English 1984 7/15
U Katekisiwile Hikwalaho Ko Phikelela Ku Rhula
MUAPOSTOLA Petro u kombe leswaku lava va “navelaka ku hanya vutomi lebyi tsakisaka, ni ku vona masiku lamanene” va fanele ku ‘lava ku rhula va tiyisela endleleni ya kona.’ (1 Petro 3:10, 11) Leswi a swi olovi minkarhi hinkwayo, kambe swi tisa mikateko. Hi xikombiso, xiya ntokoto lowu landzelaka wa un’wana wa Timbhoni ta Yehova eCanada.
A ndza ha ku va ni 20 wa malembe hi vukhale naswona a ndzi ri kusuhi ni ku hetisisa norho wa vuhlangi. Ndzi kuceteriwe ndzi ya eRoyal Canadian Mounted Police. Xisweswo ndzi sungule leswi ndzi swi tekeke wu ri ntirho wa vutomi tanihi phorisa. Hambi swi ri tano, endzhaku ko tirha 16 wa malembe, ndzi tshikile.
Ndzi nga si hlamusela xivangelo xa mina xo tshika vuphorisa, kumbexana rungula rin’wana ra masungulo ri nga pfuna. Masiku ya mina yo sungula eRCMP (Royal Canadian Mounted Police) ya hetiwe exifundzeni xa New Brunswick. Hi kona laha ndzi hlanganeke ni ntombhi leyinene leyi yi veke nsati wa mina. A hi tshama ekamarini leyintsongo swinene leyi a yi khathaleriwa hi mpatswa lowu wu veke Timbhoni ta Yehova. Hakanyingi a va hi vekela vumbhoni. Hambi swi ri tano, enkarhini wolowo vukhongeri a byi bakanyeriwe kule etipakaneni ta mina evuton’wini. Hi tlhelo rin’wana, nsati wa mina handle ko ba mariri u amukele ntiyiso naswona hi ku anghwetla a va mbhoni leyi khuvuriweke ya Yehova. Ku boxa swi nga ri swingani, a ndzi nga nyanyulekanga. Ndzi ringetile hinkwaswo ku hundzula mianakanyo yakwe, kambe a ndzi humelelanga. Ndzi rhambe ni muprista wa kwalaho leswaku a ta n’wi lulamisa. Hambi swi ri tano, loko ndzi tsundzuka riendzo leri, ndza tshemba leswaku ku kayivela loku heleleke ka vutivi bya Matsalwa ka muprista loyi ku endle leswaku ntiyiso wu va wa xiviri swinene eka yena.
Ndzi ringete ku kombisa nsati wa mina vuhunguki bya ripfumelo ra yena hi malembe lama nga vaka tsevu, hambi swi ri tano u yimele Yehova a tiyile. Enkarhini lowu faneleke, ndzi ve la olovaka ndzi kurisa langutelo ra leswaku a nga endla yini na yini lexi a xi lavaka naswona mina ndzi ta landzela ku pfumela ka mina n’wini. Kavula, enkarhini wolowo ku navela ka mina a ku nga ri ka Matsalwa; a ndzi lava ku kurisa ntirho wa mina wa vutomi eRCMP swinene. Emhakeni yoleyo ndzi tinyikerile eka mintirho leyi engetelekeke naswona ndzi ringete ku katseka etimhakeni ta langutelo leri tlakukeke leswaku ndzi ta kuma mianakanyo ya tindhuna ta mina. Leswi a ku ri ku nyikela nkarhi lowu a wu fanele ku tirhiseriwa ndyangu wa mina.
