Hulumendhe Leyi Endlaka Leswi Hlulaka Vanhu
“Tanani, mi v̌ona mitiro ya Šikwembu; ša tšhav̌iseka e ku endleni ka šona e henhla ka v̌ana v̌a v̌anhu.”—PSALMA 66:5.
1, 2. (a) Xana vuako lebyi vonekaka byi komba matimba lama chavisaka ya Muvumbi hi ndlela yihi? (b) Hikwalaho ka yini hi fanele ku pfumela leswi Rito ra Yehova ra vuprofeta ri swi vulaka ehenhleni ka nkarhi wa hina?
YEHOVA u ni matimba yo endla leswi hlulaka vanhu. Hi xikombiso: Vanhu va le ku chaveni lokukulu ka matimba ya bomo ya nyutliya; kambe matimba ya yona ma tsongahatiwa hi matimba lama hlamarisaka lama nga kona edyambyini ra hina. Hambi swi ri tano dyambu hi yin’wana ya tinyeleti leti nga vaka 200 wa tibiliyoni eka Xirimele xa hina. Vativi va tinyeleti va ringanyeta leswaku evuakweni hinkwabyo ku nga ha va ni swirimele leswi nga vaka 100 wa tibiliyoni, xin’wana ni xin’wana xi ri ni tibiliyoni ta tinyeleti. I matimba muni yonghasi lamakulu lama swi ma tekeke ku vumba sweswo hinkwaswo! (Esaya 40:26) Matimba lawa yo chavisa ya Muvumbi ya endla leswaku matimba ya vanhu ya hundzuka swa hava.—Esaya 40:15.
2 Xisweswo ku hava munhu la faneleke ku kanakana leswaku Yehova a nga endla leswi a nge u ta swi endla. (Esaya 46:9, 10; 55:11) Hi fanele ku swi pfumela loko Rito rakwe ra vuprofeta ri hi byela leswaku hi tshinelela makumu ya nkarhi lowu a pfumeleleke vanhu leswaku va famba hi ndlela ya vona yo tifuma. Vurunguri byi komba leswaku leswi vanhu va swi endleke evuton’wini bya vanhu ni bya swiharhi, kun’we ni le ka misava hi yoxe, i nhlomulo, tingana evuakweni bya Xikwembu. Xisweswo, Yehova u hlantswiwe hi laha ku heleleke eku heriseni ka tingana leti, kan’we ni hi laha ku nga heriki.—Hosea 4:1-3; Yuda 14, 15.
3. Bibele yi ri yini malunghana ni vumundzuku lebyi nga ekusuhi?
3 Leswi humelelaka exivonweni xa misava namuntlha i vumbhoni lebyinene bya leswaku mafambiselo lawa ya swilo hakunene ya le xiphen’wini xo hetelela xa ‘masiku ya makumu’ lama vhumbiweke eka 2 Timotiya ndzima ya 3. Hi xihatla Yehova u ta herisa mafambiselo lawa kutani a phyandlasa nhloko ya wona, Sathana Diyavulosi. Sweswo swi ta landzeriwa hi mafambiselo lamantshwa ya hinkwakonkwako ya swilo emisaveni, ya lawuriwa hi hulumendhe ya le tilweni leyi Yesu a dyondziseke valandzeri vakwe ku yi khongelela loko a te: “A ku te ku fuma ka wena. Ku rhandza ka wena a ku endliwe misaveni, tani hi loko ku endliwa tilweni.”—Matewu 6:10; Daniel 2:44; Varhoma 16:20.
Nawu Wo Kutsula
4. Yehova u tirhise nawu wo kutsula eka Israyele ya khale hi ndlela yihi?
4 Tihulumendhe ta vanhu a ti swi koti ku herisa xidyoho, vuvabyi ni rifu. Kambe ke, hulumendhe ya Xikwembu yi ta endla leswi hlulaka vanhu. Hi kuma vutlhari byin’wana malunghana ni ndlela leyi leswi swi nga ta tirha ha yona hi ku kambisisa ku tirhisana ka Yehova ni vanhu va yena va Israyele ya khale. Kona le ndzhaku, Xikwembu xi tirhisile nawu wo kutsula, kumbe nkutsulo. Hi xikombiso, loko Muisrayele a va xisiwana, a a nga ha tixavisa tanihi hlonga eka loyi a nga riki Muisrayele. Kambe xaka ra le kusuhi a ri ta n’wi kutsula loko ri ri ni ntsengo lowu ringaneke wa nxavo.—Levitika 25:47-49.
