Bibele—Buku Leyi Faneleke Ku Hlayiwa
BIBELE i buku leyi hangalasiweke ngopfu evurungurwini hinkwabyo. I buku leyi hundzuluxeriweke ku tlula hinkwato, leyi tshahiweke ngopfu, ni ya khale swinene. Ina, naswona i buku leyi poneke nkaneto wa vukarhi lebyikulu. Hambi swi ri tano, khombo ra kona hi leswaku a swi tshembisi leswaku Bibele i buku leyi hlayiweke ngopfu emisaveni.
Kambe Bibele yi fanele ku hlayiwa. Kambisisa mintiyiso yin’wana ha yona.
Hikwalaho Ka Yini U Yi Hlaya Nkarhi Na Nkarhi?
Rito ra hina ra Xitsonga leri nge “Bibele” ri huma eka rito ra Xigriki leri nge bi·bliʹa, leri vulaka “tibuku letintsongo.” Leswi swi hi tsundzuxa leswaku Bibele yi endliwe hi tibuku to hlayanyana—hambi leswi tin’wana ti nga riki “tintsongo” swinene! Tona ti tsariwe khale nkarhi lowu tlulaka gidi ra malembe lama hundzeke. Hambi leswi ti tsariweke hi vanhu, ti huhuteriwe hi Musunguli la tlakukeke. Hambi ku ri namuntlha, timiliyoni ta pfumela leswaku “Matsalwa hinkwawo ma huhutiwile hi Xikwembu, ma pfuna.” (2 Timotiya 3:16) Ee, ‘tibuku leti tintsongo’ ti tatiwe hi mianakanyo ya Yehova Xikwembu hi yexe. (Esaya 55:9) A swi hlamarisi leswi ti veke kona nkarhi wo leha.
Mukhuva wo hlaya Matsalwa nkarhi na nkarhi hakunene wu vile lowu pfunaka eminkarhini leyi hundzeke. Tihosi ta Israyele a ti fanele ku tiendlela tikopi leti tsariweke hi voko ta Nawu, leti sweswi ti nga xiphemu xa nkoka xa Bibele. A ti fanele ku yi hlaya siku na siku, tanihi xitsundzuxo xa nkarhi na nkarhi leswaku ti tirha hi ku titsongahata ni ku namarhela swileriso swa Xikwembu.
(Deuteronoma 17:18-20) Kunene, hi nga kuma mimpfuno leyi fanaka emhakeni yo hlaya Bibele nkarhi na nkarhi.
Naswona i swa nkoka swonghasi ku hlayisa vuprofeta bya Bibele swinene! Hikwalaho ka dyondzo ya muprofeta Daniyele ya munhu hi xiyexe ya Matsalwa, u swi kotile ku vona leswaku vuprofeta bya ntikelo ebukwini ya Yeremiya a byi ri kusuhi ni ku hetiseka.—Daniel 9:1, 2; Yeremia 29:10.
Loko Yohane Mukhuvuri a chumayela, “vanhu a va tshama va langutele” Mesiya. (Luka 3:15) Leswi swi vula leswaku vo tala exikarhi ka vona a va tolovelane ni vuprofeta lebyi vulavulaka ha Kriste lebyi a byi rhekhodiwe eMatsalweni. Leswi swa tsakisa swinene, tanihi leswi tibuku a ti nga kumeki hi ku olova emasikwini wolawo. Tikopi ta tibuku ta Bibele a ti fanele ku endliwa hi ndlela yo nonon’hwa hi mavoko. Kutani xana vanhu va ti toloverise ku yini ke?
Hakanyingi ku ve hi ku tihlayela. Mudyondzisiwa Yakobo u te: “Hikuva i khale ngopfu milawu ya Muxe yi sungurile ku dyondzisiwa emitini hinkwayo, yi ri karhi yi hlayiwa emasinagogeni masiku hinkwawo ya Savata.”—Mintirho 15:21.
Namuntlha swa olova eka vanhu ku va ni kopi ya vona vini ya Bibele, naswona ‘tibuku tin’wana letintsongo’ ta kumeka hi tindzimi ta 97 wa tiphesente ta vaaki va misava. Xisweswo swi khomisa gome leswi vo tala va nga tsakeriki ngopfu ku kuma leswi Bibele yi nga swi vulaka eka vona.
