Ku Lwa Ka Mina Ni Vuvabyi Lebyi Hetaka Matimba

HI KU VULA KA TANYA SALAY

Emalembeni yo tala lama hundzeke, a ndzi ri manana la gingiritekaka tlhelo mutirheli wa nkarhi hinkwawo exidorobanini lexi xa Luverne, eAlabama. Laha vutomi byi rhurile naswona byo nanayila kunene. Swilo a swi vonaka swi hi fambela kahle mina ni nuna wa mina Duke, ni n’wana wa hina Daniel. Kutani vuhandzuri lebyi nga vuliki nchumu byi tise ku cinca lokukulu eka ndlela leyi a hi hanya ha yona.

SWIPHIQO swa hina swi sungule hi 1992 loko ndzi susiwa mbeleko. Endzhakunyana ka swona ndzi sungule ku twa ku vava loku tsemaka nhlana, loku nga heriki ni ku tshamela ku khomiwa hi mitsakamiso (hi minkarhi ya 50 ku ya eka ya 60 hi siku). Dokodela wa mina la tshungulaka mavabyi ya vavasati u hetelele a ndzi endlele xikombelo xo ya vonana ni dokodela la kambelaka mitsakamiso, ku ri matshalatshala yo lava xivangelo xa xiphiqo lexi.

Ndzi ye exibedlhele ndzi ya kamberiwa. Eka nkambelo wo sungula, mukamberi wa mitsakamiso u kume xiphiqo xa mina—vuvabyi bya interstitial cystitis (IC), kumbe ku pfimba ka thundhela. A swi nga olovi ku vona vuvabyi lebyi hikuva swikombiso swa vuvabyi bya IC swa fana ni swa mavabyi man’wana ya mitsakamiso. Tlhandlakambirhi, a yi kona ndlela yo hlawuleka yo kambela vuvabyi bya IC. Hikwalaho, madokodela ma boheka ku kambela mavabyi man’wana, ma nga si pfumela leswaku munhu u ni vuvabyi bya IC.

Dokodela wa hina u vule leswaku tanihi leswi byi nga riki kona vutshunguri bya vuvabyi lebyi, eku heteleleni swi ta boha leswaku va susa thundhela! U vule leswaku ma kona matshungulelo man’wana kambe hinkwawo a ma tirhi. Swi le rivaleni leswaku mahungu wolawo a ma hi tsakisanga. A ndzi hanye bya cheleni kukondza ku fika nkarhi wolowo. Tanihi leswi hi nga Timbhoni ta Yehovha, mina na Duke a hi ri evutirhelini bya nkarhi hinkwawo malembe yo hlayanyana, kutani sweswi ndzi byeriwe leswaku ku fanele ku susiwa thundhela ra mina. Ndzi tsakile hi leswi nuna wa mina a ndzi seketeleke kahle.

Hi endle xiboho xa ku lava dokodela un’wana la kambelaka mitsakamiso. Hi ye eka madokodela yo hlayanyana. Khombo ra kona, hi nkarhi wolowo madokodela yo tala a ma nga tivi swinyingi hi vuvabyi bya IC. Nakambe, madokodela yo tala lama kambelaka mitsakamiso a ma ri ni mavonelo ya wona hi vuvabyi bya IC, hikwalaho, matshungulelo lawa va ma bumabumelaka a ma fani. Magazini wun’wana wa vutshunguri wu ri: “Swi vonaka onge vuvabyi lebyi a byi tshunguleki.” Wun’wana wu ri: “Vativi va sayense a va si kuma ndlela yo tshungula vuvabyi bya IC naswona a va swi koti ku vhumbha leswaku i vutshunguri byihi byi nga va khomaka kahle vanhu hi ku hambana ka vona. . . . Hikuva madokodela a ma swi tivi leswaku vuvabyi bya IC byi vangiwa hi yini, vutshunguri lebyi nga kona i bya ku huhata swikombiso swa byona.”

A ndzi twa ku vava ngopfu hikwalaho ka vusindza ni ku tshamela ku ya ba mati lerova a ndzi tiyimisele ku ringeta hinkwaswo leswi madokodela ma swi ringanyetaka. Ndzi ringete mirhi yo hambana-hambana leyi tlulaka 40 swin’we ni mitsembyana, matshungulelo yo tirhisa tineleta, ku dlaya vusindza, ku tlhavela tinayiti ekusuhi ni longo ni ku pfuxeta misiha hi ku tirhisa gezi (transcutaneous electrical nerve stimulation [TENS]), laha miseve ya gezi leyi nga riki na matimba ngopfu yi nghenaka emirini hi timinete kumbe tiawara to hlayanyana. Ndzi endle vulavisisi byo tala hilaha swi nga kotekaka hakona, lebyi ndzi pfunekenyana ku twisisa leswi a swi endleka.

