Vatshoveri Vo Tala—Va Laveka Hi Xihatla

“Ku tshovela i kukulu kambe vatirhi a va talanga; hikokwakaho khongelani n’wini wa tshovela leswaku a rhuma vatirhi eku tshoveleni ka yena.”—LUKA 10:2

1. U nga anakanyisisa njhani ehenhleni ka marito ya Yesu lama nga eka Luka 10:2, kambe i yini lexi u nga tsundzuxiwaka khwatsi ku xi endla?

LOKO u ri karhi u hlaya marito lama ya Yesu, xana wa swi vona leswaku ma katsa na wena? Tanihi leswi ma vuriweke malembe xidzana ya 19 lama hundzeke, u nga ha voyamela emhakeni yo anakanya leswaku a ma ha ri ya nkoka. Makumu yo tano ya xihatla hakunene a ya ta va xihoxo. Leswaku hi vona ntikelo lowu heleleke wa marito ya Yesu, a hi languteni endzhaku eka leswi swi humeleleke loko nhlamuselo leyi yi endliwa ro sungula, ivi manuku hi kambisisa xiyimo xa hina vini namuntlha.—Ringanisa 1 Vakorinto 10:11.

2. Xana i xiyimo xihi lexi lavaka goza ra xihatla lexi kongomaneke na Yesu hi 32 C.E., naswona u hlangavetane njhani na xona?

² Hi 32 C.E., loko nkhuvo wa Mintsonga wu hundzile, a ku sale tin’hweti ta tsevu ntsena leswaku Yesu a fa emhandzini ya nxaniso. Ku pfuneta leswaku ku hatlisisiwa ntirho wo chumayela, Yesu u rhume vadyondzisiwa va yena va 70 ‘ha vambirhi-mbirhi, leswaku va n’wi rhangela emahlweni, emitini hinkwayo ni hinkwako lomu a a anakanya ku hundza hi kona.’ Va fambile ni marito ya Yesu ya ri karhi ya duma etindleveni ta vona: “Ku tshovela i kukulu, kambe vatirhi a va talanga; hikokwalaho, khongelani n’wini wa ku tshovela leswaku a rhuma vatirhi eku tshoveleni ka yena.”—Luka 10:1, 2.

Vuyelo Bya Ntshovelo Lowukulu

3. Hlamusela vuyelo byin’wana bya vutirheli bya Yesu bya ku chumayela loku andzeke eka tin’hweti ti nga ri tingani leti hundzeke.

³ Xana vuyelo bya matshalatshala lawa ma engetelekeke yo chumayela byi ve byihi? Ha hlaya: “Lava 70 va vuya hi ku tsaka, va ku: Hosi, na wona mademona, hi vito ra wena ma hi yingisa.” Mawaku xikombiso lexi hlamarisaka xa matimba ya Xikwembu ehenhla ka mademona! Xiviko xo tano xa ntirho lowunene hakunene xi nyanyule Yesu, hikuva u te: “A ndzi vona Sathana, a wa hi le tilweni tani hi rihati.” (Luka 10:17, 18) Yesu u swi tivile leswaku Sathana ni mademona ya yena a va ta hlongoleriwa makumu etilweni endzhaku ka ku tswariwa ka Mfumo wa Vumesiya ematilweni. Kambe loko Yesu a ha ri emisaveni, ku cukumetiwa loku ka mademona lama nga voniwiki hi vanhu ku tirhe tanihi xitiyisekiso lexi engetelekeke xa xiendlakalo xexo xi tsakisaka lexi taka. Hikwalaho Yesu u vulavule hi ku wa loku ka nkarhi lowu taka ka Sathana ematilweni tanihi nchumu wa xiviri.—Nhlavutelo 12:5, 7-10.

4. Xana xikongomelo xa ntirho wa ku tshovela lowu endliweke hi Yesu ni vadyondzisiwa va yena emahlweni ka Nisan 14, 33 C.E., a xi ri xihi ke?

