Mikateko Ya Yehova Ya Fuwisa
“Swi ta nonon’hwa eka mufuwi ku nghena eMfun’weni wa matilo.”—MATEWU 19:23.
1, 2. I ku hambana kwihi loku nga kumiwaka exikarhi ka minxaka ya rifuwo?
KU VURIWA yini loko munhu a ku tivisa a ku, “Se u fumile ke”? Vo tala a va ta tsakisiwa hi ku byeriwa leswi loko a swi vula leswaku a va fumile hi mali, tiko, kumbe mafehle-fehle ya rifuwo. Kambe xiyisisa mhaka ya rifuwo elangutelweni leri: “Mikateko ya Yehova yi fuwisa munhu, a nga nwi engeteli mikaralo.”—Swivuriso 10:22.
2 Hi laha Xikwembu xi tirhisaneke ha kona ni vapatriarka va khale ni tiko ra Israyele, xi katekise ku tshembeka ka vona hi ntsako. (Genesa 13:2; Deuteronoma 28:11, 2; Yobo 42:10-12) Hosi Solomoni a a ri un’wana la katekisiweke ngopfu. U vile la fumeke ngopfu. Hambi swi ri tano u dyondze hi ntokoto leswaku vutomi lebyi vekiweke erifuweni ra nyama a byi ri “v̌uhav̌a ni ku lanḍa mheho.” (Eklesiasta 2:4-11; 1 Tihosi 3:11-13; 9:14, 28; 10:10) Kutani loko Solomoni a tsarile a ku, “Mikateko ya Yehova ya fuwisa munhu,” a a nga kandziyisi rifuwo ra nyama. A a vula ntiyiso wa leswaku loko u katekisiwa hi Xikwembu, vutomi bya wena byi fuwe ku tlula ni bya lava va nga xi tirheliki. Swi tano hi ndlela yihi?
3. I tindlela tihi leti u fumeke ha tona hakunene loko u ri ni mikateko ya Xikwembu?
3 Loko u ri Mukriste, u nga tsakela ku amukeriwa hi Yehova sweswi ivi u amukela mikateko leyi humaka eka yena yo fana ni vutlhari bya Xikwembu. U nga amukeriwa ebandlheni leri fanaka ni ndyangu ra Vakriste lava entiyisweni va tsakeke, lava ku tshembaka ni ku ku tsakela. Milawu ya Xikwembu yi ku sirhelela emavabyini ni le makhombyeni yo tala. Nakambe u ni xivangelo xo tshemba nsirhelelo wa Xikwembu eka “nhlomulo lowukulu” lowu nga emahlweni ka mafambiselo lawa yo biha—ivi endzhaku wu va wa vutomi eParadeyisini leyi nga heriki leyi nga ta landzela emisaveni. Kutani ke, wa swi vona, leswaku hi mikateko ni malangutelo yo tano yo hlamarisa, hakunene u nga vula u ku, “Ndzi fumile!”—Matewu 24:21, 22.
4. U nga veka ku va ka wena la fumeke emoyeni akhombyeni hi ndlela yihi? (Nhlavutelo 3:17, 18)
4 Hambi swi ri tano, ku va ka wena la ‘fumeke’ hi mikateko ya Yehova, ku nga nghenisiwa ekhombyeni hi rifuwo rin’wana—mali kumbe rifuwo ra nyama. Va nga ri vangani va hina (hambi va ri ni nsirhelelo wa timali kumbe swilo leswi hikiweke) va ta pfumela hi ku olova va ku, ‘Ndzi kongomana ni khombo ra xiviri ra ku hambukisiwa hi rirhandzu ra mali.’ Hambi swi ri tano, tsundzuka xitsundzuxo lexi: “Ku rhandza ngopfu mali i rimitsu ra leswo biha hinkwaswo; hi yo mhaka ya ku navela mali ngopfu leyi yi nga yisa van’wana kule, va tshika vupfumeri, kutani timbilu ta vona ti ngheniwa hi mivilelo leyo tala.” (1 Timotiya 6:10) Sweswo swi tsariwe enkarhini lowu Vakriste hinkwavo lava amukeriwaka a va totiwe hi moya wa Xikwembu tanihi xikombiso xa leswaku a va ta va vafumi va le tilweni na Kriste. Hi ku fanana vo tala va hlangane hi ku kongoma ni vaapostola ni van’wana lava va fambeke na Yesu. Loko mali yi ‘yise van’wana ekule,’ khombo ra kona i rikulu swonghasi eka hina!—2 Vakorinto 5:5; Varhoma 8:17, 23.
