Amukela Mpfuno Wa Xikwembu Wo Hlula Swihoxo Swa Xihundla

“Ndzi nga endla hinkwaswo hi matimba ya Loyi a ndzi tiyisaka.”—VAFILIPIYA 4:13.

1. I xikombelo xihi lexi tatana loyi a khumbekeke a xi endleke?

WANDZISANYANA a a ri na switshetshela.a A a tlhutlha xikhuvi enon’wini, a getsela meno, naswona hakanyingi a a wela ematini kumbe endzilweni. Tata wakwe la xumbadzekeke u lave wanuna loyi a voniweke a hanyisa vavabyi. Loko swi vonake onge a a kanakana ehenhleni ka vuswikoti bya wanuna yoloye, tatana loyi u huwelerile a ku: “Ndza pfumela! Ndzi pfune eku kanakaneni ka mina!”

2. Hi nga tiyiseka njhani leswaku Xikwembu xi lava ku hi pfuna ku hlula swihoxo xana?

² Hi nga dyondza xanchumu eka tatana loyi a laveke mpfuno wa Yesu. Wanuna loyi u pfumerile leswaku ripfumelo ra yena ri nga ha va ri tsanile; nakambe a a tiyiseka leswaku Yesu a a lava ku n’wi pfuna. Swi nga va hi ndlela yoleyo ni le ka hina, loko hi ri karhi hi kongomana ni swihoxo swa hina vini—hambi swi ri swa le xihundleni—ni ku tikarhatela ku swi hlula. Hi nga tshemba leswaku Yehova Xikwembu u lava ku hi pfuna, hi laha a pfuneke van’wana enkarhini lowu hundzeke. (Ringanisa Marka 1:40-42.) Hi xikombiso, u pfune muapostola Pawulo ku hlula swihoxo leswi a swi ta va kona hikwalaho ko taleriwa kumbe ku pfumala. Xisiwana xi nga ha navela rifuwo; ku hluleka ka xigwili ku nga ha va ku tshemba ka xona ku humelela ni ku langutela vapfumari ehansi. (Yobo 31:24, 25, 28) Pawulo u hlurile kumbe ku papalata swihoxo swo tano hi ndlela yihi xana? U ri: “Ndzi nga endla hinkwaswo hi matimba ya Loyi a ndzi tiyisaka.”—Vafilipiya 4:11-13.

3. Hikwalaho ka yini ku ri vutlhari eka hina ku ringeta ku hlula ku tsana ka hina?

³ Leswaku hi amukela matimba ya Xikwembu, hi tlharihile loko hi tikarhatela ku hlula swihoxo swa hina, hi nga swi honisi hikwalaho ka leswi enkarhini wa sweswi swi nga ha vaka xihundla. Mupisalema u vulavule hi Yehova a ku: ‘U tiva leswi fihliweke timbilwini.’ (Psalma 44:21) Loko hi nga hluli swihoxo swa hina, swi nga ha hi yisa eku vavisekeni lokukulu. Nawu lowu wa tirha: “Swidyoho swa vanhu van’wana swi le rivaleni, swi va yisa eku avanyisiweni, kambe swidyoho swa van’wana swi vonaka endzhaku ka nkarhi ntsena.” (1 Timotiya 5:24) A hi kambisiseni swihoxo swimbirhi leswi tolovelekeke leswi lavaka ku khathaleriwa hi Vakriste lava lavaka ku tsakisa Yehova.

Xihoxo Xa Le Xihundleni Lexi Katsaka Ku Navela Ka Rimbewu

4, 5. (a) Bibele yi kombisa langutelo rihi ro ringanisela ra ku navela ka rimbewu? (b) I switsundzuxo swihi leswi hi swi kumaka ematsalweni mayelana ni ku navela ka rimbewu?

