Dyondzisa Hi Vutshila Ni Ku Hiseka

“Yanani ha kona, mi ya hundzula vamatiko hinkwavo leswaku va va vadyondzisiwa va mina, . . . mi va dyondzisa ku hlayisa hinkwaswo leswi ndzi mi leriseke swona.”—MATEWU 28:19, 20

1. I yini leswi khutaziwaka hi Swivuriso 22:29, naswona swi tano hi ndlela yihi?

RITO RA YEHOVA ri khutaza vutshila na tinghitsi. Hi xikombiso, ri ri: “Šana u ṭunḍukile munhu l’a gingiritekaka e mitirweni ya yena-ke? 0 ta yima e mahlweni ka tihosi, A nga ka a nga yimi mahlweni ka v̌anhu ntsena.” (Swivuriso 22:29) Kavula, ku hava lexi solekaka hi ku tirhela “v̌anhu ntsena.” Kambe ntirho lowunene wa mutshila la nga ni vuswikoti a wu nga tshami wu ri xihundla. Phela, mahungu ya vutshila byakwe ma nga fika etindleveni ta hosi, leyi yi nga lavaka mintirho yakwe swinene!

2. (a) Ku kurisa vutshila entirhweni wun’wana ni wun’wana, i yini lexi lavekaka? (b) Hikwalaho ka yini vuswikoti bya mutirheli wa Vukriste byo va mudyondzisi byi ri bya nkoka?

² Vutivi ni vutshila swa laveka eka ntirho wihi na wihi. Munhu a nga ha dyondza vuvatli nakona a nga ha tlhela a dyondza swo tala hi ku xiya lava va nga ni vutshila entirhweni wolowo. Kambe leswaku yena a va ni vutshila u fanele ku tirhisa vutivi lebyi a byi kumeke eka ntirho wa kona. Muhandzuri u fanele ku va la dyondzekeke. Kambe leswaku a va la fanelekaka, u fanele ku tirhisa vutivi byakwe endlwini ya vuhandzuri. Naswona eka ntirho wolowo vutshila i bya nkoka, hikuva ku faneleka hakanyingi ku nga hanyisa xigulani kumbe ku xi dlaya. Kambe, xa nkoka ni ntikelo i ku va ni vuswikoti tanihi mutirheli. Ha yini ke? Hikuva vuswikoti bya mutirheli tanihi mudyondzisi ku nga khumba swinene ndlela leyi vanhu va amukelaka mahungu lamanene ha yona. Nakambe, ndlela leyi va ma tekaka ha yona yi nga endla leswaku va kuma vutomi lebyi nga heriki kumbe rifu leri nga riki na makumu.—Deuteronoma 30:19, 20; Yohane 17:3.

3. Ku endla vadyondzisiwa swi lava yini xana?

³ Xileriso lexi Yesu Kriste a xi nyikeke valandzeri vakwe xi katsa ku dyondzisa. U te: “Yanani ha kona, mi ya hundzula vamatiko hinkwavo leswaku va va vadyondzisiwa va mina, mi va khuvula hi vito ra Tatana, ni ra N’wana, ni ra Moya lowo Kwetsima, mi va dyondzisa ku hlayisa hinkwaswo leswi ndzi mi leriseke swona; kutani vonani, ndzi na n’wina masiku hinkwawo, ku ko ku hela misava.” (Matewu 28:19, 20) Kavula, vutshila bya laveka loko munhu a ta dyondzisa vanhu va timbilu letinene swilo hinkwaswo leswi Yesu a swi leriseke.

4. (a) Ku dyondzisa ka vutshila ku fanele ku endliwa hi malangutelo wahi? (b) Xana Apolosi u pfunekise ku yini hi ku va na Akwila na Prisila?

⁴ Ku dyondzisa ko tano ka vutshila ku fanele ku endliwa hi ku hiseka. Ee, Vakriste va fanele ku va lava “chivirikelaka ku endla leswinene,” nakona leswi hakunene swi katsa ku hundzisela dyondzo ya moya evutirhelini ni le bandlheni. (Tito 2:14) Tanihi vadyondzisi lava nga ni vutshila, Akwila na Prisila “va n’wi rhurhela [Apolosi aEfesa], va n’wi hlamusela swinene-nene Ndlela ya Xikwembu.” Leswi swi pfunile Apolosi swinene, hikuva endzhakunyana eAkaya “hi marito ya matimba, a a kanetana ni Vayuda erivaleni, a ri karhi a va komba hi Matsalwa leswaku Mesiya, hi yena Yesu.” (Mintirho 18:24-28) Kahlekahle, Apolosi a a dyondzisa hi vutshila ni ku hiseka.

