Xivangelo Xa Ku Va Xikwembu Xi Nga Si Tisa Ku Avanyisa Ka Xona

MALEMBE lama nga vaka makume mambirhi endzhaku ka rifu ra Yesu, Vakriste van’wana ana se a va rindzerile leswaku Yehova “a fika” a ta avanyisa. Leswi swi susumetele muapostola Pawulo ku va tsalela, a ku: “Siku ra [Yehova] a ri nga ti, loko ku nga si ta ku gweneha lokukulu, ni loko ku nga si humeseriwa erivaleni Munhu wa ku homboloka, la nga ta helela eku loveni.” Hambi leswi Pawulo a pfumeleke leswaku ‘xihundla xa ku homboloka’ ana se a xi ri lexi “tirhaka” esikwini ra yena, kahle-kahle a ku nga ri hi mpimo lowu lavekaka, leswaku ku avanyisa ka Xikwembu ku ta ta.—2 Vatesalonika 2:2, 3, 7, 8.

Ku Hlengeleta Loku Nga Hi Matlhelo Mambirhi

Vugwinehi, hambi leswi a byi ta ta, a byi nga ta hinganyeta xikongomelo xa Xikwembu xo hlawula Vakriste lava tshembekaka va 144 000 leswaku va va vafumi-kulobye na Yesu, N’wana wa xona ematilweni. (Vona Nhlavutelo 14:1-5.) Ku tisiwa ka ku avanyisa ka Xikwembu a ku ta endleka ntsena loko nhlayo ya vona yi helerile ni loko va funghiwe hi ku helela hi Xikwembu. Nhlavutelo 7:2, 3 ya hlamusela: “Ntsumi yi ku: ‘Mi nga onhi misava, Iwandle, kumbe mirhi [hi ku tisa mimoya leyi lovisaka hi ku avanyisa ka Xikwembu ehenhla ka matiko], ku kondza loko hi ta fungha malandza ya Xikwembu xa hina hi mfungho emimombyeni ya vona.’” Hi laha sweswi hi tivaka ha kona, ntirho lowu a wu hetiwanga loko Mfumo wu tlhomiwa hi 1914.

Xisweswo ke, hambi leswi van’wana a va tshemba leswaku ku fanele ku ta, ku tisiwa ka ku avanyisa ka Xikwembu a ku nga ta ta hi nkarhi wolowo. Nkandziyiso wa Xihondzo xo Rindza xa Xinghezi xa January 1, 1914 wu pfulerile xiendlakalo lexi, wu vula leswaku hambi leswi “lembe ra 1914 ri nga ro hetelela ra leswi Bibele yi swi vulaka ‘minkarhi ya Vamatiko’ . . . a hi tiyiseki leswaku lembe leri, 1914, ri ta vona ku cinca loku heleleke ni ka xihatla ka swilo hi laha a hi rindzele ha kona.” Nakambe, hi laha xihloko xexo xi yeke emahlweni xi hlamusela ha kona, Vakriste a va tlangela leswi mahlayelele ya Bibele ya va pfuxeleke ku tshinela ka ku avanyisa ka Xikwembu. Xi te: “Ha tshemba leswaku ku hlayelela i nkateko. Loko ku hi pfuxa ka ha sele timinetenyana kumbe tiawara ti nga ri tingani nimixo ematshan’wini ya nkarhi lowu a hi ta pfuka ha wona, swi lulamile futhi i swinene! Hi lava va pfukeke lava kumaka nkateko.”

Nakambe exikarhi ka lava kumaka nkateko ku ta va na lava Bibele yi va hlamuselaka tanihi “ntshungu lowukulu wa vanhu, lava ku nga pfumaleka ni munhu ni un’we la koteke ku va hlaya. [Lava] va huma hi le matikweni hinkwawo, ni le tinxakeni hinkwato, va ri va swivongo hinkwaswo ni va tindzimi hinkwato.” Ku kondza ku fika 1935 a swi nga twisisiwi hi ku helela leswaku “ntshungu lowukulu” lowu a wu ta vumbiwa hi “vanhu lava humaka eku xanisekeni lokukulu,” hi leswaku lava sukeleke nhlengeletano ya Sathana kutani va yima etlhelweni ra Xikwembu, leswaku va vona ku tisiwa ka ku avanyisa ka Xikwembu. Ku ringana makume-ntlhanu wa malembe sweswi, ntirho wa ku hlengeleta ‘ntshungu lowu lowukulu’ a wu ri karhi wu ya emahlweni hi ku pfumelelana ni xikongomelo xa Yehova. Hi nga tsaka leswi ku avanyisa ka Xikwembu ku nga ta ka ku nga tisiwi ku kondza loko ntirho lowu wo hlayisa vutomi wu hetiwile.—Nhlavutelo 7:9, 14.

