Ku Twanana Ni Mutumbuluxi Wa Nhlengeletano Ya Misava Hinkwayo
“Langutani! A hi ku ṭakisa ka ŝona, ni ku nanḍiha, loko mašaka ma hanya swiṅwe, ma twanana!”—PSALMA 133:1.
1, 2. (a) I xirhalanganyi xihi lexi humeleleke 6 000 wa malembe lama hundzeke? (b) Xana Bibele yi n’wi vula yini mugwinehi loyi, naswona u ringetise ku yini ku tifanisa ni La-nge-Henhla-henhla?
MUTUMBULUXI wa nhlengeletano ya misava hinkwayo u rhandza ku yi hlayisa yi tengile, yi lulamile, yi ri na vun’we. Kambe endzhakunyana ka ku sungula ka vukona bya vanhu malembe lama nga vaka 6 000 lama hundzeke, xirhalanganyi xi humelerile exivonweni xa misava. Leswi swi humelele loko mukaneti la nga ni matimba yo tlula ya vanhu a hambukile eka nhlengeletano ya Mutumbuluxi ivi a tisungulela nhlengeletano ya yena leyi ntshunxekeke.
2 Hi mhaka ya leswi mugwinehi loyi a kaneteke Muvumbi wa yena, Bibele yi n’wi vitana Sathana, leswi vulaka “Mukaneti.” I mukaneti lonkulu wa Yehova, Mufumi la faneleke wa misava. (Yobo 1:6, 7) Hi ku navela ku tifanisa na la nge Henhla-henhla hi ku va ni nhlengeletano ya yena n’wini, Mukaneti a nga ta tshika ku ringeta ku endla tanihi mukondleteri ni xikwembu xo kaneta. Kutani Sathana u tiendlile la kokaka mahlo. Mukhuva wa Sathana wu vonakarile eka xiyimo xa misava xa matimba ni vutlhari lexi tekiweke hi “hosi ya Babilona,” loyi a swi fanela ku n’wi vula “nyeleti le’yi v̌angamaka,” na “Lucifer.” (Esaya 14:4, 12-14; An American Translation) Ku ta fika namuntiha, kambe hi mpfumelelo wa Yehova, Sathana i “xikwembu xa misava leyi.”—2 Vakorinto 4:4.
3. (a) Xana mukaneti loyi u sungule hi ku hlasela xiphemu xihi xa nhlengeletano ya Yehova? (b) I swiendlo swihi leswi endleke leswaku Diyavulosi a va mufumi wa mademona?
3 Kumbexana leswaku a tsanisa nhlengeletano ya Yehova, Sathana u hlaserile xirho xa yona lexintsongo, Adamu, nhloko leyi hlawuriweke ya ndyangu wa vanhu. (Genesa 3:1-24; Psalma 8:3-5; Varhoma 5:12) Endzhaku, tintsumi to tala ti fularhele “xiyimo xa tona” hi ku ka ti nga yingisi; kumbe vutshamo bya tona bya xiviri etilweni, ti tihundzula vanhu va nyama leswaku ti kota ku tekana no tshama ni vavasati lavo saseka, hambi va ri vavasati lava nga hetisekangiki. (Yuda 6) Vana va vona, va swihontlovila ni matimba, a va vitaniwa Tinefelim. Rito leri, leri ku tshembiwaka leswaku ri vula “vadlayi,” a ri fanela hikuva a ti dlaya vanhu hi vukarhi. Hi nkarhi wa ndhambi, tintsumi leti nga yingisiki ti tihundzurile ivi ti tlhelela exivandleni xa moya. (Genesa 6:1-7:23) Hi ku tihambanisa ni nhlengeletano ya Yehova, ti tiendle mademona, kutani Sathana Diyavulosi u vile mufumi wa tona.—Deuteronoma 32:17; Psalma 106:37; Matewu 12:24; Luka 11:15-19.