‘Tivoneli Eku Dyondziseni Ka Wena’

5. Hi ku ya hi 1 Timotiya 4:16, hikwalaho ka yini hi fanele ku dyondzisa hi vutshila na hi ku hiseka?

⁵ Muapostola Pawulo u byele Timotiya munghana wakwe wa Mukriste a ku: “Tikambisise hi wexe, ni dyondzo leyi u yi dyondzisaka. Tiya eka swona, hikuva loko u endlisa sweswo, u ta tiponisa ni ku ponisa vayingisi va wena.” (1 Timotiya 4:16) Leswi ku ponisiwa ka mudyondzisi kun’we ni xichudeni swi nga ekhombyeni, kunene dyondzo yo tano yi fanele ku nyikeriwa hi vutshila ni ku hiseka.

6. Xana u nga va la swi kotaka ku tirhisa Matsalwa hi ndlela yihi, naswona i swivutiso swihi leswinene leswi nga kambisisiwaka?

⁶ Vavatli ni vahandzuri entiyisweni va fanele ku tikambisisa hi voxe. Va fanele va kota ku tirhisa nhundzu kumbe switirho swa vona hi mfanelo. Swi fanele ku va tano na hi mutirheli wa Mukriste, loyi xitirho xakwe lexikulu ri nga ‘tlhari ra moya, rito ra Xikwembu.’ (Vaefesa 6:17) Xana u nga swi kotisa ku yini ku tiva Matsalwa? Kavula ku nga va hi dyondzo ya nkarhi na nkarhi ni ku yi tirhisa. Kutani ke, xana u hlayile Bibele hinkwayo, u tikarhatela ku anakanyisisa hi ndzayo leyinene ya yona? U yi hlaya siku na siku ke? Xana u yi tirhisa nkarhi na nkarhi evutirhelini bya nsimu? Nakona xana u swi tirhisa hi xitalo swakudya leswi fuweke swa moya leswi phameriwaka hi Yehova hi ku tirhisa “nandza lowo tshembeka, Iowa vutlhari” ke?—Matewu 24:45-47.

7. I switsundzuxo swihi leswi nyikeriwaka malunghana ni nkarhi wa ku dyondza, nakona xilaveko xa dyondzo xi nga kombiwa njhani hi Matsalwa ke?

⁷ Tiyiseka hi ku tihlawulela nkarhi wo dyondza Rito ra Xikwembu ni tibuku ta Vukriste bya ntiyiso. Leswi swi ta tata miehleketo ya wena hi marungula lamanene lama nga ta ku pfuna ni lama nga tirhisiwaka ku hlamula lava vutisaka hi ku tiyiseka. (1 Petro 3:15; Vakolosa 4:6) Minkarhi yo dyondza ni ku anakanyisisa yi hambana hi ku ya hi mindyangu ni vanhu. Van’wana va nga ha kuma swi ri leswi pfunaka ku dyondza nimadyambu. Van’wana va nga ha va lava phaphameke kahle loko va pfuka. Kasi van’wana va nga ha kuma nkarhi wa ninhlikanhi wu ri lowu fanelaka swinene eka vona. Ku nga khathariseki, ku phikelela ni tinghitsi i swa nkoka lowukulu. Yoxuwa ni tihosi ta Israyele a va fanele ku hlaya Rito ra Xikwembu siku na siku.—Yoxuwa 1:7, 8; Deuteronoma 17:18-20.

Tirhela Ku Va Mudyondzisi La Antswaka

8. Xana ku tirhisiwa ka ku hlanganisela hi nhloko ku nga antswisa vutshila bya ku dyondzisa ka wena hi ndlela yihi?

⁸ Ku antswisa vutshila byo dyondzisa swi lava ku khoma la ku hisaka. Ndlela yin’wana yo antswisa vuswikoti bya wena byo va mudyondzisi i ku hlanganisela hi nhloko loko u ri karhi u dyondza Bibele kumbe tibuku ta Vukriste. Hlanganisa mianakanyo leyintshwa ni leyi ana se u yi tivaka. Leswi swi ta ku pfuna ku andlala mahungu emianakanyweni ya wena leswaku u ta kota ku hlamusela timhaka hi ku twakala loko u dyondzisa van’wana. Handle ko tilumaluma, u tirhisile ku hlanganisela loko u dyondza enkarhini lowu hundzeke. Hi xikombiso, hi nkarhi wun’wana u nga ha va u nga swi xiyanga leswaku Vakriste va fanele ku titsongahatela “tihosi” ta hulumendhe hi ku ringanisela. Kambe sweswi wa swi tiva leswaku ku yingisa Xikwembu ku fanele ku va ko sungula. (Varhoma 13:1-8; Marka 12:17; Mintirho 5:29) Leswi wa swi twisisa hikuva u hlanganisile tinhla letintshwa ni leti ana se a ti tiveka.

