Ku Veka Vumbhoni Swi Tisa Ku Andza Ka Mfumo

“Onge Yehova . . . a nga mi andzisa ka khume ra madzana, naswona onge a nga mi katekisa hi laha a mi tshembiseke hakona.”—DEUTERONOMA 1:11, NW.

1, 2. (a) I yini lexi Yehova a xi tshembiseke Israyele? (b) Xana u swi hetisise njhani switshembiso swakwe, kambe hi ku tiseketela hi yini ke?

KU ANDZISIWA KA KHUME RA MADZANA! Sweswo hi leswi Muxe a swi kombeleleke ‘tiko ra Yehova lero kwetsima,’ Israyele. Yehova u tshembisile tiko rero swilo leswikulu. (Eksoda 19:5, 6; nakambe vona Genesa 12:2, 3.) Xana switshembiso swoleswo u swi hetisisile ke?

² Hi swona, hi malembe lama nga vaka 500 endzhaku ka loko Muxe a vule marito lama nga laha henhla, ku vikiwe leswi: “V̌a-Yuda ni v̌a-Israel a v̌a tele ngopfu, byi ri v̌unyingi le’byi fanaka ni sav̌a le’ri nge ribuweni ra lwandle. A v̌a dya, v̌a nwa, v̌a ṭaka.” Hosi ya wansati ya Sheba, leyi taka hi le kule ku ta hlalela ku hlamarisa ka Mfumo wolowo, yi byele Solomoni yi ku: “Waŝiv̌o, a v̌a nḍi byelanga hafu ya ŝona: U tlula hi v̌utlhari ni rifuwo hikwaŝo leŝi nḍi ŝi tweke. . . . A ku nkhensiwe Yehova, Šikwembu ša wena, . . . leŝi Yehova a ranḍaka Israel hi masiku.” (1 Tihosi 4:20; 10:7-9) Ntsendze loko vanhu volavo va tirhile hi ku tshembeka tanihi Timbhoni ta Yehova, hakunene u va katekisile ni ku va andzisa.

3. (a) I yini leswi Petro a swi tiyiseke ehenhleni ka ‘vanhu va vito’ ra Xikwembu? (b) Hikwalaho ka yini vito leri nge Timbhoni ta Yehova ri ri leri fanelaka vanhu lava?

³ Ku tlula gidi ra malembe endzhaku ka nkarhi wa Solomoni, muapostola Petro, loko a veka vumbhoni emahlweni ka huvo leyi fumaka ya Vukriste eYerusalema, ‘u va rungulele hi laha Xikwembu xi nga sungula ha kona ku tikarhata, xi tilavela, exikarhi ka vamatiko, vanhu lava nga ta vuriwa va xona hakunene.’ (Mintirho 15:14) Vaisrayele a va ri vanhu va vito ra Xikwembu. Kambe sweswi, Xikwembu a xi tlhela xi hlengeleta ‘vanhu va vito ra xona’—bandlha ra Vukriste, Israyele wa moya—loyi na yena a ta vekela Yehova vumbhoni, a twarisa swikongomelo swa Mfumo wa Yena. (Vagalatiya 6:16) Hi laha ku fanelaka, vanhu lava namuntlha va tiviwa emisaveni hinkwayo hi vito leri Yehova hi yexe a ri humelerisaka eka Esaya 43:10-12, ‘Timbhoni ta Yehova.’ Xana i yini lexi katsekaka emhakeni ya ku va vanhu va vito ra Yehova ke?

“Timbhoni Ta Mina”

4. (a) Hikwalaho ka yini Timbhoni ta Yehova nakambe ti fanele ku va ‘timbhoni ta Yesu’? (b) Hi ku ya hi Matsalwa, Yesu u hi siyele xikombiso xihi eku vekeleni ka Yehova vumbhoni?

