Vahlayisi Va Vutshembeki Va Lembe Xidzana Ra Vumakumembirhi Va Hlengeletana!
NYIMPI a yi lunghiseleriwile ku sukela eku sunguleni ka matimu ya vanhu. Nxandzuko wu sungurile exivandleni xa moya kun’we ni la misaveni, naswona vunene bya vuhosi bya Muvumbi byi tlhontlhiwile! Leswi swi tswale mphikamakaneta leyikulu leyi katseke xivutiso lexi nge, Lava va ha tshembekaka eka Yehova Xikwembu va ta seketela vuhosi byakwe hi ku hlayisa vutshembeki bya vona eka yena xana?—Genesa 3:1-24; Eksoda 9:16; Luka 22:31.
Sathana Diyavulosi hi vunwa u vule leswaku vagandzeri va Yehova va N’wi tirhela ntsena hi ku lava mbuyelo wa vutianakanyi naswona ku nga ri hi rirhandzu. (Yobo 1:1-2:10) Kambe, va tshame va tshembekile eka Xikwembu ku nga khathariseki matshalatshala ya Sathana ni misava yakwe leyi kanetaka yo tshova vutshembeki bya vona. (Vaheveru 11:4-38; Nhlavutelo 12:10-17) Ku khutaza malandza ya Yehova ya lembe xidzana ra vu-20 leswaku ya ya emahlweni na vutshembeki, Sosayiti ya Watch Tower yi lunghiselele minongonoko ya tinhlengeletano ta “Vahlayisi va Vutshembeki” ya Timbhoni ta Yehova leyi nga ta khomeriwa ematikweni yo tala, ku sungula hi ximumu xa 1985. Siku na siku ri tlakusa tinhla leti fanelaka ta mhaka ya Bibele.
“Ku Famba Hi Vutshembeki”
Mhaka leyi ya siku ro sungula ra nhlengeletano yi lotile ku navela swakudya swa moya. Nkulumo leyi nge “‘Vanhu Vanga, Yingisani,’ Rito Ra Yehova” yi lunghise xiyimo hi ku tsundzuxa hinkwavo ku yingisa. Lexi kombaka vutlhari bya xitsundzuxo xolexo a ku ri nkulumo ya mutshami wa xitulu, “Vutshembeki A Byi Hi Hlayise.” Xana vutshembeki byi swi endla njhani sweswo? Vutshembeki byi lava leswaku hi tinyiketa eka Xikwembu hi laha ku heleleke, hi hlayisa timbilu ta hina, makungu, ni rirhandzu swi tengile. “Loko ku ve leswi i ku tiyimisela ka hina,” ku vula mutshami wa xitulu, “Kutani vutshembeki bya hina byi ta hi hlayisa.”—Psalma 25:5; 31:23.
Hi tlhele hi “Khutaziwa hi Xikombiso xa Vahlayisi va Vutshembeki lava Ringetiweke.” Endzhaku ka ku vulavula hi swikombiso leswi khutazaka swa khale, xivulavuri xi vulavule ni vahlayisi va vutshembeki lava nga xikombiso enkarhini wa hina. Lava va hlayisaka vutshembeki a “‘va khomiwi hi Tingana hi Mahungu lamanene.’” Nkulumo leyi, leyi tekiweke eka Marka 8:38, yi endle swi va erivaleni leswaku ku nga khomiwi hi tingana ku tihlamusela evutirhelini bya hina, entirhweni, ni kun’wana i xisirhelelo, ‘kutani, i ku hlamarisa ko tanihi kwihi ku nga ta va kona loko Yesu a vulavula emahlweni ka tintsumi ta le tilweni ni Tata wakwe a vula leswaku hi vadyondzisiwa vakwe lava fambeke hi vutshembeki!’