9. Kombisa ndlela leyi u nga xi vonaka ha yona xiendlakalo lexi tsariweke eBibeleni hi miehleketo.

⁹ Ndlela yin’wana yo antswisa vuswikoti bya wena byo dyondzisa i ku vona swiendlakalo leswi tsariweke eBibeleni hi mianakanyo. Hikwalaho ka yini u nga endli leswi hi Vaavanyisi 7:19-22 sweswi ke? Nivusiku, Gidiyoni na vavanuna va 300 va rhendzele muxaxa wa Vamidiyani laha a ka ha ku vekiwa varindzi. Xikan’we-kan’we, u twa ntlawa wa Gidiyoni wa vanhu va 100 wu chaya tinanga ta wona, ivi u va vona va faya timbita letikulu ta mati leti va ti rhwaleke. Vaisrayele lavan’wana va 200 va endla leswi fanaka. Naswona loko hinkwavo va ri karhi va tlakusela mavoni ya vona ehenhla, u va twa va huwelela va ku: “Tlhari ra Yehova ni ra Gideon!” Loko Vamidiyani lava chavisiweke va sungula ku baleka, mintlawa minharhu ya Gidiyoni yi hambeta yi chaya tinanga ta yona, naswona u kuma leswaku Yehova u endle leswaku valala lava balekaka va hundzukelana. Hi leswi u voneke xiendlo lexi hi miehleketo, handle ko tilumaluma u ta xi tsundzuka kahle naswona u ta swi kota ku xi tirhisa loko u dyondzisa van’wana. Entiyisweni, dyondzo yin’wana leyi xi yi dyondzisaka hi leswaku Yehova wa swi kota ku ponisa vanhu vakwe handle ka vuthu ra nyimpi ra matimba ra vanhu.—Psalma 94:14.

10. Eku dyondziseni, u nga xi tirhisisa ku yini xifaniso lexi kumekaka eka Vaavanyisi 9:8-15?

¹⁰ Swifaniso leswinene, ku katsa ni leswi swi nga eMatsalweni, naswona swi nga antswisa vutshila bya wena byo va mudyondzisi. Hi xikombiso, languta Vaavanyisi 9:8-15. Yotham n’wana Gidiyoni u vulavule hi nkarhi lowu mirhi yi yeke yi ya chela mufumi wa yona hi mafurha. Hambi leswi murhi wa mutlhwari, murhi wa nkuwa, ni vhinya yi aleke xikhundla xa vuhosi, ndzhenga wunene wu xi amukele hi ku chivirika. Mirhi ya nkoka a yi fanekisela lava faneriwaka hi vuhosi lava nga lavangiki ku fuma Vaisrayele-kulobye. Hambi swi ri tano, ndzhenga lowu faneriwaka hi ku tshiveriwa ntsena, a wu yimela vuhosi bya mudlayi Abimelek wa vutikukumuxi, la laveke ku fuma van’wana kambe a hetelela hi ku wela ekhombyeni eku hetisekeni ka vuprofeta bya Yotham. (Vaavanyisi 9:50-57) Xifaniso lexi xi nga tirhisiwa ku kandziyisa xilaveko xo endla leswinene ni ku titsongahata, hayi ku tikukumuxa.—Psalma 18:26, 27; 1 Petro 5:5.

11. (a) I tinhla tihi leti kandziyisiwaka hi xifaniso xa Yesu lexi tsariweke eka Matewu 13:45, 46? (b) Xivumbeko xa xifaniso xexo xi nyikela switsundzuxo swihi ehenhleni ka swifaniso leswi tirhisiwaka hi vadyondzisi va Vukriste?

