Vatirheli Va Xikwembu Va Kombisa Ku Faneleka Ka Vona
“Xana i mani loyi a faneriwaka?”—2 VAKORINTO 2:16.
1. Eka misava ya namuntlha leyi avanyisiweke hi vukhongeri, i xivutiso xihi lexi nga ha tlakusiwaka hi ku tiyiseka hinkwako?
EKA misava ya namuntlha leyi avanyisiweke hi vukhongeri, xivutiso lexi xi nga ha vutisiwa hi ku tiyiseka hinkwako: Entiyisweni i mani mutirheli la fanelekaka wa Xikwembu? Hi ku fanana, muapostola Pawulo u vutisile a ku: “Xana i mani loyi a faneriwaka?” Loko va tlhontlhiwile, Pawulo ni vatirhi-kulobye va swi kotile ku vula va ku, ‘Hi hina’! (2 Vakorinto 2:16, 17) Kambe namuntlha, i vamani lava nga ni xisekelo lexi tiyeke, lunghelo, ni xivindzi xo hlamula va ku: ‘Hi hina’?
2. Hi wihi ntikelo wa marito ya Pawulo eka 2 Vakorinto 2:14-17 ke?
2 Loko hi nga si hlamula xivutiso xexo, a hi kambisiseni marito lawa ya Pawulo lama yaka eka Vakriste eKorinto: “Kambe a ku nkhensiwe Xikwembu . . . kutani, hi ku tirhisa hina, xi hangalasa hinkwako ku nun’hwela loku nandzihaka ka ku tiva Kriste. Hikuva hi hina hi nga ku nun’hwela loku nandzihaka ka Kriste hi byakwe, loku hangalakaka hi vito ra Xikwembu exikarhi ka lava ponisiwaka ni ka lava lovaka; eka lava lovaka i masema ya rifu; kambe eka lava ponisiwaka, i ku nun’hwela ka vutomi. Xana i mani loyi a faneriwaka hi ntirho hinkwawo lowu ke? Hikuva a hi fani ni lavo tala, lava endlaka bindzu lero biha hi Rito ra Xikwembu; kambe hi vulavula kukotisa vanhu va timbilu leto tenga, kukota lava rhumiweke hi Xikwembu; hi vulavula emahlweni ka Xikwembu hi ri va ka Kriste.”—2 Vakorinto 2:14-17, vona Xihondzo xo Rindza, xa Xinghezi xa May 1, 1944, matluka 133-4.
3. (a) Hi fanele ku endlisa ku yini hi mianakanyo yo xavisa Rito ra Xikwembu hi ku lava ku vuyeriwa ka vutianakanyi? (b) Pawulo u endle yini leswaku a papalata ku va ndzhwalo wa swa timali eka lava a chumayeleke eka vona?
3 Ku xavisa Rito ra Xikwembu hi ku navela ku vuyeriwa ka vutianakanyi—mianakanyo yo tano ya nyenyetsa swonghasi! Pawulo a nga lavanga ku vuyeriwa hi swa timali hi ku chumayela Rito rolero leswaku a ta hanya vutomi byo olova, eku heteleleni a wisa evutirhelini ivi a ntshunxeka eka masiku yakwe lama saleke. A swi tsakela ku endla mintsonga [mathende] tanihi ntirho wakwe wa le tlhelweni leswaku a tikumela mali yakwe kutani a pfuna vanghana vakwe entirhweni wa Yehova. (Mintirho 18:1-4) Pawulo a nga kalanga a va ndzhwalo wa swa timali eka lava a chumayeleke mahungu lamanene eka vona. Hikwalaho a a ta swi kota ku vutisa Vakriste va le Korinto a ku: “Xana a ku ri ku dyoha ke, loko ndzi titsongahatile leswaku n’wina mi tlakusiwa, ni loko ndzi twarisile Mahungu Lamanene ya Xikwembu eka n’wina, ndzi nga kombelanga hakelo ke?” (2 Vakorinto 11:7) Xivutiso xexo a xi fanele ku hlamuriwa hi e-e la kongomeke!