⁴ Yin’wana ya tinyiko letinene ta Xikwembu i vukati, kun’we ni vuswikoti ni ku navela ku veleka. (Genesa 1:28) Ku navela ka rimbewu loku kombisiwaka evuxakeni bya vukati i ka ntumbuluko naswona ku basile. Bibele yi bumabumela ku tikhorisa hi rimbewu ni munghana wa munhu hi yexe wa vukati. (Swivuriso 5:15-19) Hambi swi ri tano, ku navela ka rimbewu ku nga siveriwa. Hi xikombiso, xiya ku navela ka hina ka swakudya. Leswaku hi ni ndlala swinene a swi vuli swona leswaku hi fanele ku hlakulela ku navela loku nga fanelangiki ka swakudya, kumbe leswaku a hi fanelanga ku tilawula ehenhleni ka nkarhi, ndhawu, ni ndlela leyi hi dyaka ha yona.—Swivuriso 25:16, 27.

⁵ Pawulo a nga ha va a tshame a teka, naswona u swi tivile leswaku swikombiso leswi tolovelekeke swa rimbewu exikarhi ka vatekani a swi fanela. (1 Vakorinto 7:1-5) Hikwalaho u fanele a a vula nchumu wun’wana loko a tsarile a ku: “Loko swi ri tano, dlayani leswi swi nga swa misava eka n’wina, hi leswaku vuoswi, ni swa thyaka, ni ku hisekela swa tingana, ni ku navela loko biha, ni makwanga.” (Vakolosa 3:5) Kumbexana a a vula swikombiso swa rimbewu leswi lwisanaka ni masungulo ni tindlela leti faneleke ta vukati. Nakambe muapostola u te: “Un’wana ni un’wana wa n’wina a a tive ku hlayisa miri wa yena hi ndlela leyo tenga ni leyo lulama, ku nga ri hi ku navela loku hisaka.” (1 Vatesalonika 4:4, 5) Ndzayo leyi yinene, leyi huhuteriweke yi pfuna Vakriste lava tekaneke kun’we ni lava nga tekangiki kumbe ku tekiwa.

6. Hikwalaho ka yini Vakriste hakunene va papalata ku tithyakisa?

⁶ Ndlela yin’wana leyi ‘ku navela ko tano loko biha ka nyama’ (1 Vatesalonika 4:5, The New Testament for English Readers, hi Henry Alford) hakanyingi ku kombisiwaka ha yona i ku pfuxa ka munhu swirho swa yena n’wini swa rimbewu leswaku a kuma ntsako lowu katsekaka. Leswi swi vuriwa ku tlanga hi swirho swa mbeleko, kumbe ku tithyakisa. Swi tolovelekile exikarhi ka va xinuna ni va xisati lava nga tekangiki kumbe ku tekiwa. Kambe swi tlhela swi endliwa hi vunyingi bya vanhu lava tekaneke. Ku toloveleka ka swona ku susumetela madokodela yo tala ku vula leswaku swi tolovelekile naswona swa pfuna. Hambi swi ri tano, mukhuva lowu wu himpfilitana ni ndzayo ya Xikwembu yo Iwisana ni “ku navela loku hisaka.” Hi nga swi tlangela ku antswa leswaku hikwalaho ka yini, ni leswaku ha yini Vakriste va fanele ku hlula mukhuva lowu, hi ku kambisisa ndzayo leyi Yesu a yi nyikeleke.