“Timhaka leti Hlavuteriweke i ta hina ni vana va hina” a ku ri mhaka ya nongonoko leyi kombaka leswaku, tanihi Tatana wa rirhandzu, Yehova u tsakela ku hlavutela vanhu vakwe “timhaka leti fihliweke.” (Deuteronoma 29:29; Amos 3:7) Ku dyondza loku chivirikaka ka timhaka leti ti hlavuteriweke ku ta hi nyika matimba leswaku hi ta hlayisa vutshembeki bya hina. Nhloko-mhaka leyi landzelaka leyi nge, “Ku Kuma Ntsako eka Rito ra Yehova,” yi tshikilele yinhla ya leswaku Timbhoni ta Yehova ti fanele ku va swichudeni swa Bibele. (Psalma 1:1, 2) Hakunene, dyondzo i xiphemu xa vutomi bya Mukriste un’wana ni un’wana la fambaka hi vutshembeki.”
“Ku Anakanyisisa Hi Matsalwa” i ndlela leyi tirhisiwaka hi vahlayisi va vutshembeki eku tirhisaneni ni tinxaka to hambana ta vanhu leti va chumayelaka eka tona. Hi xikombiso, esinagogeni eTesalonika, muapostola Pawulo ‘a a hlamulana na vona hi ku landza Matsalwa, a ri karhi a ma hlamusela, ni ku ringanisa ha wona leswaku Mesiya a a fanele ku twisiwa ku vaviseka.’ Xana Pawulo u humelerile? Ina, hikuva van’wana va vayingiseri vakwe va ve vapfumeri. (Mintirho 17:1-4) Xana vatsombani va ta tsakela mpfuno eku hlamuleni ka swivutiso leswi vutisiwaka evutirhelini bya vona? Mawaku ntsako wonghasi ku yi amukela loko xivulavuri xi humesa buku leyintshwa ya vutirheli bya nsimu leyi nge, Reasoning From the Scriptures!
‘Ku Tamela Rito Ra Ntiyiso Hi Ku Lulama’
Hi siku ra vumbirhi, a ku ri ntsako ku vona maphayona yo tala—magidi etinhlengeletanwini tin’wana—ya yima loko ya rhambiwa hi xivulavuri, swi tiyisa leswaku vunyingi byi hlanganyela evutirhelini bya nkarhi hinkwawo. Eka xiphemu lexi, “Ringetani Hi Matimba Eka Ntirho Wa Nkarhi Hinkwawo,” ku tshikileriwe leswaku ku phayona swa pfuna, hambi loko ku laveka ku tikarhata swinene ku hlanganyela evutirhelini lebyi.—Luka 13:24.
Nkulumo-nkulu, “Tsakisa Mbilu Ya Yehova Hi Ku Hlayisa Vutshembeki,” a yi seketeriwe eka Swivuriso 27:11. Nkulumo leyi yi nghene exitlatini xa Rito ra Xikwembu kutani yi huma ni marito lawa ya nkoka: “Vutshembeki bya xiviri byi vula ku tinyiketa loku nga tshovekiki eka munhu—eka Yehova Xikwembu.” “Sathana i murhangeri eku tshoveni ka vutshembeki,” naswona vuxandzuki byakwe byi pfuxe “mphikamakaneta ya vunene bya vuhosi bya Xikwembu.” “Hambi leswi vuhosi bya Yehova byi nga titshegangiki hi ku hlayisa vutshembeki ka swivumbiwa swakwe, xiendlo xa vuxandzuki xi endle leswaku mhaka ya vutshembeki bya munhu xi va xiphemu xa nkoka xa mphikamakaneta ya vuhosi bya misava hinkwayo.” Xivulavuri xi vutisile: “Swi koteka hi ndlela yihi eka hina ku hlula tanihi vahlayisi va vutshembeki?” A hlamula a ku: “Hi nga endla tano hikuva hi yingisa Rito ra Xikwembu.”—Varhoma 14:8.
Ku rhangisa swilo swa moya evuton’wini a ku ri nhlaselo wa nkulumo leyi landzeleke, “Minkateko Ya Yehova—Yi Fuwisa Munhu.” Hi pfuniwile ku twisisa hi vutalo leswaku hambi loko mali yi pfuna, rirhandzu ra mali ri nga va khombo leri yisaka eku feni. (Eklesiasta 7:12; 1 Timotiya 6:10) I vutshembeki lebyi tisaka minkateko ya Yehova, rifuwo ra ntiyiso.—Swivuriso 10:22.
