 Sml. 12:9, 10, 13, 14) Yes, yumi ken save tru olsem Jehova i redi long lusim ol rong bilong yumi. w22.06 3-4 par. 7

Sampela taim i hatwok long mekim bilip bilong yumi i stap strong. Ating yumi les pinis long wetim God long truim ol promis bilong em. Tasol tingim, Jehova i save stap oltaim oltaim na tingting em i gat long taim i no wankain long tingting bilong yumi. (2 Pita 3:8, 9) Em bai mekim ol samting em i tingting pinis long mekim long taim stret bilong em, tasol ating em bai i no mekim olsem long taim yumi ting long en. Wanem samting i ken helpim yumi long holim yet strongpela bilip taim yumi wetim God long truim ol tok promis bilong em? (Jems 5:7) Yumi mas pas gut yet wantaim Jehova, em Man i save truim olgeta tok promis bilong em. Baibel i tok olsem bilong yumi ken bilip na wetim ol gutpela samting i kamap bihain, yumi mas bilip olsem Jehova i stap tru na em i “save givim gutpela pe long ol man i wok strong long painim em.” (Hib. 11:1, 6) Taim yumi bilip olsem Jehova i stap tru, dispela bai strongim bilip bilong yumi olsem em bai truim olgeta tok promis bilong em. Bilong mekim bilip bilong yumi i stap strong, yumi mas beten long Jehova na ritim Tok bilong em. Maski yumi no inap lukim Jehova, yumi ken go klostu long em. Yumi ken beten na toktok wantaim em, na yumi ken bilip tru olsem em bai harim ol beten bilong yumi.—Jer. 29:11, 12. w22.10 26-27 par. 11-13

Piksaim ol samting i kamap. Jop i sindaun antap long ol sit bilong paia, em i karim bikpela pen tru. (Jop 2:8) Ol pren bilong em i wok yet long sutim tok long pasin bilong em na ol i traim long bagarapim gutnem bilong em. Ol hevi em i karim i olsem ol hevipela ston, na bel hevi em i pilim long ol pikinini bilong em i dai i brukim tru lewa bilong em. Pastaim, Jop i no mekim wanpela tok. (Jop 2:13) Sapos ol giaman pren bilong Jop i ting olsem as na em i no mekim wanpela tok i makim olsem em bai givim baksait long Krieta bilong em, orait ol i popaia tru. Taim ol i toktok yet i stap, ating Jop i apim het bilong em na lukluk stret long ol giaman pren bilong em na em i tok: “I go inap long taim mi dai, mi no inap lusim pasin bilong mi long i stap gut long God!” (Jop 27:5) Wanem samting i helpim Jop long strongim bel tru na sanap strong maski em i karim pen na hevi? Maski bel bilong em i bagarap tru, em i no lusim pasin bilong bilip na wet olsem gutpela God bilong em bai pinisim pen na hevi bilong em. Em i save olsem maski sapos em i dai, Jehova bai kirapim bek em.—Jop 14:13-15. w22.06 22 par. 9

Yumi kisim wanpela naispela presen tru—yumi ken toktok wantaim Man Bilong Wokim heven na graun long rot bilong beten. Tingim dispela: Yumi ken kamapim bel na tingting bilong yumi long Jehova long olgeta kain taim na long olgeta kain tokples. Yumi ken beten long em taim yumi stap long sik bet long haus sik o taim yumi stap long haus kalabus, na yumi ken save tru olsem gutpela Papa bilong yumi bai putim yau long yumi. Tru tumas, yumi amamas tru long presen bilong beten. Devit i amamas tru long presen bilong beten. Em i singsing long Jehova olsem: “Mi laik bai yu kisim beten bilong mi olsem smok i gat gutpela smel i go long yu.” (Sng. 141:1, 2) Long taim bilong Devit, ol i save redim gut paura bilong kamapim smok i gat gutpela smel em ol pris i save yusim bilong mekim lotu i tru. (Kis. 30:34, 35) Devit i stori long pasin bilong redim gut paura bilong kamapim smok i gat gutpela smel na dispela i soim olsem em i laik tingim gut ol tok em bai mekim long Papa bilong em long heven. Yumi tu i laik mekim olsem. Yumi laik bai ol beten bilong yumi i amamasim Jehova. w22.07 20 par. 1-2; 21 par. 4

