Vutomi ni Vutirheli Bya Yesu

Vasamariya Vo Tala Va Pfumela

LOKO va vuya hi le Sikari na swakudya, vadyondzisiwa va kuma Yesu exihlobyeni xa Yakobo laha va n’wi siyeke kona. Kambe sweswi u vulavula ni wansati wa Musamariya. Loko vadyondzisiwa va fika a suka, a siya mbita ya yena ya mati, kutani a ya emutini.

Hi ku tsakela swilo leswi Yesu a n’wi byeleke swona, a byela vanhu va muti: “Tanani, mi ta vona munhu loyi a nga ndzi byela hinkwaswo leswi ndzi tshamaka ndzi swi endla.” Kutani, hi ndlela yo pfuxa ku navela ku tiva, a vutisa: “Xana a nga ka a nga vi yena Mesiya ke?” Xivutiso xi hetisisa xikongomelo xa xona—vanhu va ya va ya tivonela hi voxe.

Enkarhini wolowo, vadyondzisiwa va Yesu va n’wi sindzisa ku dya swakudya leswi a va swi xavile emutini. Kambe a hlamula: “Swakudya ndzi na swona, leswi n’wina mi nga swi tiviki.”

“Xana ku nga va ni munhu un’wana la n’wi tiseleke swakudya xana?” ku vutisana vadyondzisiwa. Yesu a hlamusela: ‘Swakudya swa mina, i ku endla ku rhandza ka Loyi a ndzi rhumeke, ni ku heta ntirho wa yena swinene. Xana a mi tolovelanga ku vula leswaku, ka ha sele tin’hweti ta mune, kutani ku ta ta ntshovelo?’ Kambe loko a kombetela eka ntshovelo wa moya, Yesu u ri: ‘Ni sweswi, la tshovelaka ú kuma hakelo, kutani ú hlengeleta mavele ya vutomi lebyi nga heriki.’

Kumbexana Yesu se a a vonile vuyelo lebyinene bya ku veka vumbhoni ka wansati wa Musamariya—lerova vo tala a va pfumela eka yena hikwalaho ka vumbhoni byakwe. Loko vanhu va Sikari va fika eka yena exihlobyeni, va n’wi kombela ku xwa na vona leswaku a va byela swo tala. Yesu a amukela xirhambo kutani a xwa masiku mambirhi.

Loko Vasamariya va yingisela Yesu, vo tala va pfumela. Kutani va ku ka wansati: “A ma ha ri wona mahungu ya wena lama endlaka leswaku hi pfumela; Hikuva na hina hi n’wi twile, kutani ha swi tiva leswaku loyi i Muponisi wa misava hakunene.” Kunene wansati wa Musamariya u veka xikombiso lexinene xa hi laha hi nga vekaka ha kona vumbhoni ha Kriste hi ku pfuxa ku navela ku tiva leswaku vayingiseri va handzisisa ku ya emahlweni!

Tsundzuka leswaku ku sele tin’hweti ta mune ku fika ntshovelo—kahle-kahle ntshovelo wu nga wa mavele, lowu ePalestina wu humelelaka hi ximun’wana. Kutani sweswi i November kumbe December. Leswi swi vula leswaku endzhaku ka Paseka ya 30 C.E., Yesu ni vadyondzisiwa vakwe va hete tin’hweti leti nga vaka nhungu eYudiya va dyondzisa no khuvula. Sweswi va ya etikweni ra ka vona ra Galeliya. Va rindzeriwe hi yini kwale? Yohane 4:27-42.

◆ I ku veka kwihi ka vumbhoni loku wansati wa Musamariya a ku endleke naswona ku va ni mbuyelo wihi?

◆ Swakudya swa Yesu swi hlangana hi ndlela yihi ni ntshovelo?

◆ Hi nga ku vona njhani ku leha ka vutirheli bya Yesu eYudiya endzhaku ka Paseka ya 30 C.E.?

[Xifaniso lexi heleleke eka tluka 25]