¹¹ Mudyondzisi Lonkulu, Yesu Kriste, u tiveka kahle hi mhaka ya swifaniso swakwe leswinene. Hi xikombiso, xiya marito yakwe: “Naswona, Mfumo wa matilo wu fana ni muxavi la lavaka tidayimani letinene, kutani loko a kumile dayimani yin’wana ya nxavo lowukulu, a ya xavisa swilo swa yena hinkwaswo, a tixavela yona.” (Matewu 13:45, 46) Xisweswo Yesu a a fanekisela vunene bya Mfumo ivi a komba leswaku munhu la tlangelaka nkoka wa xiviri wo kuma wona u ta rhandza ku hambana ni nchumu wihi na wihi leswaku a ta wu kuma. A ku ri hava lexi nonohaka hi ta xifaniso xexo, naswona vadyondzisi va Vukriste va endla kahle ku tsundzuka mpimo wolowo loko va tirhisa swifaniso tanihi xipfuneto xo dyondzisa.

Minhlangano Yi Nga Hi Endla Lava Nga Ni Vutshila Swinene

12. Xana ku va kona eka tinkulumo ta le rivaleni swi nga ku pfunisa ku yini ku antswisa vuswikoti bya ku dyondzisa ka wena?

¹² Minhlangano ya Vukriste yi ni xiphemu xa nkoka eku endleni ka leswaku malandza ya Yehova ya va vadyondzisi va vutshila ni lava hisekaka. Tanihi laha Dyondzo ya Yesu ya le Ntshaveni yi kombaka ha kona, tinkulumo ta le rivaleni i switirho leswinene swo nyikela dyondzo ya moya. (Matewu 5:1-7:29) Hikwalaho ke, tinkulumo ta le rivaleni ti le xikarhi ka minhlangano ya Timbhoni ta Yehova namuntlha. Xana wa hlanganyela nkarhi na nkarhi? U muyingiseri lonene ke? Xana u pfula Bibele ya wena loko matsalwa ya hlayiwa hi xivulavuri? I ntolovelo wa wena ku teka tinhla ke? Leti i tindlela to antswisa vuswikoti bya wena byo va mudyondzisi, naswona dyondzo leyinene ya Matsalwa yi fanele ku engetela vuswikoti bya wena ni ku chivirika ka wena tanihi muendli wa vadyondzisiwa.

13, 14. (a) Xana ntirho wa ku endla vadyondzisiwa wu sungule rini ku va wa nkoka exikarhi ka malandza ya Yehova? (b) I swivutiso swihi leswi nga vutisiwaka khwatsi malunghana ni Dyondzo ya Xihondzo xo Rindza ni Dyondzo ya Buku ya bandlha?

¹³ Ntirho wo endla vadyondzisiwa wu vile wa nkoka swinene exikarhi ka malandza ya Yehova loko ku endliwa xirhambo xo ‘Twarisa Hosi ni Mfumo,’ lexi endliweke ro sungula eka nhlengeletano ya vona eCedar Point, Ohio, hi 1922. Nakambe elembeni rero, mintlawa ya tidyondzo ta Xihondzo xo Rindza hi Xinghezi yi lunghiseleriwile ro sungula. Magazini lowu hakunene wu rhangisile ku dyondzisiwa ka Bibele ni ku chumayeriwa ka Mfumo, vito ra wona ri ri Xihondzo xo Rindza Xi Huwelela Mfumo wa Yehova, Xana u muhlayi la chivirikaka wa Rito ra Xikwembu la pfuniwaka hi Xihondzo xo Rindza? U hlanganyela hi ku hiseka eka Dyondzo ya Xihondzo xo Rindza ya vhiki na vhiki xana?

¹⁴ Dyondzo ya Buku ya Bandlha ya vhiki na vhiki na yona yi pfula minkarhi yo antswisa vuswikoti bya wena bya ku va mudyondzisi wa mahungu lamanene. Loko u hlamula swivutiso eka minhlangano leyi yintsongo, kun’we ni le ka Dyondzo ya Xihondzo xo Rindza, xana u andlala timhaka hi marito ya wena ke? Xana tinhlamuselo ta wena ti kombisa leswi u swi pfumelaka embilwini ya wena?

