Vutshembeki Byi Endla Leswaku Na Vona Va Va Lava Hambaneke

MBILU yakwe yi tshovekile loko a vona thikithi ra ku paka ri khonetiwile eka xibampfula xa movha. Nkhavi wa kona a a ku ri $25 (U.S.), naswona a a vaviseka hikuva a swi nga ri leswi fanelaka. A ku ri hava mimfungho leyi sivelaka ku paka. Lexi nyanyisaka a ku ri leswaku a a huma ekule kutani a nga ta swi kota ku tlhelela edorobeni ra kona ku ya tihlamulela emhakeni yakwe. Hikwalaho u tekile mifodo ya xivandla xa kona ku tiyisa leswaku a ku ri hava mimfungho yo tsundzuxa leyi vekiweke kun’wana. Naswona hi ku va a ri un’wana wa Timbhoni ta Yehova, u komberile Mbhoni-kulobye leswaku yi ya n’wi yimela ehubyeni ya swa magondzo.

Hi lexi xiviko xa nakulobye xa leswi endlekeke ehubyeni mixo wolowo:

“Loko u vitaniwa emahlweni ka muavanyisi, u fanele ku nyika vito ni adirese ya wena. Manuku va lerisa leswaku ku endliwa xihlambanyiso xa ntiyiso. Emahlweni ka ku ndzi nyika xihlambanyiso, matsalana wa huvo, wanuna la kuleke wo xiximeka, u ndzi kombele ku vuyeta xitarata xa adirese ya mina. Loko ndzi te, ‘124 Columbia Heights,’ hi ku tiyiseka u yi tsundzuke tanihi adirese ya yindlo-nkulu ya misava ya Sosayiti ya Watch Tower ni Timbhoni ta Yehova. Loko a hundzulukela eka muavanyisi, a ku: ‘Laha ku hava lexi u nga vilelaka ha xona, wena Muavanyisi. Lava i vanhu lavanene. A va hembi! A va tshuki va hemba! Va nga ka va nga hembi! Vukhongeri bya vona a byi swi pfumeleri, naswona va namarhela swinene-nene eka byona. Ku hava ni un’we wa vavanuna kumbe vavasati va vona loyi a nga vulaka vunwa. Hi vona va tshembekaka ntsena. Ndzi vonile minkarhi yo tala lomu a va fanele va ri balekile thikithi ra ku paka hi ku vula vunwa byintsongo, kambe a va swi endlanga.’

“Kutani ke, loko a hundzulukela eka mina, a ku, ‘Ndza swi tiva leswaku u nga ka u nga vuli vunwa hikuva wa n’wi tiva loyi a nga ta tshunga-tshunga esirheni rakwe loko u endla tano?’ ‘I mani yoloye ke?’ ku vutisa mina. A hlamula a ku: ‘Muavanyisi, Muavanyisi Rutherford [la tshameke a va muungameri wa Watch Tower Society].’ ‘A ndzi tolovele ku n’wi yisela poso malembe ya 47 lama hundzeke. Ndzi tiva Timbhoni ta Yehova ti nga si andza. Muavanyisi a a ri un’wana munhu.

“Endzhaku ka hinkwaswo leswi, muavanyisi wa huvo a nga kalanga a lava leswaku ndzi hlambanya. U ndzi komberile ku andlala mhaka ya mina, leswi ndzi swi endleke. A avanyisa hi ku yini xana?‘A wu na nandzu.’”

Timbhoni ta Yehova ti lava ‘ku endla leswinene eka hinkwaswo.’ (Vaheveru 13:18) Nakona ku namarhela ka vona eka vutshembeki hi yin’wana ya tindlela tinyingi leti va hambanaka ni misava ha tona.