Bekim rong em wok bilong Jehova. Jehova i no givim yumi namba long bekim rong em wanpela i bin mekim long yumi. (Rom 12:20, 21) Yumi gat sin na sampela taim tingting bilong yumi i kranki, so yumi no inap long skelim gut ol samting long stretpela pasin olsem God i save mekim. (Hib. 4:13) Na sampela taim, yumi inap larim filings bilong yumi i stopim yumi long skelim gut ol samting. Jehova i kirapim Jems long raitim dispela tok: “Belhat bilong man i no save kamapim stretpela pasin bilong God.” (Jems 1:20) Yumi ken save tru olsem Jehova bai mekim samting i stret na i no gat wanpela samting bai pasim em long mekim stretpela kot. Taim yumi fogivim narapela, yumi soim olsem yumi trastim stretpela pasin bilong Jehova. Taim yumi larim ol samting long han bilong Jehova, yumi soim olsem yumi bilip tru olsem Jehova bai pinisim olgeta pen na hevi em sin i bin kamapim. Long nupela taim God i tok promis long kamapim, “[yumi] no inap tingim gen ol samting” i save mekim yumi pilim pen na krai, “na long bel, [yumi] no inap tingim na pilim gen ol dispela samting.”—Ais. 65:17. w22.06 10-11 par. 11-12

Ol kain pasin birua i painim yumi i soim klia olsem Jehova i orait long yumi. (Mat. 5:11, 12) Satan em i as bilong ol dispela pasin birua. Tasol Jisas i gat bikpela strong moa winim em! Jisas i sapotim yumi, olsem na yumi inap autim gutnius long ol man bilong olgeta lain man. Lukim ol samting i soim klia dispela. Narapela hatwok yumi ol pablisa bilong Kingdom i bungim em long autim tok long ol man bilong ol narapela tokples. Long visen em Jisas i bin kamapim long aposel Jon, Jisas i tokaut olsem wok bilong autim gutnius bai winim dispela hatwok. (Rev. 14:6, 7) Long wanem rot wok autim tok i winim dispela hatwok? Taim yumi autim tok, yumi givim rot long planti manmeri moa long kisim save long gutnius bilong Kingdom. Long nau, ol manmeri long olgeta hap bilong graun inap ritim ol tok bilong Baibel long websait bilong yumi jw.org, long wanem, dispela websait i stap long winim 1,000 tokples! Yumi bin kisim tok orait long tanim tok bilong buk Stap Amamas Oltaim! long winim 700 tokples, em nambawan tul bilong kamapim ol disaipel long nau! w22.07 9 par. 6-7

Jisas i sori tru long ol manmeri. Aposel Matyu i tok: “Taim em i lukim bikpela lain manmeri, em i sori tru long ol, long wanem, ol man i bin mekim nogut long ol na ol i stap nogut tru olsem ol sipsip i no gat wasman.” (Mat. 9:36) Na Jehova i pilim olsem wanem? Jisas i tok: “Papa bilong mi long heven i no laik bai wanpela bilong ol dispela man i no gat nem i lus.” (Mat. 18:14) Dispela tok i mekim gut bel bilong yumi! Taim yumi wok long save gut moa long Jisas, pasin bilong yumi long laikim Jehova bai kamap bikpela moa. Yu ken lain long laikim tru ol narapela na kamap strongpela Kristen taim yu bung wantaim ol bratasista long kongrigesen em ol i strongpela Kristen. Lukim pasin bilong ol long stap amamas. Ol i no rigret long disisen bilong ol long mekim wok bilong Jehova. Askim ol long stori long yu long sampela ekspiriens bilong ol taim ol i mekim wok bilong Jehova. Taim yu gat wanpela bikpela disisen long mekim, askim ol long edvais. Tingim dispela, “long rot bilong planti edvaisa, ol samting i save kamap gutpela.” w22.08 3 par. 6-7