4. Timbhoni ta Yehova ti tekelela xikombiso xa Pawulo mayelana ni Rito ra Xikwembu hi ndlela yihi?
4 Namuntlha Timbhoni ta Yehova ti tekelela xikombiso lexinene xa muapostola hi ku ka ti nga xavisi Rito leri nga hava nxavo ra Xikwembu kambe ti endla leswaku ri kumeka eka hinkwavo. A va bindzurisi hi wona nchumu wo tano lowu kwetsimeke. Xisweswo va hava vafundhisi lava hakeriwaka, swivulavuri swa vona swa le rivaleni a swi lavi mali loko swi nyikela tinkulumo, naswona ndhichi ya munyikelo a yi fambisiwi eminhlanganweni ya vona. Loko munhu a lava ku nyikela mali ya ntirho, a nga lahlela mpimo wihi na wihi, hambi wu ri lowu fanaka ni “swimalana swimbirhi leswi lavaka ku ringana sente” swa noni, ebokisini ra minyikelo eHolweni ya Mfumo kumbe kun’wana. (Luka 21:1-4) Minyikelo yo tano yo tirhandzela yi tirhisiwa ku hakelela leswi onhakeke naswona hayi ku fumisa munhu wo karhi. Hambi ya ri makaya ya munhu hi xiyexe ya tirhiseriwa minhlangano ya Timbhoni ta Yehova mahala.—Filemoni 1, 2.
“Loyi A Faneriwaka”
5. I mani la endleke leswaku Timbhoni ta Yehova ti fanelekela ntirho lowo hlawuleka?
5 Kambe i mani namuntlha la endleke leswaku Timbhoni ta Yehova ti faneriwa hi ku hambeta ti landzela ntila wo tano wa Matsalwa ku nga khathariseki nxaniso ni nkaneto hinkwawo lowu ti hlangavetanaka na wona nkarhi na nkarhi ke? Ku hava la nga tihlamulelaka eka leswi handle ka Munhu loyi a endleke leswaku Pawulo ni vanghana vakwe va fanelekela ntirho lowo hlawuleka. Xiyisisa ku tenga ka nsusumeto wa Pawulo, ku hambana ni nsusumeto wa vaxavisi va vukhongeri, hi laha a hlamuseleke ha kona a ku: “Hi vulavula kukotisa vanhu va timbilu leto tenga, ku kota lava rhumiweke hi Xikwembu; hi vulavula emahlweni ka Xikwembu hi ri va ka Kriste.” (2 Vakorinto 2:17) Leyi i ndlela leyi Timbhoni ta Yehova ti vulavulaka ha yona namuntlha. Kambe xana ha tibumabumela tanihi vatirheli ke? Xana hi fanele ku humesa mapapila ya xibumabumelo eka van’wana ke?
6. (a) Hikwalaho ka yini vafundhisi va Vujagana va anakanya leswaku hi lava va “faneriwaka” ke? (b) Kambe xana hi wahi masungulo ya munhu la faneriwaka hi vutirheli bya ntiyiso bya Vukriste?
6 Pawulo u landzurile ku faneleka ka vutirheli bya yena tanihi nchumu lowu a tiendleleke wona. U te: “Hi xona [Xikwembu] lexi hi nyikeke hinkwaswo leswi a hi swi pfumala, loko xi hi endlile malandza ya ntwanano lowuntshwa.” (2 Vakorinto 3:4-6) Ku hambana na Pawulo, vafundhisi va Vujagana va tivula lava “faneriwaka” hikwalaho ka leswi va thwaseke eswikolweni swa vufundhisi. Hikwalaho va ala leswaku lava va nga riki mathwasani ya xikolo lexi i vatirheli lava fanelekaka lava nga ni lunghelo ro dyondzisa. Kambe dyondzo ya Pawulo leyi hlawulekeke eka Vayuda a yi n’wi endlanga leswaku a fanelekela vutirheli bya Vukriste malunghana ni ntwanano lowuntshwa. Naswona Yesu a nga va simekelangi xikolo xo karhi xa vufundhisi vaapostola vakwe va 12 kumbe munhu wihi na wihi leswaku a va kona. Swi tano ni namuntlha, ku faneleka ka munhu ku va evutirhelini bya ntiyiso bya Vukriste ku fanele ku huma eka Yehova, Mudyondzisi lonkulu. Kavula, mutirheli wo tano u fanele ku nyika vumbhoni lebyi nga landzulekiki ni kantsongo.