Drama leyi nge “Vumundzuku Bya Wena—Mphikamakaneta” yi ringanise ndlela yo hlayisa vutshembeki ya Vanazira ni mphikamakaneta leyi vantshwa va Timbhoni va hlangavetanaka na yona eku naveleni ka vona ka ku va maphayona kutani va tshama entirhweni wa nkarhi hinkwawo ematshan’wini yo hlongorisa tipakani ta rifuwo. Yi khutaze vantshwa ku amukela mphikamakaneta ni ku tirhela Xikwembu hi xitalo. Nakambe drama yi kombise hi laha vatswari ni van’wana va nga pfunaka ha kona.
“Byala Ngopfu, Tshovela Ngopfu” yi hlamusele leswaku nawu lowu nge ‘hi tshovela leswi hi swi byaleke’ i wa vutlhari, wu lulamile, naswona i wa rirhandzu. Ku entisela Xikwembu, Kriste ni ‘nandza lowo tshembeka,’ hi ta byala ngopfu eku hlanganyeleni etidyondzweni, eka xikhongelo, eku vekeni ka vumbhoni ni le vuxakeni bya hina hinkwabyo bya ndyangu. (Matewu 24:45-47) Ku byala ko tano ku hi tiyisekisa ku tshovela nkateko wa Yehova.—Vaheveru 6:10.
Hi nkarhi wa nkulumo leyi nge “Leswi A Wu Fanele Ku Hlamurisa Swona Eka Un’wana ni Un’wana,” vayingiseri va nyike nyingiso lowu hlamarisaka eka swiringanyeto ni swikombiso swa ndlela yo tirhisa buku leyintshwa leyi nge Reasoning From the Scriptures. Ku kandziyisiwile xilaveko xo hlula ku pfumaleka ka ntwelo-vusiwana hi ku tirhisa masungulo lama faneleke, ku hlamula lokunene loko ku ri na ku kaneta, ni ku komba leswaku Bibele i xihlovo xa tinhlamulo ta hina.—Vakolosa 4:6.
Endzhaku ka nkulumo yo hetelela ya siku ra vumbirhi leyi nge, “Ku Tivisa Mintirho yo Hlamarisa Ya Yehova,” a hi chivirikela ku endla sweswo ntsena hi ku hlanganyela evutirhelini bya nsimu. Madyambu wolawo Mbhoni leyi fambaka hi yindlu na yindlu eVancouver, Canada, yi hlangane ni ku kanetiwa: “Loko Xikwembu xi ri Xikwembu xa rirhandzu, hikwalaho ka yini xi pfumelela vubihi?” Nhlamulo leyi lunghiseleriweke eka buku leyintshwa yi anerise muvutisi, kutani dyondzo ya Bibele yi sungurile xikan’we-kan’we.
“Ku Pfumala Xisandzu Exikarhi Ka Rixaka Ro Homboloka”
Leyi a yi ri mhaka leyi tlhontlhaka miehleketo ya siku ra vunharhu. Mixo wolowo, nkulumo leyi nge “Ku Dzunisa Yehova Hi Swilo Swa Hina Swa Nkoka” yi kandziyise leswaku vutomi bya hina lebyi nyikeriweke, vuxaka bya hina bya le kusuhi na Yehova, ni rifuwo ra hina ra nyama, miehleketo, moya, ni swilo leswi vonekaka hinkwaswo i swilo swa risima leswi hi faneleke ku dzunisa Tata wa hina wa le tilweni ha swona.—Swivuriso 3:9, 10.