7. Matewu 5:28 yi nyika xivangelo xihi xo tivonela eku tithyakiseni?

⁷ Yesu u te: “Un’wana ni un’wana la langutaka wansati hi ku n’wi navela, u n’wi oswile embilwini ya yena” (Matewu 5:28) U swi tivile leswaku ku navela ka mianakanyo ka vuoswi hakanyingi ku rhangela mintirho ya vunghwavava. Kambe ke, hambi va ri lava va yimelelaka ku tlanga hi swirho swa mbeleko va pfumela leswaku hi ntolovelo swi katsa ku anakanya hi rimbewu. Endzhaku ko vulavula hi “ku anakanyisisa ka vantshwa hi ntsako lowu ku tlanga hi swirho swa mbeleko ku nga wu tisaka,” buku leyi nge Talking With Your Teenager ya tlhandlekela: “Va nga ha tivona va ri eka swiyimo leswi ntshunxekeke swa rimbewu kumbe va ri ni vanghana va rimbewu leri fanaka kumbe va ri ni vanhu lavakulu vo fana ni mathicara, maxaka, hambi va ri [vatswari]. Va nga ha anakanya hi ku pfinya. Hinkwaswo leswi swi tolovelekile hakunene.” Kambe swi tano ke? Xana Vakriste a va ta yi langutisisa ku yini mianakanyo yo tano ni ku tlanga hi swirho swa mbeleko swi ri leswi ‘tolovelekeke’ ku ya hi xitsundzuxo xa Yesu ehenhleni ka ‘ku oswa embilwini’ kumbe ndzayo ya muapostola Pawulo malunghana ni “ku navela loku hisaka” ke? E-e, mianakanyo yo tano ni ku tithyakisa—ku nga va ya muntshwa kumbe ya munhu lonkulu, ya munhu loyi a nga tekangiki kumbe ku tekiwa kumbe ya munhu la tekeke kumbe ku tekiwa—yi fanele ku hluriwa.

Ku Hlula Xihoxo Lexi Xa Le Xihundleni

8, 9. I ku tlangela timhaka tihi leti nga pfunaka munhu ku herisa mukhuva wo tithyakisa?

⁸ Loko Mukriste a ri ni xihoxo xa le xihundleni, a nga endla yini leswaku a xi hlula, “a tiv̌a ku hlayisa miri wa yena eku kwetsimeni ne ku lulameni” ke? (1 Vatesalonika 4:4, Bibele ya Xitsonga) Xikwembu xi nyikela mpfuno wa nkoka hi Rito ra xona.

⁹ Xo sungula i swa nkoka ku xiya leswaku Yehova u na milawu. U veka xihoxo xa vunghwavava erivaleni, kun’we ni vumbhisa ni vuoswi. (Vaheveru 13:4) Kutani ke, loko hi pfumela leswaku tindlela ta yena ta antswa, hi ta lava vuyelo lebyi anerisaka bya ntsako wa rimbewu evukatini ntsena. (Psalma 25:4, 5) Buku leyi nge Adolescence, hi E. Atwater, yi komba leswaku malunghana ni ku tlanga hi swirho swa mbeleko, vantshwa hi ntolovelo va ‘miyela, va nyuma ni ku chava.’ Xivangelo xin’wana lexi nyikiweke hi leswaku ‘vuxaka lebyikulu bya rirhandzu lebyi fambisanaka ni nhlangano wa rimbewu bya pfumaleka eka ku tlanga hi swirho swa mbeleko.’ Ina, swa pfuna ku lawula ku navela ka rimbewu ku fikela loko ku kombisiwa evuxakeni lebyinene bya vukati.

10. I magoza wahi man’wana lawa munhu a nga ma tekaka ku tipfuna ku hlula mukhuva lowu?

¹⁰ Rito ra Xikwembu ri nyika mpfuno lowu engetelekeke hi ku laya ri ku: ‘Hinkwaswo leswi nga ntiyiso, hinkwaswo leswi chavisekaka, hinkwaswo leswi lulameke, hinkwaswo leswi tengeke, hinkwaswo leswi tsakisaka, hinkwaswo leswi nkhensekaka, ni loko ku ri ni swin’wana leswi nga ni vunene kumbe ku dzuneka, swilo leswi hinkwaswo, tshamani mi ri karhi mi swi anakanya.’ (Vafilipiya 4:8) Swi lo dla, leswaku swifaniso leswi pfuxaka nyanyuko wa rimbewu ni tibuku ta vunghwavava a swi ‘tenganga ni ku nkhenseka kumbe ku dzuneka.’ Hambi swi ri tano swilo leswi hakanyingi i ndlela ya vatlangisi va swirho swa mbeleko. Manuku ke, un’wana ni un’wana loyi a tiyimiseleke ku hlula xihoxo lexi u fanele ku papalata swilo swo tano leswi pfuxaka nyanyuko wa rimbewu hi laha ku heleleke. Ntokoto wu kombe leswaku loko ku navela ka munhu ku sungula ku yisiwa eka nyanyuko wa rimbewu hi ndlela leyi eku sunguleni yi vangeke ku tlanga hi swirho swa mbeleko, ku anakanyisisa loku tiyeke ehenhleni ka leswi lulameke ni leswi tengeke ku nga timula ku navela. Leswi ngopfu-ngopfu i swa nkoka loko munhu a ri yexe kumbe emunyameni, loko xihoxo xa le xihundleni xo tithyakisa xi tolovelekile swinene.b—Varhoma 13:12-14.