Yumi olgeta bai karim ol hevi. Tasol yumi no stap wanpis long karim ol hevi i painim yumi. Wankain olsem wanpela papa i gat pasin laikim, oltaim Jehova i save lukluk long yumi. Em i stap long sait bilong yumi, na em i redi long harim singaut bilong yumi long kisim helpim, na em i redi long sapotim yumi. (Ais. 43:2) Yumi bilip tru olsem yumi ken karim wanem ol hevi i painim yumi, long wanem, Jehova i givim yumi planti samting yumi nidim bilong sanap strong. Em i givim yumi ol gutpela presen olsem beten, Baibel, planti gutpela tok bilong strongim bilip, na bikpela lain brata i gat pasin laikim em ol i redi long helpim yumi long taim yumi nidim helpim. Yumi tenkyu tru olsem oltaim yumi gat Papa bilong yumi i stap long heven na oltaim em i save lukluk long yumi! “Yumi amamas long em.” (Sng. 33:21) Yumi ken soim Jehova olsem yumi tenkyu tru long pasin bilong em long lukautim yumi taim yumi yusim gut olgeta samting em i givim bilong helpim yumi. Yumi mas mekim sampela samting bambai yumi ken stap yet aninit long lukaut bilong God. Yumi ken tok olsem, sapos yumi wok yet long givim bes bilong yumi long Jehova na mekim ol samting i stret long ai bilong em, em bai was long yumi inap oltaim oltaim! w22.08 13 par. 15-16

Planti manmeri long nau ol i no trastim wanpela man. Ol i no save long husat ol bai trastim. Ol i tingting planti olsem ol lain em ol i save rispektim, kain olsem lain politik, ol saientis, na ol bisnisman, ol i no tingim ol. Na tu, ol i no rispektim ol pris pasto bilong lotu Kristendom. So yumi no kirap nogut olsem ol i no bilip long Baibel, em buk ol dispela pris pasto i tok ol i bihainim. Yumi olgeta wokman bilong Jehova, yumi bilip tru olsem em i “God bilong mekim pasin tru tasol” na oltaim em i laik bai gutpela samting i painim yumi. (Sng. 31:5; Ais. 48:17) Yumi save olsem yumi ken trastim ol tok yumi ritim long Baibel. Yumi wanbel long tok em wanpela saveman bilong Baibel i raitim, em i tok: “I no gat wanpela tok em God i mekim em i tok giaman o i no inap kamap tru, nogat. Ol manmeri bilong God i ken trastim ol tok em i mekim bikos ol i trastim God husat i mekim ol dispela tok.” w21.03 2 par. 1-2

Yumi strongim ol bratasista bilong yumi taim yumi strongim bilip bilong ol long Jehova. Sampela i karim hevi long ol man i no wanbilip i tok bilas long ol. Ol narapela i karim hevi bilong bikpela sik o ol i pilim hatwok long daunim pasin bilong bel hevi tru. Na tu, ol narapela i wet inap longpela taim long lukim dispela haptaim nogut bilong nau i pinis. Ol kain samting olsem inap traim bilip bilong ol Kristen long nau. Long taim bilong ol aposel, kongrigesen Kristen i bungim ol wankain hevi. Aposel Pol i yusim Ol Skripsa long strongim bilip bilong ol bratasista. Olsem, ol Kristen bilong lain Juda inap pilim olsem ol i no save long wanem tok ol bai mekim long ol wanblut husat i no wanbilip em ol i sutim tok olsem lotu Juda i gutpela moa winim lotu Kristen. Tasol pas em Pol i bin raitim long ol Kristen long Hibru i bin strongim ol tru. (Hib. 1:5, 6; 2:2, 3; 9:24, 25) Pol i mekim ol strongpela tok bilong kirapim ol long wokim tingting. Ol dispela tok inap helpim ol long save long wanem tok ol bai mekim long ol man i sutim tok long ol. w22.08 23, 24 par. 12-14