Nkulumo leyi nge “Ku Kuma Matimba, Hayi Ku Karhala” yi nyikele xiletelo lexi faneleke ku hi pfuna ku lwa ni ku ringeta ka Sathana ko tshova vutshembeki bya hina hi ku kanakana, ku lahlekeriwa hi ripfumelo, rifuwo, miringo, ni swivumbeko swo hambana swa ku hela matimba. Ku dyondza, ku anakanyisisa, ku khongela, ku va kona etidyondzweni, ni ku hlanganyela minkarhi hinkwayo eku twariseni ka Mfumo i tindlela ta ntiyiso to gwedla Yehova, Xihlovo lexi nga karhaliki xa matimba.—Esaya 40:28-31.
Yinhla-nkulu eka nkulumo leyi nge “Ku Hanyela Ku Rhandza Ka Xikwembu Namuntlha Ni Hi Laha Ku Nga Heriki” a ku ri leswaku loko hi va ni miehleketo ya Kriste, hi nga ka “hi nga ha fambisiwi hi ku navela ku titsakisa, kukota vanhu kambe hi ku rhandza ka Xikwembu.” (1 Petro 4:1, 2) Yesu a nga zanga a pfumelela ku navela kwihi na kwihi ka vumunhu ku n’wi hambukisa endleleni yoleyo. Lava yaka eku khuvuriweni ngopfu-ngopfu va rhiye ndleve va yingisela nkulumo leyi landzeleke, “Ku Longoloka Ni Vahlayisi Va Vutshembeki Va Yehova.” Va byeriwe leswaku goza ra nkhuvulo i masungulo ntsena ya mphikizano wa vona wo hlayisa vutshembeki. Leswaku va tsutsuma kahle va fanele ku tirhisa malunghiselelo yo tanihi xikhongelo, Rito ra Xikwembu, tibuku ta Vukriste, ni ku hlanganyela loku hisaka ni bandlha. Vakhuvuriwa va yimiïe va hlamula swivutiso swimbirhi va kombisa loko ku ve va twisisa goza ra risima leri a va ri teka. Ku landzele ku khuvuriwa ka vona, endzhakunyana emahlweni ka lava teke enhlengeletanweni.
Ndzhenga wolowo, nkulumo leyi nge “Xana Ha N’wi Chava Yehova Ke?” yi kandziyise ku xixima Mufumi wa Misava Hinkwayo. (Swivuriso 8:13) Exikarhi ka Hosi leyi chavaka Xikwembu, Yosafat wa Yuda na Yosafat Lonkulu loyi sweswi a nga exiluvelweni, Yesu Kriste, ku na ku fanana ko tanihi loku: ku hlayisa vugandzeri byi tengile (1 Tihosi 22:16; Malakia 3:1-18); ku Iwela ntshunxeko wa vugandzeri (2 Tikronika 17:1, 2, 12-19; Vafilipiya 1:6, 7); ku lunghiselela ku dyondzisa vagandzeri va ntiyiso (2 Tikronika 17:7-9; Matewu 28:19, 20); ni ku yimisa tihuvo ta le henhla ta nawu to hlayisa vululami.—2 Tikronika 19:6, 7; 1 Vakorinto 6:5, 6.
Xiphemu lexi nge “Matsalwa Ma Pfuna Ku Ololoxa” xi kombe hi laha Bibele yi hi pfunaka ha kona ku hanya vutomi lebyi hlelekeke ni ku chava nhlengeletano, valanguteri lava hlawuriweke, ni vakulukumba. Eka xiphemu lexi land.zelaka lexi nge, “Ku Tiboha Ku Tirhela Yehova Hi Mbilu Hinkwayo,” hi tsakisiwe hi xilaveko xo va ni mbilu leyi hanyeke yo fanekisela, leyi tshamaka yi ri na vun’we—yi helerile—entirhweni wa Yehova.—1 Tikronika 28:9.