11. Hlamusela swilo leswi engetelekeke leswi kombeke nkateko wo Iwisana ni xidyoho lexi.

¹¹ Mpfuno lowu tirhaka i ku gingiriteka, ku pfumelelana ni xitsundzuxo lexi nge: “Xiyani swinene mahanyelo ya n’wina; mi nga hanyi tani hi vanhu lava nga twisisiki nchumu, kambe hanyani tani hi lavo tlhariha. Londzovotani nkarhi lowu mi nga na wona, hikuva masiku lawa hi nga ka wona ma bihile.” (Vaefesa 5:15, 16) Vutisa Mukriste la vupfeke ni loyi a tshembekaka ehenhleni ka switsundzuxo swa swilo leswi kongomeke leswi u nga swi endlaka. (Esaya 32:2) Vo tala lava va hluleke xihoxo lexi va pfumela leswaku ku tiva ka vona leswaku Mukriste la tihlamulelaka u ta kambela nhluvuko wa vona swi va pfune ku hlakulela ku tikhoma. Kavula, Loyi a faneleke ku va munghana wa hina lonkulu i Yehova. Hikwalaho i swa nkoka ku hundzulukela eka yena hi xikhongelo, hi lava mpfuno wa yena. (Vafilipiya 4:6, 7) Loko munhu loyi a Iwisaneke ni xihoxo lexi nkarhi wo leha a ‘khunguvanyeka,’ a nga kombela matimba eka Xikwembu, masuku a nga swi kota ku pfuxeta matshalatshala ya yena kutani a tlhela a humelela, hambi wu ri nkarhinyana wo leha.—Vaheveru 12:12, 13; Psalma 10:13, 14.

Ku Lwisana Ni Ku Tirhisiwa Loku Hoxeke Ka Xihoko

12. Langutelo ra Mukriste hi swakunwa swa xihoko hi rihi xana?

¹² ‘Vhinyo yi tsakisa Xikwembu ni vanhu,’ ku vula ndzimana yin’wana ya Bibele. (Vaavanyisi 9:13) U nga ha pfumela, hikuva swakunwa leswi nga ni xihoko swi vile mpfuno eku tirivatiseni ni xihlovo xa ntsako eka lavo tala. (Psalma 104:5) Hambi swi ri tano, i vatsongo lava nga landzulaka leswaku ku tirhisiwa ka xihoko ku nga vanga makhombo ya nyama ni ya mahanyelo lamanene. Xiphiqo lexikulu i vudakwa lebyi heleleke. Xihoxo lexi i xa ntikelo swinene laha Xikwembu xi tsundzuxaka leswaku swidakwa swi nga hlongoriwa ebandlheni kutani swi hambanyisiwa ni Mfumo. (1 Vakorinto 5:11-13; Vagalatiya 5:19-21) Vakriste va swi vona leswi naswona va pfumela leswaku va fanele ku papalata ku dakwa. Kambe ke, handle ka vudakwa, xana ku tirhisiwa ka xihoko ku nga ha va xihoxo xa le xihundleni hi ndlela yihi?

13. Kombisa hi laha ku tiseketela hi xihoko ku nga kulaka ha kona.

¹³ Mukriste a nga nwa hi ku ringanisela ntsena, hambi swi ri tano a va ni xihoxo lexikulu. Xiya ntokoto wa wanuna loyi hi nga ta n’wi vula Heinz.