Va Khutaziwe Ku Yi Hlaya
Timbhoni ta Yehova ti xi endle xiphemu lexikukul xa ntirho wa tona ku khutaza ku hlayiwa ka Bibele ka nkarhi na nkarhi. Hi maletere lama vonakaka eka yin’wana ya tifeme ta vona to gandlisa eyindlu-nkulu ya vona ya misava hinkwayo aBrooklyn, New York, ku humelela marito lama nge “READ GOD’S WORD THE HOLY BIBLE DAILY.”
Eka mabandlha lama tlulaka 46 000 ya Timbhoni ta Yehova emisaveni hinkwayo, ku ni Xikolo xa Vutirheli bya le Tilweni vhiki na vhiki. Ku hlayiwa ka le rivaleni ka xiphemu lexi hlawuriweke xa Bibele vhiki rin’wana ni rin’wana i xiphemu xa ndlela leyi. Hinkwavo lava vaka kona va ni xiavelo xa vhiki rin’wana ni rin’wana xo hlaya tindzima ti nga ri tingani ta Bibele emakaya ya vona vini, naswona lava va fambisanaka ni xiyimiso lexi eku heteleleni va hlaya Bibele hinkwayo.
Leswi swi pfumelelana ni yin’wana ya tibuku ta Xikolo, leyi nge Theocratic Ministry School Guidebook, yin’wana ya tibuku leti tirhisiwaka eka dyondyo leyi. Yi ri: “Xiyimiso xa wena n’wini xi fanele ku katsa nkarhi wo hlaya Bibele hi yoxe. Ku ni nkoka lowukulu wa ku yi hlaya hinkwayo tluka hi tluka. . . . Hambi swi ri tano, pakani ya wena yo hlaya a ku fanelanga ku va ku beta mhaka, kambe ku kuma langutelo hinkwaro ra yona hi xikongomelo xo yi tsundzuka. Vana ni nkarhi wo anakanyisisa hi leswi yi swi vulaka.”—Tluka 21.
Timbhoni ta Yehova ti vona leswaku Vakriste va manguva lawa va fanele ku va ni vutivi bya Bibele. Va ri karhi va tsundzuka leswi, va kurise ku hundzuluxela ka lembe xidzana ra vu-20 ko hlaya Bibele erivaleni. Va kandziyisile matsalwa ya ‘tibuku to tala letintsongo’ ta Bibele etikhaseteni. Xisweswo lava va hlulekaka ku tshama ehansi va hlaya nkarhi wo leha se va nga yingisela tibuku ta Bibele leti rhekhodiweke loko va ri karhi va tirha endlwini, loko va ri karhi va chayela, kumbe va endla swilo swin’wana swo hlayanyana. Kavula, tithepe na tona i mpfuno lowunene loko hi tshama ehansi leswaku hi hlaya Bibele. I ntokoto lowu tsakisaka swinene ku yingisela ku hlayiwa ka Matsalwa u ri karhi u langutisa eBibeleni ya wena.
Kunene, amukela vukongomisi bya moya lebyi nyikiweke etibukwini ta ntiyiso ta Vukriste hi xitalo, leti humesiweke hi Xikwembu hi ku tirhisa “nandza lowo tshembeka, lowa vutlhari.” (Matewu 24:45-47) Kambe hikwalaho ka yini u nga tlheli u wu endla ntolovelo wa wena ku hlaya Bibele siku na siku. Mimpfuno yi ta va leyikulu, hi laha swi xiyiweke ha kona eka xileriso lexi nyikiweke Yoxuwa murhangeri wa Israyele khale: “Buku ya nawu lowu yi nga ṭhuki yi v̌a kule ni nomu wa wena, kambe u yi anakanya v̌usiku ni nhlekanhi, u hiseka ku endla hikwaŝo le’ŝi tsariweke kona, hi kona u nga ta kateka e tindleleni ta wena, u ta ṭaka.”—Yoxuwa 1:8.
[Xifaniso eka tluka 4]
Hi malembe yo tala, mfungho lowu nga evugandliselweni bya Sosayiti ya Watchtower e117 Adams Street, Brooklyn, eNew York, wu susumetele vahundzi va ndlela ku hlaya Matsalwa layo Kwetsima