Ku Hlanganisiwa Eku Twariseni Ka Rito Ra Yehova
“Ingi Xikwembu lexi ku tiyisela ni ku chaveleriwa ku humaka ka xona, xi nga mi nyika n’wina hinkwenu ku anakanya loku fanaka, hi ku landza ntila wa Kriste Yesu, ku endlela leswaku hinkwenu mi va mbilu yin’we ni miri wun’we, mi dzunisa Xikwembu, Tata wa Hosi ya hina Yesu Kriste.”—VARHOMA 15:5, 6.
1. (a) Hi rihi lunghiselelo ra Yehova ra ku hlanganisa vanhu vakwe? (b) Xana matsalwa ma komba yini hi ta ndlela leyi ya ku hlanganisa?
YEHOVA u hlanganisile timbhoni takwe eka vun’we bya misava hinkwayo lebyi vangamaka. Leswi swi pfumelelana ni malunghiselelo ya yindlu ya Xikwembu lawa muapostola Pawulo a ma hlamuselaka eka Vaefesa 1:10 a ku: “Loku a xi lava ku ku yisa emahlweni, minkarhi ya kona yi kondza yi hetiseka. Ku rhandza ka xona i ku hlanganisa swivumbiwa hinkwaswo, swa le matilweni ni swa la misaveni, nhloko ya swona a va Kriste.” Lava va faneleke ku sungula va hlengeletiwa hi lavaya va “ntlhambinyana” wa Vakriste lava totiweke lava nga ta ya etilweni kasi masalandzhaku ku ta lavaya va “ntshungu lowukulu wa vanhu . . . [lava] a va huma hi le matikweni hinkwawo” lava rindzelaka ku ponela ‘emisaveni leyintshwa’ yo lulama ya Xitshembiso xa Xikwembu.—Luka 12:32; Nhlavutelo 7:3, 4, 9, 13-17; 21:1, 5.
2. I yini xi endlaka swi koteka leswaku Timbhoni ta Yehova ti vulavula “hi mbilu yin’we” ke?
2 ‘Hi mbilu yin’we’—yoleyo i ndlela leyi timbhoni leti ta Yehova ti twarisaka mahungu ya Mfumo wa yena ha yona. Xana ti swi kotisa ku yini ku endla leswi ke? Hi leswi, emisaveni ya hina hinkwayo, ti kombisaka ‘mianakanyo yo fana ni leyi Kriste Yesu a rina yona’ loko a ha ri emisaveni. A nga ri xiphemu xa misava leyi ya manyunyu. Kambe u titsongahatile eku endleni ka leswi rhandziwaka hi Xikwembu ni le ku vumbeni ka vun’we lebyi kufumelaka, bya rirhandzu exikarhi ka vadyondzisiwa vakwe. Loku a ku ri ku sungula ka ku hlanganisiwa ka misava hinkwayo loku hlawulekiseke Vakriste va ntiyiso eka malembe xidzana lawa a ma ta landzela.—Vafilipiya 2:5-8; Yohane 13:34, 35; 17:14.
3. (a) I ku hambana kwihi lokukulu ku faneleke ku voniwa emisaveni namuntlha ke? (b) Xana Matsalwa ma pfunisa ku yini eku hlawuleni ka vandla ra misava hinkwayo ra Vakriste va ntiyiso?
3 Vun’we lebyi bya nhlengeletano byi fike eka mpimo wa byona wo hlawuleka ‘emasikwini lawa ya makumu,’ byi hambana swinene ni ku avana loku hlaselaka mafambiselo ya Sathana ya swilo, laha rivengo ni vuhomboloki swi andzeke. (2 Timotiya 3:1-5, 13; Matewu 24:3, 12) A ku nga si tshama ku va ni nhlengeletano leyi twananaka hi xitalo emhakeni ya leswi pfumeriwaka, xikongomelo ni ntirho eka matimu ya vanhu emisaveni, ematikweni ya 203. Vandla leri ra misava hinkwayo ra vadyondzisiwa va Yesu ri nga xiyiwa hi mihandzu leyi ri yi vekaka.—Yohane 15:8; Vaheveru 13:15; Vagalatiya 5:22, 23.
