I Mani La Nga Xi Hlayaka Kahle “Xikombiso” Xana?
“Vakanganyisi ndzin’wina! Mi tiva ku xiya nghohe ya tilo ni ya misava; xana hikwalaho ka yini mi nga koti ku twisisa nkarhi lowu mi nga eka wona ke?”—LUKA 12:56.
1, 2. Xana i yini lexi valala va Yesu va nga xi anakanyaka hi xivumbeko xa tilo, kambe i yini lexi va nga xi twisisiki?
VATLUTI lava tlhariheke va swi tiva ku hlamusela xivumbeko xa tilo, kutani va landzelela swikombiso swa xona. Hi laha vutlhokovetseri lebyi tivekaka swinene byi vekaka timhaka ha kona byi ri: “Tilo ro tshwuka nivusiku, i ntsako eka vatluti, tilo ro Tshwuka nimixo, i xitsundzuxo eka vatluti.”
2 Hosi Yesu Kriste u endle yinhla leyi fanaka yi va leyi twisisekaka swinene loko a hlaseriwa hi valala va yena. Mayelana ni sweswo Luka mutsari wa Mahungu Lamanene la voneke hi mahlo u vikile a ku: “Kutani a ku ka ntshungu: loko mi vona papa ri huma evupeladyambu, mi hatla mi ku: ‘Mpfula yi ta na!’; kutani swi va tano. Ni loko moya wu hunga wu ta hi le dzongeni, mi ri: ‘Ku ta hisa!’; kutani swi va tano. Vakanganyisi ndzin’wina! Mi tiva ku xiya nghohe ya tilo ni ya misava; xana hikwalaho ka yini mi nga koti ku twisisa nkarhi lowu mi nga eka wona ke?”—Luka 12:54-56.
3. I “xikombiso” xihi lexi kombaka leswaku Yesu a a ri Mesiya lexi valala vakwe a va hluleka ku xi timula xana?
3 Valala volavo vo tikukumuxa a va swi kota ku vhumba ta maxele, kambe a va ri vakanganyisi swinene naswona a va nga tivi nchumu emoyeni leswaku va twisisa timhaka ta ntikelo lowukulu. Yesu u endle swikombiso swo hambana-hambana leswi pfuneke vanhu va timbilu letinene leswaku va pfumela eka yena. (Yohane 2:23) Hambi swi ri tano, ngopfu-ngopfu rifu rakwe hi Siku ra Paseka ya 33 C.E. ni ku pfuxiwa ka yena hi siku ra vunharhu a ku ri “xikombiso” lexi kombaka leswaku a a ri Mesiya, kumbe Kriste. (Matewu 12:38-41; Luka 11:30) Hi ntumbuluko, valala va Yesu va ringete ku timula “xikombiso” xexo. (Matewu 27:62-28:20; Mintirho 4:1-4) Kambe loko a nga si tlhandlukela etilweni, Vayuda lava tlulaka 500 va ve timbhoni ta ku pfuxiwa ka yena. (1 Vakorinto 15:3-6) Hi ku fanana, namuntlha ku ni “xikombiso” lexi nga timulekiki. Ku xi hlaya kahle i mhaka ya ku fa ni ku hanya. Kambe “xikombiso” xexo i yini xana? Naswona i vamani lava nga xi hlayaka khwatsi?
“Xikombiso” Xa Siku Ra Hina
4. Namuntlha, i “xikombiso” xihi lexi vonekaka, naswona timhaka tin’wana ta xona hi tihi ke? (Matewu 24:3)
4 Vadyondzisiwa va Yesu a va n’wi vutisile va ku: “Xikombiso xa ku vuya ka wena ni xa ku hela ka minkarhi xi ta va xihi ke?” Loko a hlamula, Kriste u vhumbe tinyimpi leti nga ringanisiwiki, tindlala, ku tsekatseka ka misava, ni timhaka tin’wana ta “xikombiso” xa “vukona” byakwe lebyi nga vonekiki ematimbeni ya Mfumo. Mhaka leyikulu i ntirho lowu tateke misava hinkwayo wa ku chumayela hi Mfumo lowu sweswi wu endliweke ematikweni ya 203 hi timbhoni ta Yehova leti tlulaka 2 840 000. Hakanyingi tibuku ta Watch Tower ti vulavule hi swona leswi ni vumbhoni byin’wana lebyi sweswi byi hetisisaka “xikombiso” xa “vukona” bya Yesu.—Matewu, tindzima 24, 25; Marka, ndzima 13; Luka, ndzima 21.
