Xana Wa “Gingirika Eku Amukeleni Ka Vaendzi”?

A KU RI siku ro kufumela. Ntlawa wa Timbhoni ta Yehova, lavantsongo ni lavakulu, a va tirha hi matimba, va basisa, va penda, ni ku endla mintirho yo hambana entirhweni wo pfuxa Holo ya Mfumo. Nindzhenga, a va vonaka va karhele, naswona van’wana a va tshame ehansi va wisa swintsongo.

Hi nkarhi wolowo, ku nghenile vamakwerhu vanharhu va xisati va Timbhoni, va khome tisangweji, makokisi, makhekhe, kofi, tiya, ni swakunwa swin’wana. Vona ku hlamala konghasi ka mimoya yoleyo leyi karhaleke! Xikombiso xo tirhandzela xa malwandla ni rirhandzu ra vamakwerhu vanharhu va xisati a swi phyuphyisanga vatirhi emirini ntsena kambe swi vange ni moya wo kufumela ni wa rirhandzu exikarhi ka vamakwerhu va xinuna ni va xisati kwalaho ndzhenga wolowo.

Mfungho Wa Vukriste Bya Ntiyiso

Malwandla ni rirhandzu, kavula, a swi heleli eka minkarhi yo tano leyi hlawulekeke. Mayelana ni valandzeri vakwe va ntiyiso, Musunguri wa Vukriste bya ntiyiso, Yesu Kriste, u te: “Hinkwavo va ta tiva leswaku mi vadyondzisiwa va mina, loko mi rhandzana.” Hi laha ku fananaka, muapostola Pawulo u khongotele Vakriste-kulobye a ku: “Mi gingirika eku amukeleni ka vaendzi.” (Yohane 13:35; Varhoma 12:13) Hi marito man’wana, malwandla lama susumetiwaka hi rirhandzu leri nga riki na vutianakanyi eka van’wana i ndlela ya vutomi eka Vakriste va ntiyiso.

Timfanelo to tano, hambi swi ri tano, a ti titeli hi toxe loko munhu a va Mukriste. Ku ri na sweswo, munhu u fanele ku tirha hi matimba ku ti hlakulela. Leswi swi tano emisaveni ya namuntlha, laha rirhandzu ra vanhu vo tala ri titimeleke, tanihi loko Bibele yi swi vhumbile. (Matewu 24:12) Kambe vona ku hambana ka kona ni laha timfanelo to tano ti nga kona! Endyangwini lowu vumbaneke, swirho swi tsakela ku va swin’we naswona va tsaka ku hungata kun’we. Hi ku fanana, loko swirho swa bandlha ra Vukriste swi hlanganyela nkarhi na nkarhi etidyondzweni, evutirhelini bya nsimu, futhi ni le ka swiendlakalo swin’wana, hakunene va tivana. Va va vanghana va ntiyiso, kumbexana ku tlula ni swirho swa ndyangu. (Swivuriso 18:24) Xiboho lexi xa vunghana exikarhi ka timbhoni-kulorhi ta Yehova xi tirha tanihi rihlampfu ra matimba ku Iwa ni minkucetelo leyo biha ya misava.

Mfanelo Ya Vavasati Va Vakriste

Hambi loko Vakriste hinkwavo va khongoteriwa ku “gingirika eku amukeleni ka vaendzi,” vavasati va Vakriste va ni xiphemu xa nkoka emhakeni leyi. Kahle-kahle, hi ntolovelo xana a hi vavasati ngopfu-ngopfu lava tekiweke, lava endlaka ntirho wo tala mayelana ni ku endla malwandla? Loko wanuna a rhamba van’wana ebandlheni ra ka vona leswaku va ta hungata hi Xikriste, xana hakanyingi a hi wansati a basisaka yindlu, a lunghisa swakudya ni swo nwa, ni ku basisa endzhaku ka sweswo? Hambi leswi wanuna ni vana va nga swi kotaka, ni leswi va fanelaka va swi rhandza ku pfuneta, a swi papalateki leswaku wansati hi yena la nga ni ndzhwalo wo vona leswaku hinkwaswo swi hlayisiwa hi mfanelo.

Leswi bumabumeriwaka, vavasati vo tala va Vakriste hi ku swi rhandza va tikarhata leswaku va komba malwandla ya ntiyiso eka vamakwavo va moya va xinuna ni va xisati. Hi xikombiso, Dip Yee, phayona ra nkarhi hinkwawo eHong Kong leri nuna wa rona a nga nkulu ebandlheni ra kwalaho. Hambi loko swi vula ntirho wo tala eka yena loko va rhamba vamakwerhu va xinuna ni va xisati, nkarhi wun’wana ntlawa hinkwawo wa dyondzo ya buku, wu ta ekaya ka vona, hi ntsako u kombisa malwandla. “Hi endla swakudya swi olova,” hi ku vula kakwe. “I swinene ku vona vamakwerhu va tsakela ku hlangana hi ndlela leyi ni ku akiwa hi swona.” Hakunene, hi malwandla ya vona vavasati va Vakriste va ni xiphemu lexikulu eku akeni ka moya lowu kufumelaka ebandlheni.