5, 6. (a) Xana nawu wo kutsula wu tirha hi ndlela yihi eku tshunxeni ka vanhu eka xidyoho lexi va xi kumeke tanihi ndzhaka? (b) Xana swo tiendlekela leswaku un’wana ni un’wana a tshunxiwa exidyohweni?
5 Hi ndlela leyi fanaka, Xikwembu xi lunghiselele nkutsulo wa vanhu ku va humesa evuhlongeni bya xidyoho. Nxavo a wu fanele ku ringana ni lowu a wu lahlekile. (Deuteronoma 19:21) Adamu u lahlile vutomi lebyi hetisekeke bya munhu, lebyi nga heriki. Tanihi leswi ku nga hava nchumu lowu vanhu lava dyohaka va nga na wona lowu ringanaka ni nkoka wolowo, a va swi koti ku “kutsula makwav̌o.” (Psalma 49:7) Hambi swi ri tano, Bibele yi vhumbe ku ta ka un’wana loyi a nga swi kotaka. Yoloye u tikombe a ri Yesu Kriste. Ku hlavuteriwe leswaku Yesu a a rhange a hanya etilweni. Kambe vutomi bya yena byi hundziseriwe ekhwirini ra Mariya hi matimba ya Yehova. Hi ndlela leyi u velekiwe tanihi munhu. Kambe hi ku va Xikwembu xi ri Tata wa yena, a nga xi kumanga xidyoho xa ndzhaka lexi lamateke vanhu hinkwavo.—Matewu 1:18-21; Yohane 1:1, 14; 1 Petro 2:22.
6 Xisweswo, Yesu u ve ni nchumu lowu a wu ringana ni nkoka wa vutomi lebyi hetisekeke bya munhu—vutomi byin’wana lebyi hetisekeke bya munhu. Kambe ku hambana na Adamu la nga tshembekiki, Yesu u tshame a tshembekile eka Xikwembu. Naswona loko a nyikele vutomi byakwe hikwalaho ka ndyangu wa vanhu, Yehova u byi amukerile tanihi nxavo lowu fanelekaka wa nkutsulo. (Vagalatiya 1:4) Kambe xana leswi swi vula leswaku swo tiendlekela leswaku un’wana ni un’wana a tshunxiwa exidyohweni naswona u ta kuma ku hetiseka ehansi ka vulawuri bya Mfumo? Doo, hikuva Yohane 3:16 yi ri: “Xikwembu xi rhandzile misava swonghasi, xi ko xi nyika n’wana wa xona la nga un’we, leswaku un’wana ni un’wana la pfumelaka ka yena, a nga lovi, kambe a va ni vutomi lebyi nga heriki.” Hi loko hi amukela lunghiselelo ra nkutsulo ntsena kutani hi endla xanchumu ha rona laha hi nga ta kuma ku pfuxetiwa ka mimiri ni mianakanyo ya hina eku hetisekeni aParadeyisini.—Nhlavutelo 21:4.
Dyondzo eMafambiselweni Lamantshwa
7, 8. I vuswikoti byihi bya dyondzo ya nkarhi lowu taka lebyi nga ebyongweni bya vanhu?
7 Miehleketo yi ni vuswikoti lebyikulu byo dyondza, hambi ku ri eka xiyimo xa munhu xa sweswi xa ku nga hetiseki. Kambe lexi i xiphemunyana xa leswi yi nga ta kota ku swi dyondza eMafambiselweni Lamantshwa, laha xidyoho xi nga ta ka xi nga hinganyeti ku tirha ka yona. Eka The Brain Book mutsari u ri: “Etinhlokweni ta hina vini ku ni rin’wana ra mafambiselo lamakulu lama pfilunganeke evuakweni lebyi tivekaka. Matimba ya rona ni ku cinca-ncinca ka wona ya tlula lamaya ya khomphyutara leyi endliweke hi munhu.” Wa engetela: “Swi hlamuseriwe hi xihatla leswaku hi tirhisa tiphesente ta 10 ntsena ta matimba ya hina hinkwawo yo anakanya. Leswi se swa tikomba, leswaku i ku swi hundzeleta. Kumbexana a hi yi tirhisi hambi yi ri 1 phesente—ku nga ha va 0,1 phesente kumbe ehansinyana.”