⁴ Ntshovelo lowu Yesu a vulavuleke ha wona a wu nga ri wa mavele kumbe wa mihandzu kambe a wu ri wa vanhu, vanhu lava fanaka ni tinyimpfu lava a va ta amukela rungula ra Mfumo handle ko ba mariri. Ana se mihandzu ya ntshovelo wo tano a yi sungula ku vonaka. Hambi swi ri tano, ku tshovela loku endliweke hi Yesu ni valandzeri va yena eka tin’hwetinyana teto emahlweni ka Nisan 14, 33 C.E., a ku ri ku andlala masungulo ya ntirho wa ku tshovela lokukulu ntsena lowu a wu ta va kona endzhaku ka ku fa ni ku pfuxiwa ka Yesu.—Ringanisa Psalma 126:1, 2, 5, 6.

5. I swiendlakalo swihi leswi nyanyulaka leswi humeleleke hi Pentekosta, 33 C.E., naswona swi khumbe ntirho wo tshovela lowu a wu ta landzela hi ndlela yihi xana?

⁵ Manuku nkarhi a ku ri siku ra Pentekosta, 33 C.E. Valandzeri va Yesu lava nga vaka 120 va hlanganile eYerusalema. “Kutani hi nomu lo, ku twakala mpfumawulo lowu humaka etilweni, wu fana ni ku hunga ka xidzedze, wu tata yindlu hinkwayo leyi va tshameke eka yona. . . . Hinkwavo va tala hi Moya lowo Kwetsima, kutani va sungula ku vulavula hi tindzimi tin’wana, hi laha Moya wu nga va nyika ku vulavula ha kona.” Lawa a ya ri masungulo ya ntshovelo lowukulu! “Kutani esikwini rero, ku amukeriwa vanhu lava lavaka ku va 3 000.” (Mintirho 1:15; 2:1-4, 41) “Masiku hinkwawo a va chivirika ku hlangana eTempeleni, va ri mbilu yin’we, . . . va ri karhi va dzunisa Xikwembu, va tsakeriwa hi tiko hinkwaro. Kutani siku rin’wana ni rin’wana Hosi a yi engetela nhlengeletano ya vona hi lava a va ri karhi va ponisiwa.” (Mintirho 2:46, 47) Endzhakunyana hi kuma leswaku, “Ntsengo wa vona a wu ya wu ri karhi wu engeteleka hi vavanuna ni vavasati lavo tala lava pfumeleke ka Hosi.” Hambi swi ri tano endzhaku: “Rito ra Xikwembu ri ya emahlweni swinene, na yona nhlayo ya vadyondzisiwa yi ya yi andza ngopfu eYerusalema, naswona vaprista lavo tala va tinyiketa eku pfumeleni.”—Mintirho 5:14; 6:7.

6. I vuyelo byihi lebyi ku kanetiwa ka ntirho wo chumayela ku veke na byona ehenhleni ka mihandzu ya Mfumo?

⁶ Ku kanetiwa ka rungula ra Mfumo manuku ku kule swinene. Xana leswi swi tsongahate ntirho wa ku tshovela ke? Doo, hikuva “Lava a va hangalasiwile, a va famba-famba hinkwako, va ri karhi va vula rito ra Evangeli.” Filipi u rhelele emutini wa Samariya; mintshungu yi n’wi yingisa swinene; lava va nga ni mademona, lava omeke swirho, ni swilema, a va hanyisiwa hinkwavo. A swi hlamarisi leswi “a ku ri ni ku tsaka lokukulu emutini wolowo.”—Mintirho 8:1-8.