Vun’we Bya Ntirho
4. (a) I ku kanetana kwihi loku pfukeke ebandlheni ra lembe xidzana ro sungula? (b) Hi ku ya hi Mintirho 15:1-6, i xiendlo xihi xa le henhla lexi tekiweke?
4 Vun’we bya ntirho enhlengeletanweni ya Yehova byi kombisiwile eka Mintirho ndzima ya 15. Hi mianakanyo ya wena vona ku hlengeletiwa ka timbhoni ta Yehova leti vupfeke—vaapostola va 12, vakulukumba van’wana va bandlha ra Yerusalema na Pawulo na Barnaba, vakulu lava humaka ebandlheni ra Antiyoka. Le Antiyoka, ni le Yerusalema, Vayuda lava hundzukeke a va sindzisela leswaku vamatiko va fanele ku yimbisiwa ni leswaku va fanele ku hlayisa Nawu wa Muxe leswaku va ta ponisiwa. Hikwalaho vaapostola ni vakulukumba “va hlengeletana ku kamba mhaka leyi.”—Mintirho 15:1-6.
5-7. (a) Xana a ku ri ni “ku kanetana lokukulu” hi ndlela yihi? (b) I vumbhoni byihi byi nyikeriweke xana? (c) Xana matsalwa lama humesiweke a ma ta tiyisa mhaka leyi hi ndlela yihi? (d) I ku tiyimisela muni loku vupfeke loku Yakobo a ku endleke, ku yisa eka xiboho xihi xo hetelela ke? (e) I xiendlo xa muxaka muni lexi landzeleke?
5 Kwalaho ku ni ku kanerisana loku nga erivaleni ka xiphiqo lexi, ni vavanuna lava tinyiketeke lava boxaka mimpfuno hinkwayo ni timhangu hinkwato ta kona. A va tekeli ku pfumela. Va tsakela ku kambisisa mhaka leyi hi matlhelo hinkwawo. Ku ni ku “hambana ngopfu,” kambe kahle-kahle va hlayisa ku rhula lokunene ivi va yingisela mavonelo ya un’wana ni un’wana hi ku siyerisana. Muapostola Petro u tiyisa mhaka ya leswaku Xikwembu xi nyikile vamatiko lava nga yimbisiwangiki moya lowo kwetsima—kunene byi ri vumbhoni bya matimba bya leswaku ku yimba ka nyama a ka ha laveki eka lava ponisiwaka. Barnaba na Pawulo va engetela eka vumbhoni lebyi, va hlamusela mahlori yo tala lawa Xikwembu xi ma endleke hi vutirheli bya vona eka vamatiko.—Mintirho 15:7-12.
6 Nakambe, Yakobo u tshaha Matsalwa ku seketela njhekanjhekisano lowu wa ha ku andlariwaka. U hlamusela leswaku Amos 9:11, 12 yi kombetela eku vuyeteriweni ka tintswalo ta Xikwembu ehansi ka Davhida Lonkulu, Yesu Kriste, ni ku kombisa tintswalo ka Yehova eka ‘matiko hinkwawo lama nga ta vitaniwa hi vito ra [yena].’ Yakobo a nga voni xilaveko xo karhata lava hundzukeke eka vamatiko hi ku sindzisa leswaku va fanele ku yimba ni ku hlayisa swiletelo hinkwaswo leswi nga eNawini wa Muxe. Hambi swi ri tano, ku ni swilo swintsongo leswi lavekaka: Va fanele ku tshika swikwembu swa hava, va tshika ku dya ngati hi xivumbeko xihi na xihi ni rigangugangu.—Mintirho 15:13-21.