Yena, nsati wa yena, ni vana va yena va vile Vakriste va ntiyiso naswona a va chivirika ebandlheni ra kwalaho. Hi nkarhi lowu faneleke Heinz u hlawuriwe tanihi nkulu kutani a sungula ku langutiwa tanihi ‘phuphu’ exikarhi ka mabandlha emutini wolowo. (Vagalatiya 2:9) Hi laha ku twisisekaka, u kongomane ni mintshikilelo eku dyondziseni ka ndyangu wa yena ni ku vilela kun’wana eku khathaleleni ka ntlhambi. (2 Vakorinto 11:28) Hambi swi ri tano, ntirho wa yena wu n’wi tisele ntshikilelo lowukulu hikuva feme leyi a tirha yona a yi kula, naswona ndhuna ya yena yi lave leswaku a khathalela swirhalanganya ni makungu yo hambana-hambana.

Hakanyingi nimadyambu Heinz a a bohana. U kume leswaku nghilazi yin’we kumbe timbirhi ta byalwa ti ta n’wi pfuna leswaku a ntshunxeka. Kavula, tanihi Mukriste la vupfeke u papalate ku nwa ngopfu kumbe vudakwa hi vukheta. Hambi leswi a a nwanyana leswaku a xalamuka nimadyambu, a a nga xi lavi xihoko ninhlikanhi, naswona hakanyingi a a nga nwi eswakudyeni. A a nga tiviwi tanihi loyi a ‘tinyiketeleke vhinyo.’—1 Timotiya 3:8.

Heinz u yisiwe exibedlhele ku ya endliwa vuhandzuri lebyi tolovelekeke swi nga rindzeriwanga. Swikombiso swin’wana leswi nga tolovelekangiki swa mavabyi swi vonakile. Xivangelo xa swona a xi ri xihi xana? A swi amukelanga vutshunguri bya mirhi ku tiyisa leswaku Heinz a a hlangavetana ni ku hunguteka ka swikombiso swa mavabyi. Ina, miri wa yena a wu sungule ku tiseketela hi xihoko. Leswi swi hlamarise ndyangu, kambe wu tihlanganise na yena kutani wu seketela ku tiyimisela ka yena ko papalata xihoko hi laha ku heleleke.

14. I yini lexi nga endlaka leswaku u sandziwa hi swakun’wa leswi nga ni xihoko?

¹⁴ Van’wana va swi twa leswaku xihoko xi teke xiphemu lexi nga tolovelekangiki evuton’wini bya vona, hikwalaho va ringeta ku fihla ku nwa ka vona, va nga swi lavi leswaku ndyangu ni vanghana va vona leswaku va nwa ku fikela kwihi kumbe kangani. Hambi swi ri tano, van’wana va nga ha va va nga swi voni leswaku va tiseketele hi xihoko, leswaku ku nwa ku hundzuke yinhla leyikulu ya nkarhi wa vona. Lava va nga entlaweni va le ndzingweni lowukulu wa ku nwa ngopfu eka xiendlakalo xo karhi kumbe wa swihoko leswi fihliweke. Xiya xivuriso lexi: “V̌inyo i musanḍi, byala i pongo, hikwav̌o lav̌a tinyiketaka ka ŝona a v̌a na v̌utlhari.” (Swivuriso 20:1) Mhaka ya kona hi leswaku ku nwa ngopfu ku nga endla leswaku munhu a va ni pongo ni ku sandza. Hambi swi ri tano, vhinyo yi nga sandza munhu hi ndlela yin’wana. Munhu u faneriwa hi xisandzu loko a anakanya leswaku ku nwa ka yena ku fihlekile eka Xikwembu.