7. Xileriso xa Yesu eka vadyondzisiwa va yena lexi nga eka Mintirho 1:8 eku heteleleni xi hetisisiwe ku fikela kwihi?

⁷ Yesu la pfuxiweke u byele vadyondzisiwa va yena a ku: “Mi ta va timbhoni ta mina kwala Yerusalema, ne tikweni hinkwaro ra Yudiya, ni ra Samariya, ni ku ya fika emakun’wini ya misava.” (Mintirho 1:8) Ku kula ka ntirho wa nsimu ku lave vatirhi lava engetelekeke—hi xihatla! Mawaku ntshovelo lowonghasi wa vadyondzisiwa lowu manuku a wu fanele ku languteriwa! Naswona ana se a wu endleka—hinkwawo ehansi ka vukongomisi bya moya lowo kwetsima wa Xikwembu. Endzhaku ka ku hundzuka ka Sawulo loyi a tikarhatela ku dlaya, hi hlamuseriwe leswi: “Enkarhini wolowo, kereke a yi ri ni ku rhula etikweni hinkwaro ra Yudiya, ni ra Galeliya, ni ra Samariya, yi ri karhi yi akisiwa ni ku hanya exichabyeni xa Hosi; kutani yi andza hi ku chaveleriwa hi Moya lowo Kwetsima.” (Mintirho 9:31) Loko ku tshoveriwa ka vanhu lava fanaka ni tinyimpfu ku tinyike matimba, a swi kanakanisi leswaku vadyondzisiwa volavo vo sungula va tsundzuke marito ya Yesu lama nge: “Khongelani N’wini wa ku tshovela, leswaku a rhuma vatirhi eku tshoveleni ka yena.” Xana Yehova, “N’wini wa ku tshovela,” u xi hlamurile xikhongelo xexo ke? Kunene u xi hlamurile! Loko a swi nga ri tano, a swi ta va swi tsarisiwe ku yini leswi: “Ku tshemba loku mi ku kumeke hi ku twa Evangeli . . . yi twarisiwile eka swivumbiwa hinkwaswo leswi nge hansi ka tilo” xana?—Vakolosa 1:23.

Xihatla Lexikulu Namuntlha

8. Hikwalaho ka yini eka va-1980 ku ri ni xilaveko xa vatirhi va Mfumo ku tlula rini na rini?

⁸ Namuntlha, hi va-1980, xilaveko xa vatshoveri xi kule ku tlula rini na rini. Hikwalaho ka yini? Hikuva xivandla xa nsimu ya misava xi kurile swinene. Hikwalaho ke, mavele lama faneleke ku tshoveriwa kutani ma hlengeletiwa eka xona ma tele. Leswi swi pfumelelana ni leswi Yesu a swi vhumbeke. U vula leswaku valandzeri va yena a va ta endla mintirho leyikulu leyi tiulaka leyi a yi endleke laha misaveni, malunghana ni ku chumayeriwa ka mahungu lamanene.—Yohane 14:12.

9. (a) Xihatla xa ntirho wo chumayela wa namuntlha xi kandziyisiwe njhani exivonweni xa Yohane, lexi hlamuseriweke eka Nhlavutelo 7:1-3? (b) I makumu wahi ya nkoka lama nga kumiwaka eka xiga lexi nge “mihandzu yo sungula eka Xikwembu ni ka Xinyimpfana” lexi nga eka Nhlavutelo 14:4?

⁹ Xihatla entirhweni wa namuntlha wo chumayela xi kombisiwe emasungulweni lama hlamarisaka lama hlamuseriweke exivonweni lexi nyikiweke Yohane, hi laha xi rhekhodiweke ha kona eka Nhlavutelo 7:1-3. Kona, ku voniwa “mune wa tintsumi ti yimile etinhleni ta mune ta misava, ti sivela timheho ta mune ta misava.” Ku khomelela ka tona ‘timheho teto ta mune’ ku ta teka nkarhi wo tanihi kwihi xana? ‘Ku fikela endzhaku ka loko malandza ya Xikwembu xa hina ya funghiwile emimombyeni ya wona’ ntsena. Sweswo swi ta teka nkarhi wo tanihi kwihi ke? Xikombiso xi nyikiwe hi mhaka ya leswaku enkhubyeni wa Xitsundzuxo hi April 15, 1984, i 9 081 ntsena lava tivuleke leswaku i swirho swa lava 144 000. Vatotiwa namuntlha hi vona swirho swo hetelela swa lavaya va hlamuseriweke eka Nhlavutelo 14:4 tanihi lava “va kutsuriweke exikarhi ka vanhu leswaku va va mihandzu yo sungula leyi humeseriwaka Xikwembu ni Xinyimpfana.” Hikwalaho swi nga endleka leswaku yo tala ya ‘mihandzu leyi yo sungula’ yi se yi hlengeletiwile. Kambe xana xiga lexi nge “mihandzu yo sungula” xi vula leswaku ku ni mihandzu yin’wana leyi nga ta landzela? Kavula, swi tano! Leswi swi fanekiseriwe kahle hi ntshovelo lowukulu wa mihandzu yin’wana leyi hlengeletiweke eku heleni ka lembe ra vurimi ra Vayuda enkarhini wa Nkhuvo wa Mintsonga.—Deuteronoma 16:13-15.