7 Huvo leyi fumaka eYerusalema yi fika eka nkanelo wa vun’we. Yi rhumela tintsumi ebandlheni ra le Antiyoka ni papila leri chaputaka hi xikhutazo lexi nge: “Loko mi fularhela swilo sweswo, mi ta va mi endlile leswinene. ‘Salani hi ku rhula!’”—Mintirho 15:22-29.
Endlelo Ra Le Henhla
8. (a) Xana Huvo leyi Fumaka ya manguva lawa yi kongomisiwe hi ndlela yihi eku boheni ka makungu? (b) I timhaka tihi tin’wana leti ta ha ku hlamuseriwaka ke?
8 Eminkarhini ya manguva lawa, Huvo leyi Fumaka ya Timbhoni ta Yehova, leyi yimelaka “nandza lowo tshembeka, lowa vutlhari” wa n’wini wa vona emisaveni, yi landzela ntila walowuya wa vuapostola. (Matewu 24:45-47) Xisweswo, ntokoto wa Vukriste, vukongomisi lebyi humaka eBibeleni, na vufambisi bya moya wa Yehova swi yisile ntlawa lowu wa Timbhoni leti totiweke eku boheni ka makungu ya le henhla etimhakeni letikulu ta bandlha. Hi xikombiso, emalembeni ya sweswinyana Huvo leyi Fumaka yi landzerile endlelo ra Matsalwa eku hlamuseleni ka timhaka to tanihi malangutelo ya Bibele ya “vatirheli,” ripfalo leri nyikiwaka hi Xikwembu, ku rhwala switlhavani, na mpimo lowu timhaka ta vuprofeta bya Esaya ti tirhaka ha wona eParadeyisini ya nkarhi lowu taka emisaveni.—Ringanisa Yohane 14:26; 1 Vakorinto 2:10.
9. I ndlela yihi leyi vakulu va faneleke ku yi landzela eku tameleni ka swiphiqo namuntlha xana?
9 Endlelo ra Mintirho ndzima ya 15 ri fanele ku tlhela ri landzeriwa hi vakulu va bandlha eku tlhantlheni ka swirhalanganyi namuntlha. Xo sungula, tshikani xirhalanganyi ni tinhla leti fambisanaka na xona swi andlariwa. Kutani ke, timbhoni leti tshembekaka a a ti nyikele vumbhoni lebyi nga erivaleni lebyi tiyeke emhakeni leyi. Lavani Matsalwa ku kuma mavonelo ya Yehova, hi ku tirhisa ni mpfuno lowu nga ha kumekaka etibukwini ta Sosayiti ya Watch Tower. Hi xikhongelo tirhelani ku fika eka makumu ya vun’we, hi ku pfumelelana ni ku dyondzisa ka Rito ra Yehova, leswi swi nga ta pfuna bandlha.—Esaya 48:17; 1 Vakorinto 14:33.
Ku Tsaka—Enkarhini Wolowo Ni Sweswi
10. (a) Tanihi le bandlheni ra lembe xidzana ro sungula, xana swiboho swa le henhla swi fanele ku hi khumba njhani namuntlha? (b) Xana swiendlo swa manguva lawa swi yise eku tiyiseni ni le ku andziseni ka vanhu va Xikwembu hi ndlela yihi?
10 Loko swi twile hi ta xiboho xa huvo leyi fumaka, swirho swa bandlha le Antiyoka swi “tsakisiwa ngopfu hi marito lawa ya ku va khongotela.” Hi ku fanana namuntlha, Timbhoni ta Yehova ta tsaka hi ku tiva makungu ya nhlengeletano ni tinhlamuselo ta dyondzo-nkulu leti antswisaka rihanyu ra moya ra vanhu va Xikwembu ni ku ya emahlweni ka ntirho wa Yehova. (Ringanisa Tito 2:1.) Kambe a swa ha laveki leswaku Huvo leyi Fumaka yi tsala mapapila ya ku laya hi voko ni ku ma hangalasa hi tintsumi leti fambaka hi milenge. Ndlela ya namuntlha ya ku twalelana, ni switirho swa ku kandziyisa eka marhavi ya Watch Tower lama tlulaka 30 emisaveni yi endle leswaku swi koteka ku hundzisela “mahungu lamanene ya rito ra [Yehova]” eka timiliyoni ta vanhu va Xikwembu hi nkarhi wuntsongo. Leswi swi endliwe ngopfu-ngopfu hi ku tirhisa magazini wa Xihondzo xo Rindza. Xisweswo, mabandlha emisaveni hinkwayo ma hambeta ma ‘tiyisiwa eku pfumeleni, ma andza siku rin’wana ni rin’wana.’—Mintirho 15:30-16:5.