Swiendlakalo Swa Politiki

Swiendlakalo swo karhi swa politiki naswona a swi bvumbiwile leswaku swi ta humelela emahlweni ka ku tisiwa ka ku avanyisa ka Xikwembu. Ku hetiseka ka vuprofeta bya Daniyele bya “tihosi timbirhi” (Da ndzima ya 11) sweswi ku vonaka erivaleni tanihi loku yaka eku heleni.a Eku chaputeni ka ku hetiseka loku, Xikwembu xi ta tisa ku avanyisa.—Ringanisa Daniel 2:44.

Hambi leswi yi kanetanaka, mimfumo leyikulu ni valawuri va yona—“hosi ya le dzongeni” na “hosi ya le n’walungwini” yi na vayimeri enhlengeletanweni ya misava hinkwayo ya politiki leyi namuntlha yi vangelaka vanhu ku “hlamala [vukahle bya yona].” Vona ku fanela ka nhlamuselo ya Ntwanano wa Matiko wa le ndzhaku ka Nyimpi yo Sungula ya Misava ni musivi wa wona endzhaku ka Nyimpi ya Vumbirhi ya Misava, nhlengeletano ya Nhlangano wa Matiko.—Daniel 11:40; Nhlavutelo 17:8.

Ti hambanile hi tlhelo ra ndhavuko ni politiki, kambe hi nkarhi wu ri wun’we ti ri leti ‘hlanganeke,’ ‘tihosi letimbirhi’ ti vula swo tala hi ku hlayisa ‘ku rhula ni nsirhelelo wa misava.’ Leswi na swona, i swa nkoka, hikuva vuprofeta bya Bibele byi vula leswaku “siku vanhu va nga ta ku: ‘Ku rhulile, ku hava xo karhata,’ hi wona nkarhi lowu ku onhaka ku nga ta va wela henhla hi xitshuketa.” Leswaku i ku fikela kwihi laha ‘tihosi letimbirhi,’ ti ri toxe, ni loko ti hlanganile ni nhlengeletano ya Nhlangano wa Matiko, ti nga ta swi kota ku tlhantlha swirhalanganya swa misava swa politiki, bindzu, matshamelo, ni ntirhisano leswaku swi ta tifanela ku endla xiviko lexi, sweswi a hi swi tivi.—1 Vatesalonika 5:2, 3.

Lexi hi xi tivaka hambi swi ri tano, hi leswaku enkarhini wun’wana wa ku fuma ka yona, nhlengeletano ya Nhlangano wa Matiko, kun’we ni matiko lama nga swirho swa yona—ngopfu-ngopfu ku katsa ni ‘tihosi leti timbirhi’—yi ta hlangavetana ni ku avanyisa ka Xikwembu ivi ‘yi ya eku loveni.’ Nakambe ha swi tiva leswaku rixaka ra 1914 ri ya eku heleni ka rona, xisweswo ri pfumelela nkarhi wuntsongo ntsena wa vuprofeta lebyi bya ha fanelaka ku hetiseka. Nakambe ha swi tiva—hikuva eka leswi hi ni xitshembiso xa Yesu hi yexe—leswaku “rixaka leri ri nga ka ri nga hundzi, ku nga si humelela swilo leswi hinkwaswo.”—Nhlavutelo 17:11; Marka 13:30.

Yehova A Nga Ka A Nga Hlweli—Wena-ke?

Loko u ri karhi u hlaya Bibele ni ku dyondza hi ta swikongomelo swa Yehova, u nga hlweli ku balekela exivandleni xo fanekisela xa xisirhelelo xa Xikwembu. ‘Lava ku lulama, u lava ku titsongahata,’ leswaku u ta ‘fihliwa esikwini ra vukarhi bya Yehova.’—Sofonia 2:1-3.