8 Anakanya leswi byongo byi nga ta endla leswaku vanhu va kota ku swi endla loko byi fikelela ntamu wa byona hi xitalo eMafambiselweni Lamantshwa. Anakanya hi swilo hinkwaswo leswi nyanyulaka leswi Yehova a swi vekeke ehenhla ka misava leyi leswi hi nga dyondzaka ha swona, tanihi swiharhi swa yona, Iwandle ni vutomi bya swimilana. Nakambe, anakanya hi ku dyondza hi ta vuako lebyi hlamarisaka ni tibiliyoni ta byona ta swirimele. Xiya vutshila hinkwabyo lebyi hi nga ta kota ku byi dyondza eka ntivo-vuxongi (art), vuyimbeleri, mintirho ya mavoko ni swilo swin’wana swo tala.
9. I dyondzo ya muxaka muni leyi nga ta tisa mimpfuno leyikulu swinene eMafambiselweni Lamantshwa?
9 Ku ta va ni muxaka wun’wana wa dyondzo eMafambiselweni Lamantshwa lowu nga ta tisa mpfuno lowu tlulaka hinkwayo. Yesu u te: “Hinkwavo va ta dyondzisiwa hi [Yehova].” (Yohane 6:45) Lowu i mpimo lowu tlakukeke swinene wa dyondzo. Naswona wu ta endliwa leswaku wu kumeka eka vafumiwa hinkwavo va Mfumo wa Xikwembu, ku katsa ni lava va ponaka makumu ya mafambiselo lawa ya swilo. (Nhlavutelo 7:9, 14) Vafumiwa van’wana va Mfumo va xiyiwa eka Yohane 5:28 na 29, laha Yesu a nge te: “Nkarhi wa ta lowu hinkwavo lava nge masirheni va nga ta twa rito ra yena; kutani va ta huma.” Ku pfuxiwa loku ka tibiliyoni ta vanhu lava feke—loku hlulaka vanhu hi laha ku heleleke—ku vula leswaku ntirho lowukulu wa ku dyondzisa wu fanele ku endliwa hikwalaho ka vona.
10. Xana dyondzo yi ta ya emahlweni hi ndlela yihi eMafambiselweni Lamantshwa?
10 Namuntlha ku na mafambiselo yo tala lama himpfilitaka ya dyondzo. Kambe eMafambiselweni Lamantshwa, hulumendhe ya Xikwembu ya le tilweni yi ta lunghiselela fambiselo rin’we ra dyondzo emisaveni hinkwayo ku dyondzisa vanhu ntiyiso hi ta Yehova hi ndlela leyi nga ni vun’we. Xiphemu xa yona ku ta va ku dyondzisa vanhu hi ta vuxaka lebyi faneleke bya vanhu. A ku nga ha dyondzisiwi ku tikukumuxa ka rixaka, tiko kumbe xiyimo xa ntirhisano. Ematshan’wini ya sweswo, vaaki va misava va ta dyondza ku rhandzana, va xiximana. Nakambe dyondzo yo tano yi ta hetelela hi ku tlhela yi endla vumunhu lebyinene ku tekelela timfanelo letikulu ta Yehova.—Mintirho 10:34, 35; Vakolosa 3:9-12.
11, 12. Hi nga tiyisekisa ku yini leswaku dyondzo yo tano eMafambiselweni Lamantshwa yi ta humelela exikongomelweni xa yona?
11 Xana dyondzo yo tano hakunene yi nga tirha ke? Ha tiyiseka leswaku yi nga swi kota futhi yi ta tirha. Xivangelo xin’we hi leswaku Yehova, loyi a nga hembiki, u vula leswaku yi ta tirha. (Tito 1:2) Nakambe, muxaka lowu wa dyondzo wa tirha ni sweswi! Yehova ana se u ni nhlengeletano ya misava hinkwayo yo dyondzisa, leyi dyondzisaka timiliyoni ta vanhu hi ta hulumendhe ya Mfumo wa yena ni swilaveko swa yona. Leswi swa humelela hikuva vulawuri bya Mfumo a byi ri karhi byi tirha ku sukela loko “masiku ya makumu” ya sungurile hi 1914.