Ol manmeri long graun bilong Satan i no save long ol i ken trastim husat. Oltaim ol i bel hevi long pasin bilong ol bisnis lain, ol lain politik, na ol lida bilong lotu. Planti i pilim hatwok tu long trastim ol pren, ol neiba, na ol wanfamili. Tasol yumi no kirap nogut long dispela samting. Baibel i tok profet olsem: “Long taim bilong las de . . . , ol man bai . . . i no stap gut long narapela, . . . ol bai bagarapim gutnem bilong ol arapela, . . . ol bai birua long ol pren bilong ol.” Dispela i makim olsem ol manmeri bai bihainim ol pasin bilong god bilong dispela graun, em Satan, em man yumi no inap trastim. (2 Tim. 3:​1-4; 2 Kor. 4:4) Tasol yumi ol Kristen i save olsem yumi ken trastim tru Jehova. Yumi save tru olsem em i laikim yumi na em bai “no inap givim baksait” long ol pren bilong em. (Sng. 9:10) Yumi ken trastim tu Krais Jisas bikos em i bin givim laip bilong em long helpim yumi. (1 Pita 3:18) Na yumi ken trastim ol tok bilong Baibel bikos ol dispela tok i stiaim yumi long wokim ol gutpela disisen long laip bilong yumi.—2 Tim. 3:16, 17. w22.09 2 par. 1-2

Man i stap amamas tru i no save pilim amamas inap sotpela taim tasol na bihain dispela amamas i pinis, nogat. Em bai stap amamas long laip olgeta bilong em. Hau yumi ken kisim kain amamas olsem? Long Bikpela Tok Long Maunten, Jisas i tok: “Ol man i hangre long kisim save long God, ol i ken amamas.” (Mat. 5:3) Jisas i save olsem yumi ol man i laik tru long kisim save long Krieta bilong yumi, God Jehova, na lotu long em. Yumi olgeta i “hangre long kisim save long God.” Jehova em i “God bilong amamas,” olsem na ol man i lotuim em, ol tu i ken amamas. (1 Tim. 1:11) Yu ting yumi bai stap amamas tru sapos i no gat ol hevi? Nogat. Long bikpela tok, Jisas i tok olsem “ol man i bel hevi tru” ol tu i ken amamas. Jisas i mekim wankain tok long “ol man em ol arapela i mekim nogut long ol bikos ol i bihainim stretpela pasin.” (Mat. 5:4, 10, 11) Jisas i skulim yumi olsem yumi inap stap amamas tru taim yumi kisim save long God na go klostu long em, na i no bikos yumi no gat ol hevi.—Jems 4:8. w22.10 6 par. 1-3

Pasin bilong skelim gut ol samting bai helpim wanpela Kristen long save long “taim bilong pasim maus na taim bilong toktok.” (Ekl. 3:7) Long sampela kalsa, i gat dispela savetok olsem “pasin bilong toktok em i olsem silva, tasol pasin bilong pasim maus em i olsem gol.” Mining bilong dispela savetok i olsem, sampela taim em i gutpela long pasim maus tasol na no ken mekim wanpela tok. Tingim wanpela eksampel. Wanpela elda i gat bikpela ekspiriens, olsem na planti taim ol narapela kongrigesen i save askim em long helpim ol long stretim ol hevi em ol yet i hatwok long stretim. Wanpela brata i mekim wok elda i stori long pasin bilong dispela elda olsem: “Oltaim em i save was gut na em i no save tokim ol narapela long infomesen bilong ol narapela kongrigesen em ol i no ken save long en.” Pasin bilong dispela elda long skelim gut ol samting i mekim na ol narapela brata long lain elda long kongrigesen bilong em i rispektim em. Ol i save tru olsem em i no inap tokaut long ol infomesen bilong kongrigesen long ol narapela. Onest pasin em narapela pasin yumi mas kisim na bai ol narapela i ken trastim yumi. Yumi save trastim wanpela husat i gat onest pasin bikos yumi save olsem oltaim em bai mekim tok tru long yumi.—Efe. 4:25; Hib. 13:18. w22.09 12-13 par. 14-15