5. Hikwalaho ka yini Yesu a a nga hundzeleti mhaka loko a vula Vayuda va lembe xidzana ro sungula “riŝaka le’ri ra mona, ra v̌uoši”?
5 Ku hava ku landzula mhaka ya leswaku ku sukela loko Nyimpi yo Sungula ya Misava yi tlhekekile hi 1914 vumbhoni bya ku hetiseka ka “xikombiso” a byi ri karhi byi andza. I ntikelo wihi lowu leswi swi faneleke ku va na wona eka hina? Kunene, a hi swi lavi ku fana ni Vayuda va malembe xidzana ya 19 lama hundzeke lava a va ri vavhumbi lavanene va ta maxele, kambe va ri lava honiseke vumbhoni lebyi nga erivaleni ematihlweni ya vona, naswona a va swi lavanga ku kongomisa makumu laha a ma kongome kona hakunene. Khale emahlweni ka sweswo, Xikwembu xi nyike Muxe matimba yo endla swikombiso swinharhu ku tiyisa matimba yakwe lama humaka ehenhla eka Vaisrayele lava xanisekaka. (Eksoda 4:1-31) Kambe emahlweni ka swikombiso swo tala leswi tlulaka swinharhu, Vayuda va rixaka ra lembe xidzana rolero ro sungula a va nga swi rhandzi ku n’wi amukela tanihi Mesiya, Loyi a a ri lonkulu eka Muxe. (Yohane 4:54; Vaheveru 2:2-4) Hikwalaho Yesu a a nga hundzeleti mhaka loko a va vule “rišaka le’ri ra mona, ra v̌uoŝi.”—Matewu 12:39, Bibele ya Xitsonga.
6. Vanhu lava tlhariheke va vula yini sweswi hi swiyimo swa misava?
6 Vanhu va rixaka ra lembe xidzana leri ra vu-20 lava nga naveriki kumbe ku pfumela ku vuya ka Yesu Kriste ra vumbirhi a va xi hlayi kahle “xikombiso” xa makumu ya mafambiselo lawa. Kambe swiyimo leswi nga kona a swi khutazi nikatsongo, hi laha swi kombisiweke ha kona hi swikombiso leswi landzelaka:
“Javier-Perez de Cuellar Matsalani Jenerala wa Nhlangano wa Matiko u xiye leswaku misava yi nghene eka xiyimo xo nonon’hwa swinene eka ndzhundzuluko wa timhaka hinkwato, naswona ku phikelela ku lulama, ku rhula ni ku hleleka loku nga heriki ka hinkwako-nkwako swi vonaka swi tsanisiwile. . . . ‘Ku ala ku tshembana exikarhi ka matiko ku tisa masungulo lamakulu yo nyanyuka ni dzolonga,’ ku vule Matsalani Jenerala wa UN.”—Indian Express, October 22, 1983.