“Matimba Wolawo, U Nyikiwile Hi Mani Xana?”
7. Varhangeri va vukhongeri a va hambana njhani na Nikodema hi ndlela leyi va languteke matimba ya Yesu ha yona?
7 Varhangeri va vukhongeri va tlhontlhe ni lunghelo ra N’wana wa Xikwembu ro chumayela mahungu lamanene ni ku endla masingita. Etempeleni, “vaprista lavakulu ni vakulukumba va tiko va ta ka yena a ri karhi a dyondzisa, va ku ka yena: ‘Xana u endla swilo leswi hi matimba wahi ke? Naswona matimba wolawo, u nyikiwile hi mani xana?’” (Matewu 21:23) Va arile ku amukela makumu lawa Nikodema mufumi wa Vayuda a ma endleke loko a byele Yesu a ku: “Mufundhisi, ha swi tiva leswaku u mudyondzisi la humaka eka Xikwembu, hikuva a ku na munhu la nga endlaka mahlori lawa u ma endlaka, loko Xikwembu xi nga ri na yena.”—Yohane 3:1, 2.
8. Endzhaku ka malembe lama tlulaka manharhu ya vutirheli bya Yesu, varhangeri va Vayuda va endlise ku yini ehenhleni ka xikombiso xa vumunhu ni matimba yakwe ke?
8 Yesu a a ta va a swi kotile ku byela vatlhontlhi vakwe a ku: ‘Mintirho ya mina a yi tivulavulele!’ Endzhaku ka malembe lama tlulaka manharhu ya ntirho wakwe wa vutomi wa le rivaleni, vaprista lavakulu ni vakulukumba a va ri ni swikombiso swo tala leswi a va ta seketela makumu lama kongomeke eka swona malunghana ni vumunhu ni lunghelo ra Yesu ro endla masingita ni ku dyondzisa ntiyiso hi ta Mfumo wa Xikwembu. Kahle-kahle a va tiomisa tinhloko swinene lerova va nga byi amukeli vumbhoni hinkwabyo lebyi Yehova a a byi nyikela ku kombisa leswaku Yesu a ri Mesiya la tshembisiweke.
9, 10. (a) Hikwalaho ka yini swi nga fanelanga ku hlamarisa Timbhoni ta Yehova leswi ku faneleka ka tona tanihi vatirheli ku soriwaka namuntlha ke? (b) Yesu u hanyisane njhani na varhangeri va vukhongeri lava tlhontlheke matimba yakwe, naswona i vuyelo byihi lebyi leswi swi veke na byona?
9 Hikwalaho ka leswi swi humeleleke emhakeni ya Yesu, a swi ti hlamarisi Timbhoni ta Yehova leswi ku faneleka ka tona tanihi vatirheli lava fanelekaka va Tata wakwe ku soriwaka hi varhangeri va vukhongeri namuntlha. Tanihi leswi lavaya va tlhontlheke matimba ya Yesu va honiseke mintirho yakwe yo tala ya masingita, u tlakuse xivutiso lexi xi va vekeke endhawini leyi va faneleke. Naswona vadyondzisiwa vakwe va namuntlha va nga endla nchumu lowu fanaka eka lava va honisaka mintirho ya vadyondzisiwa volavo ha vomu.
