Mahungu Lamanene—I Ntiyiso Kumbe I Xitori?

LAVA va vuriwaka vaxopaxopi va swihoxo i khale va ri karhi va hlanganisa timhaka ta mahungu lamanene ta vutomi bya Yesu ni swivumbeko swo tala: Va vula leswaku timhaka leti ti tele hi ku kanetana naswona ti tsariwile khale swinene endzhaku ka swiendlakalo swa kona kuva ti nga va matimu ya ntiyiso. Va vula leswaku masingita ya kona ko va ku hembetela.

Eka buku yakwe leyi nge Caesar and Christ, n’wa-matimu Will Durant u ringete ku kambela timhaka ta mahungu lamanene hi xikongomelo lexi tengeke—tanihi matsalwa ya matimu. Hi ku pfumela leswaku ku vonaka ku ri na ku kanetana ni swiphiqo etimhakeni ta mahungu lamanene, hambi swi ri tano u te: “Ku kanetana i ka timhaka tintsongo, hayi timhaka ta xiviri; eka leswa nkoka mahungu lamanene ya tibuku to sungula tinharhu ma pfumelelana kahle swinene, naswona ma vumba ntila lowu nga tsekatsekiki wa Kriste.”

Kambe ku vuriwa yini hi leswi vuriwaka hi vaxopaxopi va swihoxo leswaku Mahungu lamanene a ma fambisani na matimu ya xiviri? Durant u yile emahlweni a ku: “Eku chivirikeni ka vutshuburi bya kona Vuxopaxopi bya swihoxo byi tirhe swinene eka minkambisiso ya ntiyiso wa Testamente Leyintshwa lerova eka vona vachaviseki va khale va dzana—xik., Hammurabi, David, Socrates—wu va ntsheketo. Hambi ku ri na ku solasola ni ku swi hundzeleta ka vukhongeri ka vaevhangeli, va vika swiendlakalo swo tala leswi vatshuri vanene a va ta va va swi fihlile—mphikizano wa vaapostola wo Iwela swivandla leswi tlakukeke eMfun’weni, ku baleke ka vona endzhaku ka ku khomiwa ka Yesu, ku landzula ka Petro . . . A ku na loyi a hlayaka swivono leswi loyi a nga kanakanaka leswaku loyi a endleke leswaku swi humelela i wa xiviri.”

N’wa-matimu Durant u dlayelele hi ku: “Leswaku vanhu vanene va nga ri vangani erixakeni rin’we va nga va va tshurile vumunhu byo tano bya matimba na lebyi nyanyulaka, xivono xa rixaka leri tlakukeke ni leri nga ni nsusumeto ra xinakulobye xa vanhu, a ri ta va singita leri nga khorwisiki ku tlula rihi na rihi leri rhekhodiweke eka Mahungu lamanene. Endzhaku ka malembe xidzana mambirhi ya Vuxopaxopi bya swihoxo tindlela ta vutomi, mukhuva ni ku dyondzisa ka Kriste, swi tshame swi ri leswi twisisekaka, naswona yi ri mhaka leyi nyanyulaka eka matimu ya munhu wa le Vupela-dyambu.”