“Vanyingi va hina a va ri karhi va vula hi malembe yo tala leswaku nyimpi ya nyutliya a yi ta dlaya timiliyoni to tala ta vanhu lava nga hava nandzu naswona a yi ta endla leswaku swiphemu leswikulu swa misava swi nga tshamiwi hi vanhu . . . Ntlawa wa vativi lava xiximekaka va sayense wu fikelele makumu lama vavisaka swinene—leswaku nyimpi ya nyutliya, kumbe hambi ku ri ku copana kun’we loku tolovelekeke ka nyutliya ka mimfumo leyikulu, ku nga khwexula ndzoviso lowu heleleke wa misava hinkwayo lowu nga dlayaka tibiliyoni ematshan’wini ya timiliyoni naswona ku nga herisa vutomi bya vanhu emisaveni. Ku endliwe Nhlengeletano ya dyondzo ya malembe mambirhi hi ta Vuyelo bya Nkarhi wo leha bya Misava hinkwayo lebyi vangiwaka hi Nyimpi ya Nyutliya eVuton’wini. Makumu ya yona ya tiyisiwe hi vativi va sayense lava tlulaka 100 . . . Carl Sagan . . . u veke vuyelo bya nyimpi ya nyutliya hi marito lama tiyisaka a ku: ‘Ku herisiwa ka tinxaka ta vanhu a ku ta va nchumu lowu kotekaka wa xiviri.’”—The Express (Easton, Pa.), November 3, 1983.
7. Hi kwihi laha lava rhandzaka vutomi emisaveni leyi antswaka va faneleke ku languta kona hi ntshembo?
7 Rolero i langutelo ro pfumala ntshembo ra vahlamuseri van’wana lava nga ni vutihlamuleri, lava nga ni matimba. Ku na munyama swinene hikuva a va swi koti ku komba ndlela yo huma ekhombyeni leri va ri vonaka. Hakunene, lava rhandzaka vutomi emisaveni yo antswa va lava rungula leri huhutelaka ntshembo. Lexi tsakisaka, yi kona ndlela yo pona khombo leri tshinelaka ra misava, hikuva ku vile ni vaponi va khombo leri fanaka na rona leri xungetaka misava hinkwayo. Kavula, loko a ku nga vanga ni lava poneke Ndhambi ya siku ra Nowa, sweswi misava ingi yi nga ri na vona vanhu lava tlulaka 4 000 000 000! I buku yin’we ntsena—Bibele leyo Kwetsima—leyi hi nyikaka mhaka leyi hetisekeke ya ndlela leyi vanhu va nhungu ntsena, kun’we ni mintlawa ya swihari leswi hanyaka, va poneke nhlomulo wolowo wa misava hinkwayo.
8. Ku hambana ni van’wana, vadyondzisiwa va Yesu a va fanele ku endla yini loko mafambiselo ya sweswi ya swilo ya ri kusuhi ni ku susiwa?
8 Leswi Buku yoleyo yo tshembeka yi hi nyikaka nhlamuselo ya Yesu ya swiyimo leswi a swi ta va kona emisaveni loko mafambiselo ya sweswi ya swilo lama hohlokaka ya ta susiwa, xana a hi fanelanga ku ringeta ku xi hlaya kahle “xikombiso” xexo ke? Makumenharhu nkombo wa malembe loko Yerusalema yi nga si lovisiwa hi mavandla ya Varhoma hi 70 C.E., Yesu u nyike nxaxamelo wolowo wo leha wa timhaka ta “xikombiso” xa nhlengelo leti a ti ta rhangela nhlomulo wa misava hinkwayo lowu faniseriweke hi Ndhambi. Futhi exikarhi ka swin’wana, u te: “Masingita ma ta va kona edyambyini, ni le n’wetini, ni le tinyeletini. Laha misaveni, matiko ma ta hela ntamu, ma tshukisiwa hi ku pfuma ka Iwandle ni ka magandlati. Vanhu va ta titivala hi ku chava ni ku ehleketa leswi nga ta humelela la misaveni, hikuva leswa matimba swa le matilweni swi ta dzinginisiwa. Hi kona va nga ta vona N’wana-wa-Munhu a ta hi papa, a ri ni matimba ni ku kwetsima lokukulu. Kutaku loko swilo sweswo swi sungula ku humelela, tsakani, mi yimisa tinhloko, hikuva ku kutsuriwa ka n’wina ku kusuhi.”—Luka 21:25-28.