10 Loko vaprista lavakulu ni vakulukumba va vutise Yesu va ku, “Matimba wolawo, u nyikiwile hi mani xana?” a nga vutisanga xivutiso xo nonon’hwa kambe u te: “Na mina, ndzi ta mi vutisa xivutiso xin’we; loko mi ndzi hlamula xona, hi kona na mina ndzi nga ta mi byela lomu matimba wolawo ndzi endlaka swilo leswi ha wona, ma humaka kona. Xana nkhuvulo wa Yohane a wu huma kwihi ke? A wu huma etilweni, kumbe eka vanhu ke?” Mhaka ya engetela: “Vona va kanetana va ku: ‘Loko hi ku: A wu huma etilweni, u ta ku: Loko swi ri tano, a mi pfumelanga eka yena ha yini ke? Kambe loko hi ku: A wu huma eka vanhu, hi chava ntshungu, hikuva hinkwavo va khoIwa leswaku Yohane a a ri muprofeta. Kutani va hlamula Yesu, va ku: A hi swi tivi! Hi loko a ku ka vona: Na mina, a ndzi nga mi byeli lomu matimba lawa ndzi endlaka swilo leswi ha wona, ma humaka kona.’” (Matewu 21:23-27) Namuntlha, Timbhoni ta Yehova ti nga vutisa vafundhisi hi Matsalwa hi ndlela leyi nga ni vuyelo byebyo.a
11. I ntirho wihi lowu vanhu va Yehova va wu endleke emahlweni ka 1914, naswona swi solo swa vona swi miyetiwe njhani?
11 Ku sukela hi 1876 ku ya emahlweni, vanhu va Yehova va tsundzuxile misava, naswona ngopfu-ngopfu Vujagana, leswaku Minkarhi ya Vamatiko a yi ta hela eku heleni ka 1914. (Luka 21:24, King James Version) Vafundhisi va hlulekile ku honisa ntirho lowu wo lunghiselela wa malembe lama nga vaka 40—ntirho lowu fanaka ni lowuya wa Yohane Mukhuvuri. Vafundhisi volavo hi ku hiseka va rindzele ku hlasela muhleri wa magazini lowu loko 1914 yo hundza ku nga si endleka swiendlakalo leswi hlawulekeke leswi fambisanaka ni leswiya a swi tsundzuxeke. Kambe, oho, ndlela leyi va miyetiweke ha yona loko hi July 28, 1914, ku rhula ku herisiwile hi ku tlhekeka ka Nyimpi yo Sungula ya Misava!
12. I ku nonon’hwa kwihi loku fambisaneke ku tlhela ku landzela Nyimpi yo Sungula ya Misava?
12 Ku onha ka nyimpi ni ku tshika ka vanhu vo tala ku phikelela vurimi swi tise tindlala. Ku tsekatseka ka misava ku khumbe swiphemu swo hambana-hambana swa misava, ku vanga ku onhaka ni ku xaniseka lokukulu. Hi 1915 ku tsekatseka ka misava eAvezzano, eItaly, ku dlaye 29 970, naswona ku tsekatseka loku hlamarisaka hi 1920 ku dlaye 200 000 eKansu Province, le China. Hi 1923, lava va tlulaka 140 000 va file eku ninginikeni ka misava ka Great Kanto eJapani. Eku heleni ka nyimpi ku humelerile chachalaza ya le Spain leyi hi lembe rin’we yi dlayeke vanhu lava tlulaka lava dlaweke eka mune wa malembe ya nyimpi. Lexi nga fanelangiki ku biwa hi makatla a ku ri nxaniso wa malandza ya Yehova enkarhini wa mpfilu-mpfilu wolowo wo sungula wa misava, lowu chaputeke hi ku khotsiwa ka tihanyi ka tin’hweti ta nkaye ka muungameri ni matsalani wa Sosayiti ya Watch Tower kun’we ni tsevu wa vatirhi-kulobye.
13. I yini lexi Timbhoni ta Yehova ti xi vutiseke vafundhisi va Vujagana, naswona vasori lava a va ta boheka ku pfumela yini loko a va lo hlamula hi ku tshembeka?