Mufumi Ni Kamela
5. Langutelo ra Yesu hi rifuwo a ku ri rihi?
5 Hakanyingi Yesu u paluxe khombo ra rifuwo, hikuva i khombo leri kongomanaka ni un’wana ni un’wana, lava va fumeke ni lava va nga fumangiki. (Matewu 6:24-32; Luka 6:24; 12:15-21) Tanihi masungulo ya ku tikambela ka munhu hi xiyexe, kambisisa leswi Yesu a swi vuleke eka xiendlakalo xin’wana, hi laha swi hlamuseriweke ha kona eka Matewu 19:16-24; Marka 10:17-30; na Luka 18:18-30. Entiyisweni, hikwalaho ka yini u nga hefemulinyana sweswi leswaku u hlaya yin’we kumbe timhaka teto hinkwato?
6, 7. (a) I bulo rihi leri humeleleke exikarhi ka Yesu ni wanuna lontshwa? (b) Endzhaku ka kwalaho, i ndzayo yihi leyi Yesu a yi nyikeleke?
6 Mufumi lontshwa u te eka Yesu ivi a vutisa a ku: “Xana ndzi ta endla yini ku kuma ndzhaka ya vutomi lebyi nga heriki xana?” Yesu u n’wi kongomise eNawini, xisweswo a komba leswaku Yehova a nga hlulekanga ku kombisa leswi a swi ri swa nkoka. Wanuna loyi u hlamule leswaku u hlayise milawu ya Xikwembu ‘ku sukela evuhlangini.’ A swi fana ni loko a ri enyangweni ya vutomi, kambe u swi vonile leswaku a a ‘kayivela xin’wana. Kumbexana u anakanye leswaku a ku ri ni vunene byin’wana lebyi engetelekeke, xiendlo xa vunhenha, lexi a xi ta va goza ro hetelela ro nghena hi nyangwa leyi yisaka evuton’wini lebyi nga heriki. Nhlamulo ya Yesu yi ni ku tirha lokukulu, “Xavisa hinkwaswo leswi u nga na swona, u avela swisiwana, hi kona u nga ta va ni xuma ematilweni; kutani u ta, u ndzi landza.” I yini lexi humeleleke? “Kambe munhu loyi a tsuva hi ku twa marito lawa, a famba a hlunamile, hikuva a a ri ni rifuwo lerikulu [kumbe, a a namarhele rifuwo ro tala].” Kutani wanuna a suka a famba.—Luka 18:18, 21-23; Marka 10:22.
7 Endzhaku ka kwalaho Yesu u te: “Swa nonon’hwa ngopfu eka lava nga ni rifuwo ku nghena eMfun’weni wa Xikwembu. Swi nga olovela kamela ku nghena hi ntuva wa neleta, ku ri ni leswaku mufuwi a nghena eMfun’weni wa Xikwembu.” (Luka 18:24, 25) Xana ndzayo yoleyo a yi ri ya mufumi la fuweke? Kumbe, xana na wena wa katseka, hambi u fumile kumbe u ri xisiwana ke? A hi voneni.
8. (a) Mufumi lontshwa wa Muyuda a a fana na yini? (b) I xihoxo xihi lexi a a ri na xona, naswona ha yini sweswo swi fanele ku hi khumba?
8 U nga ha pfuniwa ku twisisa xiyimo xexo xa mufumi lontshwa loko u anakanya hi ku yelana ka manguva lawa—Mukriste lontshwa la tengeke la nga ni vutivi lebyinene bya Bibele, wa mahanyelo lamanene, naswona a huma endyangwini lowu fumeke. U nga ha venga munhu wo tano namuntlha. Kambe Yesu u kume ku kayivela lokukulu eka wanuna lontshwa wa Muyuda: Rifuwo rakwe kumbe swilo leswi vonekaka a swi nga ri swa nkoka swinene evuton’wini bya yena. Xisweswo Yesu u tshinye hi laha a endleke ha kona. U nga vona ndlela leyi ha yona mhaka leyi ya Bibele yi nga ya hina hinkwerhu, hambi hi fumile kumbe hi ri swisiwana. Mali ni rifuwo swi nga va swa nkoka swinene eka un’wana ni un’wana wa hina, hambi loko ana se hi ri na swona kumbe hi navela ku va na swona.