Hikwalaho ka hinkwaswo leswi katsekaka eku kombiseni ka malwandla, hakunene swi lava migingiriko ni ku tinyikela eka vavasati va Vakriste. Kambe va nga va ni ntshembo wa leswaku mintirho ya vona ya rirhandzu ya tlangeriwa swinene hi vavanuna va vona ni vaamukeri van’wana lava nkhensaka. Kavula, minkarhi yin’wana van’wana va nga ha va va nga kombi ku tlangela loku faneleke eka leswi va endleriweke swona, kambe sweswo hakunene a hi xivangelo xa ku hela matimba kumbe ku kwata, kumbe ku tshika ku amukela vaendzi. Tsundzuka, hambi leswi swi tsakisaka ku amukela marito yo nkhensa lama humaka eka van’wana ni ku xiya leswaku matshalatshala ya hina ma tlangeriwa, hi lava ku kombisa malwandla hikwalaho ka leswi wu nga nchumu lowunene ni wa rirhandzu ku wu endla. Ku tlula hinkwaswo, swi tsakisa Yehova loko hi endla tano.

Ku Va Ni Langutelo Lerinene

Emasikwini lawa ya minxavo leyi tlakukaka, van’wana va nga ha kanakana ehenhleni ko kombisa malwandla hi leswi va vonaka onge va nge swi koti ku endla tano. Laha hi laha swi nga swa nkoka leswaku hi va ni langutelo leri ringaneleke hi mhaka leyi. Hambi leswi ku va ni swin’wana leswi hlawulekeke hi tlhelo ra swakudya ni swakunwa swi engetelaka ku tsakisa ka xiendlakalo xexo, a hi yona mhaka ya nkoka lowukulu. Rito ra Xikwembu hi vutlhari ri kombisa leswi: “Ku dya maṭav̌u ntsena laha ku nga ni riranḍu, ku tlula homu ya ku nona laha ku nga ni ku v̌engana.” (Swivuriso 15:17) Leswi hi nga na swona kumbe leswi hi swi phamelaka a hi wona nchumu wa nkoka. Lexi nga xa nkoka ni lexi tlangelekaka i xinakulobye lexi akaka ni moya wa rirhandzu lowu hi wu kombisaka.

Languta mhaka ya Fung Hing, makwerhu wa xisati wa malembe ya va-40 la nga ni nuna la kanetaka. U tshama eka kamara leyintsongo swinene ya wun’wana wa miako leyikulu ngopfu ya vanhu eHong Kong. A nga hanyanga swinene. Kahle-kahle, u fanele ku endla ntirho wa nkarhinyana ku tlakusa muholo wa ndyangu. Kambe, wa hanana hi leswi a nga na swona. Loko Timbhoni ebandlheni ti ta eka vaakelani wakwe ku ta endla ntirho wo chumayela hi yindlu na yindlu, hakanyingi u va rhambela ekaya ka yena leswaku va ta kuma swakudya. Xiendlo xo tano xa rirhandzu a xi tsakeriwi hi Vakriste-kulobye ntsena kambe xi tlhela xi komba leswaku munhu a nga fanelanga ku va la fumeke leswaku a ta komba malwandla ya ntiyiso.

Hambi loko hi ringanisela swinene eku titsakiseni ka hina, kambe, hi nga ha kuma swi fanela ku tshika swilo swin’wana leswaku hi ta swi kota ku kombisa malwandla. I swa nkoka xana? Kunene, loko hi susumetiwa hi rirhandzu ra ntiyiso ra Vukriste. Hi rihi rirhandzu leri nga hava ku tikarhata xana? Yehova kun’we na Yesu va kombe rirhandzu ra vona eka vanhu hi ku tikarhata lokukulu—Yehova u nyikerile N’wana wakwe, Yesu yena a nyikela vutomi byakwe lebyi hetisekeke bya vumunhu.—Yohane 3:16; 15:13.

Vakriste vo sungula na vona va landzele ndlela ya rirhandzu. Mayelana ni vamakwerhu eMakedoniya, muapostola Pawulo u tsarile: “Va ringiwile ngopfu hi maxangu, kambe exikarhi ka swona hinkwaswo, ku tsaka ka vona ku yile ku engeteleka. Kutani hambi leswi a va ri evusiwaneni lebyikulu va humesile tinyiko ta vona hi ku hanana loku tlurisaka mpimo. Ndzi nga mi byela leswaku va hlengile hi ku ya hi hinkwaswo leswi a va ri na swona, ni ku hundzisa kwalaho; hi ku rhandza ku vona, va komberile hi matimba swinene leswaku hi va katekisa.” (2 Vakorinto 8:2-4) ‘Vusiwana lebyikulu’ bya vona ni ‘ku tikarhata swinene ka vona’ swi endle leswaku ku hanana ka vona ku va ka xiviri ni loku khumbaka mbilu.