⁴ Yesu hi yexe u lerise vanhu lava, a ku: “Mi ta va timbhoni ta mina . . . ku ya fika emakun’wini ya misava.” (Mintirho 1:8) “Timbhoni ta mina”—xana marito lawa ya Yesu ya vula leswaku vumbhoni byi fanele ku vekeriwa Yesu ntsena, hayi Yehova ke? A swi tano! Enkarhini wolowo wo nonoha, loko tintswalo ta Yehova ti susiwa eka Israyele wa nyama ti ya eka wa moya, a swi laveka ku veka vumbhoni lebyinene ehenhleni ka Kriste loyi lunghiselelo leri rintshwa ri endliwaka ehenhla ka yena. Kambe, Yesu u tshama a ri ehansi ka Tata wakwe minkarhi hinkwayo. U hi vekele xikombiso emhakeni ya ku humesa vumbhoni malunghana ni vito ra Yehova ni Mfumo wa Yena.—Yohane 5:30; 6:38; 17:6, 26; 18:37.

5. (a) Xana hi fanele ku veka vumbhoni malunghana ni timhaka tihi leti yelanaka na Yesu? (b) Eka leswi, hi landzela minkondzo ya Yesu hi ndlela yihi ke?

⁵ Yesu Kriste i Muhlanganisi wa ntwanano lowuntshwa ni lowu Vakriste lava totiweke lava nga eka wona va vitaneriweke ku dya ndzhaka ya Mfumo. Hi yena “Hosi ya vutomi” leyi Yehova a yi tirhisaka eku kutsuleni ka vanhu eku feni. Yesu “u fanele ku fuma” ku kondza loko valala hinkwavo va Xikwembu ni munhu va kandziyeriwile ni loko paradeyisi leyo vangama yi vuyeteriwile emisaveni leyi. Hi yena “N’wana wa Xikwembu” la vitanaka vafi va huma emasirheni ya vona eku pfuxiweni. (Vaheveru 9:15; Mintirho 3:15; Psalma 110:1, 2, 5; 1 Vakorinto 15:25-28; Luka 23:42, 43; Yohane 5:25-29) Hikwalaho ke, tanihi Timbhoni ta Yehova, hi veka vumbhoni ni le henhla ka xiphemu xa nkoka xa N’wana eku lweleni ka vito ra Yehova. Emhakeni leyi, hi landzela magoza ya N’wini wa hina, loyi hi yexe a ri mbhoni leyi xiyekaka ya Yehova—“Mbhoni leyo Tshembeka.”—Nhlavutelo 1:5; 3:14; Yohane 18:37; 1 Petro 2:21.

I Mani La Vekaka Vumbhoni Xana?

6. (a) I vamani ntsena namuntlha lava humesaka vumbhoni bya Mfumo ke?

⁶ Namuntlha, vanhu lava nga ni vun’we va veka vumbhoni “ku ya fika emakun’wini ya misava.” I vanhu lava muapostola Petro a vulavulaka ha vona—‘vanhu va vito ra Xikwembu’—lava vekaka vumbhoni va vekela Yehova ni Mfumo wa yena ha Kriste Yesu. Malunghana ni leswi, Yesu hi byakwe u byele vadyondzisiwa va yena a ku: “La pfumelaka ka mina, na yena u ta endla mintirho leyi ndzi yi endlaka; u ta endla ni leyi tlulaka leyi, hikuva ndzi ya eka Tatana.” (Yohane 14:12) A ri evokweni ra xinene ra Tata wa yena ematilweni, Hosi Yesu Kriste u kongomisa vumbhoni byihi na byihi lebyi tshamaka byi nyikeriwa emisaveni. Hi laha Yesu a profeteke ha kona, loko ‘mahungu lamanene ya mfumo’ ma ‘twarisiwile emisaveni hinkwayo leswaku byi va vumbhoni eka vanhu va matiko hinkwawo; hi kona makumu ma nga ta fika.’—Matewu 24:14.

7. (a) Hikwalaho ka yini mintlawa ya Vujagana yi hluleka ku veka vumbhoni? (b) Ku hambana ni sweswo, hikwalaho ka yini Timbhoni ta Yehova ti ri leti gingiritekaka swinene entirhweni wa tona?