9. Ku sukela hi 1895 ku ya eka 1931, xana ntirho wa magazini lowu wu kombisisiwe ku yini eka tluka ra wona ro sungula?
9 Xiphemu xa vuprofeta byebyo xi humelele eka tluka ro sungula ra minkandziyiso ya Xihondzo xo Rindza xa Xinghezi xa January 1, 1895, ku ya eka xa October 1, 1931. Ehenhla ka ku tshaha koloko ka Bibele a ku ri ni xihondzo xo rindza lexi a xi haxa miseve ya ku vonakala, kasi lwandle lero kariha a ri ba ribye ra masungulo leri xihondzo a xi yime ka rona. Xisweswo magazini lowu wu kombe ntirho wa xona eka rixaka, leri swirho swa rona swa ha hanyaka, na swona swi hlaya nkandziyiso wolowu.
10. Xana hi nga ku papalatisa ku yini ku xanisiwa hi minchavo leyi varhangeri va vanhu va namuntlha va hlangavetanaka na yona?
10 Namuntlha, vanhu va mitengo, lava timbilu ta vona ti titivalaka hi ku chava, va veka nhlamuselo ya vona vini ehenhleni ka timhaka ta “xikombiso” xa nhlengelo. Kambe muhlamuseri wa hina la antswaka i Yesu Kriste, nakona loko hi hlanganisa “xikombiso” ni ntikelo lowu a xi nyikeke wona, hi nge kayakayisiwi hi minchavo leyi tolovelekeke eka varhangeri va vanhu lava nga tiviki ndlela yo huma eka mpfilumpfilu wa sweswi wa misava. Kambe ke, hi ta tsaka hikuva ku kutsuriwa ka hina eka mafambiselo lawa yo biha ku tshinele.
Nkarhi Lowu Funghiweke Wa Ku Humelela Ka “Xikombiso”
11. Xana Yesu u kombisise ku yini leswaku swiendlakalo swa misava leswi kombaka makumu a swi ta humelela hi nkarhi wa kona?
11 Swiendlakalo swa misava swi humelela hi nkarhi wa kona. Hi ndlela yihi? Phela, loko Yesu a nga si nyika vuprofeta lebyi rhekhodiweke eka Luka 21:25-28, u vhumbe ku lovisiwa ka vumbirhi ka Yerusalema. Ku pfumelelana ni rito ra yena, ku humelerile hi 70 C.E. Malunghana ni Vayuda lava ponaka, Yesu u te: “Va ta dlawa hi fumu, va ta yisiwa va ri mahlonga ematikweni hinkwawo; kutani Yerusalema u ta kandziyeriwa hi vamatiko ku kondza loko minkarhi ya vamatiko yi ta va yi herile.” Matiko wolawo a ku ri lava nga riki Vayuda, kumbe Vamatiko. Kutani ke, nkarhi wa ku kandziyeriwa hakanyingi wu vuriwa “minkarhi ya Vamatiko.” (Luka 21:24, NW; King James Version) Xana yi hele rini? Kavula, ku katseka swo tala ku tlula leswi humeleleke eYerusalema ya laha misaveni. Hikwalaho siku leri Vaisrayele va tekeke vulawuri bya muti wa khale lowu biyeriweke wa Yerusalema, kumbe ntiyiso wa leswaku i ntsindza wa tiko leri tshunxekeke ra manguva lawa ra Israyele, a hi mhaka yi kulukumba. Ku hlayelela ka Xikwembu ka nkarhi hi yona mhaka leyikulu!