12 Ku sukela enkarhini wolowo, vuprofeta bya Matewu ndzima ya 25 a byi ri karhi byi hetiseka. Byi komba leswaku Yesu u ta ematimbeni ya Mfumo loko valala va Xikwembu va ha ri emisaveni. Ndzimana ya 32 yi ri: “Kutani vanhu va matiko hinkwawo va ta hlengeletiwa emahlweni ka yena; u ta hlawula van’wana a siya van’wana, kukotisa murisi loko a hlawula tinyimpfu exikarhi ka timbuti.” Vanhu lava va fanaka ni tinyimpfu se va dyondzisiwe hi Yehova hi ku tirhisa nhlengeletano yakwe leyi vonekaka ni leyi kulaka. Hi ku tlangela leswi va swi dyondzaka, va tirhela ku tlhela va endla vumunhu bya vona hi xifaniso xa Xikwembu. Naswona ntiyiso wa leswaku dyondzo leyi sweswi yi khumba timiliyoni ta vanhu hi langutelo lerinene i xikombiso lexinene xa leswaku yi ta endla tano hi mpimo lowukulu swinene eMafambiselweni Lamantshwa ya Xikwembu.
Ku Aka Paradeyisi
13. Hi wihi ntirho lowunene wo aka lowu nga ta va kona ehansi ka vulawuri bya Mfumo?
13 Muxaka wun’wana wa ntirho ehansi ka vulawuri bya Mfumo ku ta va lowuya wa ku hundzula misava leyi yi va paradeyisi. Naswona paradeyisi yi nga ka yi nga katsi swidakana kumbe vusweti. Vanhu va lava makaya lamanene ni tiko leri nga ni swihlahla, swiluva ni mintanga. Lava va tsakelaka ku dyondzisiwa hi Xikwembu va ta va na swona sweswo. Esaya 65:21 na 22 ya vhumba yi ku: “V̌a ta aka tindlu, v̌a ta ṭhama ka tona; v̌a ta byala tivinya, v̌a dya mihanḍu ya tona. V̌a nga ka v̌a nga ha aki tindlu, leŝaku uṅwana a ta ṭhama kona. V̌a nga ka v̌a nga ha byari leŝaku uṅwana a ta dya, . . . kutani v̌ahlawuriwa v̌a mina v̌a ta ṭakela ntiro wa mav̌oko ya v̌ona.”
14, 15. Hikwalaho ka yini hi nga tiyisekaka leswaku malandza ya Yehova ya ta swi kota ku vumba paradeyisi?
14 U nga kanakani hi leswi Yehova a nga ta swi endla hi mavoko ni timbilu leti swi rhandzaka ta vanhu va yena eMafambiselweni Lamantshwa. Hambi ku ri namuntlha misava ya vuaki yi hlamarisiwa hi leswi Timbhoni ta Yehova ti swi endlaka eku tlhomeni ka miako, tanihi Tiholo ta Mfumo leti akiwaka hi xihatla. Endzhaku ka loko yin’wana ya tona yi akiwile le United States, Muhleri wa tinyuziphepha u te: ‘Nchumu wa nkoka swinene ku tlula muako wu vumbiwile hi vatirhi volavo vo tirhandzela va 2 000. Varhangeri va tiko va fanele ku languta hi vurhonwani eka leswi endliweke vhiki leri hundzeke. Ku chivirika, ku tinyiketa ni ku navela ku fikelela pakani swi vile ni vuyelo lebyi hlamarisaka. Loko mintlawa ya ndhawu yoleyo a yo tekelela tindlela teto, pakana yin’wana ni yin’wana—ku nga ha va ku pfuxetiwa ka swilo, ku sivela vugevenga kumbe ku andza ka vanhu—yi nga fikeleriwa. Vuthu ra vatirhi ri kombe vuswikoti lebyi munhu a nga na byona loko tiko ri twanana. Ha tshemba leswaku Holo ya Mfumo hi laha ku nga ni xihlovo xa nyanyuko eka bandlha ra Timbhoni. Vukona bya yona ana se i nhlohlotelo eka hina hinkwerhu.’
15 Ku swi rhandza loku ni vutshila lebyi kulaka bya malandza ya Yehova swi ta tirhisiwa swi ri leswi pfunaka ngopfu eMafambiselweni Lamantshwa ya Xikwembu. Naswona swi ta tsakisa swonghasi ku siva swivandla hinkwaswo leswi nga tsakisiki hi makaya ni swiyimo leswo saseka! I ku aneriseka muni konghasi loku nga ta va kona ku tiva leswaku siku rin’wana ni rin’wana matshalatshala ya wena ya ta tshineta misava ekusuhi ni ku va paradeyisi ya misava hinkwayo!