Sweswi, ndzi tirhisa murhi wa methadone, lowu huhataka xitlhavi, swin’we ni mirhi yin’wana. Nkarhi ni nkarhi ndzi ya etliliniki ya ku hunguta switlhavi, laha va ndzi tlhavaka nayiti ekusuhi ni longo ku ndzi pfuna leswaku ndzi tiyiselela xitlhavi lexi. Emhakeni ya ku tshamela ku ba mati, ndzi ya exibedlhele n’hweti yin’wana ni yin’wana ya vunharhu kumbe ya vumune va ya ndzi endla leswi vuriwaka hydrodistension, ku tirhisiwa swihalaki ku ndlandlamuxa thundhela ku fana ni baluni. Leswi ndzi swi endle ko hlayanyana. Swa ndzi pfuna tin’hwetinyana. Emalembeni ma nga ri mangani lama hundzeke, ndzi ye exibedlhele minkarhi leyi tlulaka 30.

Ku vuriwa yini hi matshungulelo lawa ma ha seleke, ya ku susa thundhela? Dokodela un’wana u ri: “Madokodela yo tala ma kanakana ku endla vuhandzuri lebyi hikuva a swi tiviwi leswaku munhu ha un’we u ta langutana ni yini loko byi endliwile—vanhu van’wana va endliwe vuhandzuri kambe va ha ri ni mavabyi lawa.” Kutani, enkarhini lowu, a ndzi si anakanya ku tirhisa matshungulelo wolawo.

Minkarhi yin’wana ndzi twa ku vava ngopfu lerova ndzi kala ndzi va ni gome. Nkarhi wun’wana ndzi kale ndzi ehleketa ni ku tidlaya. Kambe a swi ndzi hlomula mbilu loko ndzi ehleketa ndlela leyi ku tidlaya koloko a ku ta tisa xisandzu ha yona evitweni ra Yehovha. Ndza wu vona nkoka wa ku khongela ni ku dyondza swin’we ni ku endla vuxaka lebyikulu na Yehovha, hikuva a wu tivi leswi nga ha humelelaka, swi cinca vutomi bya wena. Vuxaka lebyi byi ponise vutomi bya mina leswi ndzi vabyaka, tanihi leswi ndzi tivaka leswaku a ndzi ta va ndzi tidlele.

Loko ndzi languta emalembeni lawa ya kaye lama hundzeke, ndza swi vona leswaku vutomi byi nga cinca hi ku copeta ka tihlo. Ndzi tlangela marito ya Eklesiasta 12:1, lama nge: “Sweswi tsundzuka Mutumbuluxi wa wena Lonkulu emasikwini ya vujaha bya wena, masiku ya khombo ma nga si ta, kumbe ma nga si fika malembe lawa u nga ta vula ha wona u ku: ‘A ma ndzi tsakisi.’” Ndza tsaka swinene leswi ndzi sunguleke vutirheli bya nkarhi hinkwawo loko ndza ha ri ni malembe ya 15 hi vukhale naswona ndzi swi koteke ku ya emahlweni kwalomu ka malembe ya 20. Hi nkarhi wolowo, ndzi hlakulele vuxaka lebyikulu na Yehovha.

Ndzi nkhensa Yehovha hi nuna wa mina ni n’wana wa mina Daniel, lava va ndzi seketeleke swinene. Nakambe, swa khutaza swinene loko swirho swa vandlha swi ndzi bela riqingho kumbe swi ndzi endzela. Swa ndzi tikela ku humela ehandle hi vuxika hikuva loko ku titimela, misiha ya mina yi kokotsana ngopfu. Kutani ndzi nyikela vumbhoni hi riqingho, leswi hlayisaka ntshembo wa mina wa Paradeyisi wu hanya naswona wu ri wa xiviri. Ndzi langute emahlweni enkarhini lowu ku vabya ni ku xaniseka ku nga ta va swilo swa nkarhi lowu hundzeke naswona swi nga taka swi nga ha tsundzukiwi.—Esaya 33:24.