⁷ “Evangeli leyi ya Mfumo” i mahungu lama tsakisaka swinene lama huweleriwaka eka vanhu. I mahungu lamanene yo vangama lawa mintlawa ya vukhongeri bya Vujagana hi ku helela yi nga ma twarisiki. A yi na ntshembo wa Mfumo wa nkarhi lowu taka. A swi hlamarisi leswi va hlulekaka ku veka vumbhoni! Va hlulekile ku xiya xiendlakalo lexi nyanyulaka swinene evurungurwini hinkwabyo—ku fika ka N’wana-wa-Munhu eku kwetsimeni ka Mfumo, a ta tshama exiluveIweni xakwe lexo vangama kutani a avanyisa matiko ni vanhu va misava. Wolowo i nchumu lowu ku nga vekiwaka vumbhoni ha wona! Kutani ke, ehansi ka nkongomiso wa tintsumi, Timbhoni ta Yehova na Kriste wa Yena sweswi ti huwelela “evhangeli leyi nga heriki . . . tanihi mahungu lamanene eka lava akeke emisaveni, ni le ka vanhu va matiko hinkwawo ni va tinxaka hinkwato ni va tindzimi hinkwato.” Xana u hlanganyela hi ku chivirika eka vumbhoni lebyi ke?—Nhlavutelo 14:6, 7, NW; Matewu 25:31-33.

Vumbhoni Lebyinene Hi 1984

8. (a) Hikwalaho ka yini hi fanele ku tsakisiwa hi Xiviko xa Ntirho wa Lembe ra 1984?

⁸ Xiviko xa Ntirho wa Lembe ra 1984 wa Timbhoni ta Yehova eMisaveni Hinkwayo, lexi humelelaka eka matluka 20-23 ya magazini lowu, xi komba hi laha Yehova, Xikwembu xa hina a katekiseke matshalatshala ya Timbhoni takwe leti ti titsongahataka hi xitalo. Ku yimeriwile matiko ya 203 loko ma hlanganile. Eka wona, matiko ya 172 ya vika ku engeteleka ka vahuweleri. Naswona hi ntsako, vahuweleri lava va Mfumo va tlhela va vulavula hi laha ‘Hosi yi endleke leswaku va andza, ina, yi kurisile rirhandzu leri va rhandzanaka ni ku rhandza van’wana ha rona.’ (1 Vatesalonika 3:12) Vun’we bya rirhandzu exikarhi ka vanhu va Yehova, kun’we ni vumbhoni bya Mfumo, swi koka mintshungu ya vadyondzisiwa lavantshwa. Eka vona Yesu u ri: “Mi ta tiva ntiyiso, kutani ntiyiso wu ta mi ntshunxa.”—Yohane 8:31, 32.

9. (a) Xana a wu ta va u katekisiwe hi ndlela yihi ku hlanganyela eku endleni ka xiviko lexi? (b) Tifigara leti ti komba yini ehenhleni ka Yehova ni vanhu vakwe?

⁹ Xana xiviko lexi xa ntirho wo hlamarisa xi hlengeletiwe njhani ke? Xi endliwe hi swiviko swa ntirho wa nsimu leswi wena—muhuweleri wa Mfumo—hi ku tshembeka u swi tiseke n’hweti yin’wana ni yin’wana. Xana a wu tsaki leswi u veke ni xiphemu xintsongo eka xiviko lexi xinene? Tifigara leti ti komba hi laha hi ndlela yo hlamarisa Yehova a ‘cheleke gandlati ra minkateko’ ehenhla ka Timbhoni ta yena—“vanhu lava nga va yena hi xiviri”—lava a va hlanganiseke exibohweni xa misava hinkwayo xa ntirho wa rirhandzu.—Malakia 3:10; Psalma 56:10, 11; Vakolosa 3:14.