11. Xana Yehova u xi tirhisise ku yini Xihondzo xo Rindza eku hetisiseni ka Esaya 30:18-21?
11 Lava va hlayeke Xihondzo xo Rindza hi malembe yo tala va tsakile nakambe ku vona ku andza ka ku hangalasiwa ka xona. Hi malembe ya 105 ya ku humesiwa ka xona, xi engeteleke ku sukela eka tikopi ta 6 000 hi Xinghezi kan’we hi n’hweti ku ya eka 11 150 000 wa tikopi hi tindzimi ta 102, leti tindzimi letikulu ta kona hinkwato ti humaka kambirhi hi n’hweti. Handle ko tipfinyinga, Xihondzo xo Rindza xi tirhisiwe hi matimba hi Yehova Xikwembu, Mudyondzisi wa hina Lonkulu, eku hetisiseni ka xitshembiso lexi nge: “Ku katekile lava tshamaka va n’wi rindzerile. . . . Tindleve ta wena ti ta twa rito endzhaku ka wena ri ku: ‘Ndlela hi leyi. Fambani ha yona, n’wina vanhu,’ leswaku mi nga tshuki mi ya exineneni kumbe mi nga tshuki mi ya eximatsini.’”—Esaya 30:18-21, NW.
12. (a) Hikwalaho ka yini sweswi hi ri ni xivangelo xin’wana xa ku tsaka-ke? (b) Xana lunghiselelo leri rintshwa ri fanele ku hi pfunisa ku yini?
12 Sweswi ku ni xivangelo xin’wana xa ku tsaka. Ku sungula hi 1985, Xihondzo xo Rindza xi humesiwa xikan’we, ehenhleni ka leswi xi swi khomeke, hi tindzimi ta 23!a Minkandziyiso leyi hinkwayo ka yona yi na xifunengeto lexi fanaka. Yi na nxaxamelo wa swihloko leswi fanaka swo sungula ni swihloko leswi fanaka leswi dyondziwaka. Leswi swi nyikela nongonoko wa ‘mphamelo’ lowu humaka xikan’we lowu nga ta hlanganisa vanhu va Yehova leswaku va kula emoyeni leswaku “eku heteleleni, hi ta hlangana swin’we hinkwerhu evun’weni lebyi tisiwaka hi ku pfumela.” Swi fanele ku hi nyanyula swinene, lerova ‘hi mbilu yin’we ni nomo wun’we hi dzunisa Xikwembu, Tata wa Hosi ya hina Yesu Kriste.’—Vaefesa 4:13; Varhoma 15:6.
13. (a) Xana nongonoko lowu wu anamise ku yini? (b) Hikwalaho 1 Vakorinto 1:10 yi nga tirhisiwa njhani?
13 Loko u khoma magazini lowu hi voko ra wena edyondzweni ya bandlha ya vhiki na vhiki ya Xihondzo xo Rindza, xana a swi ku nyanyuli ku tiva leswaku vunyingi bya vamakwenu emisaveni hinkwayo byi ta hlanganisiwa eku dyeni ka swakudya leswi swa moya hi siku ri ri rin’we? Ee, leswi swi ta endleka hinkwako eAmerika N’walungu na Dzonga, etindhawini to tala ta Yuropa, eJapani na le tindhawini to tala ta le dzongeni wa Afrika! Ku ringanyetiwa leswaku ana se lava tlulaka 90 wa tiphesente ta lava va vaka kona edyondzweni ya Xihondzo xo Rindza emisaveni—vanhu lava nga vaka 2 500 000 hi vhiki—sweswi va hlanganyela eka lunghiselelo ra ‘mphamelo’ lowu wo huma xikan’we. Va karhi ku ‘hlanganisiwa va va van’we eku anakanyeni ne makungwini ya vona.’ (1 Vakorinto 1:10) Loko swiyimo swi pfumela, tindzimi tin’wana ti ta engeteriwa.