15. Marito ya Pawulo eka 1 Vakorinto 9:24-27 ya khumba ku tirhisa ka Mukriste ka xihoko hi ndlela yihi xana?

¹⁵ Wun’wana wa mihandzu ya moya wa Xikwembu i ku tikhoma, naswona ha wu lava etimhakeni hinkwato ta vutomi. (Vagalatiya 5:22, 23) Pawulo u fanise Mukriste ni xitsutsumi. Eka mphikizano lowu tolovelekeke xitsutsumi xa “tikhoma hi matlhelo hinkwawo” leswaku xi ‘kuma harhi leyi nga onhakiki.’ Hi ku fanana, Mukriste u fanele ku kombisa ku “tikhoma hi matlhelo hinkwawo” leswaku a kuma hakelo ya nkoka lowu tlakukeke—VUTOMI. Pawulo u kandziyise leswaku hi fanele ku ‘xanisa miri ya hina’ leswaku hi ta tiyiseka ‘leswaku endzhaku ka loko hi ta va hi dyondzise van’wana hi nga kumeki hi ri lava tsandzekaka,’ tanihi le ka xihoxo xa le xihundleni lexi katsaka xihoko.—1 Vakorinto 9:24-27.

16. Munhu a nga swi vona njhani loko xihoko xi hundzukile xihoxo eka yena ke?

¹⁶ I yini lexi nga pfunaka Mukriste ku hlula xihoxo lexi. Swa pfuna ku tlangela leswaku hambi loko munwi a nga ha fihla ndlela ya yena eka vanhu van’wana, a nga yi fihleli Xikwembu. (1 Vakorinto 4:5) Xisweswo, hi ku tshembeka—emahlweni ka Xikwembu—munhu u fanele ku anakanya hi mikhuva ya yena yo nwa. (Hi vula ku nwela ntsako kumbe ku dakwa, hayi ku nwanyana tanihi swakunwa leswi tolovelekeke kun’we ni swakudya.) Hambi swi ri tano, van’wana va nga ha ku, ‘Kambe a a ku nga ri xikolokolo nguvu ya Pitori leswaku ndzi fanele ku nwa. Ndzo tiphina ha swona, swa ndzi phyuphyisa. A ndzi ta swi papalata loko a ndzi swi lavile.’ Kunene, hikwalaho ka makhombo lama nga vaka kona yo nwa ngopfu kumbe ku tiseketela hi xihoko, hikwalaho ka yini u nga endli tano n’hweti yin’we kumbe timbirhi? Kumbe, tanihi leswi ku nga ni mboyamelo lowukuiu wo landzula leswaku ku ni xirhalanganya, tiyimisele n’hweti yin’we ku swi papalata minkarhi hinkwayo loko ku nwa swi tolovelekile. Hi xikombiso, munhu loyi hakanyingi a a nwa endzhaku ka ntirho, a nga si ya eku etleleni, kumbe entlangwini lowu tolovelekeke a nga swi kota ku papalata ku endla tano. Xisweswo a nga swi kota ku xiya ndlela leyi a titwaka ha yona. Loko swi nonon’hwa, kumbe a nga ‘swi koti ku ntshunxeka,’ u na xihoxo lexikulu.

17. Hikwalaho ka yini Mukriste loyi a nga ni xihoxo lexi katsaka xihoko a fanele ku tikarhatela ku xi hlula?

¹⁷ Xikan’we-kan’we loko Mukriste lonene a swi xiya emahlweni ka Xikwembu leswaku u ni xihoxo lexi katsaka xihoko, swi ta n’wi olovela ku xi hlula. A nga ha va ana se a swi tiva leswaku Bibele yi ri i ‘munhu la rivaleke’ loyi a vulaka ‘leswaku mati lama yiviweke ma nandziha, ni vuswa [kumbe xihoko] lebyi dyiwaka xihundleni—bya xawula.’ Hambi swi ri tano, vanhu vo tano, ku vula Swivuriso, va ta hluleka ku tisirheleta eku feni. Hi laha ku hambaneke, munhu la tlhariheke u rhandza ku tshinyiwa, naswona hi ntsako u ‘tshika lava nga hava ntokoto kutani a hambeta a hanya hi ku famba hi ku lulama endleleni yo twisisa.’ (Swivuriso 9:1, 6, 8, 13-18) Ee, Xikwembu xi nyika mpfuno lowu engetelekeke wo hlula swihoxo swa le xihundleni hi ku hi tivisa leswi nga emahlweni, leswi vuyelo byo hetelela byi nga ta va swona.