Hambi loko munhu a ri xisiwana kumbe a vonaka a hanye kahle, naswona ku nga khathariseki rifuwo ra manguva lawa, swa ha lava nkarhi, matimba ni rifuwo ku komba malwandla. Kahle-kahle, xivutiso hi lexi: Xana hi rhandza ku tikarhata leswaku van’wana va ta tsakela minkateko ya xinakulobye xa Vukriste? Tsundzuka, “L’a hananaka o ta nona,” ku vula xivuriso xa Bibele, “L’a tšheletaka o ta tšheletiwa na yena.” Nakambe hi nga chaveleriwa hi mianakanyo ya leswaku loko hi komba malwandla eku yingiseni ka marito lama lerisiweke hi Yehova ni le ku tekeleleni ka xikombiso xakwe lexinene, hakunene hi ‘lomba Yehova.’—Swivuriso 11:25; 19:17.

I Vamani Lava U Nga Va Rhambaka?

“Loko u endla nkhuvo wa xifihlulo kumbe wa xilalelo,” ku tshama ku vula Yesu, “u nga rhambi vanghana va wena, kumbe vamakwenu, kumbe maxaka ya wena.” Ha yini swi nga fanelanga? “Hikuva na vona va ta ku rhamba, kutani swi hundzuka xinkhenso eka wena.” (Luka 14:12) Yinhla leyi Yesu a yi endleke laha a hi ku vula leswaku hi nga rhambi vanghana va hina kumbe maxaka eswakudyeni. Minkarhi yo tala a a tsakela swakudya ni vanghana vakwe, tanihi le kaya ka Mariya na Marta. Mhaka hi leswaku ku kombisa ka hina ka malwandla a ku fanelanga ku endliwa hi mianakanyo yo tlheriseriwa.

Tanihi loko Yesu a ye emahlweni a kombisa, lava hi faneleke ku va languta ku sungula eku rhambeni hi lava nga ta pfuneka swinene hi xinakulorhi. (Luka 14:13) Va nga ha katsa ni lava lavaka ku khutaziwa, lava nga vantshwa entiyisweni, lava nyumaka kumbe lava vonakaka va nga khathaleriwi ni lava kuleke. Ku aka loku xinakulobye xo tano xi nga na kona ku nga voniwa eka marito ya Oi Yuk, makwerhu wa xisati la kuleke loyi a hisekaka swinene kambe loyi a karhatiwaka hi rihanyo leri nga nyawuliki: “Vamakwerhu hakanyingi va ndzi rhamba eka swinkhubyana swa vona ni ku ndzi komba musa hi tindlela to tala. Swi ndzi endla ndzi tsaka ku va xiphemu xa ndyangu lowukulu!”

Kahle-kahle, xikongomelo xa minhlangano yo tano xi tlula ku vumba xinghana ntsena. Ku ri na sweswo, i ku aka ni ku tiyisa vun’we bya rirhandzu exikarhi ka vagandzeri-kulobye va Yehova. Hikwalaho, lexi kandziyisiwaka ku fanele ku va ku hlayisa moya lowu akaka ni lowu khutazaka ku ri na ku fuwa ka swakudya ni swo nwa. Hi ku fanana, ku fanele ku anakanyiwa hi swiendlo ni mabulo eka swiendlo swo tano. Hambi loko swi nga bohi leswaku swiendlo hinkwaswo swi va swa Bibele kumbe leswaku ku vulavurisana hinkwako ku va ka timhaka ta Matsalwa, swi ta va vutlhari ni rirhandzu ku swi hlayisa minkarhi hinkwayo swi ri leswi akaka ni ku khutaza. Mintlangu ya mphikizano, mahlevo kumbe ku poyilana hakunene swi fanele ku papalatiwa.—Vaefesa 4:29, 31.

Hakelo Leyi Fuweke Yi Rindzele Lava Nga Ni Malwandla

Hambi leswi munhu a nga fanelangiki ku kombisa malwandla hi mianakanyo yo tlheriseriwa, leswi a swi vuli swona leswaku munhu la nga ni malwandla a nga kumi hakelo ni yintsongo. Ku hambana ni sweswo, ku komba malwandla ya ntiyiso swi tisa tihakelo to tala, hambi loko ti nga kambisisiwanga. Swi pfuna munhu ku endla vanghana lavantshwa, naswona swi tiyisa swiboho swa khale. Swi susumetela ni van’wana ku hlakulela moya wa ku hanana ni malwandla. (Luka 6:38; Swivuriso 11:25) Ku tlula hinkwaswo, munhu la nga ni malwandla swinene emisaveni hinkwayo, Muvumbi wa hina wa rirhandzu Yehova Xikwembu, u ta vona leswaku lava nga ni malwandla hi ntiyiso va nga tshuki va pfumala, hikuva u tsakela lava ‘gingirikaka eku amukeleni ka vaendzi’ ku fana na yena.