14. Xana mindyangu yi ta pfunekisa ku yini ke?
14 Ku ta fika enkarhini lowu, hikwalaho ka ku hambana ka tindzimi, swirho swa ndyangu wun’we swi nga ha va swi hambanile hi tin’hweti eku dyondzeni ka swihloko swo karhi swa Xihondzo xo Rindza, Kambe sweswi va nga hlanganisiwa emhakeni leyi. Hi xikombiso, vatswari lava nga vahlapfa lava tivaka ririmi rin’wana va nga ha tshama ehansi ni vana va vona lava vulavulaka Xinghezi va lunghiselela kun’we dyondzo ya vhiki rin’we ya Xihondzo xo Rindza hi tindzimi ha timbirhi. Emindyangwini ya tindzimi timbirhi, vatswari va ta swi kota ku antswa ku tirhisa xiletelo lexi nga eka Vaefesa 6:4 na 2 Timotiya 3:14, 15.
15. (a) Evutirhelini bya hina bya le rivaleni, i yini lexi sweswi hi nga xi endlaka ku pfumelelana na Esaya 52:8, 9? (b) I yini lexi nga ta endleka eku sunguleni ka 1985, ni le nkarhini lowu taka?
15 Nakambe, xiya ntirho wa hina wa timagazini evanhwini. Hi ndlela leyi, vahuweleri va Mfumo emisaveni hinkwayo sweswi va nga ‘ba nkulungwana swin’we’ loko va ri karhi va andlala mahungu lama fanaka eka vanhu va misava hi nkarhi wun’we. (Esaya 52:8, 9) Loko va veka vumbhoni exitarateni hi timagazini etindhawini ta tindzimi to tala, vahuweleri va nga humesa timagazini leti nga ni xifunengeto lexi fanaka hi tindzimi timbirhi kumbe ku tlula kwalaho. Wa nga vona! Eka xiyenge xo rhanga xa 1985, vahuweleri va Mfumo emisaveni hinkwayo va ta nyikela vumbhoni lebyi nyanyulaka ni bya vun’we ehenhleni ka Armagedoni! Hi nkarhi lowu faneleke, Yehova a nga ha kongomisa vanhu vakwe leswaku va endla swiviko swin’wana swa matimba ni leswi nga ni vun’we emisaveni hinkwayo loko va ri karhi va ‘lwa swin’we hi mbilu yin’we va lwela ku pfumela loku tisiwaka hi mahungu lamanene.’ (Vafilipiya 1:27) Ku humesiwa xikan’we ka Xihondzo xo Rindza hi tindzimi to tala ku ta endla leswaku swiviko swo tano swi endleka.—Ringanisa Daniel 11:44.
Ku Languta eMahlweni
16. (a) Xana Xihondzo lexi xo Rindza xi hi byela yini hi ta ntirho wa timagazini eka matluka 10, 11, na 19 ke? (b) Hikwalaho ka yini vanhu va lava timagazini ta hina namuntlha?