Planti man i no laik putim yau taim trupela savetingting “i singaut strong long strit.” (Prov. 1:20) Baibel i tok i gat 3-pela grup bilong ol manmeri em ol i sakim savetingting: “ol man i sot long save,” “ol man i save tok bilas,” na “ol longlong man.” (Prov. 1:22-25) “Ol man i sot long save” em ol man i no gat gutpela tingting, ol i save bilipim olgeta kain tok, na em isi tru long ol narapela i giamanim ol. (Prov. 14:15) Olsem, tingim planti milion manmeri em ol lida bilong lotu na ol lida bilong politik i paulim ol. Sampela man i kirap nogut tru taim ol i painimaut olsem ol dispela lida i giamanim ol. Tasol ol man em Provep 1:22 i stori long ol, ol i mekim disisen long stap yet olsem ol man i sot long save bikos ol i laik stap kain man olsem. (Jer. 5:31) Ol i no laik kisim save long tok Baibel i mekim o bihainim ol lo bilong Baibel. Yumi no laik tru long bihainim pasin bilong ol man em long laik bilong ol yet ol i no laik bihainim savetingting!—Prov. 1:32; 27:12. w22.10 19-20 par. 5-7

Oganaisesen bilong God i save givim yumi ol daireksen bilong yumi ken stap seif. Planti taim yumi save kisim toksave long givim ol nupela kontek infomesen bilong yumi long ol elda bambai ol i ken ringim yumi long taim bilong imejensi. Na tu, yumi inap kisim ol daireksen long wanem ples yumi ken i go stap long en, wanem taim yumi mas lusim wanpela hap, na kisim ol rilif saplai o olsem wanem na long wanem taim yumi ken helpim ol narapela. Sapos yumi no bihainim tok, samting yumi mekim inap bagarapim laip bilong yumi yet na laip bilong ol elda, em ol i save lukautim yumi. (Hib. 13:17) Planti bratasista em ol i no gat hap bilong stap bikos long disasta o pait i kamap insait long kantri, ol i bin mekim olgeta samting ol inap mekim long lain long nupela sindaun bilong ol na wantu tasol ol i insait long ol wok tiokratik. Wankain olsem ol Kristen long pastaim em pasin birua i mekim na ol i go stap long ol narapela narapela hap, ol i wok yet long “autim gutnius bilong tok bilong God long ol hap ol i go long en.” (Apo. 8:4) Wok autim tok i helpim ol long putim tingting olgeta long Kingdom na ol i no tingim tumas ol hatwok long sindaun bilong ol. Long dispela rot, ol i holimpas amamas na bel isi bilong ol. w22.12 19 par. 12-13

Jehova i save tingim tru yumi wan wan. Paslain long Jisas i salim ol aposel bilong em i go autim tok, em i helpim ol long daunim pret bilong pasin birua. (Mat. 10:29-31) Em i mekim olsem long rot bilong stori long ol long ol liklik pisin i save stap long Israel. Long taim bilong Jisas, ol dispela pisin i no gat bikpela pe. Tasol em i tokim ol disaipel bilong em olsem: “I no gat wanpela bilong ol dispela liklik pisin i save pundaun long graun na Papa bilong yupela i no save long dispela.” Na em i tok moa olsem: “Yupela i winim tru ol dispela liklik pisin.” Long dispela rot, Jisas i strongim ol disaipel bilong em olsem Jehova i tingim tru olgeta wan wan bilong ol, olsem na i no gat as long ol i pret long ol man i birua long ol. Ol disaipel inap tingim tok bilong Jisas taim ol i lukim ol liklik pisin long ol taun na ol ples ol i autim tok long en. Taim yu lukim wanpela liklik pisin, yu mas tingim olsem Jehova i tingim yu tru bikos yu tu i “winim tru ol dispela liklik pisin.” Jehova bai helpim yu, olsem na i no gat wok long yu pret taim ol man i birua long yu. w23.03 18 par. 12