10. (a) I yini lexi tiyisaka leswaku timbhoni ti fanele ku tinyiketela? (b) Xana Matsalwa ya ri yini hi ta lava tshembekaka ni hakelo ya vona?

¹⁰ Xiyenge lexikulu xa ku veka vumbhoni xi endliwile ehansi ka ku xanisiwa kumbe maxangu nakona hi ku tikarhata lokukulu. Leswi swi fanele ku languteriwa, hikuva rito leri nge “mbhoni” hi laha ri tirhisiweke ha kona laha i ku hundzuluxela ka rito ra Xigriki martys kumbe martyr, leri eka rona ku tlheleke ku humesiwa rito leri nge “martyr,” leri vulaka munhu la vekaka vumbhoni hi rifu rakwe. Leswi swi tiyisa leswaku hina, tanihi Timbhoni ta Yehova, hi fanele ku tinyiketela, minkarhi hinkwayo hi tiyimisele ku tikarhata ni ku tiyisela ehansi ka matshamelo hinkwawo, hambi ku ri ku fika eku feni loko swi laveka.—Luka 9:23; ringanisa Yobo 2:3; 27:5; 31:6; Mintirho 22:20; Nhlavutelo 2:10.

Lava Tiyiselaka Va Katekisiwa

11, 12. (a) Yehova u hi nyika switshembiso swihi leswi tiyisaka nhlana? (b) Xana vanhu vakwe va hlurise ku yini eka mintshikilelo ya mimfumo?

¹¹ Eminkarhini ya ku xanisiwa, ‘vanhu va vito’ ra Yehova va lavile “matimba lamakulu, lama tlulaka hinkwaswo” leswaku va ta hlula minhlaselo ya matimba ya Sathana ni mavandla yakwe ya vudemona. Yehova u nyikela matimba wolawo ivi a kutsula ni ku katekisa timbhoni takwe leti tshembekaka. (2 Vakorinto 4:7-9; Esaya 54:17; Yeremia 1:19) Hi xikombiso vona xiyimo xa mimfumo ya Xikhirhi ya Nyimpi ya Vumbirhi ya Misava, lexi Jarimani, Italy, na Japani ya langutaneke na xona. Hi ku tirhisa tihulumendhe ta tihanyi, Diyavulosi u ‘humesile nambu wa nxaniso enon’wini wa yena,’ ku herisa ntirho wa ku veka vumbhoni lowu kongomisiwaka hi nhlengeletano ya Xikwembu ya le tilweni leyi fanaka ni wansati. Kambe xana Sathana u hlurile eka leswi ke? Ni kantsongo! Yehova u kongomisile swiendlakalo leswaku matiko ya xidemokrati ya misava ya mita ndhambi yoleyo. ‘Lavo biha va susiwile’ kasi timbhoni leti tshembekaka ta Yehova sweswi ti kateka hi ndlela leyi hlamarisaka ematikweni wolawo.—Nhlavutelo 12:15, 16; Psalma 37:28, 29.

¹² Sweswinyana, eka matiko lawa manharhu, Sosayiti ya Watch Tower yi lavile ku aka ni ku lunghiselela tifektri letikulu leswaku yi ta humesa muxaka lowu hambanaka wa ndhambi—mamiliyoni ya mamiliyoni ya tiBibele ni tibuku tin’wana ta Mfumo eku andziseni ka Timbhoni ta Yehova ni vanhu van’wana lava nga ni ndlala ya ntiyiso. Le Jarimani, Italy, na Japani, namuntlha vahuweleri va Mfumo lava tlulaka 300 000 va rhwala vumbhoni va byi yisa emakaya ka vanhu. Naswona Yehova u katekisa vanhu vakwe lava hlayisaka vutshembeki ensin’wini ya misava hi ku andza!—Ringanisa Psalma 115:12-15.

13. (a) I yini lexi eka Xiviko xa Lembe xi kombaka leswaku timbhoni leti tshembekaka ti hanye hi ku pfumelelana ni ndzimana ya lembe ya 1984? (b) Xana leswi swi fanele ku hi susumetisa ku yini?