Anakanya hi Vakriste va lembe xidzana ro sungula lava balekeke va huma eYerusalema hi 66 C.E. loko va vonile xikombiso lexi Yesu a va nyikeke xona xa ku avanyisa loku tshinelaka ka muti. Hinkwavo lava beke mariri—hikwalaho ka xivangelo xihi na xihi—swi vonaka va wele emianakanyweni leyi hoxeke ya ku sirheleteka loko Varhoma, lava a va rhendzele muti ivi manuku hi ndlela leyi nga rindzeriwangiki va tlhelela endzhaku, va hlulekile ku vuya. Mavhiki ya hundzile. Mavhiki ya hundzuka tin’hweti. Tin’hweti ti hundzuka malembe. Van’wana va nga ha va va ehlekete leswaku Yehova a a hlwerisa ku tisiwa ka ku avanyisa kakwe. Kambe xikan’we-kan’we, handle ko rindzeriwa, Varhoma va vuyile hi 70 C.E. Eka lava a va ri endzeni ka muti a ku nga ri na ku baleka.—Luka 21:20-22.

Hi tlhelo rin’wana, vanhu lava ana se namuntlha va nyikeleke vutomi bya vona eku endleni ka ku rhandza ka Xikwembu na kona lava balekeleke exivandleni xa xona xa vuhlayiseki, a va fanelanga ku ba mariri eku hetisiseni ka mindzhwalo ya vona ya Vukriste. A va fanelanga ku lava swivangelo swo tshika ku chumayela mahungu ya Yehova ya ku avanyisa tanihi laha Yonasi a ringeteke ku endla ha kona loko a lerisiwe ku tsundzuxa vanhu va Ninivha hi ta ku avanyisa ka Xikwembu. Naswona a va fanelanga ku tlhelela eku tshameni hi laha a endleke ha kona hikwalaho ka leswi swilo swi nga endlekangiki hi laha va rindzeleke ha kona kumbe hi xihatla hi laha a va tshemba ha kona.—Yonas 1:1, 2; 4:2, 5, 10, 11; 2 Petro 3:15.

Hi laha ku fanelaka Xihondzo xo Rindza xa Xinghezi xa June 1, 1906 malunghana ni ku tisiwa ka ku avanyisa ka Xikwembu xi te: “Nkarhi wu ta kombisa vutlhari bya Xikwembu hi xitalo eka leswi swi vonakaka swi fana ni ku ba mariri ka ku pfumala ntwelo-vusiwana eka vanhu va mavonelo lama komeke . . . Xikwembu hi musa xi hi tisile eka malangutelo ya xona ni ku hi lerisa ku languta vumundzuku lebyi vangamaka . . . naswona hi xiringaniso lexi hi kotaka ku byi twisisa ni ku byi pfumela ha xona, hi nga tiwisela ni ku titsakela eka byona. Kambe sweswi, loko xisweswo hi phyuphyisiwile hi ndlela leyinene hi ku langutela loku tsakisaka, hi fanele hi yimela makumu hi ku lehisa mbilu, ku nga khathariseki leswaku nkarhi wo rindzela wu vavisa hi ndlela yihi.”

Naswona hi ta rindzela, hi ri na ku tiyiseka loku teleke loku nge: “Yi ta endlakala šinene, yi nga ka yi nga hlweri.”—Habakuk 2:3.

[Nhlamuselo ya le hansi]

[Bokisi eka tluka 6]

LESWI FANELEKE KU RHANGELA KU TISIWA KA KU AVANYISA

Vugwinehi—2 VATESALONIKA 2:2, 3

Ku funghiwa ka lava 144 000—NHLAVUTELO 7:2, 3

Ku hlengeletiwa ka “ntshungu lowukulu” leswaku wu pona—NHLAVUTELO 7:14

Ku humelela ka Ntwanano wa Matiko, ivi manuku ku landzela Nhlangano wa Matiko—NHLAVUTELO 17:8

Ku himpfilitana ko hetelela ka mimfumo mimbirhi leyikulu ya matiko—DANIEL 11:40, 44, 45

Ku huweleriwa ka misava hinkwayo ka ‘ku Rhula ni nsirhelelo’—1 VATESALONIKA 5:2, 3