9. Hi swi tivisa ku yini leswaku Yesu a nga soli rifuwo hi ndlela yoleyo?
9 Yesu a a nga vuli swona leswaku munhu la nga ni rifuwo ra leswi vonekaka a nga ka a nga xi tirheli Xikwembu. Vo tala va endle tano. Wanuna luya lontshwa wa Muyuda u endle tano—ku fikela eka mpimo wo karhi. A ku ri ni muluvisi Zakiya, loyi a a “fuwe ngopfu.” (Luka 19:2-10) Vakriste van’wana lava totiweke eka lembe xidzana ro sungula a va fumile kutani hambi swi ri tano a va ri ni mphikamakaneta leyi hlawulekeke yo “hanana, va tiva ni ku pambulela van’wana.” (1 Timotiya 6:17, 18; Yakobo 1:9, 10) Naswona ku na Vakriste van’wana lava fumeke namuntlha. Hakanyingi va nyike hi ku hanana leswaku va seketela ntirho wa Mfumo, va pfula makaya ya vona leswaku ku va ni minhlangano, naswona va tirhise mimovha ya vona evutirhelini. Manuku ke, ha yini Yesu a vule leswi a swi vuleke ehenhleni ka wanuna la fumeke ni kamela? I yini lexi hi nga xi dyondzaka eka swona?
10. Hi nga hetelela hi ku yini eka ndzayo ya Yesu exiendlakalweni xexo?
10 Hi laha u nga tlangelaka ha kona, ku sungula ku gandzela Xikwembu i mhaka yin’wana; ku kombisa ku tshembeka ku ya fika emakumu hi yin’wana. (Matewu 24:13; Vafilipiya 3:12-14) Yesu a nga ha va a tsundzuke leswi loko a ku: “Swi nga olovela kamela ku nghena hi ntuva wa neleta, ku ri ni leswaku mufuwi a nghena eMfun’weni wa Xikwembu”. (Marka 10:25) Ku hava kamela leyi nga manyulutaka yi nghena hi ximbhovana xa neleta yo rhunga ha yona, kutani swi le rivaleni leswaku Yesu a a tirhisa ku hundzeleta ntiyiso, ku hundzeleta loku ku nga endleriwangiki ku tekiwa ku ri ka xiviri. Hambi swi ri tano, swi komba ndlela leyi swi tikaka ha yona eka mufumi ku endla xanchumu. Yini xana? Hayi ku sungula ku tirhela Xikwembu ntsena, e-e, kambe “ku nghena eMfun’weni,” kahle-kahle ku kuma vutomi lebyi nga heriki. Swi nga khathariseki leswaku u yimise ku yini hi swa timali, ndzayo ya Yesu yi nga pfuna ku anakanya ka wena, nhluvuko wa wena wa moya ni ku kuma ka wena vutomi lebyi nga heriki.
Hikwalaho Ka Yini Swi Tikela Mufumi?
11. Swisiwana ni van’wa-nkumi va khumbekise ku yini hi ku chumayela ka Yesu?
11 Hi ku chumayela loku endliweke hi Yesu ni vaapostola, ‘swisiwana swi byeriwa Mahungu Lamanene.’ (Matewu 11:5) A ku ri hava ku hambanisa eka mufumi. Hambi swi ri tano swi vonaka onge vo tala va swisiwana va xiye xilaveko xa vona xa moya ivi va amukela rungula ra ntshembo. (Matewu 5:3, 6; 9:35, 36) Vayuda lava fumeke a va aneriseke ngopfu hi ndlela leyi swilo a swi famba ha yona. (Ringanisa Luka 6:20, 24, 25.) Hambi swi ri tano, a ku ri ni swivangelo le ndzhaku, naswona ku ni swivangelo namuntlha. Vanhu van’wana lava fumeke va amukela rungula ra Bibele kutani va tirhela Xikwembu. Vuyelo bya vona byi nga va lebyi hlamarisaka. A swi ri tano emhakeni ya Pawulo, loyi a nga xi pfumelelangiki xikhundla xakwe evuton’wini xi n’wi sivela. (Vafilipiya 3:4-8) Hambi swi ri tano, Yesu u vule leswaku a swi ta tika eka mufumi.