Xikwembu Xi Hakela Swiendlo Swa Le Xihundleni

18. Loko hi ri karhi hi hlula swihoxo swa hina swa le xihundleni, hi nga tiyiseka ha yini xana? (Swivuriso 24:12; 2 Samuel 22:25-27)

¹⁸ Vanhu van’wana va hanya hi ku chava leswaku tindlela ta vona leto biha ti ta tshuburiwa, hi vanhu kumbe hi Xikwembu. Sweswo swi nga vi tano eka hina. Ematshan’wini ya sweswo, a hi hanyeni hi ku swi xiya leswaku hi nga ka hi nga swi tumbeti swilo eka Xona, “hikuv̌a Šikwembu ša ha ta yisa mitiro hikwayo e ku av̌anyiseni ni leŝi lahliweke hikwaso, hambi ŝi ri leŝo biha, hambi ŝi ri leŝo saseka.” (Eklesiasta 12:14) A hi amukeleni mpfuno wa Yehova wo hlula swihoxo swa hina, hambi swi ri leswi fihlekeke. Manuku hi nga languta emahlweni enkarhini lowu ku nga ta humeseriwa “swilo swa munyama leswi fihliweke” erivaleni ni ku paluxiwa ka “makungu ya timbilu.” “Kutani hi kona un’wana ni un’wana a nga ta kuma ku dzunisiwa ka yena loku humaka eka Xikwembu.”—1 Vakorinto 4:5; Varhoma 2:6, 7, 16.

[Nhlamuselo ya le hansi]

Wa Tsundzuka Xana?

◻ Xikwembu xi titwisa ku yini hi swihoxo swa le xihundleni leswi hi nga ha vaka hi Iwisana na swona ke?

◻ I ndzayo yihi ya Matsalwa leyi kombaka leswaku ku tithyakisa ku fanele ku papalatiwa ke?

◻ Leswi Bibele yi nga xi siveriki, xana ku tirhisiwa ka xihoko ku nga va xihoxo xa le xihundleni hi ndlela yihi?

◻ I magoza wahi ya vutlhari lama nga tekiwaka ku lwisana ni xihoxo xa le xihundleni lexi katsaka swakunwa leswi nga ni xihoko?

[Bokisi eka tluka 28]

U Hlurile Ku Tithyakisa

TANIHI JAHA, C——— a a ri ni ku titwa loku tolovelekeke ka rimbewu, kambe a ri na xiphiqo. Ku sukela emalembeni ya 13 a a ri na ntolovelo wa ku tithyakisa, hakanyingi a a swi endla exihundleni elawini rakwe. A swi n’wi nyumisanyana, kambe u ehlekete leswaku a swi nga vavisi munhu un’wana.

Loko a ri ni malembe ya 19 hi vukhale, mukhuva lowu a wu n’wi godzomberile. Siku rin’wana C——— u swi boxele muprista wa yena, kambe u byeriwe leswaku hambi loko swi hoxile, a ku nga ri mhaka yikulukumba. Loko C——— a yile evusocheni a a nga ri na nkarhi ngopfu wa ku va yexe. Hikwalaho ke, a a nga swi koti ku tithyakisa, leswi kahle-kahle swi kombaka leswaku mukhuva wakwe wa nkarhi lowu hundzeke a wu nga vangiwi hi nyanyuko lowu nga lawulekiki.

Loko a huma evusocheni, C——— u tlhelele ekaya. U sungule ku xava timagazini leti kombisaka manyala, ivi hi ku nyanyuriwa hi tona, a tlhelela eka tindlela takwe ta khale. Loko a sungule ku tshama yexe, a swi n’wi olovela ku kuma swilo leswi nyanyulaka rimbewu. Hakanyingi a a tlangisa swirho swa mbeleko minkarhi yo tala hi siku.

