Swivutiso Swa Vahlayi

■ Xana Timbhoni ta Yehova ti alela makolo swinene exikarhi ka swirho swa tona hi laha ti alelaka mukhuva lowu onhaka wa fole ha kona ke?

Timbhoni ta Yehova ti teka xiyimo lexi sekeriweke eBibeleni xo Iwisana ni fole, naswona ti amukela ku sola ka Matsalwa ka makolo hi laha ku ringanaka.

Ti pfumela leswaku ku dzaha ku tshova milawu ya Bibele. Ku dzaha ku katsa ku nwa nikhotini. Nakambe, ku koka musi a hi ka ntumbuluko. Ku dzaha ku thyakisa miri, ku vanga swiphiqo swa rihanyo naswona ku tsongahate vutomi lebyi a byi ta va byi tirhisiwile ku dzunisa Xikwembu. Nakambe ku dzaha ku thyakisa moya lowu van’wana va wu hefemulaka swinene; entiyisweni, rero a hi rona rirhandzu ra munhu-kuloni.—2 Vakorinto 7:1; Varhoma 12:1; Marka 12:33.

Hambi swi ri tano, ku vuriwa yini hi makolo ya ku dya ngopfu? Hi laha ku twalaka, Bibele yi sola makolo, ku nga makwanga lama tlulaka mpimo eku dyeni, kumbe ku dya ngopfu. Jaha ra Muisrayele leri handle ko hundzuka a ri ri ‘ni makolo ri tlhela ri va xidakwa’ a ri fanele ku dlayiwa. (Deuteronoma 21:18-21) Swivuriso ya tshinya ehenhleni ka ku ‘tolovela vanhu va makolo.’ (Swivuriso 28:7; 23:20, 21) Nakambe makolo ya hoxile tanihi leswi hi byeriwaka leswaku “va makwanga’’ va nga ka va nga dyi ndzhaka ya Mfumo wa Xikwembu. (1 Vakorinto 6:9, 10; ringanisa 1 Petro 4:3; Vafilipiya 3:18, 19.) Valanguteri va Vakriste va fanele ku ‘tikhoma,’ va nga ‘vi na makolo.’ (Tito 1:8,  12) Leyi i mhaka ya ntikelo lerova valanguteri van’wana va susiwile hikwalaho ka ku dya ka vona loku nga lawuriwiki.

Hambi swi ri tano, swi fanele ku xiyiwa leswaku ku vona loku makolo ya humelela a swi olovi. Ku dya (ku hambana ni ku koka musi wa fole) i ka ntumbuluko naswona ka fanela. Naswona ku va la nyuheleke a hi mhaka ya xikombiso xa makolo; munhu la ondzeke swinene a nga ha va na wona makolo. A hi ku va ni ntiko lowukulu leswi Bibele yi swi solaka, kambe, i ku dya ku tlula mpimo, loku kumbexana ku nga nyuherisiki.

Vanhu van’wana va ni ntiko lowukulu hikwalaho ka vuvabyi kumbe mimpfilungano ya rimbewu, hambi leswi Profesa Judith Rodin a vulaka leswaku i “5 wa tiphesente ntsena wa timhaka hinkwato ta ku nyuhela loku ngopfu-ngopfu ku vangiwaka hi swiphiqo swa mirhi.” Xitekela xa ndzhaka xi nga ha voyamisela munhu eku ondzeni. Dr. William Bennett u ri: “Vo tala va vanhu lava va nyuheleke va hlayisa ntiko wa vona hi ku dya leswi munhu loyi a nga ni avhareji ya ntiko a dyaka swona . . . Va ni swakudya leswi hambaneke swa miri.” Tintlhari tin’wana ti vona leswaku loko munhu la nyuheleke a dya swintsongo, miri wakwe wu hunguta mpimo wa wona wa swakudya leswi akaka miri leswaku wu herisa ntikelo wa swakudya hakantsongo-ntsongo. Kambe hambi loko munhu la nyuheleke a nga ri na makolo hi mhaka yo dya ngopfu, na yena (wa xinuna kumbe wa xisati) a nga ha lava ku tirhisa ndzayo ya Xikwembu swinene.