10. I mintshovelo yihi mimbirhi leyi a yi ya emahlweni eminkarhini ya manguva lawa, naswona xana mhaka leyi yi xi kandziyisa njhani xilaveko xa xihatla xa vatshoveri lava engetelekeke?

¹⁰ Hikwalaho se swa twisiseka leswaku, loko ku tshoveriwa ka masalela ya lava totiweke ku tshinele emakun’wini ya kona, ku tshovela kun’wana ko hlengeleta a ku ri kusuhi ni ku pfuleka. Xana leswi a swi kombisiwi eka leswi Yohane a yeke emahlweni a swi vona exivonweni ke? “Endzhaku ka swona, ndzi languta, kutani ndzi vona ntshungu lowukulu wa vanhu, lava ku nga pfumaleka ni munhu ni un’we la koteke ku va hlaya. A va huma hi le matikweni hinkwawo, ni le tinxakeni hinkwato, va ri va swivongo hinkwaswo ni va tindzimi hinkwato.” Yohane u byeriwe leswi: “Lava, hi lava humaka eku xanisekeni lokukulu.” (Nhlavutelo 7:9, 14) Ku sele nkarhi wuntsongo ntsena wo beta ku hlengeleta “ntshungu lowukulu.” Loko ‘timheho teto ta mune ta misava’ ti kala ti tshikiwa, ku komba masungulo ya “nhlomulo lowukulu,” nkarhi wu ta va wu nga ha ri kona! Xana a wu xi voni xilaveko xa xihatla xa vatshoveri lava engetelekeke leswaku va tisa mintshungu leyi nga ha kumekaka ke?

Magidi Lawa Ya Swi Amukelaka Sweswi

11. (a) “Tinyimpfu tin’wana” ta Yesu ti hlanganyela ku fikela kwihi entshovelweni? (b) Xana nhlayo ya lava veke kona eXitsundzuxweni hi 1984 yi komba yini?

¹¹ Yesu u vhumbe ku kurisiwa loku ka ntirho wa ku tshovela wa vanhu lava fanaka ni tinyimpfu loko a te: “Naswona ndzi ni tinyimpfu tin’wana leti nga riki ta tshanga leri; na tona ndzi fanele ku ti vuyisa; ti ta yingisa rito ra mina, kutani ti ta endla ntlhambi wun’we, ti va ni murisi un’we.” (Yohane 10:14, 16) Ana se ku ni lava tiulaka 2 800 000 va ‘tinyimpfu leti tin’wana’ lava hi ku chivirika va tikombeke va ri va “ntlhambi wun’we.” Eka nhlayo yoleyo, a ku ri na 179 421 lava khuvuriweke eka lembe ra ntirho ra 1984! Kambe ke, lava a va ri kona enkhubyeni wa Xitsundzuxo a va ri 7 416 974. Leswi swi hi byela yini? Leswaku ku na van’wana vo tala lava tweke rito ra Murisi, kambe hikwalaho ka xivangelo xo karhi, a va xi amukelanga xirhambo lexi kufumelaka xa Yesu lexi nge: “Ndzi landze.”—Luka 5:27.