4. Lava poneke Ndhambi va endle yini, kambe Sathana a lava ku endla yini, nakona hi xikongomelo xihi?
4 Hi ndlela yoleyo, Sathana u yimisile xiphemu xa moya lexi nga vonekiki, lexi tlakukeleke vanhu xa nhlengeletano ya yena. Nowa na ndyangu wa yena, lava poneke Ndhambi, va tshamile hi vun’we ni nhlengeetano ya Yehova leyi nga vonekiki ya le tilweni. (Genesa 6:9; 8:18-21) Kambe Sathana u ringetile ku tsema vun’we bya vatukulu va Nowa. Xikongomelo xa Diyavulosi a xi ri xihi? A lava ku humelerisa xiphemu lexi vonekaka xa nhlengeletano ya yena yo biha.
5. Xihondzo xo Rindza xa May 1, 1921, xi hlamusele njhani leswaku Sathana u na nhlengeletano?
5 Swi teke nkarhi wo leha leswaku swichudeni swa Matiko hinkwawo swa Bibele swi tshubula leswaku Sathana u na nhlengeletano. Kambe Xihondzo xo Rindza xa May 1, 1921 xa Xinghezi xi te: “Hi ku nga anerisiwi hi leswi a se a swi endlile, Sathana u xisile lava va vandla ra le tilweni a va kucetela ku oswana ni vanhu ni ku tata misava hi vuhomboloki. U kondletele endlelo leri nga vonekiki emahlweni ka vanhu, kun’we ni endlelo ra la misaveni leri vonakaka emahlweni ka vanhu, futhi u tiyimisele ku onha xiphemu xin’wana ni xin’wana lexi hlavuteriweke xa kungu ra Xikwembu.”
6. Xihondzo xo Rindza xa December 1, 1922, xi vule yini mayelana ni xikongomelo xa Sathana?
6 “Xikongomelo xa Sathana” a ku ri xihlokwana lexi eka xona Xihondzo xo Rindza xa Xinghezi xa December 1, 1922, hi ku twala xi nga te: “Sweswi hi le nkarhini wo biha. Nhlengeletano ya Sathana yi lwa ni nhlengeletano ya Xikwembu. I ku lwa loku chavisaka. Sathana u ringeta ku herisa vunene bya nhlengeletano ya Hosi, ni ku herisa swirho swa yindlu ya vana, loko swi koteka. Leswaku a kota ku endla sweswo u tirhisile rhengu rin’wana ni rin’wana leri kotekaka.”
7, 8. (a) Ku vona tinhlengeletano timbirhi leti Iwisanaka a a swi pfuna njhani? (b) Eka Xihondzo xo Rindza xa March 1, 1925, ku kombisiwe yini lexi Iwisanaka ni “n’wana wa wandzisanyana” wo fanekisela?
7 Hi ku vona tinhlengeletano leti timbirhi leti lwisanaka swi pfune ku hlamusela tidyondzo ni vuprofeta bya Bibele. Hi xikombiso, Nhlavutelo ndzima ya 12 a yi nga twisisiwanga kahle ku fikela loko nhloko-mhaka leyi nge “Ku Velekiwa ka Rixaka” yi huma eka Xihondzo xo Rindza xa Xinghezi xa March 1, 1925. Tsalwa leri xi tiseketeleke ha rona (Nhlavutelo 12:5) ri ri: “Wansati a veleka n’wana wa wandzisanyana, loyi a nga ta fuma matiko hinkwawo hi nhonga ya nsimbi. Kambe n’wana a vutliwa, a yisiwa henhla eka Xikwembu ni le xiluvelweni xa xona.”