¹³ Hambi swi ri tano, hi ku tiva leswaku nkarhi wa yena wu komile, Diyavulosi u ya emahlweni a lwisana ni lava va “hlayisaka milawu ya Xikwembu ni ku humesa vumbhoni bya Yesu.” (Nhlavutelo 12:12, 17) Nkaneto wa Sathana wu pfurha hi laha ku hlawulekeke ematikweni lawa ya longoloxiweke eka xiviko lexi tanihi “Matiko Man’wana ya 28.” Timbhoni eka tindhawu leti hi ku tshembeka ti hanye hi ku pfumelelana ni ndzimana ya hina ya lembe ya 1984, “va kanya timbilu ku vula Rito va nga chavi nchumu.” (Vafilipiya 1:14) Ku engeteleka ka vahuweleri va wona ka tiphesente ta 3, 1 ka nkhenseka swinene. Hi ku nyanyuriwa hi xikombiso xa vona, onge hinkwerhu ka hina hi nga ya emahlweni hi humesela ‘Xikwembu magandzelo ya ku vonga vito ra xona hi marito lama humaka emilon’wini ya hina.’—Vaheveru 13:15.

14. (a) I yini lexi nga vaka ‘nkarhi wo humesa vumbhoni’ eka hina ke? (b) Hi fanele ku ya emahlweni hi humesa vumbhoni hi xivindzi hambi ku ri ni swiyimo swihi, naswona ha yini ke?

¹⁴ Loko swiyimo swa misava swi ri karhi swi nyanya ku biha, van’wana va hina, handle ko tilumaluma, va ta xanisiwa, vahuvahuveriwa ekhoto ni ku khotsiwa. Yesu u vulavule hi mintokoto yo tano exikarhi ka swilo ‘leswi faneleke ku humelela’ ku nga si fika makumu, ivi a engetela a ku: “Wu ta va wona nkarhi wa n’wina wo humesa vumbhoni.” Eka swiyimo hinkwaswo, manuku Timbhoni ta Yehova ti fanele ku hambeta ti humesa vumbhoni malunghana ni Xikwembu na Kriste. Vo tala va ya emahlweni na ku swi endla hambi loko ku ri ni nkaneto lowukulu wa ndyangu, ku poyiriwa hi vatirhi-kulobye kumbe vanghana va xikolo, ni swisandzu leswi vekiwaka ehenhla ka vona endhawini leyi va chumayelaka eka yona. Xana u veka vumbhoni hi ku chivirika hambi ku ri ni swiyimo leswi tisaka ndzingo-ke? Manuku u wun’wana wa lava Yesu a va byeleke a ku: “Hi ku tiyisela ka n’wina, mi ta tikumela vutomi.”—Luka 21:7, 9-19.

Ku Andza Ka Mfumo!

15. I tinhla tihi tin’wapa ta nkoka ti nga echatini eka tluka leri xana?

¹⁵ “Ku Andza ka Mfumo”—mayana ku fanela ka nhloko-mhaka ya mintsombano ya hina ya ximumu xa 1984! Leri hakunene ri vile lembe ra hina lerinene ra ku andza. Wa nga languta chati eka tluka leri! Leswi swi hlengeletiwe swi huma eka swiviko swa marhavi ya 95 ya Sosayiti ya Watch Tower lama fambisaka ntirho wa vumbhoni ematikweni ya 203.

16. Hlamusela timhaka tin’wana leti tsakisaka leti humaka emisaveni hinkwayo.

¹⁶ Ndhawu a yi hi pfumeleli ku humesa timhaka hinkwato ta mapapila yo tlangela lama amukeriweke ya huma hi le tihofisini teto ta marhavi kun’we ni swiviko swa vona swa lembe, kambe ku ni swikombisonyana swin’wana leswi humaka hi le misaveni hinkwayo:

Alaska: Muti hinkwawo wa Metlakatla wu tile ku ta vona loko Timbhoni ta Yehova ta 230 ti aka Holo yo saseka ya Mfumo hi maawara ya 32; yi khanguriwa hi Sonto ya le maheleni ya vhiki rero.