12. I swivutiso swihi swa nkoka leswi hi fanelaka ku tivutisa swona sweswi?

¹² Xana u yima kwihi mayelana ni ntirho lowu wa nkoka wo tshovela ‘emakun’wini ya mafambiselo lawa ya swilo’ ke? (Matewu 13:39) Xana u hlayiwa exikarhi ka mintshungu leyi tsakeke ya lava sweswi va hlanganyelaka emintsakweni ya ku tshovela? Kumbe, xana wa ha ri muhlaleri, loyi emianakanyweni a voyameleke emhakeni yo papalata ku amukela xirhambo xa Murisi Lonene erivaleni, lexi nge: “Ndzi landze” ke? Hakunene ku hava loyi namuntlha a nga lavaka ku tiyimelela ku fana ni vavanuna lavaya vanharhu lava nga eka Luka ndzima ya 9, leyi hlamuseriweke eka xihloko xa hina lexi hundzeke. Anakanya hi leswi vavanuna volavo vanharhu va lahlekeriweke hi swona—ntsako wa ntirho wa Mfumo, ku katsa ni ku hlangayela eku ntshunxeni ka lava a va ri ni mademona loko swi koteka!—Luka 9:57-62; 10:17.

13. Ripfumelo i ra nkoka emhakeni ya leswaku u va mutshoveri la swi rhandzaka hi ndlela yihi?

¹³ Muapostola Pawulo u te: “Kutani ehandle ka ku pfumela a swi endleki ku tsakisa Xikwembu.” (Vaheveru 11:6) Kavula, ina, swi lava ripfumelo eka un’wana ni un’wana ku bakanyela leswi a swi tsakelaka etlhelo kutani a nyikela vutomi byakwe eka Xikwembu hi ku tirhandzela leswaku a va mutshoveri. Hi xikombiso, swi nga endleka leswaku u ni xiphiqo lexikulu xa rihanyo; kumbexana swirho swin’wana swa ndyangu wa wena swi lwisana ni Timbhoni ta Yehova swinene; kumbexana u vona leswaku u dyuhale ngopfu lerova u nga endla ku hundzuka loku lavekaka evuton’wini bya wena; hi tlhelo rin’wana, u nga titwa u hluleka ku kongomana ni ntshikilelo wa vanghana lowu u hlangavetanaka na wona exikolweni. Ku nga khathariseki leswi swiyimo swa wena swi nga ha vaka swona, u nga rivali leswaku Yehova u twisisa swirhalanganya swa wena ku antswa ku tlula munhu wihi na wihi. Nakambe, u tiyimisele ku tshinela eka wena kutani a tiyisa ku tiyimisela ka wena ko n’wi tirhela loko u titekela magoza yo karhi lama lavekaka.—Psalma 103:13, 14; Yakobo 4:8.

Ripfumelo Ri Rhurhisa ‘Tintshava’

14. Hlamusela leswi Yesu a a vula swona hi marito yakwe lama rhekhodiweke eka Matewu 17:20.

¹⁴ Yesu u te: “Loko mi ri ni ku pfumela loku ringanaka ni ndzoho ya murhi wa sinapi, mi nga ku ka ntshava leyi: ‘Rhurhela lahaya!’ kutani yi ta rhurha, ku ri hava lexi xi mi tsandzaka.” Lowu wu ve ntokoto wa munhu hi xiyexe wa lavo tala va madzana ya Magidi lava amukeleke xirhambo xa vatshoveri lava engetelekeke hi va-1980. Swirhalanganya ni swihinganyeto swa munhu hi xiyexe leswi humeleleke tanihi tintshava eka vona malembe lama hundzeke swi hluriwile hi ku pfuniwa hi Yehova. (Matewu 17:20; 19:26) Xiyisisa mintokoto leyi landzelaka:

15, 16. Hlamusela ndlela leyi jaha ra le United States, ni wanuna wa Mukhatoliki eBrazil va hluleke swirhalanganya leswikulu leswi a swi va sivela ku khuvuriwa ha yona.