Kambe ku vuriwa yini hi tihlo? Xivulavuri lexi landzeleke xi hlamurile xivutiso, “Tanihi Xirho Xa Ndyangu, Tihlo Ra Wena I ‘Rinene Xana’?” Leswi Sathana a tirhisaka swilo swo tala swo koka mahlo ya hina ya moya, i swa risima leswaku vatatana va Vukriste, vamanana, ni vana va hlayisa malungutelo lama ringaneleke ni ku rhangisa swa Mfumo. (Matewu 6:33) Xilaveko xo tiva Muhlengeleti Lonkulu hi ku chava vakulu lava hlawuriweke ni bandlha swi kandziyisiwile eka nkulumo leyi landzelaka, “Ku Landzela Milawu Ya Hosi Hi Vukheta.”—Swivuriso 8:32-36.
Nhlohlori ya siku a ku ri nkulumo leyi nge “Ku Tshembeka eNtiyisweni eMisaveni Leyi Nga Hava Xikwembu.” Exikarhi ka swilo swin’wana, Vakriste va fanele ku hlayisa vutshembeki entiyisweni hi ku lwela dyondzo ya Bibele ya ntumbuluko ni ku fularhela miehleketo leyi nga riki na vukwembu. Vayingiseri va tsakisiwe hi ku humesiwa ka buku ya matluka ya 256 leyi yi xi hlamulaka kahle xivutiso lexi tlakusiweke hi vito ra yona leri nge, Life—How Did It Get Here? By Evolution or by Creation? Buku leyi yi hi pfuna hi ndlea yihi? Khale ka museketeri wa hundzuluko, loyi sweswi a nga Mbhoni eSweden, u hlaye buku hinkwayo vusiku byebyo kutani a ku: “Loko a ndzi ri museketeri wa hundzuluko tolo, a ndzi ta va kunene-nene ndzi cince mianakanyo ya mina ni vusiku.”
“Hlayisani Mahanyelo Lamanene Exikarhi Ka Matiko”
Leyi a yi ri nhloko-mhaka ya siku ro hetelela ra nhlengeletano. Yin’wana ya tinkulumo leti nyikeriweke mixo wolowo yi hlamule xivutiso lexi nge “Xana Nchumu Wun’wana Wu Nga Ku Hambanisa Ni Rirhandzu Ra Xikwembu?” Hina hi ri hexe hi nga tihambanisa ni rirhandzu ra Xikwembu na Kriste. Kambe ntsendze loko hi hlayisa ripfumelo ra hina, ku hava ntshikilelo, xiyimo, mukaneti loyi a nga vangelaka Xikwembu ku lahlekeriwa hi rirhandzu ra xona ha hina.—Varhoma 8:35-39.
Nkulumo leyi nge “Mi Nga Hatlisi Ku Pfilunganisiwa eMiehleketweni Ya N’wina” yi tshikilele xilaveko xo sirheleta ndzhawu ya hina eparadeyisini ya moya. Hi ndlela yihi? Hi ku komisa, hi ku papalata moya wa ku vilela ni hi ku alela vugwinehi, xisweswo hi namarhela ndzayo ya Pawulo ‘mi nga hatlisi ku pfilunganisiwa emiehleketweni ya n’wina’ hi ku vulavula kun’wana kumbe hi papila rin’wana leri ri nga tisaka ku kanakana ni ku onha ripfumelo ra hina.—2 Vatesalonika 2:1, 2.
“Chava Xikwembu, Papalata Swo Biha” a ku ri drama ya vumbirhi leyi tsakisaka. Yi vulavule hi muhlayisi wa vutshembeki Yobo ivi yi komba leswaku nxaniso ni nhlomulo wa ku tirhela Xikwembu a hi swintshwa. Ku nga khathariseki matshalatshala lama endleriweke ku hi sivela, ku fana na Yobo hi fanele ku tiboha ku hlayisa vutshembeki bya hina, hi chava Yehova naswona hi fularhela swo biha.
Nkulumo ya rivala leyi nge, “Minkarhi ni Tinguva ta Xikwembu—Swi Kombetela Eka Yini?” yi hi tsundzuxe leswaku Yehova a a “susa tihosi ni ku yimisa tihosi” ku twanana ni xikongomelo xakwe lexi nga hundzukiki. Loko nkarhi wakwe wu fika, hikwalaho, handle ko hluleka u ta herisa vubihi kutani a kondletela vululami.—Daniel 2:21, 44.