8 Eka matluka ya 67 na 68 xihloko lexi xi te:
“Xana mhaka ya nkoka a ku ri yihi ekungwini ra Xikwembu hi malembe layo tala? . . . Ku tlhomiwa ka mfumo lowu Yesu a hi dyondziseke ku wu khongelela. Sweswo swi vula ku tswariwa ka rixaka lerintshwa, leri nga ta fuma ni ku katekisa mindyangu hinkwayo ya misava. . . . A ku ri wahi matimba yo kaneta lawa ya endleke leswaku vanhu va nga ri tivi rixaka leri ro vangama lerintshwa ni mikateko leyi a ri ta va tisela yona? . . . Sathana diyavulosi, ni nhlengeletano ya yena. . . . Ku lwa ka xiviri hi leswaku Xikwembu xi lwa na diyavulosi, mfumo wo lulama wu herisa mfumo wo biha ni wa munyama, ivi ematshan’weni ya wona a tlhoma mfumo wa ntiyiso. . . . Endzhaku ka 1918 nhlengeletano ya diyavulosi, eka swa timali, politiki ni le vukhongerini, ngopfungopfu evukhongerini, yi fularherile hosi ni mfumo wa yona erivaleni; kutani nkarhi na nkarhi vukarhi bya Xikwembu byi pfurhele matiko. Ku sukela eka nkarhi wolowo ku ya emahlweni nyimpi yi yile mahlweni emisaveni. Emahlweni ka sweswo ku Iwiwile nyimpi etilweni.”
9. Hi 1925, “wansati” wa Nhlavutelo ndzima ya 12 u hlamuseriwe ku va yini?
9 Manuku ku ehleketiwe hi ku hoxisa leswaku Esaya 66:7 na Nhlavutelo 12:5 ha timbirhi a ti vhumba ku velekiwa ka ‘n’wana un’we wa wandzisanyana.’ Kutani Xihondzo xo Rindza xa Xinghezi lexi tshahiweke laha henhla xi tlhele xi ku:
“‘Wansati’ swi le rivaleni leswaku u fanisela xiphemu lexiya xa Siyoni, nhlengeletano ya Xikwembu, leyi velekaka hulumendhe leyintshwa kumbe rixaka leri nga ta fuma tinxaka ni vanhu va misava hi nhonga ya nsimbi na hi ku lulama. . . . (Vagalatiya 4:26) Hi marito man’wana Siyoni kumbe Yerusalema, nhlengeletano ya Xikwembu, i manana loyi a velekaka rixaka lerintshwa, kumbe swirho leswi fumaka. Vatotiwa emisaveni i xiphemu xa ‘wansati’ wa kona, futhi hakunene va yimela yena. Wansati ‘la ambaleke dyambu’ i Siyoni ematiIweni ni lava va amukelekaka va nhlengeletano ya Xikwembu la misaveni hi nkarhi lowu Hosi yi taka etempeleni ya yona. . . . Sweswi etempeleni ya yena loko a biyela ntlawa wa tempele kumbe ku va boha hi nguvu yakwe ya u lulama, nhlengeletano ya yena leyi tihlawulaka, u vangama kukotisa dyambu.”
10. Ku endleke yini eka xiphemu xa moya xa nhlengeletano ya Sathana, naswona i nyimpi muni leyi sweswi xi yi lwaka?
10 “Dragona” leyi sweswi yi twisisiwaka yi ri Sathana Diyavulosi hi byakwe, yi hlulekile ku mita “n’wana wa wandzisanyana,” Mfumo wa Vumesiya lowu velekiweke ematilweni eku heleni ka Minkarhi ya Vamatiko hi 1914. (Luka 21:24) Hi nkarhi wa nyimpi leyi nga landzela etilweni, exiphemu xa moya xa nhlengeletano ya Sathana xi cukumetiwe emisaveni, leswaku xi nga ha ngheni xi tirhisa nkucetelo lowu hlahlaka vun’we kona. Nhlengeletano yoleyo leyi tsongahatiweke sweswi yi sale xiphemu lexi vonekaka xa nhlengeletano leyikulu ya Yehova endzhaku, “yi ya lwa ni va rixaka ra yena lava saleke, lava hlayisaka milawu ya Xikwembu ni ku humesa vumbhoni bya Yesu.”—Nhlavutelo 12:17.