“Ku Kanganyisiwa Hi Rifuwo”
12, 13. (a) Exifanisweni, i yinhla yihi leyi Yesu a yi endleke ehenhleni ka mivilelo? (b) Hikwalaho ka yini lava fumeke va kongomana ni xihinga lexi engetelekeke?
12 Exifanisweni xakwe xa timbewu leti welaka eka misava leyi nga faniki, Yesu u vule leswaku tin’wana “ti wela exikarhi ka mitwa; loko mitwa yi kula, yi ti kamanyeta.” U hlamuserile a ku: “Mbewu leyi haxiweke emitweni, swi fana ni loko munhu a twa rito; kambe ku vilela hi swa misava ni ku kanganyisiwa hi rifuwo swi kamanyeta rito, kutani ri tsandzeka ku veka mihandzu.” (Matewu 13:7, 22) Vanhu lava va nga vaka hinkwavo va tokota kun’wana ka “ku vilela hi swa misava.” Swa olova ku vona leswaku hikwalaho ka yini sweswo swi ri tano eka munhu loyi a endliweke xisiwana, loyi a nga thoriwangiki, kumbe la lamaleke. Munhu la nga ni nsirhelelo wa swa timali a nga ha pfumala mivilelo leyi fanaka ni leyi, hambi swi ri tano na yena a nga ha vilerisiwa hi vuyelo bya ku durha ka swilo, ku hundzuka ka ndzuvo, kumbe khombo ra vukhamba. Kutani lava fumeke ni lava nga swisiwana va nga ha va ni mivilelo.—Matewu 6:19-21.
13 Yesu u kombe leswaku van’wana a va ta siveriwa na hi ‘‘ku kanganyisiwa hi rifuwo.” Ku va la humelelaka hi swa timali hinkwaswo swi nga va leswi swi lavaka ku tikarhata. N’wa-timiliyoni Aristotle Onassis u tshama a ku: “Endzhaku ka loko u fikelele yinhla yo karhi, mali a ya ha ri ya nkoka. Lexi xi nga xa nkoka i ku humelela. Nchumu lowukulu wu nga va wa leswaku ndzi tshika sweswi. Kambe ndzi nge swi koti. Ndzi fanele ku hambeta ndzi kunguhata leswi tlakukeke—leswaku ndzi tsaka.” Hi ku fanana, Mukriste a nga kuma swi tsakisa ku tikarhatela lerhi ra ntirhisano. Kumbe a nga kanganyisiwa leswaku a kurisa bindzu rakwe endzhaku ka loko a fikelele leswi eku sunguleni evuton’wini a a ta swi languta swi ri leswi ‘eneleke.’ Ematshan’wini yo hunguta ntirho wakwe (kumbe ku kuma penceni) leswaku a va mutirheli wa nkarhi hinkwawo, u ‘hahlula switolo swakwe (kumbe makaya) ivi a aka leswikulu.’ (Vona Luka 12:15-21.) Xana sweswo swi nga humelela eka wena ke? Xana u anakanya leswaku Xikwembu xi ta languta un’wana ni un’wana loyi a nga eka xiyimo xexo a ri loyi a xi tirheleka hi moya hinkwawo ke?—Matewu 22:37.
14. Leswaku rifuwo ri nga sivela Mukriste swi nga kombisisiwa ku yini? (Swivuriso 28:20)
14 Ka ha ri ni tindlela tin’wana leti rifuwo (kumbe ku navela ku ri kuma) ku nga sivelaka Mukriste ku ‘kuma vutomi lebyi nga heriki’ ha tona. Yin’wana hi leswaku ku rhandza rifuwo ku nga ha n’wi susumetela ku amukela marhengu ya misava, ku fana ni ku vika vuyelo byintsongo kumbe ku tirhisa ku nga tshembeki kun’wana kambe ku ri marhengu lama tolovelekeke. Kumbe loko a thola Vakriste-kulobye lava tshembekaka ni lava va tirhaka hi matimba, a nga ha rhangisa ku pfuneka kakwe ka munhu hi xiyexe emahlweni ka vumoya bya vona. Hi xikombiso, ku endlela ku va khomelela entirhweni wa vona, a nga ha va khutaza ku kurisa mahanyelo lama durhaka swinene (kumbe hambi ku ri ku tinghenisa exikweletini lexikulu). Naswona leswi a nga ndhuna ya vona, xinakulobye lexi xi nga ha vonaka xi nghena eku tirhisaneni ka bandlha.