13 Ku sukela eku heleni ka Nyimpi yo Sungula ya Misava, Timbhoni ta Yehova ti vutisile vafundhisi va Vujagana ti ku: ‘Xana swiendlakalo leswi chavisaka leswi hlaseleke misava ya hina ku sukela hi 1914 ku ya emahlweni i ku hetiseka ka vuprofeta bya Yesu eka Matewu 24:3-13 ke?’ Loko vafundhisi volavo a va lo ina hi ku tshembeka, a va ta fanela ku pfumela leswaku Yesu Kriste u nghenile eMfun’weni wakwe wa le tilweni hi 1914. Entiyisweni, tanihi leswi Yesu a vuleke leswaku ‘misava a yi nga ha n’wi voni’ ni leswi sweswi a nga munhu wa moya la nga fiki, ku “vuya,” kumbe “vukona” byakwe a byi vonaki. (Yohane 14:19; Matewu 24:3, KJ; 1 Petro 3:18) Kambe ku pfumela hinkwaswo leswi a swi ta sivela vafundhisi ku vula leswaku swiendlakalo leswi ninginisaka misava swa 1914-18 a swo va nyimpi leyi tolovelekeke ntsena ya matiko ematin’wini.
14. (a) Loko varhangeri va vukhongeri a va lo hlamula kahle, i ntirho wihi lowu leswi a swi ta va boha ku hlanganyela eka wona? (b) I xikhomela-ndhawu xihi xa Mfumo lexi a va ta fanela ku xi fularhela, kambe i ndlela yihi leyi va yi phikeleleke?
14 Ku tlula kwalaho, loko vafundhisi va Vujagana a va lo pfumela leswaku swiendlakalo swa 1914-18 swi funghe ku sungula ka ku hela ka mafambiselo ya khale ya swilo, a va ta boheka ku xiya timhaka tin’wana ta “xikombiso” xa “vukona” bya Yesu naswona a va ta fanela ku hlanganyela eku hetisekeni ka marito yakwe lama nge: “Evangeli leyi ya Mfumo yi ta twarisiwa emisaveni hinkwayo, leswaku yi va vumbhoni eka vanhu va matiko hinkwawo.” (Matewu 24:14) Sweswo a swi ta vula ku chumayela, hayi Evhangeli leyi va yi chumayeleke hi malembe xidzana, kambe mahungu lamanene ya Mfumo lowu tlhomiweke ematilweni eku heleni ka Minkarhi ya Vamatiko hi 1914. A va ta landzula Ntwanano wa Matiko tanihi “xikombiso xa politiki xa Mfumo wa Xikwembu emisaveni” kutani va languta wona ni mulandzeri wa wona, ku nga Nhlangano wa Matiko, tanihi ‘manyala layo chavisa exivandleni lexo hlawuleka.’ (Matewu 24:15, KJ) Kambe ku ta fika elembeni ra 1985, vafundhisi va Vujagana va ala ku fungha Ntwanano wa Matiko ni Nhlangano wa Matiko tanihi “manyala” wolawo, kumbe ‘nchumu lowu nyenyetsaka.’
15. Hi byihi vumundzuku lebyi rindzeleke vafundhisi, kambe i yini lexi Timbhoni ta Yehova a ti ri karhi ti xi endla?
15 Hikwalaho vafundhisi va Vujagana va ala ku yimela Mfumo wa Yehova ha Yesu Kriste. Hikwalaho ko tsandzeka ku wu seketela, va ta herisiwa ‘enhlomulweni lowukulu’ lowu nga emahlweni. Kambe ku hambana na vona, Timbhoni ta Yehova ti fularhele Babilona Lonkulu, mfumo wa misava wa vukhongeri byo hemba, naswona ti chumayela rungula ra Mfumo ematikweni ya 203. Ntirho lowu wu nga ringanisiwiki i mhaka leyi hlawulekeke ya “xikombiso” lexi xi kombaka leswaku hi 1914 Yesu u vekiwile Hosi ematilweni, leswaku a fuma exikarhi ka valala va yena.—Matewu 24:3, 14, 21; Psalma 110:1, 2; Nhlavutelo 18:1-5.