Tinkulumo timbirhi to pfala a ti fanela hakunene. “Ku Chaveleriwa Ka Vanhu Va Vutshembeki” yi hi tiyisekise leswaku hi Rito ra Yena, hi moya wakwe, na hi ku hlamula swikhongelo swa hina, Yehova u ta hi tiyisa emiringweni handle ko hluleka. Kutani tanihi loko nkulumo yo hetelela yi kombisile, Timbhoni ta Yehova a ti tlheleli ndzhaku hi leswi ti hanyaka emisaveni leyi ya vakaneti. Ku ri na sweswo, i “Vahlayisi va Vutshembeki Va Nhlengeletano Leyi Yaka eMahlweni!” Nhlengeletano leyi yi hlawulekile eku seketeleni ka yona ka vuhosi bya Yehova ni le ku tiyisekeni ka yona ka ku hlula ni ku pona.
Yanani Emahlweni Tanihi Vahlayisi Va Vutshembeki!
Ku tlhandlekela eka ntsako wa vona wo kuma swakudya swin’wana leswi fuweke swa moya, ku katsa ni tibuku letinene timbirhi letintshwa, vatsombani a va tsakile eku humesiweni ka broxara leyi nga ni swifaniso swa mihlovo ya matluka ya 32 leyi nge Hulumendhe Leyi Nga Ta Tisa Paradeyisi. Nakambe i ntsako muni wonghasi lowu a wu ri kona eku kumeni ka Kingdom Melodies No. 6, khasete ya vuyimbeleri byo xonga byo hi nyanyula!
Vatsombani lava phyuphyisiweke swinene ni lava katekisiweke, lava hangalakaka va nkhensile hakunene hikwalaho ka nkhuvo wa moya lowu hakelaka swinene. Ntshembo wa hina wu pfuxetiwile leswaku Loyi a seketeleke vaseketeri va vuhosi byakwe hi malembe ya 6 000 hi ku tsaka u ta vona timbhoni takwe ti hundza “emasikwini ya makumu” lama xiyekaka hi ku hlayiseka ti nghena eMafambiseIweni Lamantshwa, hinkwaswo swi tisa ku Iweriwa kakwe loku nga heriki.—2 Timotiya 3:1; Nhlavutelo 7:9-12; 21:1-5.
Hi ntshembo lowu ni ripfumelo eka Yehova, Xikwembu xa hina, xikongomelo xa hina i yini? Kavula, hi tiyimisele ku ya emahlweni hi xivindzi tanihi vahlayisi va vutshembeki va nhlengeletano ya Yehova ya lembe xidzana ra vu-20!
[Bokisi eka tluka 29]
Leswi Van’wana Va Swi Vuleke
Leeds, mulanguteri wa maphorisa, eNghilandi: “Ndzi rhandza ku vonga n’wina, vatirhi va n’wina, ni hikwavo vanhu va n’wina lava hlanganyeleke. . . . Hi ndlela ya le henhla leyi mi pulaneke no tikhoma ha yona. A ku ri ku dzuneka eka n’wina hikwenu. Ndzi vhakerile eXitediyamu hi Mugqivela nindzhenga na hi Sonto nimixo kutani ndzi kuma moya ni maendlelo ku ri ntokoto lowu phyuphyisaka. Vatirhi-kulorhi vo tala va hlamusele leswi fanaka.”