Sampela taim yumi bungim ol hevi, olsem famili i birua long yumi o kampani i pinisim yumi long wok. Taim yumi karim ol hevi inap longpela taim, yumi inap pilim olsem i no gat rot bilong stretim ol hevi na yumi bel hevi tru. Long kain taim olsem, Satan i painim ol rot bilong kirapim yumi long holim tupela tingting long pasin bilong Jehova long laikim yumi. Satan i laik bai yumi ting olsem Jehova o oganaisesen bilong em i as bilong ol pen na hevi yumi karim. Wankain samting i bin painim sampela manmeri bilong lain Israel long Isip. Pastaim ol i bilip olsem Jehova i makim Moses na Aron long kisim bek ol long wok sleiv. (Kis. 4:29-31) Tasol bihain taim Fero i mekim laip bilong ol i go hatwok moa, ol i sutim tok olsem em asua bilong Moses na Aron na ol i karim ol hevi. (Kis. 5:19, 20) Ol i sutim tok long ol gutpela wokman bilong God. Sori tru long dispela! Sapos yu karim ol hevi inap longpela taim tru, beten long Jehova na autim olgeta wari bilong yu long em, na larim em i helpim yu. w22.11 15 par. 5-6

Jehova em Man Bilong Givim Laip na em i gat strong long kirapim bek ol man long dai. Em i givim strong long profet Elaija long kirapim bek pikinini man bilong wido meri bilong Sarefat. (1 Kin. 17:21-23) Bihain, God i helpim profet Elisa na em i kirapim bek pikinini man bilong wanpela meri Sunem. (2 Kin. 4:​18-20, 34-37) Ol dispela kirap bek na ol narapela kirap bek i kamapim klia olsem Jehova i gat strong long kirapim bek ol man i dai pinis. Taim Jisas i stap long graun, em i kamapim klia olsem Papa bilong em i bin givim em strong long mekim olsem. (Jon 11:23-25, 43, 44) Nau Jisas i stap long heven na “God i givim [em] namba long bosim olgeta samting long heven na long graun.” Olsem na em i gat namba long inapim dispela tok promis olsem “olgeta man i stap long matmat” bai kirap bek na kisim laip na ol bai stap laip oltaim oltaim.—Mat. 28:18; Jon 5:26-29. w22.12 5 par. 10

Taim ol manmeri i sakim Esekiel, ol i sakim Jehova. Ol tok i stap long teks bilong tude i strongim Esekiel olsem taim ol manmeri i sakim em, dispela i no makim olsem em i no mekim gut wok olsem wanpela profet, nogat. Na tu, Jehova i strongim Esekiel olsem taim ol dispela tok bilong kot em i autim i kamap tru, ol manmeri bai “save tru olsem i gat wanpela profet i bin i stap namel long ol.” (Ese. 2:5; 33:33) Tru tumas, ol dispela tok bilong mekim gut bel i strongim Esekiel long inapim wok autim tok bilong em. Yumi tu i kisim strong taim yumi save olsem Jehova i salim yumi. Em i onarim yumi taim em i kolim yumi olsem ol “witnes” bilong em. (Ais. 43:10) Em gutpela blesing tru! Wankain olsem Jehova i bin tokim Esekiel olsem: “Yu no ken pret,” Jehova i tokim yumi tu olsem: “Yupela i no ken pret.” (Ese. 2:6) I gat wanem as na yumi no ken pret long ol birua bilong yumi? Olsem Esekiel, Jehova i salim yumi na Em i stap bilong helpim yumi.—Ais. 44:8. w22.11 3-4 par. 4-5

Long nau, yumi amamas tru long ol elda na ol kongrigesen sevan em yumi ken trastim ol. Ol dispela brata i lukautim yumi gut, na yumi tenkyu long Jehova long ol dispela gutpela brata! Tasol yumi ken mekim wanem ol samting bilong soim olsem ol narapela i ken trastim yumi? Yumi laikim ol bratasista bilong yumi na yumi laik soim olsem yumi tingim ol. Tasol yumi mas holim stretpela tingting na rispektim ol pesenel samting long laip bilong ol. Long taim bilong ol aposel, sampela Kristen i “tok baksait na subim nus bilong ol long ol samting ol arapela i mekim, ol i toktok long ol samting i no stret long toktok long en.” (1 Tim. 5:13) Yumi no laik tru long bihainim pasin bilong ol. Olsem wanem sapos wanpela i tokim yumi long pesenel samting long laip bilong em na em i askim yumi long no ken tokim ol narapela long dispela samting? Olsem, ating wanpela sista i tokim yumi long hevi em i gat long sait bilong helt o narapela traim em i wok long feisim, na em i tokim yumi long no ken tokim ol narapela long dispela samting. Yumi mas rispektim tingting bilong em. w22.09 10 par. 7-8