Manuku u sungurile ku dyondza Bibele ni mutirheli wa Timbhoni ta Yehova. Loko a dyondzile malangutelo ya Xikwembu hi vunghwavava, C——— u titwe a nyuma ku xava tibuku ta manyala, naswona u lavile ku tshika mukhuva wo tithyakisa. U ringetile. Kambe endzhaku ka vhiki kumbe mambirhi u twile ntshikilelo wa rimbewu, a yima laha ku nga ni tinyuziphepha ivi a nyanyuriwa hi mhaka ya manyala. Loko a tihelela kaya, a a vona onge leswi ana se a hlulekeke, a nga ha teka goza rin’wana ro tlhotlhovela eka swona. Endzhaku, a khomiwa hi tingana. Xana a nga ta swi kota ku tshika mukhuva lowu wo biha ke?

Eku heteleleni C——— u vulavule ni nkulu wa moya ebandlheni. Mutirheli loyi a a twisisa kutani u n’wi pfunile ku pfula mhaka leyi seketeriweke hi Bibele leyi nga n’wi pfunaka ku antswisa ku tikhoma kakwe. Mutirheli loyi u tlhele a hlamusela a ku:

‘Teka ku navela tanihi loku fanaka ni nketani. Eku sunguleni i kuntsongo naswona ku tsanile. Kambe ku navela kun’wana ni kun’wana ku ya ku kula ni ku tiya. Swi tano ni minsusumeto leyi yisaka eku tlangiseni ka swirho swa mbeleko. Hikwalaho u laveka ku tsema xiendlo lexi hi xihatla hi laha u nga kotaka ha kona. Loko xi tshikiwa xi ya emahlweni, hi laha ku navela ka wena ku yaka ku kula. Eku heteleleni ku ta vonaka ku nonon’hwa ku ku tshika. Ee, ringeta ku tsema nketani eku naveleni ko sungula. Loko u sungula ku twa nsusumeto wu ta, ENDLA SWIN’WANA! Suka u yima u cinca ndhawu ya wena, pholicha tintanghu, famba u ya chulula thyaka leri nga thinini ra thyaka—nchumu wun’wana ni wun’wana lowu nga kavanyetaka ku navela. U nga ha sungula ku hlaya swin’wana hi rito leri tlakukeke, tanihi Bibele kumbe buku ya Vukriste leyi nga ta nghenisa mianakanyo eka swilo leswi baseke.’

Mutirheli loyi a vutisa C——— etidyondzweni leswaku swilo a swi famba njhani, nkarhi na nkarhi a a n’wi nkhensa ni ku n’wi khutaza eku tiyimiseleni kakwe. C——— u swi kotile ku humelela hi mavhiki ya nkombo. Kutani ke, loko a khomisiwe tingana ni ku hetiwa matimba hi xiphiqo xin’wana, u tlhele a tinyiketela kona, a xava tibuku leti pfuxaka nyanyuko. Sweswo swi yise eku rhetemukeni. Timhakanyana to tano a ku ri ku hluleka, kambe mutirheli u n’wi khutazile ku hambeta a chukuvanya. Hakantsongo-ntsongo mikhandlu yi ye yi pfuleka ku ya fika eka mavhiki ya 9, endzhaku mavhiki ya 17, masuku a nga ha karhatiwi. Hi ku nonoka ntshembo wakwe wu ye wu karhi wu kula ku fikela laha a swi kotaka ku hlula xirhalanganya xakwe xa le xihundleni.

Eku heteleleni C——— u langutane ni ntiyiso wa leswaku Yehova a a tiva hinkwaswo leswi a a ri karhi a swi endla. Xisweswo, loko a lava ku tirhela Xikwembu hi ripfalo leri baseke hi ku helela, a a fanele a wu tshikela makumu mukhuva lowu evuton’wini bya yena. U swi endlile! Sweswi ni ku tsundzuka leswaku swi teke nkarhi wo tanihi kwihi a nga ha swi tsundzuki. Tanihi Mukriste la nga xikombiso, C——— u nyikiwile vutihlamuleri ebandlheni, naswona u endla malunghiselelo yo kurisa ntirho wakwe leswaku a dzunisa Xikwembu. I munhu loyi a cinceke.