15. Xana xikongomelo xa Nhlangano wa Ntirho hi xihi, naswona vukongomisi byi nyikeriwa hi ndlela yihi eka wona?

¹⁵ Ku nga si fika 1922, malandza ya Yehova hi ntolovelo a ma hlengeletanela Xikhongelo, Ku dzunisa, ni Nhlangano wa Vumbhoni exikarhi ka vhiki. A ku ri nkarhi wo yimbelela, wo nyika vumbhoni, ni wo khongela. Kambe hi ku kandziyisisiwa ka ku huweleriwa ka Mfumo hi yindlu na yindlu, nhlangano lowu wu endliwile Nhlangano wa Ntirho, lowu kandziyisaka ntirho wa ku chumayela. Lexi a xi pfuna ngopfu a ku ri Bulletin, leyi tameleke swiletelo swa ntirho wa nsimu ni “tinhlamuselo,” kumbe vumbhoni, lebyi nga tirhisiwaka evutirhelini. Namuntlha, Vutirheli Bya Hina Bya Mfumo byi nyikela mpfuno wo tano, kun’we ni vuleteri bya “Minhlangano Yo Hi Pfuna Ku Endla Vadyondzisiwa” ya vhiki na vhiki. Xana u hlanganyela nkarhi na nkarhi eka minhlangano yo tano ke? Wa yi tirhisa ndzayo leyi endleriweke ku hi pfuna ku dyondzisa hi vutshila ni ku hiseka xana?

16. Hi laha swi vuriweke ha kona eku sunguleni ka xona, xana xikongomelo xa Xikolo xa Vutirheli bya le Tilweni hi xihi?

¹⁶ Ku kurisa ku dyondzisa hi vutshila, Xikolo xa Vutirheli bya le Tilweni xi sunguriwile emabandlheni ya Timbhoni ta Yehova hi 1943. Malunghana ni xikongomelo-nkulu xa xikolo, buku ya xona yo sungula ya vukongomisi yi te: “Dyondzo leyi a yi endleriwanga ku teka nkarhi lowu tirhisiwaka entirhweni wa nsimu, kambe yi lunghiseriwe ku ku endla la wu endlaka kahle. Hi ku twakala, xikongomelo xa ‘Dyondzo leyi ya Vutirheli bya le Tilweni’ i ku lunghiselela ‘vanhu hinkwavo lava tshembekaka,’ lava tweke Rito ra Xikwembu ni ku pfumela eka rona, leswaku ‘va kota ku dyondzisa van’wana’ hi ku famba hi yindlu na yindlu, hi ku tlhelela [ku endla maendzo yo vuyela], ku komba vanhu madyondzele ni tidyondzo ta buku, naswona hi ku komisa, va hlanganyela eka xivumbeko xihi na xihi xa ntirho wa Mfumo. Ku hi xikongomelo xin’we xo endla leswaku un’wana ni un’wana a swi kota ku antswa ku va mutirheli wa Xikwembu leswaku ku dzunisiwa vito ra Hosi; leswaku a ta hloma ku antswa a twarisa ntshembo lowu nga eka yena erivaleni; leswaku a ta ‘swi kota ku dyondzisa, a leha mbilu, eku leteleni loku olovaka.’ (2 Tim. 2:24, 25) Ku nga tshuki ku va ni la rivalaka xikongomelo lexi xikulu xa dyondzo leyi.” (Dyondzo eVutirhelini bya le Tilweni, tluka 4) Lexi xi tshama xi ri xikongomelo-nkulu xa Xikolo xa Vutirheli bya le Tilweni. Xana a wu tirhisa marungula lamanene eku dyondziseni, eku hlayeni, eku vulavuleni ka le rivaleni, ni swin’wana leswi humelelaka etibukwini leti ta xikolo?a U tsarisile exikolweni ke? Xana hi ntsako wa amukela ni ku endla swiavelo swa wena eka nongonoko wa xikolo? Lunghiselelo leri ra Yehova hi ku tirhisa nhlengeletano yakwe ri nga pfuna ku ku endla mutirheli wa vutshila ni wo hiseka.

Ku Leteleriwela Ku Dyondzisa Hi Ku Hiseka

17. I malunghiselelo wahi ya moya lawa Yehova a ma endleleke lava dyondzisaka van’wana ntiyiso wakwe lowo hlawuleka?

¹⁷ Yehova u va endlela malunghiselelo yo tala ya moya vanhu lava nga ni lunghelo ro dyondzisa van’wana hi ntiyiso wakwe lowu hlawulekeke. Exikarhi ka swin’wana, u lunghiselela dyondzo ya Bibele, minhlangano ya vhiki na vhiki, ni tinhlengeletano letikulu. Malunghiselelo yo tano lamanene ya endla leswaku Timbhoni leti tinyiketeke ti swi kota ku va vadyondzisi va vutshila ni lava hisekaka.

18. Hi ku landzela swikombiso swa Yesu na Pawulo, i malunghiselelo wahi lawa vakulu va nga ha ma endlaka ku yisa vutirheli bya nsimu emahlweni namuntlha?

