Swivutiso swa Vahlayi

◼ Loko munhu a va un’wana wa Timbhoni ta Yehova, xana u tshama a ri mbhoni minkarhi hinkwayo?

E-e, Timbhoni ta Yehova a ti fani na vukhongeri lebyi nge, ‘Loko u kala u va xirho, u ta tshama u ri xirho.’ Phesente yintsongo ya vanhu yi hlawula ku tihambanisa ni bandlha ra Vukriste kumbe va hlongoriwa hi leswi va nga vadyohi lava nga hundzukiki.

Siku rin’wana vadyondzisiwa vo tala va sukele Yesu kutani “va nga ha famba-fambi na yena. (Yohane 6:66) Nakambe Bibele yi hlamusela leswaku loko Mukriste handle ko hundzuka a endla xidyoho lexikulu, bandlha ri fanele ‘ku susa lowo biha exikarhi ka vona’ naswona ‘va nga ha tolovelani na yena.’—1 Vakorinto 5:9-13.

Xisweswo, namuntlha, loko Mukriste a wela exidyohweni, komiti ya vakulu va moya lava fanelekaka yi hlangana na yena. Va lava ku vona loko a tisola ni loko a pfuneka. (Vagalatiya 6:1) Loko swi nga ri tano, vakulu va yingisa xiletelo xa Bibele xa ku susa mudyohi leswaku bandlha ri ta ka ri nga ‘ha vi na comela.’—1 Vakorinto 5:7.

Kumbe, hi laha swi vuriweke eka Yohane 6:66, nkarhi wun’wana Mbhoni hi yoxe yi ta hlawula ku sukela ndlela ya ntiyiso. Yi nga ha tivisa makungu ya yona endzhaku ka loko komiti yi sungurile ku langutisa vudyoho bya yona. Yi nga ha va byela hi papila, kumbe yi swi vula emahlweni ka timbhoni, leswaku yi lava ku tihambanisa ni bandlha naswona yi nga ha tiviwi tanihi Mbhoni. Hikwalaho swi nga ka swi nga ha faneli leswaku vakulu va ya emahlweni hi vulavisisi bya vona. Hambi swi ri tano, manuku vakulu va ta nyikela xitiviso xo koma xa leswaku u tihambanisile leswaku bandlha ri ta swi tiva leswaku ‘u sukile a hi siya.’ (1 Yohane 2:19) Kutani va ta namarhela xileriso lexi huhuteriweke xa ‘ku ka va nga n’wi amukeli munhu wo tano emakaya ka vona kumbe ku n’wi xeweta, leswaku va nga twanani na mintirho ya yena leyo biha.’—2 Yohane 10, 11.

Hikwalaho ke, vanhu a va sindziseriwi ku tshama va ri xiphemu xa bandlha. Kambe vunyingi bya Timbhoni ta Yehova byi na malangutelo ya vaapostola lava hi ku swi rhandza va tshameke na Yesu, va amukela mpfuno wakwe wa moya ivi va tiphina hi vunakulobye lebyi kufumelaka bya bandlha ra Xikwembu.—Luka 22:28.

◼ Loko ku ri leswaku Muxe a a ri ni tintswalo ni ku titsongahata, a a ta swi kotisa ku yini ku tsala eka Tinhlayo 12:3 leswaku ‘Muxe a a ri ni tintswalo swinene ku tlula vanhu hinkwavo’ ke?

Hambi leswi swi nga ha vaka swi nga olovi ku endla tano, Muxe u swi kotile ku tsala nhlamuselo yoleyo ya ntiyiso ehansi ka ku huhuteriwa hi Xikwembu.

Mfungho wa leswaku Bibele yi huhuteriwe hi Xikwembu i ku tshembeka ka vatsari va yona. Muxe ni vavanuna lava Xikwembu xi va tirhiseke ku tsala swiyenge swa Matsalwa va tsale swilo leswi a swi ri ni ntiyiso hi ndlela yo hlamarisa.

Hi xikombiso, Muxe u tsale timhaka ta swihoxo ni swidyoho swa vanhu va ka vona, ku katsa ni leswiya swa makwavo wa xinuna ni wa xisati. (Eksoda 16:2, 3; 17:2, 3; 32:1-6; Levitika 10:1, 2) Naswona Muxe a nga titsetselelanga; hi xivindzi u hlamusele swihoxo swakwe, hambi ku ri leswi heteleleke hi ku tshinyiwa kakwe hi Xikwembu. (Tinhlayo 20:9-12; Deuteronoma 1:37) Hikwalaho a swi ri leswi tiyeke leswaku hi ku tiyimisela Muxe a tsala mhaka leyi Yehova entiyisweni a laveke leswaku yi nghenisiwa—leswaku Muxe hi byakwe a a ri ni tintswalo hi ndlela leyi nga tolovelekangiki. Rungula leri leswi swi kumekaka eka rona ri ba mhaka enhlokweni. Ematshan’wini ya ku hlundzuka loko Miriyamu na Aroni va tlhontlhile vuhosi byakwe, Muxe u pfumelele Yehova a lulamisa xiyimo xa kona.

Muxe a a fanekisela Mesiya. (Deuteronoma 18:15-19) Kutani loko Yehova Xikwembu a kokele miehleketo eka tintswalo ta Muxe, A tiyisa leswaku mfanelo leyi yo rhandzeka a yi ta kumeka eka Mesiya. Loko hi ri karhi hi hlaya Tievhangeli xana tintswalo ta Yesu a hi leti nyanyulaka, leti ti hi kokelaka eka yena ni ku hi nyika xivangelo xo tiseketela ha yena-ke?—2 Vakorinto 10:1; Vaheveru 4:15, 16.