16 Hi lembe ra 1984, Timbhoni ta Yehova ti hangalasile timagazini leti fambisanaka ta Xihondzo xo Rindza ni Awake! hi ku anama. Ntirho lowu wu katekisiwile swinene hi Yehova, hi laha swi nga voniwaka ha kona eka tifigara leti humesiweke eka matluka 10, 11, na 19 eka magazini lowu. Emisaveni hinkwayo, ku hangalasiwa ka timagazini ta hina ensin’wini hi 1984 ku engetelekile hi tiphesente ta 11,1 leswi endleke ntsengo wa 287 358 064, kasi ku fambisiwa ka swikhokhelo swa timagazini ku engeteleke hi tiphesente ta 3,2 swi va 1 812 221. Ku hava ku tilumaluma leswaku mintshungu ya vanhu yi lava ku tiva leswaku hikwalaho ka yini matiko ya ri eku chaveni, ‘ma ri lama helaka ntamu.’ (Luka 21:25, 26) Vatswari va lava vumundzuku lebyi tsakisaka bya vana va vona—nchumu lowu antswaka ku tlula misava leyi oxiweke enyimpini ya nyutliya. Timagazini ta hina ti tamerile ntshembo lowu hanyaka!—Matewu 12:18, 21; Varhoma 15:4.
17. Xana timagazini ta hina ti ta hi pfunisa ku yini ku lwisana na Diyavulosi?
17 Manuku ku vuriwa yini hi 1985 ke? Mahungu lama nga eka Xihondzo xo Rindza ni Awake! ma va lama twisisekaka. Leswi swi fanele ku rindzeriwa leswi masiku ya makumu ya misava ya Sathana ya helaka. (Nhlavutelo 12:12) U nga tshuki u paxeka! Diyavulosi u ta lava ku hi heta matimba eku hlanganyeleni ka nkarhi na nkarhi entirhweni wa Yehova. Ee, Sathana u ta lava ku hi hambanisa ni vandla ra vanhu va Xikwembu ni ntirho wa rona, ivi a hi dya. (1 Petro 5:8) Kambe hi nga lwisana na yena hi ku tshama hi ri karhi hi hlangana nkarhi na nkarhi leswaku hi kuma vutivi lebyinene, ni ku tirhisa vutivi lebyi byo engeteleka hi tirhela Yehova.—Vaefesa 6:11, 14-16; Vakolosa 1:9-11.
18. (a) Xana vutihlamuleri bya wena tanihi muhuweleri wa Mfumo byi kule ku fikela kwihi? (b) Hi nga yi tirhisa hi ndlela yihi ndzayo ya Varhoma 12:10, 11 na 15:5, 6?
18 Xana u muhuweleri wa Mfumo ke? Loko swi ri tano, u ni nkoka lowukulu eka vandla ra le henhla ra manguva lawa. Tanihi Mukriste la tinyiketeke, u nga ha va ni vutihlamuleri byin’wana ebandlheni. Hambi swi ri tano, hi ku hanya hi ku pfumelelana ni vito ra Yehova, u fanele ku va mutirheli la gingiritekaka ensin’wini. Hi ri lava hlanganeke erirhandzwini ra vuxaka ni le ku tsakelaneni, hinkwerhu ka hina a hi hambeteni hi hiseka emoyeni hi “tirhela [Yehova].” (Varhoma 12:10, 11) Ku nga khathariseki leswaku i mintshikilelo yihi hi vaka na yona yo huma eka Sathana ni misava yakwe, hi fanele ku ya emahlweni tanihi miri wun’we, ina, ‘hi mbilu yin’we ni nomu wun’we,’ hi dzunisa Yehova hi ku twarisa swikongomelo swa Mfumo wakwe.
19. (a) Xana hi nga langutana ni ku xanisiwa ni swiphiqo swin’wana hi laha ku humelelaka hi ndlela yihi? (b) I ndzayo yihi leyi Sofonia 3:8, 9 yi hi nyikaka yona?
19 Vo tala va hina hi fanele ku langutana ni ku xanisiwa kumbe ni masimu lama nga amukeliki ku chumayela ka hina. Kambe, a hi hambeteni hi kombisa mavonelo lawa Kriste Yesu a ri na wona. (Yohane 16:33; 1 Petro 4:1, 2) Tanihi miri lowu hlanganeke a hi kombiseni xivindzi xa ntiyiso—matimba ya le ndzeni ya moya ni lama nga heriki ehansi ka ntshikilelo. (Psalma 27:14; Vafilipiya 1:14) Hi nga tshuki hi debya eku laveni ka lava fanaka ni tinyimpfu. A hi tshameni hi ‘langutele’ Yehova ni siku rakwe ra ku avanyisa, hi n’wi tirhela hi mbilu yi ri yin’we loko hi ri karhi hi khongela vito ra yena naswona hi vulavula ‘ririmi leri tengeke’ ra ntiyiso.—Sofonia 3:8, 9.