Ntirho Lowu Hlanganeke
11. (a) Marito ya Pawulo mayelana na Yerusalema wa le henhla’ ma nga tirhisiwa eka vamani namuntlha? (b) Xana Davhida u vule yini hi Yerusalema wa la misaveni, laha yindlu ya Yehova ya vugandzeri a yi ri kona?
11 ‘Wansati’ wo fanekisela wa Xikwembu u fanisiwa na Yerusalema muti lowu hlawuriweke, lowu hi ku tlhokovetsela wu vuriwaka Siyoni. Hikwalaho ke, marito ya Pawulo mayelana na ‘Yerusalema wa le henhla’ la ntshunxekeke sweswi ma nga tirhisiwa eka “lava rixaka ra yena lava saleke” lava “dragona,” Sathana Diyavulosi, a hambetaka a ‘lwa na vona.’ (Vagalatiya 4:26) Yerusalema wa la misaveni a akiwile a tiya ni ku hlanganisiwa kahle enkarhini wa Davhida, loyi a nge te: “Nḍi ṭakile loko v̌a te ka mina: A hi yeni ndlwini ya Yehova! Milenge ya mina yi yimile Tinyangweni ta wena, Yerusalem, Yerusalem, l’a akiweke, wu nga muti lo’wu manyeneke, laha tinšaka ta Yehova ti tlhandlukelaka kona hi nawu wa Israel, e ku ḍunisa v̌ito ra Yehova.”—Psalma 122:1-4.
12. (a) Marito ya Psalma 122:1-4 ya tirha eka vun’we byihi namuntlha? (b) Yerusalema kun’we na tabernakele yo kwetsima swi byi khumbisa ku yini vun’we bya tinxaka ta Israyele?
12 Mawaku xifaniso lexinene xa vun’we bya nhlengeletano ya Yehova ya misava hinkwayo! Ngopfu-ngopfu vun’we a byi voniwa eka minkhuvo ya rixaka, loko tinxaka ta 12 ta Israyele ti hlangana eka vugandzeri bya vun’we bya Yehova etabernakeleni yo kwetsima eYerusalema. Naswona enkarhini wa ku fuma ka Davhida hosi ya vona ya murisi, tinxaka leti ti tshame ti ri na vun’we hayi hi mhaka ya swiboho swa nyama kambe ngopfungopfu hikwalaho ka vugandzeri lebyi hleriweke bya Xikwembu xa vona. Ina, Yerusalema a ku ri xivandla xa vun’we, xa vugandzeri lebyi hleriweke, lexi amukeriwaka hi Xikwembu ehansi ka vuprista byin’we lebyi tekiweke eka rixaka ra Levi ni le ka ndyangu wa Aroni, muprista lonkulu wo sungula wa Israyele, hosi ya muprofeta Muxe. Tlhandla-kambirhi, tinxaka leti hinkwato ta 12 a ti ri eka ntwanano wun’we wa Nawu lowu nga va hambanisa ni tinxaka hinkwato leti gandzelaka mademona.
13. Xana Davhida u te yini hi vun’we lebyi tsakeriweke hi Vaisrayele va khale?
13 Swilo leswi hinkwaswo a swi ri leswi hlanganisaka swinene. Swi hlayisile vanhu va Xikwembu va ri na vun’we tanihi nhlengeletano ya rixaka leswaku va hlayiseka ni ku kateka. Davhida u swi vekisa leswi: “Langutani! A hi ku ṭakisa ka ŝona, ni ku nanḍiha, loko mašaka ma hanya ŝiṅwe, ma twanana. Ŝi fana ni mafura ya risuna la’ma tšheriwaka e nhlokweni, ma širirika e malepfini ya Arone. Ma širirika e ku yisa e makumu ka nguv̌u ya yena. Ku fana ni mbera ya Hermon, Le’yi welaka tinṭhav̌eni ta Sion, Hikuv̌a hi kona Yehova a lerisaka mikateko, Ni v̌utomi, hi laha ku nga heriki.”—Psalma 133:1-3.
