Swivandzana Swa Nhlavutelo—Hikwalaho Ka Yini Hi Hlaya Hi Swona?

APOCALIPSI! Rero hi rin’wana ra mavito lama hlamarisaka lama nyikiweke buku yo hetelela ya Bibele. Nakambe yi vitaniwa buku ya Nhlavutelo. Buku leyi yi tele hi swifaniso swa marito lama hlamarisaka, lama hlawulekeke lawa exikarhi ka wona ku nga ni lawaya ya dragona ni swivandzana swinharhu. Van’wana va vona swivandzana leswi swi chavisa. Van’wana va swi honisa tanihi milorho ya mukhalabye. Manuku ke, hikwalaho ka yini u fanele ku hlaya hi ta swivandzana swa Nhlavutelo? Hikuva ntsako wa wena wa katseka.

I ntiyiso, muapostola Yohane a a ri mukhalabye loko a tsala buku ya Nhlavutelo kwalomu ka malembe ya 1 900 lama hundzeke. Hambi swi ri tano, xana sweswo swi vula leswaku swivandzana leswi yi swi hlamuselaka a ku ri milorho ya miehleketo ya leswi hundzeke? Doo, naswona Yohane a a nga ri mukhalabye wo sungula ku vona swivono swo tano. Wanuna loyi a vuriwaka Daniyele na yena u vonile swivono swa swivandzana emalembeni ya vudyuhari bya yena, naswona swivono leswi swi tikombe swi ri vuprofeta lebyinene bya ku cinca ka hulumendhe ya vanhu. (Daniel, tindzima 7 na 8) Nakambe, Yesu Kriste hi yexe u langute Daniyele tanihi loyi a a huhuteriwe hi Xikwembu, a n’wi vitana muprofeta ivi a tshaha matsalwa yakwe.—Matewu 24:15.

Yesu u kombise leswaku vaapostola va yena a va ta amukela vuleteri lebyi engetelekeke bya le henhla endzhaku ka rifu rakwe. (Yohane 16:12, 13) Naswona leswi timhaka to tala ta buku ya Nhlavutelo ti hetisekeke hi ndlela leyi xiyekaka, hi nga tiyiseka leswaku swivono ‘swa muapostola Yohane swa swivandzana swa Nhlavutelo naswona a swi huhuteriwe hi Xikwembu.—2 Timotiya 3:16.

Masungulo ya buku ya Nhlavutelo ma ri: “Leyi i nhlavutelo ya Yesu Kriste, leyi Xikwembu xi n’wi nyikeke yona . . . U tivisile swilo leswi hi ku rhumela ntsumi ya yena eka Yohane nandza wa yena.” (Nhlavutelo 1:1) Hikwalaho ke, swivono leswi nga eka buku ya Nhlavutelo, ku katsa ni leswiya swa swivandzana swa yona, i swo fanekisela, hayi swa xiviri. Ku hava xilaveko xo chava ku hlaya hi swona. Swivandzana leswi swo fanekisela swi nyika Vakriste vutivi bya nkoka, swi va pfuna ku hlayisa vuxaka bya vona ni Xikwembu. Xisweswo, muapostola Yohane u swi kotile ku tsala a ku: “Ku katekile munhu loyi a hlayaka mahungu lawa ya vuhlavuteri, ku katekile ni lava va ma yingisaka, ni ku landza leswi tsariweke ebukwini ya kona; hikuva nkarhi wa ku humelela ka swona wu kusuhi.” Ina, ku twisisa ka wena swifanekiselo leswi ku nga tisa ntsako sweswi ni le nkarhini lowu taka.—Nhlavutelo 1:3.