Xana Xi Kona Xilaveko Xa Xibumabumelo?
16. I swivutiso swihi leswi tlakukaka malunghana ni xibumabumelo, naswona i yini leswi Pawulo a swi vulaka malunghana ni leswi?
16 Xana hi tibumabumela tanihi timbhoni leti totiweke ta Yehova handle ka xisekelo ke? Kambe, xana hi kunguhata timhaka hi vutlhari leswaku hi ta simeka xibumabumelo xo tano eka “tinyimpfu tin’wana” ta Yesu ke? (Yohane 10:16) Pawulo a nga wu endlanga nchumu wo tano kambe u swi kotile ku byela Vakorinto lavaya va hundzukeke Vakriste hikwalaho ka matshalatshala yakwe lama nga karhaliki a ku: “Xana ho tlhela hi sungula ku titivisa ke? Xana hi fanele ku kuma mapapila lama hi tivisaka eka n’wina, kumbe lama humaka eka n’wina ku fana ni leswi van’wana va endlisaka swona ke? E-e! Hi n’wina mi nga papila ra hina, leri tsariweke etimbilwini ta hina, leri tiviwaka ni leri nga hlayiwaka hi vanhu hinkwavo. Swa vonaka swinene leswaku n’wina mi papila ra Kriste, leri humesiweke hi hina, leri tsariweke ku nga ri hi inki kambe hi Moya wa Xikwembu lexi hanyaka; a ri tsariwanga ematambeni ya maribye, kambe ri tsariwile etimbilwini ta vanhu.”—2 Vakorinto 3:1-3.
17. Hikwalaho ka yini ku nga vuriwaka leswaku Pawulo a a fanelekela vutirheli, naswona emhakeni leyi, i yini leswi nga vuriwaka hi Timbhoni ta Yehova ke?
17 Hi mpfuno wa moya wa Yehova, Pawulo u tsale tibuku ta Bibele to hlayanyana naswona u endle leswaku vo tala va hundzukela eVukristeni. Hikwalaho hakunene u tikombe a ri la faneriwaka hi vutirheli bya Vukriste. Eku fambisaneni ka manguva lawa, ngopfu-ngopfu ku sukela loko magazini lowu wu humesiwile ro sungula hi 1879, masalela lama totiweke ya vadyondzisiwa va Kriste, hambi leswi ya nga huhuteriwangiki hi laha Pawulo a a huhuteriwe ha kona, ya humese tibuku to tala ta Bibele. Ku sukela hi 1920, va humesile magidi ya timiliyoni ta tibuku, swibukwana, timagazini, na swiphephana hi tindzimi to tala. Tibuku leti ti hangalasiwile hi nxavo wa le hansi, to tala ta tona ti nyikiwile swisiwana mahala. Sosayiti ya Watch Tower yi tlhele yi lunghiselela tinkulumo ta Bibele ta mahala naswona yi rhumele varhumiwa etindhawini leti nga tirhiwangiki emisaveni hinkwayo. Makume ya magidi ya amukerile rungula leri kandziyisiweke ni leri vuriwaka kunene naswona ma kombisile ku tinyikela ka wona eka Yehova Xikwembu hi ku khuvuriwa, ngopfu-ngopfu ku sukela hi 1935 loko swi vekiwe erivaleni leswaku “ntshungu lowukulu” lowu nga pimiwangiki wa “tinyimpfu tin’wana” ta Yesu wu nga langutela vutomi lebyi nga heriki eparadeyisini leyi pfuxetiweke emisaveni.—Nhlavutelo 7:9-17; Luka 23:43.
18. Loko ya tlhontlhiwa leswaku ya kombisa ku faneleka ka wona tanihi vatirheli, masalela lama totiweke ma nga komba yini?