¹⁵ Jaha rin’wana le California, eU.S.A., a ri hlaseriwe hi vuvabyi byo khwanyana swirho (Polio), ri va xilema hi ndlela yo vavisa naswona ri honisiwe hi ndyangu wa rona hi laha ku khomisaka gome. Endzhaku u kumiwe hi un’wana wa Timbhoni ta Yehova loyi a a famba hi yindlu na yindlu. Va sungule dyondzo ya Bibele. Kambe a a ri ni tingana lerova loko mbhoni yi fikile ku ta fambisa dyondzo, a a yisa xitulu xa yena ekhonweni ya kamari kutani a languta ekhumbini leswaku xikandza xa yena xi nga voniwi. Swi teke jaha leri tin’hweti ku hlula swin’wana swa swirhalanganya swa rona. Hambi swi ri tano, ri swi kotile naswona i Mbhoni leyi tsakeke, leyi khuvuriweke.

¹⁶ Mpatswa wa Makhatoliki eBrazil a wu nga anerisiwi hi vukhongeri bya wona naswona eku heteleleni wu sungule ku dyondza Bibele ni Timbhoni ta Yehova. Wu swi vonile leswaku swilaveko swa wona swa moya se a swi anerisiwile, kambe a ku ri ni xirhalanganya lexikulu swinene: Nuna wa kona, Antonio, a a ri mudzahi lonkulu. U dzahe malembe ya 48, ku sukela loko a ha ri na malembe ya nkombo hi vukhale! Hi malembe yo tala u ringetile ku tshika mukhuva lowu kambe a swi pfunanga nchumu. Hambi swi ri tano, se a swi nga ha fani, hi laha Antonio a vulaka ha kona u ri: “Se ndzi dyondze leswaku loko ndzi lava ku tsakisa Xikwembu kutani ndzi tinyiketa leswaku ndzi endla ku rhandza ka xona, ndzi fanele ku ri tshika. Endzhaku ka ku khongela nkarhi wo leha eku heteleleni ndzi swi kotile ku endla tano.” I ntsako muni wonghasi lowu a veke na wona loko a kote ku kombisa ku tinyikela ka yena eka Yehova hi nkhuvulo wa mati!—Psalma 66:19; Marka 11:24.

17. (a) Hi wihi nkucetelo lowo biha lowu Yesu ni vadyondzisiwa va yena va hlangavetaneke na wona lowu nga ni matimba swinene namuntlha? (b) Xana Yesu ni vadyondzisiwa va yena va kongomane njhani na lava a va ri ni mademona eka lembe xidzana ro sungula, naswona xana va khomisiwa ku yini sweswi?

¹⁷ Vayuda lava nga ni mademona a va ri xirhalanganya lexi Yesu ni vadyondzisiwa va yena va hlangavetaneke na xona nkarhi na nkarhi. Minkucetelo yoleyo yo biha ya tirha namuntlha, ngopfu-ngopfu sweswi laha Sathana ni mavandla ya yena ya mademona va cukumetiweke etilweni va ta wela laha misaveni. (Nhlavutelo 12:7-9, 12, 17) Ku hambana ni Vukriste eku sunguleni ka byona, Yehova a nga va nyikanga vanhu va yena namuntlha mahlori ya matimba yo hlongola mademona. Hambi swi ri tano, matlhari ya moya lama a ma nyikeke Vakriste ya nga tirha tanihi xisirhelelo xo Iwisana ni nkucetelo wa mademona, nakambe ya nga tirhisiwa tanihi xitirho xo ntshunxa van’wana eka vulawuri bya vudemona. (Vaefesa 6:10-18) Xiviko lexi humaka eGhana xi ri: “Hi matshalatshala lama tiyeke ya vamakwerhu, vo tala va ntshunxiwile exibohweni xa mademona.” Mbhoni yin’wana yi hlangane ni un’wana evutirhelini, naswona kute loko ku vulavurisana hi Bibele ku sunguriwile, “nsati loyi u sungule ku khapa mihloti.” Xana xirhalanganya a xi ri xihi ke? Mbhoni yi te: ‘U humeriwe hi moya, naswona minkarhi hinkwayo loko wu n’wi humerile, a wu n’wi endla leswaku a rila, naswona mali yihi na yihi leyi a ri na yona a yi nyamalala.’ Dyondzo ya Bibele ya nkarhi na nkarhi yi n’wi pfune leswaku a ntshunxeka eka nhlaselo lowu wa mademona, yi endla leswaku a swi kota ku tinyiketa eka Yehova.—Yohane 8:32.