14. (a) Vun’we bya rixaka ra Israyele byi andzisiwa hi vamani namuntiha? (b) Hi kwihi la Vaisrayele va moya va voniwaka va yimile kona, nakona i “risimu” rihi leri va ri yimbelelaka hi vun’we?
14 Vun’we bya rixaka lebyi hlohleteleke marito wolawo ya ku nkhensa bya andzisiwa namuntlha. Hi mani xana? Hi “Israel wa Xikwembu,” Vaisrayele va moya lava mana wa vona un’we, Pawulo a n’wi ehleketa loko a ku: “Kutani Yerusalema wa le [henhla] u ntshunxekile, kutani hi yena a nga mana wa hina.” (Vagalatiya 6:16; 4:26) A nga nghenisi vana va yena lava tswariweke hi moya evuhlongeni bya ntwanano wa Nawu. Hambi leswi “Israyele wa Xikwembu” a faniseriweke a ri na tinxaka ta 12, swirho hinkwaswo swa 144 000 swi funghiwile hi ‘mfungho wun’we wa Xikwembu lexi hanyaka,’ futhi hinkwaswo swi voniwa tanihi leswi yimeke ‘eNtshaveni yin’we ya Siyoni’ wa le tilweni. (Nhlavutelo 7:1-8; 14:1-4) Mawaku ntlawa lowu va wu endlaka wa vuyimbeleri byo nandziha loko hi vun’we va “yimbelela risimu ra Muxe nandza wa Xikwembu ni risimu ra Xinyimpfana,” Yesu Kriste! (Nhlavutelo 15:3, 4; Yohane 1:29, 36) “Risimu” ra kona ri tsakisa Xikwembu nakona ri vula ku hlula!
15. (a) Lava va 144 000 va hlengeleteriwe yini handle ka ku yimbelela? (b) Xana rito leri nge “nhlengeletano” ri komba vun’we hi ndlela yihi?
15 Lava 144 000 ni Murhangeri wa vona, “Xinyimpfana,” va hlengeleteriwe ku tlula ku pfumisa matilo hi vuyimbeleri bya vona. Xa vona i nhlengeletano ya vuhosi leyi nga ta fuma gidi ra malembe leswaku yi Iwela mfumo wa Yehova wa hinkwako-nkwako ni ku katekisa vanhu hinkwavo lavanene. (Nhlavutelo 20:4-6) Rito leri nge “vukondleteri” i rito-fularha ra “ku hangalasa.” Ri yelana ni malunghiselelo ya swilo laha xiphemu ha xin’we xi vekiwaka eka ndhawu ya xona leyi fanelaka naswona xi nyikiwile xiavelo xa ntirho leswaku hinkwaswo swi tirha swin’we ku humesa mbuyelo lowu fanaka. Xisweswo, vukondleteri byi tisa vun’we, ntirhisano, nxaxamelo lowunene, ni ntwanano—hayi nghudlhano.
16. Ku ya hi Vaefesa 4:8, 11-16, i pakani yihi leyi vekiweke ku tlula malembe xidzana ya 19 lama hundzeke, futhi ku endleke yini exikarhi ka Timbhoni ta Yehova?
16 Pakani ya vun’we bya Vakriste yi vekiwile malembe xidzana lama tlulaka 19 lama hundzeke, loko ku nyikiwa vanhu ‘tinyiko’ van’wana ku va vaapostola, van’wana ku va vaprofeta, van’wana ku va vavuri va Evangeli, van’wana ku va [varisi] ni vadyondzisi. Loko magazini wa Xihondzo xo Rindza wu sungula ku humesiwa hi Xinghezi hi 1879, Xikwembu xi tlhele xi nyikela ‘varisi ni vadyondzisi’ va moya. Lunghiselelo leri ri tisile Timbhoni ta Yehova eku ‘hlanganeni ka ripfumelo ni le vutivini lebyinene bya N’wana wa Xikwembu.’ (Vaefesa 4:8, 11-16) Mawaku ku tlangela loku hi nga na kona leswi Yehova a endleke swilo leswi endzhaku ka malembe xidzana hinkwawo ya dzolonga ni ku hangalaka ka vukhongeri bya misava!