Tok Grik em ol i tanim olsem “kisim nupela tingting,” em ol inap tanim tu olsem “stretim tingting bilong yupela.” So yumi no inap mekim sampela gutpela pasin na em tasol, nogat. Yumi mas skelim tru ol tingting i stap insait long bel bilong yumi na mekim ol senis yumi gat wok long mekim bambai ol samting yumi mekim long laip bilong yumi i stret wantaim ol lo bilong Jehova. Yumi mas mekim olsem long olgeta taim, na i no wanpela taim tasol. Taim yumi kamap gutpela olgeta, oltaim yumi bai amamasim Jehova long olgeta samting yumi mekim. Tasol paslain long dispela taim i kamap, yumi mas wok strong bilong winim dispela mak. Lukim tok Pol i mekim long pasin bilong kisim nupela tingting na pasin bilong skelim tingting bilong God, olsem i stap long Rom 12:2. Yumi no ken larim tasol tingting bilong dispela graun i stiaim tingting na pasin bilong yumi, nogat. Pastaim yumi mas skelim yumi yet bilong save yumi larim tingting bilong God—i no tingting bilong dispela graun—i stiaim yumi inap long wanem mak long rot bilong skelim ol mak yumi putim na ol disisen yumi mekim. w23.01 8-9 par. 3-4

Yu ting Jehova i save stiaim olgeta samting i painim yumi? Yu ting em i save stiaim olgeta samting long laip bilong yumi na bai olgeta samting nogut i painim yumi i kamapim gutpela samting? Nogat, Baibel i no tok olsem. (Ekl. 8:9; 9:11) Tasol yumi save long dispela samting: Taim yumi bungim wanpela hevi, Jehova i luksave long dispela na em i save harim ol beten yumi mekim bilong kisim helpim. (Sng. 34:15; Ais. 59:1) Na moa yet, Jehova i ken helpim yumi long sanap strong na karim ol hevi. Hau em inap mekim olsem? Wanpela rot Jehova i save helpim yumi em long rot bilong mekim isi bel bilong yumi na strongim yumi, na planti taim em i save mekim olsem long taim stret. (2 Kor. 1:3, 4) Yu inap tingim wanpela taim long laip bilong yu we Jehova i bin helpim yu na mekim isi bel bilong yu taim yu nidim stret helpim? Planti taim, yumi save luksave long hau Jehova i bin helpim yumi taim hevi bilong yumi i pinis. w23.01 17-18 par. 13-15

Lukluk bilong dispela wel animal i klostu wankain long lukluk bilong wel animal i gat 7-pela het, tasol em i no gat retpela kala. Baibel i tok em i “piksa bilong namba 1 wel animal” na “namba 8 king.” (Rev. 13:14, 15; 17:3, 8) Bipo dispela “king” i bin stap, bihain em i no stap, tasol bihain em i kamap gen. Dispela tok i makim stret Yunaitet Nesen, em oganaisesen i sapotim gut tru olgeta wok politik bilong ol gavman bilong graun! Pastaim ol i kolim olsem Lig ov Nesen. Em i no bin stap long taim bilong Wol Woa 2. Tasol em i kirap gen long mekim wok olsem Yunaitet Nesen nau long dispela taim. Long rot bilong ol tok giaman ol i mekim, ol dispela wel animal o ol gavman bai kirapim ol manmeri long birua long Jehova na ol manmeri bilong em. Jon i tok i olsem ol i bungim “ol king bilong olgeta hap graun” long bikpela pait bilong Armagedon, em “bikpela de bilong God i Gat Olgeta Strong.”—Rev. 16:13, 14, 16. w22.05 10 par. 10-11