12. Xana Minkarhi ya Vamatiko yi sungule rini, a yi lehe ku fikela kwihi, naswona yi hele rini?
12 Varhoma lava nga Vamatiko va sungule ku kandziyela Yerusalema hi 63 B.C.E. Kambe emahlweni ka vona Vagriki lava nga Vamatiko, Va-Persia, ni Vababilona va kandziyele ‘muti wolowo wa Hosi leyikulu,’ Yehova. (Matewu 5:34, 35) Vababilona va wu lovisile ni tempele ya wona hi 607 B.C.E. Ku sukela enkarhini wolowo ku ya emahlweni, Vamatiko lava kandziyelaka leswi yimeleke Mfumo wa Xikwembu va sungurile, na yona Minkarhi ya Vamatiko hakunene yi sungurile. Minkarhi yoleyo ya Vamatiko a yi fanele ku va ntlhanu na mimbirhi, wun’wana ni wun’wana wa yona wu ringana ni lembe ra vuprofeta ra masiku ya 360. Hi leswi ‘siku ri yimelaka lembe,’ ‘minkarhi hinkwayo ya ntlhanu na mimbirhi’ a yi ta endla malembe ya 2 520. (Daniel, ndzima 4; Tinhlayo 14:34; Ezekiel 4:6) Yi sungula eku lovisiweni ka Yerusalema hi 607 B.C.E., a yi ta hela hi 1914 C.E.
13. I ku sukela rini laha swichudeni swa Bibele swi tiveke siku leri Minkarhi ya Vamatiko a yi ta hela ha rona?
13 Eku sunguleni ka 1880, magazini wa Xihondzo xo Rindza wa Xinghezi wu vule leswaku Minkarhi ya Vamatiko a yi ta hela hi lembe ra 1914. Masuku eku humesiweni ka buku leyi nge The Time Is at Hand hi 1889, swichudeni swa Bibele emisaveni hinkwayo a swi phaphamisiwe swinene emhakeni ya leswaku Minkarhi ya Vamatiko a yi ta hela hi xixikana xa 1914.
14. Ku nga khathariseki leswi humeleleke eka Yerusalema hi 1948, hikwalaho ka yini hi nga vulaka leswaku Minkarhi ya Vamatiko yi hele hi 1914?
14 Manuku ke, xana elembeni rolero Yerusalema wa khale u tshikile ku kandziyeriwa hi lava va nga riki Vayuda, kumbe Vamatiko ke? Doo, hikuva hi 1914 muti wolowo wa matimu a wa ha ri emavokweni ya Mfumo wa Turkey, lowu fambisanaka ni Mfumo wa Jarimani. Hi December 9, 1917, wu tekiwile eka ma-Turkey hi mavandla ya Manghezi ehansi ka Allenby Ndhuna ya Nyimpi. Yerusalema yi ye emahlweni yi ri ehansi ka vulawuri bya Manghezi hi xileriso xa Ntwanano wa Matiko ku fikela hi 1948. Manuku Vayuda va pfukile kutani va teka xiphemu xa le vupela-dyambu bya Yerusalema ya manguva lawa ehandle ka muti wa khale lowu biyeriweke. Muti lowu biyeriweke wu tekiwile hi Va-Muhammadan. Kutani ke, hi nga vurisa ku yini leswaku Minkarhi ya Vamatiko yi hele hi 1914? Hikuva elembeni rolero hulumendhe ya Yehova Hosi leyikulu yi tswariwile etilweni.
15, 16. (a) Yerusalema ya khale yi tshike rini ku va “muti wa Hosi leyikulu,” Yehova, kambe i Yerusalema yihi leyi tlakusiweke leyi yi nga kona? (b) Manuku ke, hi kwihi laha Yehova a a ta veka Yesu Kriste tanihi Hosi kona?
15 Loko Yesu a ha ri emisaveni, tempele ya Xikwembu a yi yime eYerusalema, naswona Yesu u gandzerile kona. Hikwalaho Yerusalema manuku a yi ta vuriwa “muti wa Hosi leyikulu,” Yehova. (Matewu 5:34, 35) Kambe entiyisweni eku handzukeni ka nguvu ya tempele hi singita eku feni ka Yesu hi Siku ra Paseka ya 33 C.E., wu tshikile ku va muti wa Yehova wa vuhosi. Ku lovisiwa ka Yerusalema ni tempele ya kona hi Varhoma lava nga Vamatiko hi 70 C.E. ku tiyise mhaka yoleyo. Lexi tsakisaka eka Vakriste va Vayuda enkarhini wolowo, ni le ka Vakriste hinkwavo ku sukela kwalaho, ku na Yerusalema un’wana, loyi a tlakusiweke ngopfu, “Yerusalema wa le tilweni.”—Vaheveru 12:22.