17. Hi swi tivisa ku yini leswaku Xikwembu a a xi ri na ku tlula vun’we bya Vakriste lava totiweke emiehleketweni, nakona emhakeni leyi Yesu u vhumbe yini?
17 Kahle-kahle, Xikwembu xi na leswi tlulaka vun’we bya Vakriste lava totiweke emianakanyweni, hikuva “xi hi tivisile ku rhandza ka xona loku a ku fihlekile, loku a xi lava ku ku yisa emahlweni, minkarhi ya kona yi kondza yi hetiseka. Ku rhandza ka xona i ku hlanganisa swivumbiwa hinkwaswo, swa le matilweni ni swa la misaveni, nhloko ya swona a va Kriste.” (Vaefesa 1:9, 10) Emhakeni leyi, Yesu u vhumbile a ku: “Na swona ndzi ni tinyimpfu tin’wana leti nga riki ta tshanga leri, na tona ndzi fanele ku ti vuyisa, ti ta yingisa rito ra mina, kutani ti ta endla ntlhambi wun’we, ti va ni murisi un’we.”—Yohane 10:16.
18. (a) I vamani lava nga exikarhi ka swilo “swa la misaveni” leswi faneleke ku hlengeletiwa? (b) Hi 1935, miehleketo leyi hlawulekeke yi yisiwe hi mukhuva wihi eka “tinyimpfu tin’wana” ke?
18 ‘Tinyimpfu leti tin’wana’ ti le xikarhi ka swilo “swa la misaveni” leswi faneleke ku hlengeletiwa. Kutani hi nkucetelo wa moya wa Xikwembu, kwalomu ka malembe ya 21 loko Yesu Kriste a sungule ku fuma hi 1914 miehleketo leyi hlawulekeke yi sungule ku yisiwa eka “tinyimpfu tin’wana.” Eka Nhlengeletano ya Timbhoni ta Yehova eWashington, D.C., hi 1935, Muungameri wa Sosayiti ya Watch Tower u hlamuserile leswaku “vunyingi lebyikulu” a ku ri “tinyimpfu tin’wana” leti eku heteleleni a ti fanele ku hlengeletiwa hi Murisi Lonene, Yesu Kriste. (Nhlavutelo 7:9-17, KJ) Xana Yesu u hlengeletile “tinyimpfu tin’wana” eka nhlengeletano ya kona leyi tsemaka nguva? Ina, vatsombani va 840 va tivone va ri lava hlengeletiwaka hi Murisi Lonene kutani va khuvuriwa ku kombisa ku tinyiketela ka vona eka Yehova Xikwembu.
19. (a) Ku fikela sweswi, “vunyingi lebyikulu” byi kule ku fika kwihi? (b) Hi ku hlangana ni nhlengeletano ya Yehova leyi vonekaka, “vunyingi lebyikulu” byi nghenile eka vun’we na vamani, naswona ku tiyimisela ka vona hi kwihi xana?
19 Volavo ntsena va sungule ku hlengeletiwa ka “vunyingi lebyikulu” bya “tinyimpfu tin’wana,” leti ana se ti tlulaka 2 800 000. Hi ku tihlanganisa ni xiphemu lexi vonekaka xa nhlengeletano ya Yehova—hi leswaku, ni masalela ya “ntlhambinyana” eka “tshanga leri” ra Murisi Lonene va tile eka vun’we ni Muvumbi Lonkulu wa nhlengeletano ya misava hinkwayo. Naswona va tiyimisele ku hlayisa vun’we byebyo evuton’wini bya vona lebyi nga heriki emisaveni ya Paradeyisi leyi Yehova, Murisi Lonkulu, a nga ta va lunghisela yona.—Luka 12:32; 23:43.