Honduras: Vahuweleri va 3 663 a yi ri nhlohlorhi ya hina leyi tlakukeke; leyi nga ni lava va veke kona eXitsundzuxweni va 17 005 lava va ha faneleke ku pfuniwa.

Brazil: Tinhlohlorhi letintshwa ti fike eka vahuweleri va 160 927, ni vanhu va 474 450 lava va nga va kona eXitsundzuxweni.

Thailand: Moya wa vuphayona wa hanya, ku vile tiphesente ta 22 ta vahuweleri hinkwavo leti hlanganyeleke entirhweni lowu hi April.

Papua New Guinea: Nhlohlorhi ya maphayona lama pfunaka yi engeteleke hi tiphesente ta 91; lava va veke kona eXitsundzuxweni va tlakuke hi ku tlula 1 000—ku ya eka 7 704.

Austria: Moya wa vuphayona wa nghena, naswona hi ni tinhlohlorhi ta ntlhanu leti landzelelanaka ensin’wini yoleyo; hi ni tinhlohlorhi ta nkombo ta vahuweleri, yo hetelela yi nga 15 618.

Zambia: Hi fikelerile nhlohlorhi ya nkarhi hinkwawo ya vahuweleri va 58 925: Lava va veke kona eXitsundzuxweni a va ri 393 431—110 447 ku tlula n’waxemu.

17. (a) Xana maphayona ma andza njhani? (b) I tipakani tihi leti xiyekaka leti nkhensekaka, naswona eka vamani? (c) Hi yihi nhlohlorhi leyintshwa ya vahuweleri, naswona yi nga va yi vangiwe hi yini ke?

¹⁷ Swiviko swi komba leswaku varhumiwa lava tshembekaka ni maphayona va ya emahlweni va veka xikombiso eku yiseni ka vumbhoni etindhawini letintshwa ni ta khale. Swi tiyisa nhlana hakunene ku vona ku engeteleka ka maphayona. Ntsengo wa maphayona ya nkarhinyana lama vikeke hi April ma engeteleke ku fika enhlohlorhini ya nkarhi hinkwawo ya 323 644 ku nga ku engeteleka ka 49 wa tiphesente. A hi vantsongo va vona lava voneke lunghelo ra vona ro ya eswivandleni swa vuphayona bya nkarhi hinkwawo. Nakambe, vunyingi bya vahuweleri va hina lavantshwa va Mfumo va veka ntirho wa vuphayona tanihi pakani ya vona ivi va endla malunghiselelo lama nga erivaleni ku yi fikelela emalembeni ya vona yo hetelela ya le kholichini. Vuyelo hinkwabyo byi kombisiwile hi ku andza loku hlamarisaka ka maphayona. Leswi swi tlhele swi pfuna ku vumbetela moya wa ku chivirika emabandlheni ya hina, swi susa ku kanakana eka nhlohlorhi leyintshwa ya misava hinkwayo ya vahuweleri va 2 842 531, ku engeteleka ka tiphesente ta 7,2 ku tlula nhlohlorhi ya 1983. Xana a wu tsaki leswi u hlanganyeleke eku engetelekeni loku ke?

18. (a) I ku andza kwihi kun’wana lokunene loku veke kona hi 1984? (b) Xiviko xa Xitsundzuxo xi komba ku koteka ka ku andza kwihi, nakona vahlayi va hina va nga endlisa ku yini xana?