Ndyangu Lowu hlanganeke Wa Misava Hinkwayo
16. Ha yini vaaki va Mafambiselo Lamantshwa va ta ka va nga xungetiwi hi vukarhi?
16 Vaaki va Mafambiselo Lamantshwa va nga ka va nga ha xungetiwi hi vugevenga, switereko kumbe nyimpi. Psalma 46:9 yi ri: “[Xikwembu xi] herise tinyimpi ku yisa e makuṅwini ya misav̌a.” Yesu Kriste “Hosi ya ku rula,” u ta tisa ku rhula loku nga heriki ka misava hinkwayo, hikuva “matimba yakwe ya vuhosi ma ta hambeta ma kula; mfumo wa yena wu ta va eku rhuleni minkarhi hinkwayo.” (Esaya 9:6, 7, Today’s English Version) Hi ku rhula ka ntiyiso, na hi ndyangu hinkwawo wa vanhu lowu dyondzisiweke hi mimpimanyeto leyi tlakukeke ni leyi fanaka, hinkwavo va ta hlanganisiwa exibohweni lexi nga tshovekiki xa rirhandzu. Xisweswo, a ku nga ha vi na mindzilakana yo karhi leyi avanyisaka ya tiko.
17. Xana ku rhula ni vun’we leswi malandza ya Xikwembu ya nga na swona hambi ku ri sweswi swi fika kwihi?
17 Xana switshembiso swo tano i swinene ku tlula mpimo lerova swi nga vi ntiyiso ke? Doo, hikuva ku rhula ni vun’we ana se i swa xiviri exikarhi ka lava va titsongahatelaka vulawuri bya Mfumo hi ku tshembeka! Xiya leswi: Timbhoni ta Yehova leti tlulaka timiliyoni timbirhi ni hafu ti hangalakile emisaveni hinkwayo. Kambe ke, ti se ti hetisise Esaya 2:4, leyi nge: “Hi mabanga ya v̌ona v̌a ta fula ŝikomu, hi matlhari ya v̌ona v̌a ta fula masikiri, tiko ri nga ka ri nga ha lwi na riṅwana, kutani a ku nga ha dyonḍisiwi ku lwa.” Ehansi ka swiyimo swihi na swihi Timbhoni ta Yehova ti nga ka ti nga dlayi vamakwavo hi ku tiyimisela, kumbe munhu wihi ni wihi, eka tiko rin’wana ni rin’wana. Hi laha buku ya le Italy leyi nge Il Corriere di Trieste yi xiyeke ha kona yi te: “Va tiyimisele ku kongomana ni rifu ematshan’wini yo tshova nawu wa masungulo . . . U NGA TSHUKI U DLAYA!” Hikwalaho ko namarhela milawu ya Xikwembu, Timbhoni ta Yehova ti ni ku rhula ni vun’we bya ntiyiso, lebyi misava leyi yi hlulekaka ku byi fikelela. Naswona ntiyiso wa leswaku timiliyoni ta vona ti tiphina hi xiyimo lexi exikarhi ka misava leyi ya dzolonga wu veka vumbhoni bya leswi swi nga ta humelela loko Mfumo wa Xikwembu wu lawula timhaka hinkwato ta misava.—Yohane 13:34, 35; 1 Yohane 3:10-12.
18, 19. Hi yihi mimpfuno yin’wana leyi taka eka lava va namarhelaka milawu leyi tlakukeke ya Xikwembu?
18 Ku tlhandlekela eka ku rhula loku ni vun’we bya hinkwako-nkwako, ku namarhela milawu leyikulu ya Xikwembu ku humesa vanhu lava khathalelaka vaakelani, na nhundzu ya vona. Xisweswo va ‘hanya hi ku tshembeka eka swilo hinkwaswo.’ (Vaheveru 13:18) Emhakeni leyi, mutsari wa tinyuziphepha wa Mu-Canada wa le Furwa, loko a tsala eka Le Journal de Montreal, u vule leswi ehenhleni ka Timbhoni ta Yehova: “Loko a vo va vona vanhu ntsena emisaveni, nivusiku a hi nga ta fanela ku notlela timbanti ta hina ni ku veka bele ya vuhlayiseki.”