Taim Jisas yet i lain long ritim Ol Rait Holi, dispela i mekim na em i save gut long Ol Rait Holi na em i laikim ol dispela tok na larim ol i stiaim ol pasin bilong em. Olsem, tingim samting i bin kamap long tempel taim Jisas i gat 12-pela krismas tasol. Ol tisa em ol i save gut tru long Lo Bilong Moses, “ol i kirap nogut long save bilong [Jisas] na ol tok em i bekim long ol.” (Luk 2:46, 47, 52) Yumi tu i ken kisim save long Tok Bilong God na laikim tok bilong em taim yumi ritim Baibel long olgeta de. Yumi ken kisim skul long tok Jisas i mekim long ol man i save gut long Lo, dispela i makim tu ol saveman bilong Lo, ol Farisi, na ol Sadyusi. Ol dispela hetman bilong lotu, planti taim ol i save ritim Ol Rait Holi, tasol ol i no kisim helpim long ol tok ol i ritim. Jisas i kamapim klia 3-pela samting em ol dispela man i no mekim bilong kisim helpim long Ol Rait Holi. Ol tok em i mekim long ol bai helpim yumi long (1) kliagut long ol tok yumi ritim, (2) kisim save long ol tok i tru, na (3) larim Tok Bilong God i stiaim yumi. w23.02 8-9 par. 2-3

Sampela samting nogut em yumi mas abrusim em pasin bilong tok gris, dring planti, kaikai planti, mekim ol tok nogut, lukim ol piksa i gat pasin pait, ponografi, na ol kain samting olsem. (Sng. 101:3) Oltaim Satan i save painim ol rot long bagarapim pasin pren bilong yumi wantaim Jehova. (1 Pita 5:8) Sapos yumi no was gut, Satan inap planim sid bilong ol pasin nogut insait long bel na tingting bilong yumi, em ol pasin olsem pasin mangal, tok giaman, gridi pasin, heitim narapela, pasin hambak, na pasin bilong bel nogut. (Gal. 5:19-21) Sapos yumi no mekim ol samting wantu tasol bilong rausim ol dispela pasin nogut, ol bai wok yet long gro olsem gras nogut insait long bel bilong yumi na nogutim yumi. (Jems 1:14, 15) Yumi mas abrusim ol poroman nogut. Yumi mas was gut, long wanem, ol man yumi poromanim, ol bai stiaim ol pasin bilong yumi. (1 Kor. 15:33) Sapos yumi was gut long yumi yet olsem Jisas i kirapim yumi long mekim, yumi bai sakim ol poroman em ol i no save bihainim ol stretpela lo bilong Jehova. (Luk 21:34; 2 Kor. 6:15) Yumi bai luksave long hevi i laik kamap na yumi bai abrusim. w23.02 16 par. 7; 17 par. 10-11

Taim yu kisim save moa long Jehova, pasin bilong yu long laikim em i wok long kamap strong moa. Dispela i mekim na yu laik stap gutpela pren bilong em long nau na inap oltaim bihain. Na yu ken mekim olsem. Em i kirapim yu long mekim bel bilong em i amamas. (Prov. 23:15, 16) Yu ken mekim olsem long rot bilong pasin bilong yu na toktok bilong yu. Ol pasin yu bihainim long i stap bilong yu bai soim klia olsem yu laikim tru Jehova. Dispela em gutpela samting yu ken mekim long laip bilong yu. Olsem wanem yu ken soim olsem yu laikim Jehova? Pastaim, yu ken mekim wanpela spesel beten na dediketim yu yet i go long God tru. (Sng. 40:8) Na bihain, yu kamapim klia dispela dediket long rot bilong kisim baptais. Baptais bilong yu em i bikpela samting tru long laip bilong yu na yu amamas tru long en. Dispela em kirap bilong nupela laip bilong yu, em long bihainim laik bilong Jehova na i no laik bilong yu yet. (Rom 14:8; 1 Pita 4:1, 2) Dispela em wanpela bikpela disisen yu mekim long laip bilong yu. Na em i opim rot long yu inap i gat gutpela laip tru. w23.03 5-6 par. 14-15