¹⁸ Vumbhoni lebyi tsakisaka lebyi nyikeriweke hi 1984 nakambe byi tikombise eku engetelekeni ka ku fambisiwa ka timagazini na tibuku tin’wana, rhekhodo leyi vikiweke ya nhlayo ya maawara ya ntirho wa nsimu, ku andza loku hlamarisaka ka maendzo yo vuyela eka vanhu lava tsakelaka ni le ka tidyondzo ta le kaya ta Bibele leti ti khomiwaka na vona. I ku langutela muni konghasi loku hi nga na kona eka mihandzu yin’wana ya ntirho wa ku chivirika! Naswona swi lo dla, leswaku ka ha ta va ni ku hlengeletiwa lokukulu! Leswi swi kombisiwe hi nhlayo leyi xiyekaka ya lava va veke kona eka Xilalelo xa Hosi hi April 15 leyi hundzeke. Emabandlheni ya Timbhoni ta Yehova emisaveni, ku vile ni ntsengo wa 7 416 974, lava eka vona 9 081 va kombiseke leswaku a va ri va “ntlhambinyana” wa Hosi hi ku hlanganyela exinkweni ni le vhinyweni. Wonge vahlayi va hina hinkwavo va nga hambeta va kula emoyeni, leswaku va ta kota ku hlanganyela eku humeseni ka vumbhoni lebyinene ni le ku hlengeleteni loku ka ha taka.—Ringanisa Vaefesa 4:15; Vafilipiya 1:9-11.

19. Yehova hi nga n’wi nkhensa hikwalaho ka yini, futhi hi xihi xikhongelo xa hina mayelana ni nkarhi lowu taka?

¹⁹ I ntiyiso, hi nga phindha marito ya Muxe hi vulavula hi Timbhoni ta Yehova, ‘vanhu va vito ra yena’ va namuntlha hi ku: “Yehova, Šikwembu ša ṅwina, ši mi a nḍisile, kutani namuntlha mi tarile kukotisa tinyeleti ta le tilweni.” (Deuteronoma 1:10) I xikhongelo xa hina leswaku Yehova, Hosi Leyikulu a ya emahlweni a katekisa vumbhoni bya Mfumo ni ku byi andzisa!

U Nga Ku Yini Xana?—

◻ Hikwalaho ka yini Timbhoni ta Yehova nakambe ti fanerile ku va ‘timbhoni ta Yesu’?

◻ I vumbhoni byihi lebyinene lebyi humesiweke hi 1984 ke?

◻ I yini lexi kombaka leswaku Yehova u katekisa timbhoni leti tshembekaka?

◻ Xana xiviko xa 1984 xi fanele ku hi nyanyula hi tindlela tihi ke?

(b) Hikwalaho ka yini ku nga vuriwaka leswaku vona va endla ‘mintirho leyi tlurisaka’?

(b) I yini lexi kokaka vadyondzisiwa lavantshwa ke?

[Chati eka tluka 14-17]

XIVIKO XA NTIRHO WA LEMBE RA 1984 WA TIMBHONI TA YEHOVA EMISAVENI HINKWAYO

(Vona vholomo leyi heleleke)

[Chati eka tluka 19]

Mfananiso Wa Xiviko Xa Misava

1984 1983 Ku Andza

Marhavi ya Watch Tower 95 94

Matiko Lama Vikaka 203 205

Nhlohlorhi ya Vahuweleri 2 842 531 2 652 323 7,2%

Avhareji ya Vahuweleri 2 680 274 2 501 722 7.1%

Avhareji ya Maphayona 258 936 206 098 25,6%

Maphayona ya Nkarhinyana (April) 323 644 217 860 48,6%

Ntsengo wa Maawara ya Nsimu 505 588 037 436 720 991 15,8%

Tibuku leti Fambisiweke 36 639 925 36 039 400 1,7%

Swikhokhelo Leswi Fambisiweke 1 812 221 1 756 153 3,2%

Timagazini leti Fambisiweke 287 358 064 258 698 636 11,1%

Maendzo yo Vuyela 195 819 093 174 687 309 12,1%

Avh. ya Tidyondzo ta Bibele 2 047 113 1 797 112 13,9%

Lava Veke Kona eXitsundzuxweni 7 416 974 6 767 707 9,6%

Lava Hlanganyeleke eXitsundzuxweni 9 081 9 292