Hi xikombiso, Vakriste va fanele ku hlakulela ku tikhoma, loku ku tlhelaka ku tirha ni le ku dyeni. (Vagalatiya 5:22, 23; 2 Petro 1:5-8) Muapostola Pawulo u khutaze Vakriste ku fana ni xitsutsumi lexi ‘kombisaka ku tikhoma hi matlhelo hinkwawo.’ Pawulo u ‘xanise miri wakwe, a wu endla hlonga, leswaku a nga kumeki a ri la tsandzekaka.’ (1 Vakorinto 9:24-27) Munhu la nyuheleke a nga ha va ni xivangelo xo ‘xanisa miri wakwe’ malunghana ni leswaku u dya ku fikela kwihi, yini, rini naswona njhani.a

Ku va la nyuheleke ku nga va ni khombo. Swiviko swi komba leswaku ku nyuhela ku nga yisa eka ntshikilelo lowu tlakukeke wa ngati ni mimpimo ya xihoko, nhlaselo wa vuvabyi bya chukele eka lavakulu, tinxaka to hambana-hambana ta khensa, vuvabyi bya mbilu ni nyongwa, vuvabyi bya vudyuhari ni swiphiqo swo hefemula. “Munhu loyi a nga ni ntiko lowu tlulaka 20 wa tiphesente u kongomana ni mpimo wa rifu ra n’we xa nharhu ehenhla ka avhareji; lava nga ni ntiko lowu tlulaka 30 na 50 wa tiphesente, mimpimo yi tlakuke hi 50 na 100 wa tiphesente, hi ku landzelelana.’’ (The New York Times, February 27, 1985) Swiviko leswi fanaka swa swiphiqo swa rihanyo swi huma eNghilandhi, Jarimani na Italy.

Mukriste hakunene u lava ku ‘rhandza Yehova hi mbilu ya yena hinkwayo, moya [kumbe vutomi], mianakanyo ni matimba ya yena.’ (Marka 12:30) Vo tala, loko va dyondza Vukriste, va tshika ku dzaha leswaku va hlayisa rihanyo ni vutomi bya vona. Xana Vakriste a va fanelanga ku khathalela leswaku ku va ni ntiko lowu tlulaka mpimo hikwalaho ka makolo ngopfu swi nga ha tsanisa rihanyu ni vutomi bya vona lebyi nyikeriweke Yehova?

Vanhu vo tala va dya ngopfu loko va ri enhlomulweni, va karhatekile, va ri ni xivundza kumbe va hlundzukile. Hambi leswi ku va Mukriste ku nga siveleki mintlhaveko yo tano hinkwayo, ematshan’wini yo kuma xikhomela-ndhawu eku dyeni loku nga lavekiki, Mukriste a nga hundzukela eka Xikwembu ni le ka vamakwavo. Emhakeni leyi hlaya Vafilipiya 4:6, 7, 11-13. Hambi ti ri tintlhari leti pfumelaka leswaku munhu u ni mboyamelo wa ntumbuluko ehenhleni ka ntiko wo karhi ta pfumela leswaku leswi swi nga cinciwa. Ti kandziyisa ku hunguta swakudya leswi nyuherisaka ngopfu ni ku andzisa ntirho lowu lavaka matimba. Lexi tsakisaka, eswivandleni swo tala Mukriste loyi a hlanganyelaka nkarhi na nkarhi evutirhelini bya yindlu na yindlu u endla ku famba ni ku khandziya ko tala leswi n’wi pfunaka. Nakambe, Pawulo u ‘tikarhatile ni ku tixanisa’ evutirhelini.—2 Vakorinto 11:26, 27.

Xisweswo, Timbhoni ta Yehova ti sola makolo hi mhaka ya leswi Bibele yi swi vulaka. Ku nga khathariseki ntiko wa tona, ti tikarhatela ku ‘kombisa ku tikhoma hi matlhelo hinkwawo,’ ku katsa ni ku dya. Leswi ngopfu-ngopfu a hi mhaka ya ku avanyisa ka ntumbuluko ehenhleni ka mahanyelo kambe va lava ku hanya hi milawu ya Bibele ivi va va Vakriste lava gingirikaka lava amukeriwaka hi Xikwembu.

[Tinhlamuselo ta le hansi]