20. (a) Xana ntsako wa ntiyiso hi nga wu kumisa ku yini? (b) Esaya 11:6-9 yi ve ni ku hetiseka kwihi loku xiyekaka?
20 Hi vun’we, onge hinkwavo lava dzunisaka Xikwembu va nga ‘ambala munhu lontshwa la vumbiweke hi xifaniso xa Xikwembu, la vonakaka hi ku lulama ka yena ni ku hlawuleka loku nga ni ntiyiso.’ (Vaefesa 4:24) Leswi swi tisa ntsako wa ntiyiso. Swi kombisiwile eka Esaya 11:6-9, leyi yi vulavulaka hi paradeyisi ya moya leyi nga kona sweswi exikarhi ka vanhu lava kondleteriweke va Yehova. Mawaku ku rhula ni ntwanano wo tano! Ku hava makwanga, mintila leyi vavisaka ya vumunhu! Tanihi mahetelelo ya nhlamuselo leyi ya paradeyisi, hi xiya marito lawa: “Ku nga ka ku nga endliwi ŝo biha, ni ku onhiwa e nṭhav̌eni hikwayo le’yi kwetsimaka ya mina; hikuv̌a ku tiv̌a Yehova ku ta eneta misav̌a, tani hi leŝi mati ma funengetaka v̌uento bya lwandle.” ‘Ntshava leyi kwetsimaka’ ya Yehova ya vugandzeri lebyi hlanganeke yi tlhomiwile namuntlha emisaveni hinkwayo. Ha yini-ke? Hi leswi Yehova a susumeteleke Timbhoni ta yena ku dzunisa vito rakwe hi ‘mbilu yin’we na hi nomu wun’we.’ Xisweswo ‘misava,’ xiyimo xa moya xa vanhu va Yena, yi tele hi “ku tiv̌a Yehova.”
21. Hikwalaho ka yini hi fanele ku hangalasa timagazini ta hina hi laha hi nga kotaka ha kona?
21 Onge hi matimba lawa Yehova a ma nyikelaka, hi nga hangalasa magazini wa Xihondzo xo Rindza ni munghana wa kona wa Awake! hi laha swi nga kotekaka ha kona. Naswona a hi endleni tano hi ntshembo wa leswaku matlhelo hinkwawo ya misava ni mindyangu hinkwayo ya matiko, hi laha yi yimeriweke ha kona, ‘swi ta tsundzuka Yehova swi hundzulukela eka yena.’—Psalma 22:27; Nhlavutelo 15:4.
[Nhlawo wa lehansi]
a Tindzimi leti i: Afrikaans, Danish, Dutch, English, Finnish, French, German, Italian, Japanese, Norwegian, Portuguese, Spanish, Swedish, na xi-Thai; tindzin’wana ta Vantima: Xipedi, Xisuthu, Xitsonga, Xitswana, Xivenda, Xixhosa, na Xizulu; ni tindzimi timbirhi ematikweni lawa ntirho wa Timbhoni ta Yehova wu yirisiweke.
Ku Hlahluvisisa Nhloko-mhaka Leyi—
◻ Xana bandlha ra lembe xidzana ro sungula a ri tirhisa ku yini?
◻ I ku pfuneka kwihi loku faneleke ku tisiwa hi ku humesiwa xikan’we ka Xihondzo xo Rindza?
◻ I ku ringeta kwihi lokunene ka timagazini ku rhangisiweke hi 1984 ke?
◻ Xana hi nga katekisa ku yini emoyeni, hambi ku ri eminkarhini ya miringo?