15. Vakriste vo sungula va nga ha va va twe vuyelo lebyi vavisaka bya rifuwo hi ndlela yihi? (Psalma 73:3-8, 12, 27, 28)
15 Vakriste van’wana lava fumeke eka lembe xidzana ro sungula va nga ha va va ve exikarhi ka lava hlaseriweke hi “ku kanganyisiwa hi rifuwo.” Yakobo u tsale hi ‘mahlomulo lama nga ta wela vavanuna lava fumeke.’ A va ri ni tinguvu to durha, a va tihlengeletele nsuku ni silver hi ku hakela vathoriwa swintsongo, naswona a va hanya emafurheni. (Yakobo 5:1-5) Swa fana ni namuntlha. Rifuwo hakanyingi ri pfumelela munhu ku va ni swakudya ni swakunwa leswi fuweke leswi swi nga ha onhaka miri wa yena. Nakambe ri nga ha n’wi pfumelela ku tsendzeleka nkarhi ni nkarhi leswi swi nga n’wi hambanisaka ni bandlha ra ka vona. A hi vuli swona leswaku mpahla leyinene, swingwavila, swakudya ni ku famba-famba swa onha hi swoxe. Hambi swi ri tano, ‘vavanuna lava fumeke’ lava Yakobo a tsaleke ha vona va pfuniwile hi sweswo; hi vumoya bya vona lebyi nga ehansi ni ku yima emahlweni ka Xikwembu, a va ri ni xivangelo xo ‘rila, va kolola hikwalaho ka mahlomulo lama nga ta va humulela.’
16. Hikwalaho ka yini Yesu a nyikele ndzayo yo tano leyi nga erivaleni hi rifuwo, naswona u fanele ku tivutisa yini?
16 Entiyisweni Yesu a a tiva nhlomulo ni swihinga swa vumoya leswi lava fumeke hakanyingi va swi tokotaka. Nakambe a a swi tiva leswaku leswi swi nga swa ntikelo swi nga ha bola hi ku kongoma kumbe swi hundzuka leswi nga pfuniki nchumu, leswi swi nga ta ka swi nga endleki eka rifuwo ra Mukriste. (Swivuriso 11:28; Marka 10:29, 30) Kutani ke, Yesu a a endla leswaku hinkwerhu ka hina hi va ntirho wa xiviri loko a tsundzuxa a ku: “Swa nonon’hwa ngopfu eka lava nga ni rifuwo ku nghena eMfun’weni wa Xikwembu.” (Luka 18:24) Xitsundzuxo xakwe xi nga hi pfuna hambi loko hi ri ni rifuwo leri pimiweke swinene. Njhani? Hi ku susa ka hina ku navela kwihi na kwihi loku hi nga na kona leswaku hi va lava fumeke sweswi. Vakriste va pfumela leswaku Yesu a a vula ntiyiso. Hi pfumela ni ku hanya hi leswi Yesu a swi vuleke ehenhleni ka Tata wa yena, mayelana ni ku hela ka mafambiselo lawa ya swilo ni ku hlakulela rirhandzu. Nakambe Xivulavuri lexi xa Ntiyiso xi te: “Swi nga olovela kamela ku nghena hi ntuva wa neleta, ku ri ni leswaku mufuwi a nghena eMfun’weni wa matilo.” (Matewu 19:24) Xana wa swi pfumela hakunene sweswo? Xana swiendlo, mahanyelo ni malangutelo ya wena swi kombisa leswaku wa swi pfumela?
