U Nga Tlheleli Endzhaku
MAVUTHU mambirhi lamakulu ya langutanile. Mindzilakana ya nyimpi yi tshariwile. Ku chava lokukulu ku khoma socha rin’wana ni rin’wana loko ra ha yimele xileriso xa leswaku ri hlasela. Xiendlo xa matimba ni ku tiyimisela swa laveka sweswi. Ku hava ku chava loku nga pfumeleriwaka, ku anakanyiwa hi ku hlula ntsena. Socha rin’wana ni rin’wana ra swi xiya leswaku swi nga ha lava vutomi bya rona. Kambe ra swi tiva leswaku ku tlhentlhela endzhaku enkarhini lowu wo biha swi nga tisela ntirho lowu khombo. U fanele ku tsundzuka swikongomelo leswi a nga na swona ivi a hambeta hi ku tshembeka exivandleni xa ntirho.
Vakriste va ntiyiso va fanisiwa ni masocha ya Kriste. Muapostola Pawulo u tsalele Timotiya a ku: “Nkhensa na wena ku xaniseka, ku fana ni nhenha leyinene ya Kriste Yesu.” (2 Timotiya 2:3) Ee, socha ri fanele ku tilulamisela ku langutana ni ku xaniseka naswona ri tshama ri tiyile eku tiyimiseleni ka rona ko hetisisa ntirho wa rona. Emhakeni leyi, socha ra Mukriste a ri tihambanisi ni van’wana. Ri tlakusa vuhosi lebyi tlakukeke, bya ndhawu hinkwayo bya Xikwembu.
Xana munhu u va socha ra Yesu Kriste hi ndlela yihi? Hi ku amukela lunghiselelo ra Xikwembu ra ku ponisa ha Yesu Kriste na hi ku tinyiketa ka yena loku heleleke eka La-nge-henhla-henhla leswaku a ta kuma vutomi. Munhu u veka nsayino wakwe eku tinyiketeni ko tano, kavula, hi nkhuvulo wa mati.
I yini lexi katsiweke enyimpini ya socha ra Mukriste xana? Swikombiso swa Yesu Kriste ni vaapostola vakwe swi komba leswaku socha ra Mukriste a ri fanelanga ku tirhisa matlhari ya nyama. Kambe Mukriste u tirhisa tlhari ra moya (hi leswaku, Rito ra Xikwembu) ku lwisana ni mimoya leyo biha ya swivandla swa le henhla. (Vaefesa 6:12, 17) Nyimpi yo tano ya moya yi voningela vanhu leswaku va lwisana ni mavandla ya munyama, lama yimelaka vuhomboloki. Munhu u pfumela ku hlanganyela enyimpini leyi ya moya loko a nyiketa vutomi bya yena eka Xikwembu.—Matewu 5:14-16; Varhoma 13:12.
Socha ra Mukriste ri endzela vanhu hi yindlu na yindlu, ri lava vanhu lava tsakelaka. (Luka 10:5, 6; Mintirho 5:42) Loko va kumekile, u va endzela vhiki na vhiki, a va dyondzisa ntiyiso wa Rito ra Yehova. Xisweswo socha ra Mukriste ri va pfuna ku kuma ntshunxeko eka xihoxo xa vukhongeri. (Ringanisa Yohane 8:31, 32.) Loko vanhu lava va tsakelaka va fikela laha va tlangelaka ntiyiso wa Bibele, na vona va ta va masocha ya Kriste.
Hlayisa Xikongomelo eMiehleketweni
Ku hambana ni minkitsikitsi ya misava leyi vangaka ku lahleka ka vutomi, nyimpi ya moya yi na xivumbeko xa mahungu lama ponisaka lama nga tisiki khombo eka mani na mani. Hikwalaho ka mhaka leyi, ku navela lokukulu ka ku ponisa vutomi, kun’we ni rirhandzu ra Xikwembu ni ra munhu-kulorhi, ka laveka leswaku hi ya emahlweni tanihi masocha lama tshembekaka ehansi ka vuleteri bya Yesu Kriste.