16 Ku pfumelelana ni mhaka leyi, vuprofeta bya Yesu lebyi rhekhodiweke eka Luka 21:24 byi sungule hi ku tirha eka Yerusalema wa laha misaveni kambe byi fanele ku hetelela hi ku tirha eka “Yerusalema wa le tilweni.” Ina, hikuva “Yerusalema wa le tilweni” u sive Yerusalema wa laha misaveni tanihi “muti wa Hosi leyikulu,” Yehova Xikwembu. Kwalaho, eka “muti” wolowo wu nge matilweni, a ku ri ni xivandla xa Yehova, “Hosi leyikulu,” xo veka N’wana wa yena la kwetsimisiweke Yesu Kriste eku heleni ka Minkarhi ya Vamatiko hi 1914.
17. Eku heleni ka Minkarhi ya Vamatiko, i xileriso xihi xa le henhla lexi nyikiweke Yesu Kriste, Hosi leyi vekiweke exiluvelweni, naswona i vamani lava tinyikeleke hi ku swi rhandza entirhweni wa yena?
17 Wolowo a wu ri nkarhi lowu vekiweke wa le henhla wa leswaku Yehova a nyika Yesu Kriste N’wana wakwe la vekiweke exiluvelweni xileriso lexi katsiweke eka marito ya Psalma 110:2, 3, lama nge: “Yehova o ta ṭhambuluta hi le Sion nhonga ya matimba ya wena: Tlhoma ku fuma ka wena e šikari ka v̌alala v̌a wena! Tiko ra wena ri ta v̌a le’ra mapfunḍa siku u hlengeletaka nyimpi ya wena. Hi ku saseka lo’ku hlawuriweke, la’v̌antŝha v̌a ta huma ka wena, kukotisa mbera le’yi humaka e v̌ušeni.” Ku pfumelelana ni vuprofeta lebyi, “vanhu” lava tinyiketeke ni lava landzeleke mintila ya Yesu ni lava xiyeke ku hela ka Minkarhi ya Vamatiko hi 1914 va tinyikerile hi ku swi rhandza ku tirha tanihi vativisi va vulawuri lebyi a bya ha ku tswariwa bya Yehova Xikwembu eSiyoni wa le tilweni ha Hosi Yesu Kriste. Kambe matiko lama tivulaka ya Vukriste a ya titsongahatelanga yona Hosi leyi ya ha ku vekiwaka exiluvelweni ya Yehova hi ku swi rhandza. Kahle-kahle, ya tikombe ya ri “valala” va yena, hikuva ya nghenelerile eka nyimpi yo sungula ya misava ya vurunguri bya vanhu ehenhla ka mhaka ya vulawuri bya misava. Nakambe ya kavanyetile ku huweleriwa ka Mfumo wa Xikwembu emisaveni hinkwayo.
18. Hi 1918, hi xihi xikombiso lexi a xi ri kona xa rivengo ehenhleni ka Mfumo wa Xikwembu?
18 Rivengo ehenhleni ka Mfumo wa Xikwembu ri sungule ku vonaka swinene hi 1918. Hi May 8, 1918, muhleri wa magazini wa Xihondzo xo Rindza ni vatirhi-kulobye vo hlayanyana va khomiwile exikarhi ka mpfhapfhapfha wa nyimpi. Endzhakunyana, hi June 21, va gweviwile malembe yo tala ekhotsweni le Atlanta, eGeorgia, U.S.A. Hi le ndzhaku ka loko nyimpi yi herile ntsena ni loko va hete tin’hweti ta kaye ekhotsweni laha vatirheli lava va Mfumo wa Xikwembu va pfumeleriweke ku beyila. Hi nkarhi lowu faneleke, va tshunxiwile eku lumbetiweni hinkwako loku va ku rhwexiweke.