Muhleri-nkulu wa phepha-hungu ra Montreal, eCanada, ehansi ka nhloko-mhaka leyi nge “A hi tlheleni hi n’wayitela eka vanhu va Yehova.” “Tolweni, ehansi ka tiawara timbirhi, va gongondze minyangwa ya 800 000 endhawini leyi: Xivumbeko xo endla vadyondzisiwa va ntsengo lowukulu va moya, leswi nga ha vilerisaka swintsongo kambe swi nga ri leswi nyenyetsaka. . . . Loko u amukela vapfhumba ekaya ra wena, a wu vileri hi ku tikarhatanyana u va lunghisela ndhawu. . . . Kutani, ku vuriwa yini loko hi nga hlanganyeli eka ripfumelo ra Timbhoni ta Yehova; hi nga hlanganyela, masikunyana, kuntsongo ntsena ka ku rhula ka vona, kutani hi ta twa swi antswa. Vanhu lava vo rhula va hlawule ku hlangana eMontreal; a ku te lava engetelekeke, makume ya magidi ya vona.”
Phorisa ra le Dortmund, Federal Republic ra Jarimani ri te: ‘Eka swiendlakalo swa mintlangu laha hi na ku ringana 200 wa maphorisa lama tirhaka; etinhlengeletanwini ta n’wina hi lava vambirhi ntsena, xikan’we ni van’wana vambirhi ku lawula swo famba emagondzweni.’
Mininjere wa xitediyamu xa bolo eNorwich, eNghilandi u te: “Moya wa ku rhula hi masiku ya mune . . . wa hlamarisa. U vona ku rhula ka vumunhu loku hambaneke hi laha ku heleleke ni ka masiku wahi kumbe wahi man’wana ya mune emisaveni ya bindzu lerikulu ni vutomi bya siku na siku lomu hi tshamaka kona. Hakunene Timbhoni ti na xin’wana lexi hambaneke ha vona ni lexi nonohaka ku xi hlamusela.”
[Bokisi eka tluka 30]
Nhlengeletano ya le Montreal—Nchumu wo Hlawuleka!
Eka leswi tameriweke hi nongonoko, Nhlengeletano ya Muganga ya “Vahlayisi va Vutshembeki” leyi khomeriweke eXitediyamu lexi dumeke xa Olympic eMontreal, Quebec, Canada, a wu fana ni yin’wana hinkwayo enxaxamelweni lowu. Kambe eka tindlela tin’wana a wu hlawulekile. Exikarhi ka swilo swin’wana, a ku ri ntlawa wo sungula wa tinhlengeletano leti, leti a ti ri to hlawuleka hi vukulu kumbe hi tindlela tin’wana.
Vukulu: Ntsengo wa vatsombani va 78 804 ku suka evuxeni bya Canada ni le n’walungwini wa United States. A swi tiyisa ripfumelo ku va xiphemu xo tano xa vunyingi lebyikulu bya vahlayisi va vutshembeki lava yingisaka, va yimbelela ni ku khongela kun’we. Leswi a swi hlawulekile!
Nkhuvulo: A ku ri ntsako wo hlawuleka ku vona 1 004 lava tinyiketeleke lavantshwa va yima leswaku va khuvuriwa. Laha a ku ri na vumbhoni lebyi vonakaka bya ku andza loku sweswi ku endlekaka exikarhi ka hina.
Tindzimi: A ku ri na minongonoko hi tindzimi ta 11—Xiarabiya, Xichayina, Xinghezi, Xifurwa, Xigriki, Xihungaria, Xintariyana, Xikorea, Xiputukezi, Xipaniya, na Xiukrania. Endzeni ka xitediyamu, endlelo ro hlawuleka ra mpfumawulo a ri lunghiseleriwile lerova lava nga eka swiyenge swa Xifurwa va yingisa hi ririmi ra vona loko varhumiwa lava vulavulaka Xinghezi va swi twa hi ra vona.
Doroba ra Ndhawu ya Swigolonyani swa Mpahla: Leyi a ku ri mhaka yin’wana yo hlawuleka. Ku amukela varhumiwa lava lavaka mbangu wa swigolonyani swa mpahla, tikharavhani ni mathendhe, matshalatshala ya sungule hi December 1984 yo tirhisa Phaka leyi nga kusuhi ya Maisonneuve, loko ntsena u tsemakanya xitarata ku suka exitediyamu. Loko vatirhela-mfumo va tshineleriwile ro sungula hi ta ku hirha Phaka, hi ku twisiseka va hleka. Entiyisweni, ku hirha phaka ya le dorobeni a ku nga si endliwa ni kan’we. Hambi swi ri tano, eku heteleleni, va nyiwile mpfumelelo. Ku twala lokunene ka Timbhoni ta Yehova ku pfunile.