18 Hikwalaho ke, ku vuriwa yini loko vafundhisi va tlhontlha masalela lama totiweke leswaku ya humesa mapapila ya vumbhoni tanihi Madokodela ya Xikwembu ke? Kunene, malandza lawa ya Yehova ya nga nyika vumbhoni bya nkoka swinene! Sweswi ya nga komba eka lava tlulaka timiliyoni timbirhi na hafu va “tinyimpfu tin’wana” emisaveni hinkwayo naswona va nga ku: ‘Papila ra hina ro hi seketela hi rero!’ Va nga teka marito ya Pawulo kutani va byela swirho swa “ntshungu lowukulu” va ku: “Hi n’wina mi nga papila ra hina, leri tsariweke etimbilwini ta hina, leri tiviwaka ni leri nga hlayiwaka hi vanhu hinkwavo.” (2 Vakorinto 3:2) Vafundhisi va Vujagana a va hlaye papila rolero ri hanyaka leri endliweke hi Vakriste lava tinyiketeke, lava khuvuriweke lava va tirhelaka Yehova Xikwembu vusiku ni nhlikanhi etempeleni yakwe ni lava va pfunetaka ku ‘chumayela mahungu lamanene ya mfumo emisaveni hinkwayo leswaku byi va vumbhoni eka matiko hinkwawo.’ (Matewu 24:14) Ku fana ni masalela lama totiweke, va tikomba va ri lava faneriwaka hi vutirheli bya Vukriste.
19. I papila rihi ra nkoka ra xibumabumelo leri nga ta hlayisiwa ri hundza eHar-Magedon xana?
19 Papila leri ra nkoka ra xibumabumelo ri nga ka ri nga herisiwi ‘enyimpini leyi tshinelaka ya siku lerikulu ra Xikwembu xa Matimba hinkwawo’ exivandleni xo fanekisela lexi vuriwaka Har-Magedon. (Nhlavutelo 16:14-16) Kambe ke, ri ta sirheletiwa ni ku hlayisiwa hi Xikwembu xa Matimba hinkwawo leswaku ri ta kombisiwa eka mafambiselo ya swilo ya le ndzhaku ka Har-Magedon ehansi ka Hosi Kriste. Mawaku papila ra matimba leri “ntshungu lowukulu” wu nga ta va rona eka tibiliyoni ta vanhu lava feke lava Yehova Xikwembu, ha Yesu Kriste, manuku a nga ta va pfuxa emasirheni emisaveni hinkwayo! Hikwalaho n’wina masalela lama totiweke, hambetani mi tsala! Naswona n’wina “ntshungu lowukulu” wa “tinyimpfu tin’wana” ta Murisi Lonene, hambetani mi va pfuna!
[Nhlamuselo ya le hansi]
a Hi xikombiso, vona tindzimana 3 na 14 laha hansi
Tinhlamuselo Ta Wena Hi Tihi Xana?
◻ Timbhoni ta Yehova titekelela Pawulo emhakeni ya ku nga xavisi Rito ra Xikwembu hi ndlela yihi?
◻ Masungulo ya ku fanelekela ka munhu vutirheli bya ntiyiso bya Vukriste hi wahi xana?
◻ Loko varhangeri va vukhongeri a va lo pfumela kahle, i ntirho wihi lowu a va ta boheka ku hlanganyela eka wona?
◻ Masalela lama totiweke ya nga komba eka papila rihi ra ntikelo leri kombaka leswaku i vatirheli lava fanelekaka?
[Xifaniso eka tluka 15]
Yesu u dyondzise vadyondzisiwa vakwe ku va vatirheli, kambe a nga xi simekanga xikolo xo karhi xa vufundhisi
[Xifaniso eka tluka 17]
Tanihi vatirheli lava fanelekaka, Timbhoni ta Yehova ti chumayela mahungu lamanene ya Mfumo lowu tlhomiweke. Wena ke?