Wa Tsundzuka Xana?

Xana u anakanyisise hi minkandziyiso ya sweswinyana ya Xihondzo xo Rindza ke? Loko swi ri tano, u ta tsundzuka leswi landzelaka:

◻ Yesu u kombise rirhandzu rakwe eka vanhu ku fikela kwihi?

U suke ekaya ra le tilweni ra ku rhula ni nsirhelelo hi ku tirhandzela a ta a ta dya, a etlela ni ku endla xinakulobye ni vanhu lava va vabyaka ni ku fa. Endzhaku ka leswi, Yesu u tshike vukona byakwe bya munhu la hetisekeke hi ku tirhandzela a lunghiselela nkutsulo wo pfuna vanhu. (Matewu 20:28)—12/15, matluka 3, 4.

◻ I mimpfuno yihi ya munhu hi xiyexe leyi vaka kona eka Mukriste loyi a hlakulelaka ku tikhoma?

Mukriste u kuma ku tixixima lokukulu hi ku kombisa ku tikhoma. Nakambe, u tsakela ku rhula ni ntsako lowukulu endyangwini, ebandlheni ni le ka swinakulobye swa siku na siku. Ehenhla ka hinkwaswo, ku tikhoma ku pfuna ku aka xinakulobye lexinene ni Muvumbi wakwe ivi a tikombisa a ri Mukriste wa ntiyiso.—12/15, tluka 24.

◻ Nsusumeto lowukulu wo kombisa mapfundza ku fanele ku va wihi?

Hambi leswi swi tsakisaka ku amukela swiga swo tlangela leswi humaka eka van’wana ni ku xiya leswaku matshalatshala ya hina ya tlangeriwa, hi fanele ku lava ku kombisa malwandla ngopfu-ngopfu hikuva i swinene naswona i nchumu wa rirhandzu ku wu endla. Ku tlula kwalaho, swi tsakisa Yehova Xikwembu leswaku hi endla tano.—1/15, tluka 22.

◻ Xana mukhandziyi wa hanci yo basa, loyi a hlamuseriweke eka Nhlavutelo 6:2, u khumba vutomi bya wena hi ndlela yihi?

Yesu i mugadi wa hanci yo basa, naswona u sungule ku khandziya kakwe ka le tilweni hi 1914. Loko a vhumba ndlela leyi vanhu a va ta khumbiwa ha yona hi ku fuma ka yena, u te: “Siku N’wana-wa-Munhu a taka hi ku kwetsima ka yena, ni tintsumi hinkwato ti ri na yena . . . u ta hlawula van’wana a siya van’wana, kukotisa murisi loko a hlawula tinyimpfu exikarhi ka timbuti.” Namuntlha, vanhu hinkwavo va hlawuriwa, naswona ndlela leyi u amukelaka rungula ra Mfumo ha yona yi ta vula vutomi kumbe rifu eka wena. (Matewu 25:31-33; 24:14)—1/15, tluka 6.

◻ Hi tihi tindlela tin’wana leti Yehova a chavelelaka ni ku pfuna malandza yakwe ha tona?

Yehova u chavelela ni ku seketela malandza yakwe hi moya wakwe lowo kwetsima. (1 Petro 4:12-14) Nakambe u va chavelela hi ku amukela swikhongelo swa vona. (Vafilipiya 4:6, 7) Nakambe, Rito ra Xikwembu i xihlovo lexikulu xa ku chavelela, lexi tlyisaka malandza ya xona leswaku ku hava lexi nga humelelaka eka vona lexi Yehova a nga xi voniki kumbe ku xi lawula.—2/1, tluka 19.

◻ Apocalipsi leyi vhumbiweke eBibeleni i yini?

I ku lamula loku hlawuriweke ka Xikwembu etimhakeni ta vanhu.—2/15, tluka 7.

◻ Nhlamuselo ya xiga xa Yesu xa “vutomi eka n’wina,” eka Yohane 6:53 hi yihi xana?

Eka Yohane ndzima 6, Yesu u tshaha “vutomi lebyi nga heriki” ni ku va ni “vutomi eka n’wina,” hi leswaku, ku nghena eku hetisekeni ka vutomi eku heteleleni. “Ntlhambinyana” wa vadya-ndzhaka va Mfumo wu tokota sweswo eku pfuxeriweni ka wona ematilweni, kutani “tinyimpfu tin’wana” ti endla tano endzhaku ka ku hela ka ku Fuma ka Kriste ka gidi ra malembe. (Nhlavutelo 20:4, 5)—2/15, tluka 19.

◻ I nawu wihi lowu kandziyisiweke ebukwini hinkwayo ya Nehemiya lowu wu nga dyondzo eka hina namuntlha?

Nawu wa kona hi leswaku “loko Yehova a nga aki yindlu, lav̌a yi akaka v̌a tikaratela ŝa hav̌a.” (Psalma 127:1) Namuntlha, ematshalatshaleni yerhu hinkwawo, hi ta humelela loko hi katekisiwa hi Yehova ntsena.—2/15, tluka 26.

◻ I yini lexi pfuneke Yobo enkarhini wa ku ringiwa ka yena, naswona leswi swi nga hi pfunisa ku yini namuntlha?

Yobo a a tiyiseka leswaku vutomi lebyi a hi byona ntsena. (Yobo 14:13-15) Ku va ni ntshembo lowu fanaka namuntlha, leswaku Yehova u ta pfuxa malandza yakwe lama tshembekaka, swi nga hi pfuna ku kongomana ni miringo yihi na yihi leyi Sathana a nga ha yi tisaka eka hina. (Vaheveru 6:10; 11:6)—3/1, tluka 20.

◻ I dyondzo yihi leyi vatswari va nga yi dyondzaka eka vuyelo bya xidyoho xa Davhida na Baxeba?

Yehova u kombise musa eka Davhida hikwalaho ka ntwanano wa Mfumo, xisweswo a pfumelela yena na Baxeba ku hambeta va hanya. Hambi swi ri tano, muvulavuleri wa Yehova u te eka vona: “Kambe leŝi u tsaṅwiseke Yehova e ka v̌alala v̌a yena e mhakeni leyi, ṅwana loyi u v̌elekeriweke yena o ta fa hakunene.” (2 Samuel 12:14) Leswi swi fanele ku kandziyisa eka vatswari leswaku mahanyelo ya vona ya nga khumba vana va vona swinene.—3/15, tluka 31.

◻ I yini lexi lavekaka loko munhu a ta va ni xinakulobye lexi amukelekaka xa Timbhoni ta Yehova?

Munhu wo tano u fanele ku amukela nxaxamelo hinkwawo wa tidyondzo ta Bibele, ku katsa ni tidyondzo letiya ta Matsalwa leti ti nga ta nkoka eka Timbhoni ta Yehova.—4/1, tluka 31.

◻ Loko miehleketo leyo biha yi nghena emianakanyweni nkarhi na nkarhi, hi fanele ku endla yini?

Hi fanele ku ala ku pfumelela miehleketo ya hina yi tshama emianakanyweni leyi yo biha. Leswaku hi pfuneka ku endla leswi, hi fanele ku ya eka Yehova hi xikhongelo hi ku anghwetla, ‘hi lahlela ndzhwalo wa hina eka Yehova.’ (Psalma 55:22)—4/1, tluka 25.