Emakumu, ku yimisiwile 4 300 wa tikharavhani, kutani vatsombani va 20 000 va kume ndhawu yo tshama ebyanyini exikarhi ka mirhi leyo tala ya ndzhuti. Kutani xiyimo xa phaka a xi ri xihi endzhaku ka loko vanhu vo tarisa leswi va yi tirhisile ku ringana vhiki? Vatirhela-mfumo lava hlamarisiweke va kume ku nga ri na ku onhaka ni kun’we. Hikwalaho ka sweswo, ntsengo hinkwawo wa tifigara ta ntlhanu ta ku onheka ta dipositi wu tlherisiwile!
Swirho Swa Huvo Leyi Fumaka Leswi A Swi Ri Kona: Mhaka leyi nakambe yi endle nhlengeletano ya le Montreal yi hlawuleka. Hambi loko vanhu va Yehova va papalata vugandzeri hinkwabyo bya swivumbiwa, handle ko kanakana vo tala va vile ni ku titwa ka makwerhu un’wana loyi hi ku tlangela a nge te: “Ku va kona ka swirho swa nkombo swa varhandziwa va Huvo Leyi Fumaka, lava van’wana va vona a ndzi nga si tshama ndzi va vona kumbe ku va twa va nyikela nkulumo, a swi khutaza swinene.”—Varhoma 1:11, 12.
Ku Amukeriwa Lokunene: Vatirhela-mfumo ni vanhu va tirhisane ni Timbhoni ta Yehova hi ndlela leyi bumabumeriwaka ni yo twisisa. Leswi a swi hlawulele loko ku tsundzuwa leswaku malembe ma nga ri mangani lama hundzeke khale ka Mufumi wa Quebec Maurice Duplessis u lunghlselele “nyimpi leyi nga riki na musa yo lwisana ni Timbhoni ta Yehova” ku fikela loko ti nga ha ri kona. Hi laha ku twalaka ke, muviki un’wana wa mahungu u te: “Tsundzuka, tolo [Ravuntlhanu] a ku ri na Timbhoni ta 74 846 exikarhi ka xitediyamu! Maurice Duplessis, loyi a yiriseke ntlawa lowu, u fanele a tshukatshuka esirheni.”
Lowu a wu nga ri nkarhi wo sungula leswaku Yehova a katesa vahlayisi va vutshembe hi xitalo. Hi tindlela to tala, hambi swi ri tano, nhlengeletano ya le Montreal a yi ri nchumu wo hlawuleka.
[Chati eka tluka 28]
Tinhlengeletano Tin’wana Ta “Vahlayisi Va Vutshembeki”
Tiko Tinhlengeletano Nhlayo Vukhuvuriwa
Austria 3 23 123 237
Brazil 25 389 387 4 825
British Isles 10 142 859 925
Canada 14 146 897 1 585
Ecuador 4 22 918 394
France 11 119 940 2 002
Germany, Federal Republic of 17 148 853 904
Greece 3 37 367 386
Italy 25 184 078 4 153
Japan 25 202 221 3 512
Netherlands 1 40 694 151
Portugal 10 52 581 990
Spain 13 90 808 1 628
Sweden 8 2 194 315
Switzerland 3 20 601 213
United States of America 112 1 189 173 9 851
Venezuela 4 69 843 1 063
[Swifaniso eka tluka 31]
EMontreal, W. L. Barry wa Huvo Leyi Fumaka u humese buku leyintshwa yo tsakisa leyi nge “Life—How Did It Get Here? By Evoiution or by Creation?”
Ndlela ya Yobo yo hlayisa vutshembeki yi tlakusiwile eka drama leyiya Bibele leyi veke kona enhlengeletanwini eAthena, aGreece