20. Loko masalela lama totiweke ni “vunyingi lebyikulu” va ri karhi va vona leswi Murisi Lonkulu a swi endleke ku sukela hi 1914, i marito wahi lawa va susumeteriwaka ku ma vula?
20 Loko masalela lama totiweke na “Vunyingi Lebyikulu” lebyi andzaka byi ri karhi byi hlalela hinkwaswo leswi Murisi Lonkulu a swi endleke emisaveni hinkwayo ku sukela loko Minkarhi ya Vamatiko yi herile hi 1914, ku tlangela lokukulu ku va susumetela ku yimbelela swin’we pisalema leyinene ya ku dzunisa Yehova va ku: “Ḍunisani Yehova! Ḍunisani Šikwembu ev̌ukwetsimelweni bya šona. Ši ḍuniseni e matilweni la’ma endliweke hi matimba ya šona! Ši ḍuniseni hikwalaho. Ši ḍuniseni hi mpimo wa v̌ukulu bya šona le’byi tlurisaka! Ši ḍuniseni hi mpfumawulo wa tinanga! Ši ḍuniseni hi psalteri ni harpa! Ši ḍuniseni hi ngoma ni ku tšina! Ši ḍuniseni hi mpfumawulo wa timbila le’ti nga ni tingoti ni nanga! Ši ḍuniseni hi maḍanḍani ya mpfumawulo lo’wu twakalaka! Ši ḍuniseni hi tingoma ta mpfumawulo lowu pfumaka! Le’ŝi hefemulaka hikwaŝo a ŝi ḍunise Yehova. Ḍunisani Yehova!”—Psalma 150:1-6.
21. (a) ‘Hinkwaswo leswi hefemulaka’ swi ta dzunisa Yehova rini? (b) Swirho hinkwaswo swa nhlengeletano ya misava hinkwayo swi ta tirha na mani futhi hi xikongomelo xihi?
21 Hi ku hatlisa “matilo” ni “misava” ya sweswi swi ta n’okisiwa hi nkarhi wa “ku lwa ni Xikwembu xa matimba hinkwawo hi siku lerikulu ra kona,” ni “matilo lamantshwa ni misava leyintshwa” leswi rindzeriweke nkarhi wo leha swi ta va kona hi laha ku nga heriki. (2 Petro 3:7-13; Nhlavutelo 16:14, 16) Kutani ke, hakunene, ‘leswi hefemulaka hinkwaswo’ leswi poneke eka misava leyi hlantswiweke swi ta dzunisa Yehova, Muvumbi Lonkulu wa nhlengeletano yo lulama ya misava hinkwayo. Swirho hinkwaswo swa nhlengeletano yoleyo etilweni ni la misaveni swi ta dzunisa Yehova hi ntsako nakona swi ta tirha na yena hi ku tshembeka na hi rirhandzu ku Iwela mfumo wa yena wa misava hinkwayo hi masiku ni ku kwetsimisiwa ka vito rakwe ra nkoka ni ntikelo. I vun’we muni byo hlamarisa swonghasi lebyi leswi hinkwaswo swi byi vulaka.
U Nga Hlamula Njhani?
◻ I swiendlo swihi leswi endleke leswaku Sathana a va mufumi wa mademona?
◻ A swi pfunisa ku yini ku hambanisa tinhlengeletano timbirhi letikulu?
◻ Psalma 122:1-4 yi tirha eka vun’we byihi namuntlha?
◻ Swi nga vurisiwa ku yini leswaku Yehova a a ri na ku tlula vun’we bya valandzeri lava totiweke va Yesu emiehleketweni?
◻ ‘Hinkwaswo leswi hefemulaka’ swi ta dzunisa Yehova Xikwembu rini?
[Xifaniso eka tluka 27]
Vanhu va Yehova nkarhi hinkwawo va tshame va ri na vun’we exikarhi ka vona ni ku va ni vun’we ni Muvumbi wa nhlengeletano ya misava hinkwayo