19. Endzhaku ka Nyimpi yo Sungula ya Misava, i xiyimo xihi lexi Huvo ya Ntwanano wa Tikereke ta Amerika yi xi tekeke ehenhleni ka Ntwanano wa Matiko?
19 Nyimpi yo Sungula ya Misava yi hele hi November 11, 1918, naswona n’hweti leyi landzelaka Huvo ya Ntwanano wa Tikereke ta Kriste le Amerika yi tivule erivaleni leswaku yi tsakela Ntwanano wa Matiko lowu a wu kunguhatiwile enkarhini wolowo. Huvo yoleyo ya vukhongeri yi te Ntwanano lowu i “xikombiso xa politiki xa Mfumo wa Xikwembu emisaveni.” Hi ku honisa xibumabumelo xexo xa vukhongeri, hikwalaho ka swivangelo swa politiki United States of America yi arile ku tihlanganisa ni Ntwanano wa kona, yi tihlanganisa ni Huvo ya Misava ntsena. Kambe Ntwanano wu sungule ku tirha eku sunguleni ka 1920, naswona swirho swa Huvo ya Ntwanano wa Tikereke swi wu katekisile ni ku wu seketela.
20. Hi xihi xiyimo lexi vanhu va Yehova va xi tekeke ehenhleni ka Ntwanano wa kona, naswona va sungule ku huwelela yini?
20 Hi tlhelo rin’wana, magazini wa Xihondzo xo Rindza ni vanhu va Yehova lava wu hangalasaka va arile ku teka Ntwanano wa Matiko tanihi muyimeri wa politiki wa Mfumo wa Xikwembu. A va kalanga va wu xiya tanihi ku hetiseka ka xikhongelo xa xikombiso hi laha xi dyondzisiweke ha kona hi Yesu Kriste a ku: “A ku te ku fuma ka wena. Ku rhandza ka wena a ku endliwe misaveni, tani hi loko ku endliwa tilweni.” (Matewu 6:9, 10) A va tinyikelanga entirhweni wa muyimeri yoloye a endliweke hi vanhu, loyi a kanganyisaka! Kambe ke,a veke ku tshemba ka vona eka Mfumo wa xiviri wa Xikwembu emavokweni ya Yesu Kriste eka “Yerusalema wa le tilweni.” Hi mpfuno wa Xikwembu, va xi hlaye kahle “xikombiso” xa ‘vukona bya Yesu ni xa ku hela ka mafambiselo ya swilo.’ Hikwalaho va tihlawurile leswaku va huwelela Mfumo emisaveni hinkwayo.
Nhlamulo Ya Wena Hi Yihi Xana?
◻ I “xikombiso” xihi lexi vonekaka namuntlha, naswona timhaka tin’wana ta xona hi tihi xana?
◻ Xana hi nga yi papalatisa ku yini minchavo leyi sweswi yi hlangavetaneke ni varhangeri va misava?
◻ Xana Minkarhi ya Vamatiko yi sungule rini naswona yi hele rini?
◻ Hi le ka “Yerusalema” wihi laha Yehova a vekeke Yesu Kriste tanihi Hosi?
◻ Vanhu va Yehova va languta Ntwanano wa Matiko hi ndlela yihi?
[Chati eka tluka 6]
October, 607 B.C.E. — October, 1 B.C.E. = 606 wa malembe
October, 1 B.C.E. — October, 1914 C.E. = 1 914 wa malembe
MINKARHI YA MATIKO YA NTLHANU NA MAMBIRHI = 2 520 WA MALEMBE
[Xifaniso eka tluka 5]
Lava va xi hlayaka kahle “xikombiso” va nga pona makumu ya mafambiselo lawa, tanihi leswi vanhu va nhungu va poneke Ndhambi