Hambeta U Va La Fumeke—Hi Ndlela Ya Xikwembu
17. Vakriste vo tala va tinghenisa enxaxamelweni wa ku va lava fumisiweke hi Yehova hi ndlela yihi?
17 Vumbhoni byi huma emisaveni hinkwayo bya leswaku vunyingi bya malandza ya Xikwembu byi nghenisa ndzayo ya ku fana ni leyi yi kumekaka eka Matewu 19:16-24 embilwini. Vakriste vo tala lavantshwa va tiyimisele leswaku loko va heta mpimo lowu tolovelekeke wa xikolo, va ta phikelela vutirheli bya nkarhi hinkwawo. Vavasati lava va nga endlaka ntirho wa ku tihanyisa leswaku va andzisa muholo wa ndyangu, ematshan’wini ya sweswo, va nyikela nkarhi wa vona wo tala emintirhweni ya Vukriste, va endla vona ni van’wana lava fumeke emoyeni. Hambi va ri vavanuna van’wana lava nga ni vutihlamuleri bya MatsaIwa byo pfuna mindyangu ya vona enyameni va kuma tindlela to hlanganyela hi xitalo evutirhelini.
18, 19. I magoza wahi lawa van’wana lava laveke ku katekisiwa hi Yehova va ma tekeke?
18 Nkulu un’wana loyi a nga exikarhi ka malembe ya va-30 wa pfumela leswaku “ku va mutirheli wa nkarhi hinkwawo hi minkarhi yo tala a ya ri marito lama humaka enon’wini wa mina.” A a hola R50 000 hi lembe, handle ka swona a a hakeleriwa ku lahlekeriwa ka yena a tlhela a tirhisa movha wa feme. Endzhaku u komberiwe ku nyikela nkulumo ya ntsombano wa 1983 leyi nge “Veka Ivi U Fikelela Tipakani Letinene.” U ri: “Loko ndzi ri karhi ndzi hlaya mhaka ya kona hi tinghitsi, ndzi khomiwe hi tingana ni gome ra leswaku ripfalo ra mina a ri ndzi dlaya.” Loko ntsombano wu nga si fika, yena ni nsati wakwe va vulavule hi xiyimo xa vona. Hi ku hatlisa u kume ntirho wa nkarhinyana ivi a tihlanganisa ni nsati wakwe tanihi phayona. Na sweswi va ha phayona, va tsakela mikateko yo tala ya moya.
19 Van’wana va rhurhe etindhawini leti nga ni minkarhi ya timali va ya etindhawini leti va nga ndlandlamuxaka mintirho ya vona ya moya. Mpatswa wa le Canada wu tsarile malunghana ni vuphayona bya wona eLatin Amerika wu ku: “Hambi leswi ku nga ni vusweti lebyikulu laha xikarhi ka vamakwerhu, va ni ku hisekela ntiyiso loku hlamarisaka. Va nga ha va swisiwana hi ndlela ya misava, kambe emoyeni i van’wa-timiliyoni. Hi ni vahuweleri va 38, 10 wa vona i maphayona ya nkarhi hinkwawo. Minhlangano leyi phindhiwaka i ya nkoka hikuva ku ni vo tala lava vaka kona—ku sukela eka nhlayo-xikarhi ya 110 ku ya eka 140. Vakulu vambirhi ni malandza manharhu ya vutirheli va fanele ku khathalela minhlangano leyi hinkwayo. Hi tlhela hi dyondza eka vamakwerhu lava titsongahataka laha leswi swi vulaka swona ku rhangisa Yehova evuton’wini bya hina. Va hi komba leswaku Yehova a nga tirheriwa hi moya hinkwawo ku nga khathariseki leswi swiyimo swa hina swi nga ha va ka swona.”
20. Hi fanele ku titwisa ku yini etimbilwini ta hina hi ku va lava fumeke enyameni?
20 Vakriste vo tano va hava xivangelo lexi tiyeke xo venga munhu la fumeke, hambi a ri handle kumbe endzeni ka bandlha, kumbe ku khomeka ngopfu hi ku navela rifuwo. Va swi vona leswaku mali yo karhi ya laveka leswaku ku hanyiwa vutomi lebyi tolovelekeke. (Eklesiasta 5:3; 7:12) Kambe va tlhela va tlangela leswaku Yesu u vule ntiyiso—lava fumeke va kongomana ni swihinga swo tala swa moya, mintlhontlho ni makhombo. Ntlhontlho wun’wana lowu tikaka i wa ‘lava nga ni rifuwo ra misava leyi, leswaku va nga tikhorwisi, kumbe ku veka ku tshemba ka vona erifuweni leri nga tiyangiki, kambe va veka ku tshemba ka vona eka Xikwembu.’—1 Timotiya 6:17.