Ndzi hambetile ndzi phikelela hanyelo leri ku fikela eximun’wini xa 1978. A ku ri ku navela ka nsati wa mina leswaku a va kona entsombanweni wa Matiko Hinkwawo wa “Ripfumelo Leri Hlulaka” eMontreal, exifundzeni xa Quebec. Ndzi pfumerile ku n’wi yisa eMontreal hi movha, kambe ndzi arile ku va kona eka xin’wana ni xin’wana xa swiyenge. Endzhaku ko vuya siku ro sungula hi le nhlengeletanweni, nsati wa mina u vule leswaku nongonoko wa siku leri tlhandlamaka wu vulavula hi vutomi bya ndyangu ivi a ndzi khorwisa leswaku ndzi fanele ku va kona. Ku fikela namuntlha ndzi tlangela Yehova leswi ndzi swi endleke. Ndzi hlamarisiwe hi ndlela leyi hlelekeke leyi ntshungu lowukulu wu tikhomeke ha yona. Ku hava ku dzaha, ku hava ririmi ra nhlamba naswona vanhu a va vonaka va tsakile ni ku va eku rhuleni swinene. Hambi leswi a ndzi nga tivi nchumu hi Bibele, ndzi kume tinkulumo leti nyikeriweke hi swivulavuri ti ri ni rungula naswona ti tirha swinene. Vanhu lava a va ringeta ku dyondza ni ku tirhisa milawu ya Xikwembu hi laha yi andlariweke ha kona eBibeleni. Tanihi phorisa, a ku ri ntokoto wa mina leswaku vanhu vo tala, hambi loko va tiva nawu, va ringeta ku kuma swikhomela-ndhawu leswaku va endla swilo hi ndlela ya vona vini. Se a ndzi nyanyulekile. Hi ku hatlisa endzhaku ko vuya ekaya hi le nhlengeletanwini, ndzi sungule ku dyondza Bibele ivi ndzi khuvuriwa hi October 1979.
Loko ndzi ri karhi ndzi endla nhluvuko emoyeni, ndzi swi kotile ku tshika mikhuva yo tala ya misava kutani eku heteleleni ndzi nyikiwe lunghelo ro tirhela Yehova Xikwembu tanihi nandza wa vutirheli. Ku ambala ka mina vumunhu lebyintshwa tanihi Mukriste ku hatle ku voniwa hi vatirhela-mfumo-kulorhi va maphorisa, lava eku sunguleni, va tekeleke ripfumelo ra mina lerintshwa ehansi. (Vaefesa 4:22-24) Hi nkarhi lowu faneleke, ndzi swi kotile ku hundzula mafenya ya vona ya va nkarhi wo nyikela vumbhoni. Entiyisweni, loko rito ri ri karhi ri hangalaka endzawulweni hinkwayo leswaku a ndzi ri mbhoni ya Yehova, vo tala a va ndzi tshinelela hi swivutiso. Nakambe ndzi nkhensa valanguteri va mina lava, hi ku xixima ripfumelo ra mina, va ndzi aveleke mintirho leyi a yi ta ndzi endla leswaku ndzi nga landzuli vuxaka bya mina na Yehova.
Ina, hinkwaswo swi vonake swi famba khwatsi. Siku rin’wana loko ndzi vuya ekaya ndzi huma entirhweni, nsati wa mina a a ri karhi a hlaya Xihondzo xo Rindza xa January 1, 1984, ngopfu-ngopfu mhaka leyi dyondziwaka eka matluka 14-9 leyi nge “Lava Ku Rhula U Ku Landzelela.” A xi vulavula hi ku papalata “ntirho lowu katsaka ku rhwala xibalesa leswaku xi tirhiseriwa vanhu van’wana,” tanihi leswi “minkarhi hinkwayo ku nga ni khombo ro tirhwexa nandzu wa ngati hi ku koxa vutomi hi xibalesa.” (Esaya 2:4; Varhoma 12:17, 18) Xihloko xi ya emahlweni xi ku: “Leswi misava yi yaka yi nyanya ku biha hi nga ka hi nga ha teki makwerhu la hambetaka a tirha ntirho lowu lavaka swibamu tanihi xikombiso. U ta nyikiwa tin’hweti ta tsevu leswaku a cinca. Loko a nga cinci, a nga ka a nga vi exiyin’weni xo rhwala malunghelo lama hlawulekeke ya ntirho kumbe mindzhwalo ebandlheni.—1 Timotiya 3:2; Tito 1:5, 6.”