Kavula, mimoya leyo biha yi tiyimisele ku kavanyeta nyimpi ya Vukriste ya moya. Yi le misaveni naswona yi yisa matshalatshala ya yona eku hambukiseni ka vanhu hinkwavo eka Xikwembu. (Nhlavutelo 12:12) Rifuwo leri nga vaka minkateko eka vanhu i xitirho lexi Sathana ni mademona yakwe va nga xi tirhisaka tanihi ntlhamu. Swikhumukani kun’we ni swisiwana swi nga phasiwa hi ndlela ya vutomi leyi kombisaka ku tikarhatela rifuwo ku tlula xikalo. Hambi ku ri van’wana va malandza ya Xikwembu va nga ha sungula ku rhandza misava ni leswi yi swi nyikelaka, va tinyiketela “ku navela ka mahlo, ni ku tikurisa hi swa vutomi lebyi.”—1 Yohane 2:15, 16.
Ku tinghenisa eka swilo leswi vonekaka swi nga fanelanga hi swona swi endleke leswaku van’wana lava hlanganyelaka ebandlheni ra Vukriste va tshika kumbe va debya eku Iweni ka nyimpi ya moya. Leswi swi khomisa gome swonghasi! Loko nyimpi yi ri karhi yi Iwiwa, socha ri nga ka ri nga swi tiyeli ku kavanyetiwa hi swilo swin’wana. Ku navela ka rona ku fanele ku va ku hlula. Leswi vutomi byi nga ekhombyeni, socha ra Mukriste ri nga ka ri nga swi koti ku pfumelela mahlo ya rona ma ri susa exikongomelweni xa rona eka mpfilumpfilu wa moya. Muapostola Pawulo u byele Timotiya a ku: “Ndzi veka ku khongotela loku emavokweni ya wena, . . . hi laha swi vuriweke ha kona khale ehenhla ka wena, hi leswaku, hi ku nyikiwa matimba ha swona, u ta kota ku Iwa nyimpi leyinene. U khomile ku pfumela, ni ripfalo lerinene.” (1 Timotiya 1:18, 19) Muxaka lowu wa nyimpi wu ta kula eka Mukriste ku kondza Yehova Xikwembu, hi ku tirhisa N’wana wakwe, a lovisa vakaneti hinkwavo va mfumo wa Yena.—Nhlavutelo 19:11-16.
Vutshembeki I Bya Nkoka
I swa nkoka swonghasi leswaku Mukriste a tshama a tshembekile! Kambe i yini lexi nga ta n’wi pfuna ke? Loko a ku ri leswaku socha leri Iwaka nyimpi leyi tolovelekeke ri ri roxe a ri fanele ku yima ri lwisana ni vuthu ra magidi-gidi, a ri nga ta langutela ku va muhluri. Ku nga khathariseki xivindzi xa rona, a ri ta hluriwa. Ku nga ha humelela sweswo eka socha ra Mukriste leri langutanaka ni mavandla ya mademona. U fanele ku tsundzuka leswaku a nga yexe. Hi ku seketeriwa hi Yehova Xikwembu, Yesu Kriste ni mavandla ya tintsumi, Mukriste, la hlanganyelaka ni vapfumeri-kulobye a nga hlula.
I swa nkoka leswaku hi tirhisa mpfuno lowu nyikaka matimba lowu nhlengeletano ya Xikwembu yi kotaka ku hi nyika wona. Hi ku hlanganyela nkarhi na nkarhi ni rin’wana ra mabandlha lama tlulaka 46 000 ya Timbhoni ta Yehova, munhu a nga kuma dyondzo eku tirhiseni ka matlhari ni swisirhelelo swa moya. (Vaefesa 6:10-20) Ku tihlawulela ku tihambanisa ni vapfumeri van’wana, munhu u fana ni socha leri langutanaka ni magidi ri ri roxe. Hikwalaho ke, hi vutlhari hi tirhisana ni vanhu lava hleriweke va Xikwembu eku Iweni ka nyimpi ya moya, hi papalata swirimbana swihi na swihi leswi nga hi susaka entirhweni wa hina wa Vukriste.
U nga tshuki u rivala leswaku nyimpi ya Mukriste i ya ku ponisa vutomi, ku katsa ni bya yena n’wini. (1 Timotiya 4:16) U nga tlhentlheli endzhaku eku lweni ka nyimpi ya moya leyi endliwaka hi mintirho ya vugingiriteki. “Ku fana ni nhenha leyinene ya Kriste Yesu” u nga swi kota ku hlula misava.—2 Timotiya 2:3, 4; Vaheveru 10:38; Yohane 16:33.