21. Vuyelo bya lava phikelelaka rifuwo ra moya hi byihi?
21 Lexi khomisaka gome, mufumi lontshwa loyi a vulavuleke na Yesu u hluleke ku hlangavetana ni mphikamakaneta leyi. Van’wana lava fanaka na yena va tirhele Xikwembu nkarhinyana kambe endzhaku va karhatiwa hi mahlomulo ni ku hluleka ka moya loku fambisanaka ni rifuwo ra vona. Hi laha ku hambaneke ku ni timiliyoni ta Vakriste lava tshembekaka lava hambetaka va kombisa leswaku “mikateko ya Yehova yi fuwisa munhu, a nga ṅwi engeteli mikaralo.” (Swivuriso 10:22) Vutomi bya vona byi na xikongomelo; va ni tipakani ta nkoka ni ku titwa ka ntirho. Mintirho ya vona leyinene yi ta tshama hi laha ku nga heriki, yi va nyika ntsako lowukulu sweswi ni le nkarhini lowu taka. Un’wana ni un’wana wa hina a a tikarhatele ku va la fumeke hi ndlela yoleyo.—Vafilipiya 4:1; 1 Vatesalonika 2:19, 20.
Mianakanyo Yo Yi Xiyisisa
◻ I rifuwo ra njhani leri vuriwaka eka Swivuriso 10:22?
◻ Yinhla ya nhlamuselo ya Yesu malunghana ni wanuna la fumeke ni kamela a yi ri yihi?
◻ Hikwalaho ka yini vutomi hakanyingi byi nonon’hwa swinene eka lava fumeke?
◻ Hi nga tikarhaterisa ku yini ku va lava fumeke hi ndlela ya Xikwembu?
[Bokisi eka tluka 10]
Rifuwo ni Ndyangu
LOKO u anakanya hi vuyelo lebyikulu bya rifuwo, u nga honisi ndyangu wa wena. Xiya timhaka leti:
Le Canada ku ta xiviko lexi humaka eka ntlhari leyi dyondzeke vana van’wa-nkumi: “Vutomi bya va phirwa. Va hava tipakani handle ko titsakisa naswona a va swikoti ku amukela na hambi ku ri ku vaviseka kuntsongo. Va twa minsusumeto yi nga ri yingani ya muxaka wihi na wihi. Tipakani-nkulu ta vona i ku xava swilo, ku tsendzeleka ni ku lavisisa swihlovo leswintshwa swo titsakisa.”
The New York Times yi vulavule hi khale ka n’wa-timiliyoni yi ku: “Loko a rl karhl a humelela swinene ebindzwini ivi a kuma rifuwo, u vula leswaku u vone ndyangu wakwe wu hundzuka. Nsati wa mina ni n’wana wa mina a va avanyisa vanhu hi mali leyi ava ri na yona, kutani loko ndzi nyike n’wana un’we kaya ra [R600 000] a ndzi fanele ku nyika ni lowun’wana [R600 000] ya khexe.” Endzhaku ko hlaseriwa hi mbilu, ni ku vona leswi rifuwo ri swi endlaka eka nsati ni vana va yena,u hundzule mahanyelo yakwe.
Mayelana ni tiko leri fuweke hi mafurha eMiddle East, Arnold Hottinger u te: ‘Rifuwo ni ntivo-mavabyi i nchumu lowu tolovekeke eka madokodela yo tala lama nga valuveri lama teke laha ku ta hola miholo leyi tlakukeke. Va ri ku hava laha mavabyi ya hava ya taleke ku tala ku fana ni laha—mavabyi lama vangaka hi ku vaviseka ka ntiyiso kambe ya nga vangiwi hi xikombiso xa ku hluleka ko karhi ka swirho swa miri. Va ri ku ni vanhu lavantshwa lava nyikaka xikombiso xin’wana ni xin’wana xa ku va lavakulu, ni vanhu lavakulu lava hanyaka ku fana ni lavantsongo.