19 Malandza lawa yo tshembeka ya hulumendhe ya Xikwembu ya hava xiphiqo xa vugevenga exikarhi ka wona, kasi a xi lawuleki emisaveni. Nakambe, leswi va namarhelaka milawu leyi tlakukeke ya mahanyelo lamanene ya Bibele, a va khomiwi hi mavabyi yo tluletana hi rimbewu kumbe ku xixa tinyimba loku ku nga ntungu etikweni rin’wana ni rin’wana. Naswona malandza ya Yehova ya xixima vukati swinene, ku hambana ni langutelo ra vutilawuri ra misava ehenhleni ka lunghiselelo ra vukati. Hikwalaho ka yini Timbhoni ta Yehova ti swi kota ku hlayisa milawu yo tano? Hi leswi Yehova a kongomisaka vagandzeri vakwe lava tshembekaka, naswona “Xikwembu xona a xi tsandzi hi nchumu.”—Matewu 19:26.
Tihlanganise Ni Vugandzeri Bya Ntiyiso
20. Fambiselo ra nkoka lowukulu ra manguva lawa hi rihi?
20 Hambi vanhu va swi xiya kumbe e-e, ku hlengeletiwa ka misava hinkwayo ka vanhu lava fanaka ni tinyimpfu enhlengeletanweni ya Yehova i fambiselo ra nkoka swinene ra manguva lawa. Leswi swi hetisisa vuprofeta lebyi xiyekaka bya Esaya 2:2, 3 lebyi nge: “E mikarini ya makumu, ku ta humelela leŝaku nṭhav̌a ya yindlu ya Israel [vugandzeri byakwe lebyi tlakusiweke bya ntiyiso] yi ta v̌ekiwa e nhlohlorini ya tinṭhav̌a, yi tlakusiwa henhla ka ŝiṭunga, kutani matiko hikwawo ma ta talela kona. Matiko la’yo tala ma ta ta kona ma ku: Tanani, hi ta tlhandlukela e nṭhav̌eni ya Yehova, . . . [u] ta hi dyonḍisa tindlela ta [yena], kutani hi ta famba e mitileni ya [yena].”
21. Xana vanhu va timbilu letinene va khutaziwa ku endla yini?
21 Hi khutaza vanhu hinkwavo va timbilu letinene leswaku va va xiphemu xa fambiselo leri ri nyanyulaka ra misava leri kongomeke evugandzerini bya ntiyiso ni hulumendhe leyi lulameke. Tiphine hi minkateko leyi sweswi yi taka hi ku hlanganyela ni vanhu lava dyondzisiweke milawu ni misinya ya milawu ya Xikwembu. Titsongahateli hulumendhe ya Mfumo hi ku tshembeka, leyi ku nga ri khale yi nga ta sungula ku hundzula misava leyi yi va paradeyisi. Veka ku tshemba ka wena eka Mfumo wolowo, naswona hayi eka marhengu ya misava leyi, hikuva hi laha Psalma 127:1 yi vulaka ha kona yi ri: “Loko Yehova a nga aki yindlu, la’v̌a yi akaka v̌a tikaratela ŝa hav̌a.” Amukela xirhambo xa Psalma 66:5 lexi nge: “Tanani, mi v̌ona mitiro ya Šikwembu; ša tšhav̌iseka e ku endleni ka šona e henhla ka v̌ana v̌a v̌anhu.” Hikwalaho ke, tana eka Xikwembu lexi nyikaka hulumendhe leyi antswaka ya vanhu, hulumendhe leyi nga ta endla leswi hlulaka vanhu, hulumendhe leyi ku nga ri khale yi nga ta va yona ntsena leyi misava leyi yi nga ta va na yona.
A Wu Ta Hlamurisa Ku Yini?
◻ Hikwalaho ka yini hi nga tiyisekaka leswaku Yehova u ta hetisisa swikongomelo swa yena?
◻ Xana nawu wo kutsula wu tirha hi ndlela yihi eku tshunxeni ka munhu exidyohweni?
◻ Hi yihi dyondzo leyikulu ni mintirho yo aka leyi nga ta va kona eMafambiselweni Lamantshwa?
◻ I vumbhoni byihi lebyi nga kona sweswi bya leswaku ku rhula, vun’we ni rirhandzu swi ta va kona emisaveni hinkwayo eMafambiselweni Lamantshwa?
[Xifaniso eka tluka 28]
Ehansi ka vulawuri bya Mfumo, vanhu lava rhandzaka ntiyiso ‘hinkwavo va ta dyondzisiwa hi Yehova’
[Xifaniso eka tluka 30]
Ku rhula ni vun’we ana se i swa xiviri exikarhi ka lava va titsongahatelaka hulumendhe ya Mfumo