Swi le rivaleni, a ndzi ri ni kungu ra nkoka swinene ro ri endla. Tanihi ndyangu, hi vulavurisane hi mhaka ivi hi languta eka Yehova hi xikhongelo. Siku leri landzelaka ra ntirho ndzi tshinelele ndhuna ya mina ivi ndzi hlamusela xiyimo xa mina. Endzhaku ka ku vulavurisana ka nkarhi wo leha, hi hete hi leswaku vuthu ri nga ri nga ndzi pfumeleri leswaku ndzi nga tameli xibalesa. Nkarhi na nkarhi, ndzi nyike xitiviso xa leswaku ndzi ta tshika exikarhi ka tin’hweti ta tsevu.
A ndzi nga swi tivi leswaku ndzi fanele ku lava ntirho kwihi, tanihi leswi ndzi thoriweke ku sukela loko ndzi suke exikolweni. Nakambe, matshamelo ya ikhonomi a ya khumba ku laviwa ka mintirho swinene. A ndzi ri ni vanghana vo talanyana evanhwini va bindzu lava a ndzi tiendlele vona malembe lama hundzeke, kutani ndzi kunguhate ku va vitana. Lexi hlamarisaka, ku nga si hela vhiki rin’we ndzi kongomisiwe eka nhlengeletano leyi tlhomiweke leyi a yi lava munhu loyi a a ta pfala xikhundla lexintshwa tanihi mukonanisi. Ndzi tihlanganise ni munhu loyi a a tihlamulela hi ku lava munhu wa xivandla lexi naswona ndzi tshubule leswaku a ndzi wu fanelekela khwatsi ntirho lowu. Ntirho wa kona a wu ta fana ni mintirho ya mina tanihi mukonanisi wa vukanganyisi, naswona a ndzi nga ta laveka ku rhwala xibalesa. U nga anakanya hi laha ku tiyimisela ka mina a ku kongome kwalaho ha kona.
Loko ku burisaniwile na mina hi ntirho lowu, ndzi anakanye leswaku a swi antswa eka mina ku tshembeka malunghana ni xivangelo xa mina xo suka eRCMP. Lexi ndzi hlamariseke loyi a a burisana na mina (loyi a a ta va mulanguteri wa mina) u hlamusele leswaku u tshike ntirho wa yena wo sungula hikwalaho ka swivangelo swa ripfalo naswona a a yima ni xiyimo xa mina. U tlhele a komba leswaku xikhundla lexi xi fanele ku siviwa hi munhu loyi a nga ni vutshembeki lebyi nga kanakanisiki. U ndzi nkhensile hikwalaho ko va la hlamuselaka kutani a kombisa leswaku a a ta ndzi bumabumelela xikhundla lexi. Ku nga si hela mavhiki mambirhi a ndzi thoriwile ximfumo.
Ku hava ku kanakana emianakanyweni ya mina leswaku moya wa Yehova wu pfune mina ni ndyangu wa mina entokotweni lowu hinkwawo. Kumbexana ku ni vamakwerhu van’wana lava kongomanaka ni xiyimo lexi fanaka. Ndzi khongelela leswaku ntokoto wa mina wu va khutaza ku tiseketela hi Yehova ivi va n’wi pfumelela ku endla swilo hi ndlela yakwe.—Matewu 6:33.
Hi laha ntokoto lowu nga laha henhla wu kombaka ha kona, ku phikelela ku rhula ni ku rhangisa Mfumo wa Xikwembu evuton’wini bya wena swi ta lava matshalatshala naswona swi nga ha lava ku lulamisa kun’wana ka munhu hi xiyexe. Kambe mikateko yi chululukela eka lava va tirhisaka ndzayo ya Matsalwa, xisweswo va kombisa moya lowu fanaka ni lowuya wa mupisalema Davhida, loyi a nga te: “Yehova, nḍi kombise ndlela ya wena, u nḍi fambisa e ndleleni le’yi lulameke.”—Psalma 27:11.