¹⁸ Kambe ku vuriwa yini loko hi hlawuriwe tanihi vakulu kumbe hi ri timbhoni ta Yehova leti nga ni ntokoto lowukulu? Manuku rirhandzu ra van’wana ri fanele ku hi susumetela ku pfuna Vakriste lavantshwa ni lava nga ni ntokoto wuntsongo leswaku va va vadyondzisi va vutshila lebyikulu ni lava hisekaka. Kunene leswi swi fanerile, hikuva Yesu u rhumile vadyondzisiwa vakwe va 70 ntsena endzhaku ka loko a va nyikile swileriso swa vutirheli bya vona. (Luka 10:1-24) Pawulo u dyondzisile valanguteri va le Efesa “erivaleni ni le tindlwini,” nakona leswi a swi ta katsa ku va letelela ku veka vumbhoni eka lava nga pfumeriki loko va ri karhi va famba hi yindlu na yindlu evutirhelini bya nsimu. (Mintirho 20:20, 21) Hi ku fanana, vakulu, maphayona, ni van’wana va nga letela Timbhoni-kulobye evutirhelini bya nsimu namuntlha. Xana wa xi vona xilaveko xa vuleteri byo tano ke? Hikwalaho byi lavi hi tindlela hinkwato ni ku byi amukela. Xana u nkulu? Kutani endla malunghiselelo yo letela van’wana evutirhelini loko wena hi wexe u veka xikombiso hi ku hiseka entirhweni wa nsimu.

Yana eMahlweni U Kurisa Vutshila

19. Hikwalaho ka yini hi fanele ku khongelela vutirheli bya hina?

¹⁹ Vahandzuri, vavatli, ni van’wana va nga va ni vutshila lebyikulu hi ku hambeta va dyondza ni ku tirhisa vutivi lebyi va byi kumeke. Swi tano na hi vatirheli va Vakriste. Hikwalaho ke, i swa nkoka swonghasi leswaku mbhoni yin’wana ni yin’wana ya Yehova leyi tinyiketeke yi tirha hi matimba ku kurisa vutshila bya yona byo va mudyondzisi wa mahungu lamanene! Naswona leswi lowu wu nga ntirho wa Yehova, wu fanele wu va wona lowu hi wu khongelelaka hi ku hiseka. Loko hi lava mpfuno ni nkongomiso wa Xikwembu, hi nga tiyiseka leswaku xi ta katekisa vutirheli bya hina bya ku chivirika. Hi laha muapostola Yohane a vuleke ha kona: “Hi amukela eka [Yehova Xikwembu] hinkwaswo leswi hi swi kombelaka, hikuva hi hlayisa milawu ya xona ni ku endla leswi xi swi tsakelaka.”—1 Yohane 3:22.

20. Tanihi Timbhoni ta Yehova, ku tiyimisela ka hina ku fanele ku va kwihi loko mafambiselo lawa ya tshinelela makumu ya wona ke?

²⁰ Leswi mafambiselo lawa yo biha ya swilo ma tshinelaka emakun’wini ya wona, hikwalaho ke, onge hi nga tikarhata hi ku chivirika evutirhelini. Onge hi nga ‘tikambisisa hi hexe ni dyondzo leyi hi yi dyondzisaka,’ leswaku hi ta tiponisa ni ku ponisa lava hlayisaka mahungu ya Mfumo. Ina-ka, a hi endleni matshalatshala wahi ni wahi yo dyondzisa hi vutshila ni ku hiseka.

[Nhlamuselo ya le hansi]

A Wu Ta Ku Yini Xana?

◻ Handle ka ku chumayela, ntirho wa ku endla vadyondzisiwa wu lava yini?

◻ Hikwalaho ka yini swi ri swa nkoka ku ‘kambisisa ku dyondzisa ka wena’?

◻ Hi tihi tindlela tin’wana to antswisa vutshila byo dyondzisa?

◻ Xana minhlangano ya Vukriste yi nga hi pfunisa ku yini leswaku hi va vadyondzisi va Rito ra Xikwembu lava nga ni vutshila ni ku hiseka?

◻ Xana i yini lexi vakulu ni timbhoni tin’wana leti nga ni ntokoto va nga xi endlaka malunghana ni vutirheli bya nsimu?

[Xifaniso eka tluka 15]

Muleteri wa Xikolo xa Vutirheli bya le Tilweni u pfuna swichudeni ku va ni vutshila entirhweni wa Mfumo