18. I ntokoto wihi lowu kombaka leswaku tintsumi ta hiseka eku kongomiseni ka ntirho wo chumayela ke?

¹⁸ Swirhalanganya leswi fanaka ni leswi swi hlamuseriweke laha henhla swi nga va leswikulu emiehleketweni ya munhu lerova a kunguhata ku tisunga. Teka mhaka ya ntombhi yin’wana eNew Zealand. Mbhoni leyi n’wi endzeleke ro sungula yi swi vonile leswaku a a “karhatekile eminsusumetweni naswona handle koti pfinyinga a a hlundzukisiwe hi swin’wana.” Endzhaku munhu loyi u pfumerile leswaku “A a ya eku tisungeni naswona a a kunguhate ku sungula hi ku khongela Xikwembu leswaku a kombela ku pfuniwa.” Hi nomu wolowo Mbhoni yi gongondza enyangweni wa yena, kutani hakunene u “nkhense Xikwembu hi ku hlamula xikhongelo xa yena.” Xana leyi a ku ri mhangu ntsena? Manuku hikwalaho ka yini swilo leswi fanaka swi humelela nkarhi na nkarhi? Yesu u te yini xana? “Siku N’wana-wa-Munhu a taka hi ku kwetsima ka yena, ni tintsumi hinkwato ti ri na yena, . . . u ta hlawula van’wana a siya van’wana, kukotisa murisi loko a hlawula tinyimpfu exikarhi ka timbuti.” (Matewu 25:31, 32; nakambe vona Nhlavutelo 14:6.) Tintsumi ti pfuna Yesu entirhweni wa vurisi, naswona ti kongomisa ‘vatirhi-kulobye’ va N’wini wa tona lava kombelaka ku pfuniwa eka Yena.—1 Vakorinto 3:6, 9; vona Mintirho 8:26-39; 16:9, 10.

19. I xiyimo xihi xa misava hinkwayo lexi nga kona namuntlha, xi lava goza rihi eka hina?

¹⁹ Namuntlha, ku nga khathariseki laha hi nga ha vaka hi tshama kona, ku ni magidi ya vanhu lava tshikileriwaka ni lava tsanisiwaka hi swiphiqo sweswo leswi vo tala va vanhu va Yehova ana se va swi hluleke. Van’wana va vona va nga ha va va tshama ekusuhi na wena! Va lava ku pfuniwa hi xihatla. Entiyisweni, hi laha Yesu a vuleke ha kona u te: “Ku tshovela i kukulu.” Hi khongela N’wini wa ku tshovela sweswi leswaku a rhuma vatirhi eku tshoveleni ka yena hi lembe ra 1986. Onge mbilu ya wena yi nga ku susumetela ku amukela xirhambo lexi nge: Vatshoveri Vo Tala—Va Laveka Hi Xihatla!

Swivutiso Swa Mpfuxeto

◻ N’wini wa ku tshovela i mani?

◻ Xana i mintshovelo yihi mimbirhi leyi yaka emahlweni sweswi ke?

◻ I mintirho yihi leyikulu leyi Yesu a vuleke leswaku valandzeri va yena a va ta yi endla?

◻ Hikwalaho ka yini ripfumelo ri laviwa hi vatshoveri hinkwavo?